Bɔ ni Ooofee Onu Biblia lɛ Shishi

2. Okɛ Jwɛŋmɔ Ni Ja Akane

Ani onaanyo ko ekɛɛ bo mɔ ko ni oleee lɛ lɛ he saji gbohii pɛŋ? Beni okɛ mɔ lɛ kpe klɛŋklɛŋ kwraa lɛ, ekolɛ nɔ ni onaanyo lɛ kɛɛ bo yɛ mɔ lɛ he lɛ haaa ona mɔ lɛ nyɛmɔi kɛ esui kpakpai lɛ jogbaŋŋ! Nɔ ko tamɔ nakai baanyɛ aba yɛ Biblia lɛ gbɛfaŋ.

BƆFO Paulo bɔ kɔkɔ yɛ nɔ ni baanyɛ aba kɛ́ wɔkɛ jwɛŋmɔ ni ja kaneee Biblia lɛ he. Paulo ŋma kɛkɔ Yudafoi komɛi ni hi shi yɛ ebeaŋ lɛ ahe akɛ: “Miiye amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee [anɔkwa] nilee naa.”—Romabii 10:2.

Yudafoi ni hi shi yɛ klɛŋklɛŋ afii 100 lɛ mli lɛ ateŋ mɛi komɛi sumɔɔɔ ni amɛkpɛlɛɔ anɔkwa sane ni Hebri Ŋmalɛi lɛ ejie lɛ kpo faŋŋ lɛ nɔ: no ji, mɔ ni ji Mesia lɛ. Anaa nɔ fɛɛ nɔ ni Ŋmalɛi lɛ wie akɛ no baakadi Mesia lɛ yɛ Yesu ni jɛ Nazaret lɛ he, ni agbɛnɛ hu, gbalɛi fɛɛ ni kɔɔ Mesia lɛ he lɛ ba mli yɛ enɔ. Shi susumɔi ni Yudafoi ni hi shi yɛ Yesu beaŋ lɛ ateŋ mɛi babaoo hiɛ ni amɛŋmɔ amɛyiŋ kpɔ yɛ he lɛ haaa amɛnyɛ amɛnu Nyɔŋmɔ Wiemɔ lɛ shishi.

Mɛni wɔbaanyɛ wɔkase kɛjɛ amaniɛbɔɔ nɛɛ mli? Ehe miihia ni wɔkɛ jwɛŋmɔ ni ja akane Biblia lɛ. Kɛ́ Biblia kanelɔ ko ha jwɛŋmɔ ni ejaaa loo susumɔ ko ni eyɔɔ momo lɛ ná enɔ hewalɛ lɛ, no haŋ enyɛ enu Biblia mli anɔkwalei lɛ ashishi.

Ákɛ nɔkwɛmɔnɔ lɛ, Nyɔŋmɔjamɔ he nilelɔ kpanaa ko ni yɔɔ North Carolina yɛ U.S.A. lɛ wie Biblia lɛ he akɛ, eji “adesai awolo ŋmiiŋmi, adesai asusumɔi eyi mli obɔ, susumɔi nɛɛ ateŋ babaoo kɛ amɛhe kpãaa gbee, ni amɛteŋ ekome folo po bɛ ni kɛ gbɛtsɔɔmɔ ni ja kɛha shihilɛ haa.” Kɛ́ mɔ ko kane Biblia lɛ akɛ “adesai awolo ŋmiiŋmi” lɛ, ekã shi faŋŋ akɛ ebaakpoo emli gbɛtsɔɔmɔi loo shishitoo mlai ni ekɛkpãaa gbee lɛ, aloo jeee nakai?

Nɔ ni tamɔɔɔ nakai lɛ, Biblia lɛ woɔ wɔ hewalɛ ni wɔkase emli wiemɔi lɛ jogbaŋŋ. Ŋmalɛi lɛ wie Beroiabii ni hi shi yɛ Paulo beaŋ lɛ  ahe akɛ: “Amɛjie amɛyitsoŋ amɛmɔ wiemɔ lɛ mli, ni daa amɛkpaa ŋmalɛi lɛ amli amɛkwɛɔ akɛ nibii nɛɛ yɛ mli nakai lo.” (Bɔfoi lɛ Asaji 17:11) Taakɛ Beroiabii lɛ fee lɛ, esa akɛ okɛ jwɛŋmɔ ni ja akane Biblia lɛ. Jiemɔ oyitsoŋ ni okɛ jwɛŋmɔ ni ja akane Nyɔŋmɔ Wiemɔ lɛ, koni ona Nyɔŋmɔ shɛɛ saji ni haa mɔ náa miishɛɛ waa ni yɔɔ mli lɛ.—w09 07/01-E.