Bible I Hriat Thiam Theih Dân

2. Rilru Inhawng Takin Chhiar Rawh

I ṭhian pakhatin i hnênah i la hmuh ngai miah loh tuemaw a rêl tawh ngai em? Chu mi chu a tâwpa i han hmuh chuan, i ṭhianin a rêlna thute chuan a thiamnate leh a mize ṭhate chu a hmuh hmaihtîr che em? Bible chungchângah chuan chutiang bawk chu a thleng thei a ni.

TIRHKOH Paula chuan rilru inhawng taka Bible kan chhiar loh huna thil thleng thei lakah min vaukhân a. Ani chuan a hun laia Juda mi ṭhenkhatte chungchângah: “Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo,” tiin a ziak a ni.—Rom 10:2.

Kum zabi khatnaa chûng Juda mi ṭhenkhat chuan Hebrai Pathian Lehkha Thuin chiang taka a târ lan, Isua chu Messia a ni, tih chu an pawm duh lo. Nazaret Isua chuan Hebrai Pathian Lehkha Thu-a Messia nihna leh Messia tih tûr hrilh lâwkna zawng zawngte chu a tithleng famkim a ni. Chuti chung pawhin, a hun laia Juda mi tam takte chuan an ngaih dân neih sa an vawn tlat avângin Pathian Thu an hriat thiam theih loh phah a ni.

Chu thilthleng aṭang chuan eng nge kan zir theih? Rilru inhawng tak chunga Bible chhiar a pawimawhzia kan zir thei a. Pâwngpaw huatna emaw, ngaih dân lo siam lâwkna emaw chuan a chhiartuin Bible thutak a hriatthiamna tûr chu a dang thei a ni.

Entîr nân, North Carolina, U.S.A.-a sakhaw  lam chanchin zirtîrtu professor pakhat chuan Bible chu “mihringte lehkhabu, an ngaih dân inkalh tak takte ziakna lehkhabu a ni a, a eng amahin kan nun dân tûr kaihhruaina rin tlâk a pe lo,” tiin a sawi. Miin Bible chu “mihringte lehkhabu” anga ngai chunga a chhiar chuan, a duhzâwng mil lo kaihhruaina emaw, thu bulte emaw hnâwl chu a duh mai dâwn lâwm ni?

Chu mi nêna inkalhin, Bible chuan Pathian Thu chu taima taka zir tûrin min fuih zâwk a. Paula hun laia Beroia khuaa mite chungchângah, Pathian Lehkha Thu chuan: “Rilru lâwm takin thu chu an pawm a, an thusawi chu a dik leh dik loh hriat nân ni tin Pathian Lehkhaah an zawng ṭhîn,” tih a sawi a ni. (Tirhkohte 17:11) Chûng Beroia khuaa mite angin, Bible i hriatthiamna dang theitu, pâwngpaw huatna emaw, sawisêlna emaw rêng rêng chu i paih bo ve a ngai thei a ni. Pathian Thu chu rilru inhawng tak leh a Ziaktu thuziak phûrawm takte hmuh chhuah châk tak chungin chhiar ang che. (w09 7/1)