Muswelo Okokeja Kwivwana Bible

2. Tanga na Mutyima Wampikwa Lupata

Lelo kwalombwelwe na mulunda nobe bintu bibi pa muntu okwamwene kasha? Lelo powetene na muntu’wa, wamumwene bibi ne kukomenwa kumona ngikadila yandi milumbuluke pa mwanda wa byanene mulunda nobe? Pakwabo e mobifikilanga ne pa bitala Bible.

MUTUMIBWA Polo wādyumwine pa bikokeja kwitufikila shi tutanga Bible na mutyima wa lupata. Polo wāsonekele pa bitala Bayuda ba mu abo mafuku amba: “Nebētabija bu-kamoni byo badi ne bukankamane bwa kusaka Leza, ino kebwendelepo mu ñeni, mhm.”—Loma 10:2.

Bayuda bamo ba mu myaka katwa kabajinji kebāsakilepo kwitabija bubinebine bulombwelwe patōkelela mu Bisonekwa bya Kihebelu: buyukanya Meshiasa. Mungya Bisonekwa, Yesu wa Nazala ye Meshiasa mwanda bupolofeto bonso bwāfikile padi. Inoko, milangwe ya lupata yākankeje bantu bavule ba mu yabo ntanda babulwa kwimvwanija Kinenwa kya Leza.

Le i ñeni’ka yotukokeja kuboila ku uno mwanda? I biyampe kutanga Bible na mutyima wampikwa lupata. Mifwatakanyo nansha ñeni ya lupata ibwanya kukankaja mutangi akomenwe kwimvwanija bubinebine bwa mu Bible.

Kimfwa, polofesele umo wa bifundwa bya myanda ya Leza mu Caroline wa Kungala, mu États-Unis, utela Bible bu “kitabo’tu kya bantu bitupu, kidi na milangilo ya bumuntu, mivule yampikwa kukwatañana kadi kutupu nansha umo witupa buludiki bukulupilwa pa muswelo wa kwiendeja mu būmi.” Shi muntu atange  Bible bu “kitabo’tu kya bantu bitupu,” mwene usa kupela bwendeji ne misoñanya yamona’mba keimusangejepo?

Inoko, Bible witukankamika twifunde’ye na katentekeji. Bisonekwa binenena pa Bene Belea ba mu myaka yādi’ko Polo amba: “Batabukile buleme boba ba mu Tesalonika mu kusepelela mwanda ne mutyima onka wa lubilo, ke basakesake mu bisonekwa mafuku onso mo bukila, mo bukila’mba, shi momo byendele.” (Bilongwa 17:11) Pamo bwa bano batangi, i biyampe utalule masakila obe nansha lupata bikokeja kukuvutakanya ukomenwe kwimvwanija. Tanga Kinenwa kya Leza na mutyima wampikwa lupata, koku usaka kuyuka musapu usangaja utamba kudi Mwine wandikije’kyo.