Bibliata entiendenapaq yanapakuykuna

1. Diostam mañakuna

Italia nacionpi yachaq Ninfam nin: “Pasaq watakunapiqa manaraq puñuchkaspaymi Bibliata leeq karqani. Yacharqanim Diospa palabran kasqanta hinaspam munarqani ima nisqanmanta yachayta. Chaymi, leeyta mana gustachkaspaypas tukunaykama leenaypaq tanteakururqani. Allinta qallarichkaspaymi sasa entiendena kaqkunaman chayaruspay hukmanyaruspay saqerurqani”, nispa.

KAYQA manamá Ninfallatachu pasan, hukkunatapas chaynam pasan. Yachamusqanchikman hinaqa, Biblia qellqachiq Jehová Diosninchikqa munanmi Bibliata llapallanchik entiendenanchikta. Hinaptinqa, ¿imaynatam entiendeyta atichwan? Chaypaqqa puntatam oracionpi yanapakuyninta mañakunanchik.

Qawasunchik Jesuspa apostolninkunapa ejemplonta. Paykunaqa Diosmanta yachanankupaqqa manam rirqakuchu reqsisqa escuelakunamanqa, chaymi paykunata runakuna nirqaku “mana ancha educacionniyoq kasqankuta” (Hechos 4:13). Chaywanpas Diospa yachachikuynintaqa entienderqakum. ¿Imanasqataq chaynata ninchik? Jesuspa kayna nisqanraykum, paymi nirqa: “Taytam Chuya Espirituta ñoqapa sutiypi kachamunqa qamkunata [. . .] yachachisu[naykichikpaq]”, nispa (Juan 14:26). Chuya espirituqa Diospa atiyninmi, chay atiyninwanmi tukuy imata unancharqa (Genesis 1:2). Chay atiyninwantaqmi Bibliatapas 40 runakunawan qellqachirqa (2 Pedro 1:20, 21). Chay atiynintataqmi Diosqa qon Palabranta entiendey munaqkunamanpas.

Chay atiyninta Dios qowananchikpaqqa iñiywanmi mañakunanchik, ichapas achka kutitaraq. Jesusmi nirqa: “[Hinalla] mañakuptikichikqa Diosqa qosunkichikmi”, nispa. Nirqataqmi: ‘Qamkunaqa [. . .] churikichikmanqa allin kaqkunatam qonkichik, ¿chaychu mañakuqkunamanqa hanaq pachapi kaq Taytaykichik mana qosunkichikman chuya espirituta?’, nispa (Lucas 11:9, 13). Arí, Jehová Diosqa chuya espirituntaqa qonmi sonqomanta mañakuqkunamanqa. Chuya espiritunqa, ¿imaynatam yanapawasun? Puntatam yanapawasun Bibliapa yachachikuyninta allinta entiendenapaq. Yachaytapas qowasunchiktaqmi Bibliapa consejonkunata kasukunanchikpaqpas (Hebreos 4:12; Santiago 1:5, 6).

Chaynaqa, sapa kuti Bibliata leespaykiqa, Jehová Diostayá mañakuy chuya espiritunwan entiendenaykipaq.