Kamoo o ka Kwešišago Beibele ka Gona

2. Bala ka Monagano o Bulegilego

Na mogwera wa gago o kile a go botša dilo tše di sa kgahlišego ka motho yo o sa kago wa mmona? Ge mafelelong o kopana le motho yoo, na seo mogwera wa gago a go boditšego sona se ile sa go šitiša go lemoga ditalente le dika tša motho yoo tše dibotse? Go ka direga se se swanago ka Beibele.

MOAPOSTOLA PAULO o ile a lemoša ka seo se ka diregago ge re ka palelwa ke go bala Beibele ka monagano o bulegilego. Paulo o ngwadile mabapi le Bajuda ba mehleng ya gagwe gore: “Ke ba hlatsela gore ba fišegela Modimo; eupša e sego go ya ka tsebo e nepagetšego.”—Baroma 10:2.

Ba bangwe ba Bajuda ba ba lekgolong la pele la nywaga ba be ba sa nyake go amogela therešo yeo  Mangwalo a Seheberu a e utollotšego ka mo go kwagalago: yoo Mesia e lego yena. Jesu wa Natsaretha o be a dumelelana le senyakwa se sengwe le se sengwe sa Mangwalo e bile o ile a phethagatša boporofeta bjo bongwe le bjo bongwe. Lega go le bjalo, dikgopolo tše di kgomaretšwego di ile tša thibela batho ba nageng ya gabo go kwešiša Lentšu la Modimo.

Re ka ithuta’ng phihlelong ye? Go bala Beibele ka kgopolo e bulegilego go bohlokwa. Lešira la go beba sefahlego goba dikgopolo tšeo di kgomaretšwego di ka šitiša mmadi go kwešiša therešo ya Beibele.

Ka mohlala, moprofesara wa dithuto tša bodumedi wa Carolina Leboa, U.S.A., o hlalosa Beibele e le “puku e ngwadilwego ke batho, e nago le dikgopolo tša batho e le ruri, tšeo bontši bja tšona di sa swanego le tšeo di sa neego tlhahlo e ka botwago ya kamoo re swanetšego go phela ka gona.” Ge motho a be a ka bala Beibele e le “puku ye e ngwadilwego ke batho,” gona na o be a ka se be le tshekamelo ya go lahla tlhahlo goba melao ya yona ya motheo yeo a sa kwanego le yona?

Ka mo go fapanego, Beibele e re kgothaletša gore re ithute yona ka mafolofolo. Mangwalo a bolela mabapi le Baberea ba mehleng ya Paulo gore: “Ba amogetše lentšu ka go le fišegela kudu monaganong, ba hlahloba Mangwalo ka kelohloko letšatši le letšatši go bona ge e ba dilo tše di be di le bjalo.” (Ditiro 17:11) Go swana le babadi bao, o ka swanelwa ke go tloša lešira le ge e le lefe la kgethollo goba la go swaya-swaya diphošo leo le ka šitišago kwešišo ya gago. Bala Lentšu la Modimo ka monagano o bulegilego, o fagahletše go kwa molaetša o kgahlišago wa Mongwadi wa yona.