?Yu Mas Mekem Wanem Blong Kasem Save Long Baebol?

 2. Ridim Baebol Wetem Tingting We i Open

Maet samtaem wan fren blong yu i bin talem sam nogud samting long yu long saed blong wan man we yu neva mitim hem. Ale, wan dei yu yu gat janis blong mitim man ya. ?Olsem wanem? ?Yu faenem se ol nogud samting we fren blong yu i talem oli kam fulap long tingting blong yu, nao yu no luksave ol gudfala fasin blong man ya? Sem samting i save hapen long saed blong Baebol.

APOSOL Pol i givim woning long saed blong samting we i save hapen sipos yumi no ridim Baebol wetem tingting we i open. Long wan leta blong Pol, hem i tokbaot sam man Jiu long taem blong hem, i se: “Mi mi mas talemaot wan gudfala poen blong olgeta, se olgeta ya oli strong blong mekem wosip long God. Be wosip blong olgeta i no stanap long stret save.”—Rom 10:2, NW.

Sam long ol man Jiu long faswan handred yia oli no wantem bilif long ol trufala tok blong ol Hibru hanraet blong Baebol, we oli soemaot hu ya Mesaea. Evri samting we Baebol i talem mo evri profet tok long saed blong Mesaea, oli kamtru fulwan long Jisas blong Nasaret. Be sam nogud tingting we ol manples blong Jisas oli holemtaet longtaem finis i kam, i blokem plante long olgeta blong oli no kasem save long Tok blong God.

?Stori blong olgeta i tijim yumi long wanem samting? Hem i tijim yumi se i impoten blong ridim Baebol wetem tingting we i open. Sipos man we i ridim Baebol i gat tingting we i agens, no i gat sam rong tingting we hem i holemtaet, samting ya i save blokem hem blong i no kasem save long trutok blong Baebol.

Tingbaot tok blong wan man we i tijim ol save long saed blong jos long Not Karolina, Yunaeted Stet. Hem i talem se Baebol i “wan buk blong man nomo, we i fulap long ol tingting blong man, plante long ol tingting ya oli defdefren, mo i no gat wan long olgeta we i save lidimgud yumi long laef.” Nao sipos wan man i ridim Baebol wetem tingting ya se Baebol i “wan buk blong man nomo,” ating bambae hem i sakemaot ol advaes mo rul we hem wan i no laekem.

Baebol i talem samting we i defren long tingting blong man ya. Baebol i pulum yumi blong stadi gud long ol tok blong hem. Long saed blong ol man Berea long taem blong Pol, Baebol i talem se: “Oli wantem tumas blong harem tok blong tufala, mo evri dei, oli stap ridimgud ol tok blong Baebol, blong faenemaot se ol tok blong tufala i tru no i no tru.” (Ol Wok 17:11) Maet yu mas mekem sem mak olsem ol man Berea, mo sakemaot enikaen tingting we i agens mo we i save blokem yu blong yu no kasem save long Baebol. Ridim Tok blong God wetem tingting we i open. Yu mas wantem tumas blong faenemaot ol nambawan tingting we God i wantem talem long ol man.