A Ninfa er a Italy a kmo: “Ak mle blechoel el menguiu er a Biblia er a uchei er a bo kmechiuaiu. Ak mirruul el uaisei e le ak mle medengei el kmo a Biblia a Tekingel a Dios. Me alta e ngdimlak semeriar el menguiu er ngii, engdi ngmle soak el mo medengei a Tekingel a Dios el llechukl er a Biblia. Ak millatk el mo menguiu er ngii el rokir. Me ngkora mle beot a omengiuel er a uchelel, engdi ngmlo diak kunguiu er ngii e le ngkmal mlo meringel er ngak el mo medengelii.”

KAU ke dirrek el uaisei el meringel er kau el mo medengelii a Biblia? Te betok el chad a uai kau. Engdi ngsebeched el mesang er sel mlo merek el suobel el kmo a Jehovah el Dios a soal a bo dodengelii a Tekingel el Biblia. Engdi kede mekerang e mo nguu tia el klemedengei? A kot, e ngkired el olengit a ngeso er a Dios.

A rechad a ulemes er a rulebengkel a Jesus el kmo te “diak a skulir, el uar di chad,” e le ngdimlak el tobed er aike el skuul el olsisechakl a tekoi er a klechelid. (Rellir 4:13) A Jesus a dilu er tir el kmo ngsebechir el mo medengelii a Tekingel a Dios. El oeak a ngera el rolel? Ngmilsaod er ngii el kmo a ongeseu el chedaol el reng el mlodurech er a Chedam a mo olisechakl er tir a rokui el tekoi e omeklatk er tir er aike el dilu er tir. (Johanes 14:26) A Dios a uluusbech er tia el chedaol el reng er ngii me a lechub e ngklisichel, el omeob er a beluulechad me aike el rokui el ngar er a chelsel. (Genesis 1:2) Ngdirrek el uluusbech er ngii el omekrael er tirke el bekord el 40 el chad el mo meluches a uldesuel el ngar er a Biblia. (2 Petrus 1:20, 21) Me tia el osisiu el klisiich a sebechel el ngosuterir tirke el sorir el mo medengelii a Biblia.

Kede mekerang e sebeched el nguu a chedaol el reng er a Dios? Ngkired el blechoel el olengit er ngii el oba klaumerang. A Jesus a milsaod el kmo a dolengit er a chedaol el reng er a Chedam e ngmo meskid el di ua ungil chedam el lomesterir a rengelekel aike el ousbech. (Lukas 11:9, 13) A Jehovah a kongei el mesterir a chedaol el reng tirke el olengit er ngii. Tia el klisichel a Dios a sebechel el ngosukid el mo omtab a belkul a mlukreng el tekingel el melluches er a Biblia er a betok el telael el rak er a uchei. A chedaol el reng er a Dios a sebechel el ngosukid el mo oltaut a mesisiich el tekingel er a chelsel a klengar er kid.​—Hebru 4:12; Jakobus 1:5, 6.

Me a bek el taem el donguiu er a Biblia, e ngkired el meluluuch el mo er a Dios el olengit er a chedaol el reng er ngii me lengesukid el mo medengelii a Tekingel.