Qanoq ilillutit Biibilimik paasinnissinnaasutit

2. Isummereernak atuarit

Ikinngutivit arlaata inuk naapissimanngisaannakkat pillugu ajortumik oqaluttuunnikuuaatit? Taanna kiisami naapikkakku qanoq pisoqarpa? Ikinngutivit oqaasii pissutigalugit taassuma pissusii ajunngitsut takujuminaatsippigit? Biibilimut isiginnittaatsitsinnut tunngatillugu tamatumunnga assingusumik pisoqarsinnaavoq.

APUSTILIP Paulusip isummereerluta Biibilimik atuarnitta qanoq kinguneqarsinnaanera mianersoqqussutigaa. Paulusi nalimini juutit pillugit ima allappoq: “[Taakku] pillugit nalunaajaasariaqarpunga Guuti ilungersuutigigaat, kisianni silaqassuseqarnatik [eqqorluartumilli ilisimasaqarnatik, NV].” — Romamiut 10:2.

Ukiuni hundredelinni siullerni juutit taakku ilaat Jiisusip Missiarsiuneranik akuerinnikkumanngillat, naak tamanna Allakkani Hebræerisuuni erseqqikkaluartoq. Jiisusi Nazaretimiu Missiarsip Allakkani Illernartuni allaatigineqarneranut naleqquppoq taassumunngalu siulittuutaasunik tamanik eqquutitsilluni. Nunaqqataasali ilarpassui aalajangiutiveriikkaminnik isumaqarput, tamannalu Guutip oqaasianik paasinninnissaminnut akornutigaat.

Tamanna qanoq ilinniutigisinnaavarput? Isummereernani Biibilimik atuarnissaq pingaaruteqartoq. Isummat pigiliutiinnakkat aalajangiutiveriikkallu Biibilimik atuartup tamatumani tusarliunneqartumik paasinninnissamut akornutigisinnaavai.

Assersuutigalugu North Carolinami USA-miittumi teologiimi professorip Biibili  allaatigaa “erseqqissumik inuit suliaattut inuit isumaannit sunnersimaneqangaartutut. Inuit isumaasa ilaat assigiinngillat, taakkualu arlaannaalluunniit qanoq inuusariaqarnitsinnut siunnersuutitut ajoquteqanngitsutut iluaqutaasinnaanngillat.” Inuk Biibilimik ‘erseqqissumik inunnit suliaasorinnilluni’ atuaruni, taava siunnersuutinik najoqqutassianilluunniit iluarinngisaminik sumiginnaaqqajaassaaq.

Biibilimili kajumissaarneqarpugut eqiasuilluta tamatuminnga atuaqqissaaqqulluta. Paulusip nalaani Berøamiut ima oqaluttuarineqarput: “Oqaaseq kajumeqalutik ilassivaat, ullullu tamaasa Allakkat misissuiffigisarpaat paasiniarlugu ilumut taamaannersut.” (Apustilit Suliaat 17:11) Imaassinnaavoq illit, atuartartut taakkua pisimanerattut, isummat pigiliutiinnakkatit isornartorsiueqqajaanerillu paasinnissinnaaninnut akornutaasinnaasut taamaatittariaqaritit. Isummereernak Guutip oqaasia atuaruk, tusarliussamillu pissanganartumik atuakkiortup ingerlateqqikkusutaanik paasinninnissat ilungersuutigiuk.