Kun Paano Nindo Masasabotan an Biblia

2. Magbasa na May Bukas na Isip

May katood daw kamo na nagsabi sa saindo nin negatibong mga bagay manongod sa sarong tawo na dai pa nindo nakabisto? Kan makabisto na nindo an tawong iyan, an mga sinabi daw kan katood nindo nakaapektar sa saindong kakayahan na maheling an mga abilidad asin marahay na mga kualidad kan tawong iyan? Puede man na mangyari iyan kun dapit sa Biblia.

SI APOSTOL Pablo nagpatanid dapit sa puedeng mangyari kun dai niato babasahon an Biblia na may bukas na isip. Mapadapit sa nagkapirang Judio kan panahon ni Pablo, sia nagsurat: “Ako nagpapatotoo na igwa sinda nin kaigotan para sa Dios; alagad bakong oyon sa tamang kaaraman.”​—⁠Roma 10:⁠2.

An nagkapira sa mga Judiong iyan kan enot na siglo habong akoon an sarong katotoohan na  malinaw na ihinahayag kan Hebreong Kasuratan: na si Jesus an Mesiyas. Yaon ki Jesus na taga Nazaret an lambang kahagadan na sono sa Kasuratan, asin sia an nakaotob kan lambang hula. Pero, an depisil bagohon asin dati nang nasa isip na mga ideya nakaolang sa dakol sa mga kahimanwa nia na masabotan an Tataramon nin Dios.

Ano an manonodan niato sa pagkasaysay na iyan? Mahalaga na basahon an Biblia na may bukas na isip. An daing binabasaran na paghusgar o dati nang nasa isip na mga ideya makakaolang sa nagbabasa na masabotan an katotoohan sa Biblia.

Halimbawa, segun sa sarong propesor nin pag-adal sa relihion sa North Carolina, E.U.A., an Biblia “sarong libro na tawo man sana an nagsurat asin pagmansay man sana nin tawo an laog kaiyan, na an dakol kaiyan magkakalaen asin mayo sa mga iyan an nagtatao kan tamang giya kun paano kita maninigong mamuhay.” Kun babasahon nin saro an Biblia bilang “sarong libro na tawo man sana an nagsurat,” bako daw na puedeng magkaigwa sia nin tendensia na dai akoon an paggiya o mga prinsipyo na dai nia gusto?

Sa kabaliktaran, dinadagka kita kan Biblia na maigot na pag-adalan iyan. Mapadapit sa mga taga Berea kan panahon ni Pablo, an Kasuratan nagsasabi: “Inako ninda an tataramon na igwa nin dakulaon na pagmawot nin isip, na maingat na sinisiyasat an Kasuratan aroaldaw kun baga an mga bagay na ini iyo man nanggad.” (Gibo 17:11) Arog kan mga nagbabasa na idto, tibaad kaipuhan nindong haleon an ano man na bakong makatanosan na paghusgar o pagkritika na posibleng makaolang sa saindong pagsabot. Basahon an Tataramon nin Dios na may bukas na isip asin makosog na pagmawot na maaraman an nakakaogmang marhay na mensahe kan Autor kaiyan.