Chimwatela Kwiluka Chikupu Bayibolu

2. Tañenuña Nakanañachima

Komana ibwambu denu wayilejahu dehi nsañu yakutwamba hadi muntu imwabula kwiluka? Chimwadibulakeni namuntu yeniwu, komana yuma yayilejeliyi ibwambu denu yayileñeleli kubula kwiluka wuswa windi wakwila yuma niyililu yindi yayiwahi? Chuma chochimu chinateli kuzatika neyi munakutaña Bayibolu?

KAPOSTOLU Pawulu wasoñamishili hachuma chinateli kuzatika neyi tukañanya kutañaña Bayibolu nakanañachima. Pawulu wayisonekeleli aYudeya amumafuku indi nindi: “Ami nichinsahu chawu nami asweja iyena hansañu yaNzambi, ilaña abulaña kushinshikamu.”—Aroma 10:2.

A Yudeya amakwawu amuyaaka nkulakaji yakusambila akaanini kwiteja nawu Yesu diyi Mesiya, hela chakwila Nsona jachiHeberu jalumbulwili chikupu hansañu yeniyi. Nsona jachiHeberu jamulumbulula chikupu Yesu wakuNazareta nawu diyi Mesiya nawa jahosha hakushikijewa kwawuprofwetu wejima kutalisha hanyidimu yakakoñayi Mesiya. Ilaña, yitoñojoka yakutwamba yaleñeleli aYudeya amavulu kubula kwiluka chikupu Izu daNzambi.

Chumanyi chitukudizila kunichi chakutalilahu chamuBayibolu? Chalema kutaña Bayibolu nakanañachima. Kwikala nachaambu hela yitoñojoka yakutwamba kunateli kukañesha ntañi kwiluka chikupu chalala chamuBayibolu.

Chakutalilahu, mukulumpi wadiza chikupu jansakililu wakwituña dakuNorth Carolina, U.S.A., walumbulwili kutalisha haBayibolu nindi “himukanda wasonekeluwu kudi antu nawa mwekala maana awantu, niyuma yayivulu yashimunawu muBayibolu yambuka  chikupu, hiyinateli kutukwasha muchihandiluku.” Neyi muntu yatoñojokaña nindi Bayibolu ayisonekeli kudi antu bayi kudi Nzambuku, nateli kukaana wunlomboli ninshimbi jekala muBayibolu jabula kukeñayi.

Kwambukaku, Bayibolu yatukoleshaña kuyitaña chikupu. Nsona yahosha nawu mumpinji yaPawulu aYudeya: “Akwenoku hiyakubadika amuTesalonika kalemesha, muloña wena anyakeli kutambula mazu; hiyakutalatala munyikanda yajila hefuku hefuku, amoni neyi yumiyi dimu yaya.” (Yililu 17:11) Kufwana atañi wenawa twatela kutondolwela yuma yinateli kutuluwañesha hela kujinoka nsañu yekala muBayibolu. Neyi tunakutaña Bayibolu, twatela kuyitaña nakanañachima.