Baʼax jeʼel u yáantkoʼon k-naʼat le Bibliaoʼ

1. Kʼáat u yáantaj le máax beet u tsʼíibtaʼaloʼ

Ninfa, utúul koʼolel kajaʼan Italiaeʼ, ku yaʼalik: «Kaʼacheʼ suuk in xokik le Biblia táanil tiʼ in weenloʼ. In wojel upʼéel libro tiʼ Dios u taal yéetel in kʼáat in wojéelt baʼax ku yaʼalik. Le oʼolaleʼ kex maʼ jach utstintʼaan in xookeʼ, tin chʼaʼatuklaj in láaj xokik. Ka kaajeʼ jatsʼuts in wilik, baʼaleʼ ka kʼuch in xook tiʼ jujumpʼéel jaatsoʼob talam u naʼataʼaleʼ tin xulaj in xokik».

LE BAʼAX úuch tiʼ Ninfaoʼ, tiʼ yaʼab máakoʼob bey xan u yúuchloʼ. Baʼaleʼ jeʼex t-ilaj teʼ xook máanikoʼ, Jéeoba Dios, le máax beet u tsʼíibtaʼaloʼ u kʼáat ka naʼataʼak tumen tuláakal máak. ¿Bix jeʼel u páajtal k-beetkeʼ? Yáaxeʼ kʼaʼabéet k-kʼáatik u yáantaj.

Koʼox ilik bix tu beetil u apostoloʼob Jesús. Letiʼobeʼ maʼ binoʼob tiʼ escuelaʼob tuʼux ku kaʼansaʼal baʼax u kʼáat u yaʼal u tʼaaniloʼob le Bibliaoʼ, le oʼolal kʼaj óoltaʼaboʼob bey máaxoʼob «maʼ xooknajaʼanoʼobiʼ bey xan chéen ichil meyajil máakoʼob u taaloʼob» (Beetaʼanoʼob [Hechos] 4:13). Baʼaleʼ leloʼ maʼ tu beetaj maʼ u naʼatikoʼob le baʼax ku yaʼalik le Bibliaoʼ. ¿Baʼaxten k-aʼalik beyaʼ? Tumen Jesuseʼ tu yaʼalajtiʼob: «Le [espíritu santo] kun u túuxt le Taata tin kʼaabaʼoʼ, [...] letiʼ kun u kaʼans teʼex tuláakal baʼal» (Juan 14:26). Le espíritu santoaʼ letiʼe meyajnaj tiʼ Dios utiaʼal u beetik tuláakal le baʼaxoʼob yaan way Luʼumeʼ (Génesis 1:2). Lelaʼ le xan meyajnajtiʼ utiaʼal u beetik u tsʼíibtaʼal le Biblia tumen 40 máakoʼoboʼ (2 Pedro 1:20, 21). Lelaʼ letiʼe ku tsʼáaik xan Jéeoba Dios tiʼ le máaxoʼob u kʼáat u naʼatoʼob le Bibliaoʼ.

Utiaʼal ka u tsʼáatoʼon u espíritu santoeʼ, kʼaʼabéet yantoʼon fe ken k-kʼáat tiʼ. Lelaʼ maʼ chéen utéen ken unaj k-kʼáatkiʼ. Jesuseʼ tu yaʼalaj: «Kʼáatneneʼex, bíin tsʼaʼabakteʼex». Tsʼoʼoleʼ tu yaʼalaj xan: «Bey túunoʼ wa teʼex, kex kʼaakʼas máakeʼex, a wojel a tsʼaʼex maʼalob baʼaloʼob tiʼ a paalaleʼexeʼ, jach tu jaajil a Taataʼex yaan teʼ kaʼanoʼ bíin u tsʼáa le [espíritu santo] tiʼ le máaxoʼob kʼáatik tiʼeʼ» (Lucas 11:9, 13). Jeʼex túun k-ilkoʼ Jéeobaeʼ ku tsʼáaik u espíritu santo tiʼ le máax kʼáatik yéetel tuláakal u puksiʼikʼaloʼ. ¿Bix túun ken u yáantiloʼon? Yáaxeʼ yaan u yáantkoʼon k-naʼat tubeel le baʼaxoʼob úuch tsʼíibtaʼak teʼ Bibliaoʼ. Yéetel yaan xan u tsʼáaiktoʼon le naʼat kʼaʼabéetoʼon utiaʼal k-tsʼáaik ichil k-kuxtal le baʼax ku yaʼalikoʼ (Hebreob 4:12; Santiago 1:5, 6).

Le oʼolaleʼ cada ken a xok le Bibliaoʼ maʼalob ka a kʼáat u espíritu santo Dios utiaʼal ka u yáantech a naʼate.