Kamoo o ka Kwešišago Beibele ka Gona

1. Kgopela Mongwadi Thušo

Ninfa, yo a dulago Italia, o anega ka gore: “Go kile gwa ba le nako yeo ka yona ke bego ke bala Beibele pele ke robala. Ke be ke dira bjalo ka gobane ke tseba gore ke Lentšu la Modimo, gomme gaešita le ge ke be ke sa thabele go e bala, ke be ke nyaka go tseba seo Modimo a se ngwadilego ka Beibeleng. Ke be ke ikemišeditše go e bala ka moka ga yona. Ge ke be ke e thoma e be e le bonolo, eupša ke ile ka fihla dikarolong tšeo di bego di nthatafalela, gomme ke ile ka kgaotša go e bala”

NA O na le phihlelo e swanago le ya Ninfa? Ba bantši ba na le yona. Lega go le bjalo, bjalo ka ge re bone sehlogong se se fetilego, Mongwadi wa Beibele, Jehofa Modimo, o nyaka gore re kwešiše Lentšu la gagwe. Bjale, o ka hwetša kwešišo e bjalo bjang? Mogato wa pele ke go kgopela Mongwadi thušo.

Baapostola ba Jesu ba be ba lebelelwa e le “ba sa rutegago le ba tlwaelegilego” ka gobane ba be ba se ba ya dikolong tša bo-rabi bakeng sa tlwaetšo ya bodumedi. (Ditiro 4:13) Lega go le bjalo, Jesu o ile a ba kgonthišetša gore ba be ba ka kgona go kwešiša Lentšu la Modimo. Go bjalo bjang? Jesu o hlalositše ka gore: “Mothuši, e lego moya o mokgethwa woo Tate a tlago go o roma ka leina la-ka, o tla le ruta tšohle.” (Johane 14:26) Modimo o dirišitše moya o mokgethwa, goba matla a šomago, go hlola lefase le diphedi ka moka tšeo di lego go tšona. (Genesi 1:2) O ile a ba a o diriša go budulela bangwadi ba 40 gore ba bege dikgopolo tša gagwe  ka Beibeleng. (2 Petro 1:20, 21) Moya wona woo o a hwetšagala bakeng sa go thuša bao ba nyakago go kwešiša Beibele.

O ka hwetša moya o mokgethwa wa Modimo bjang? O swanetše go o kgopela ka tumelo. Ge e le gabotse, o ka swanelwa ke go o kgopela ka go se kgaotše. Jesu o itše: “Tšwelang pele le kgopela, gomme le tla newa. Ge e ba lena . . . le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:9, 13) Batho bao ba kgopelago moya o mokgethwa ka potego, Jehofa o ikemišeditše go ba nea wona. Matla a ao a šomago a ka go thuša go kwešiša se se bolelwago ke mantšu a buduletšwego a ngwadilwego ka Beibeleng nywaga e dikete e fetilego. Moya wa Modimo gape o ka go nea bohlale bjo bo nyakegago bja kamoo o ka dirišago molaetša o matla wa Beibele bophelong bja gago.—Baheberu 4:12; Jakobo 1:5, 6.

Ka baka leo, nako le nako ge o bala Beibele, rapela Modimo gomme o mo kgopele moya o mokgethwa gore o go thuše go kwešiša Lentšu la gagwe.