Ifyo Mwingacita pa Kumfwikisha Ifyaba mu Baibolo

2. Pa Kubelenga, Muleba no Mutima wa Kusambilila

Bushe kwali inshita imo ilyo cibusa wenu amwebelepo ifintu fimo ifyabipa pa muntu uo mushaishibe? Lintu mwaishileishibana no yo muntu, bushe filya cibusa wenu amwebele fyalengele ukuti mufilwe ukumona ubusuma muli ulya muntu ne mibele yakwe iisuma? E cingacitika na kuli Baibolo.

UMUTUMWA Paulo alitusokele pa cingacitika nga ca kutila tatukwete umutima wa kusambilila ilyo tulebelenga Baibolo. Ilyo alelanda pa baYuda bamo abaliko mu nshiku shakwe, Paulo atile: “Nababela inte nati ukupimpa kwa kubombela Lesa kwena balikwata; lelo te kupimpa ukwalingana no kwishiba kwine kwine.”—Abena Roma 10:2.

 Bamo abaYuda abaliko mu nshita ya batumwa, balikeene ukusumina ukuti Yesu e wali Mesia nangu ca kutila Amalembo ya ciHebere yalilondolwele bwino bwino ukuti e wali Mesia. Fyonse ifyo Amalembo ya ciHebere yalandile pali Yesu wa ku Nasarete fyalifikilishiwe muli Yesu kabili na masesemo yonse yalifikilishiwe muli ena. Nomba, pa mulandu wa kuti abengi balemona ukuti Yesu te kuti abe Mesia, balifililwe ukusumina ifyo Icebo ca kwa Lesa calelanda.

Finshi twingasambilila kuli ili lyashi lyaba mu Baibolo? Tulesambililako ukuti calicindama ukuba no mutima wa kusambilila ilyo tulebelenga Baibolo. Ukukakatila fye ku fyo tuletontonkanya kuti kwalenga twafilwa ukumfwikisha icine icaba mu Baibolo.

Ica kumwenako fye, umwaume umo uwasambilila sana ifya mapepo uwa ku North Carolina, ku U.S.A., alandile ukuti Baibolo “bantu fye balembele, kabili mwaba fye amano ya bantu, e lyo ifyebo fyabamo filapilikana kabili te kuti fitwafwe nangu ukututungulula mu mikalile.” Nga ca kutila umuntu atontonkanya ukuti abalembele Baibolo bantu fye, te Lesa iyo, bushe batini kuti asumina ukukonka amafunde ayabamo no kupanda amano kwa iko nga ca kutila ifyo alebelenga te fyo alefwaya ukumfwa?

Nomba Baibolo itukoselesha ukuba no mukoosha wa kuisambilila. Baibolo ilanda pa bena Berea abaliko mu nshiku sha kwa Paulo ukuti: “Bena imitima yabo yafwaishe nga nshi ukupokelela amashiwi ya kwa Lesa. Balefwailisha mu Malembo cila bushiku pa kuti bashininkishe nga ca kutila ifi fintu fya cine.” (Imilimo 17:11) Ilyo mulebelenga Baibolo, na imwe bene mufwile ukuba no mutima wa kufwaya ukusambilila nga filya fyali abena Berea. Mulefwaisha ukwishiba ifyebo na fimbi ifisuma ifyo Lesa, uwatupeela Baibolo, afwaya ukuti mwishibe.