Y sẽn tõe n wʋm Biiblã goam võor to-to

1. Kos-y biiblã soab sõngre

Itali pag a ye yʋʋr sẽn boond t’a Ninfa yeela woto: “Sasa n da zĩnd tɩ mam da karemd Biiblã yʋng fãa n yaool n gãande. Mam sẽn da maand woto wã yaa tɩ m miime tɩ Biiblã yaa Wẽnnaam Gomde, la baa m sẽn da pa nong sɛb karengã, m da rat n bãnga Wẽnnaam goamã sẽn be Biiblã pʋgã. Mam da rat n karma a gillã. Sɩngrẽ wã, karengã ra yaa nana, la mam wa n karem n ta a zĩis kẽer n mik tɩ wʋmbã yaa toogo, tɩ m kell n base.”

YÃMB me maana wa a Ninfa bɩ? Yɩɩ woto ne neb wʋsgo. La wa d sẽn yã sõsg ning sẽn loogã pʋgẽ wã, Wẽnnaam a Zeova sẽn yaa Biiblã soabã ratame tɩ y wʋm a Gomdã võore. La bõe la y na n maan n tõog n wʋme? Pipi, y segd n kosa Biiblã soab t’a sõng-yã.

B ra geta a Zezi karen-biisã wa “nin-tals sẽn ka paam zãmsgo,” b sẽn pa karem tũudmã karen-saam dãmb b sẽn da boond tɩ rabẽ rãmbã lekoll dãmbẽ wã yĩnga. (Tʋʋma 4:13) La baasgo, a Zezi yeela a karen-biisã vẽeneg tɩ b tõe n wʋma Biiblã goam võore. Bõe n da na n sõng-ba? A Zezi yeel-b-la woto: “Sõngda sẽn yaa Sɩɩg sõngo, m Ba sẽn na n tʋm ne mam yʋʋrã na n zãmsa yãmb bũmb fãa.” (Zã 14:26) Yaa ne vʋʋsem sõng kãngã, rat n yeel tɩ ne pãng ning Wẽnnaam sẽn tar n tʋmdẽ wã la a naan tẽngã la bũmb nins fãa sẽn be a zugã. (Sɩngre 1:2) Leb n yaa ne a vʋʋsem sõngã maasem la a kɩt tɩ sẽn na maan neb 40 gʋls a tagsa wã Biiblã pʋgẽ. (2 Pɩɛɛr 1:20, 21) Yaa ne a vʋʋsem sõng-kãng la a sõngd neb nins fãa sẽn dat n wʋm Biiblã goam võorã.

La wãn to la ned paamd vʋʋsem sõngã? Y segd n pʋʋsa Wẽnnaam n kos-a ne tẽebo. La y segd n pẽdga ne kosgo. Sɩd me, a Zezi yeela woto: “Ket-y n kotẽ, la b na n kõo yãmba. A sã n yaa woto tɩ yãmb . . . bãng tɩ kõ yãmb kambã kũun sẽn yaa sõma; dẽ, sẽn yɩɩda, yãmb saasẽ Ba kõn kõ neb nins sẽn kot bãmbã Sɩɩg sõng bɩ?” (Luk 11:9, 13, NW ) A Zeova na n sak n kõ a vʋʋsem sõngã neb nins sẽn kot-a ne b sũy fãa wã. Yaa a pãn-kãngã n na n sõng-y tɩ y wʋm a goamã sẽn be Biiblã pʋgẽ hal na maan yʋʋm tusa wã võore. Wẽnnaam vʋʋsem sõngã tõe n sõng-y lame me tɩ y bãng y sẽn na n tũ a goamã sẽn tar pãngã to-to.—Hebre dãmba 4:12; Zak 1:5, 6.

Woto yĩnga, y sã n wa zĩnd n na n karem Biiblã fãa, bɩ y pʋʋs Wẽnnaam n kos-a a vʋʋsem sõngã, tɩ sõng-y tɩ y wʋm a Gomdã goam võore.