Neeni Geeshsha Maxaafaa Akeekana Danddayiyo Ogiyaa

 2. Suure Qofaa Oyqqada Nabbaba

Neeni beˈa erenna uraabaa iitabaa issi laggee neessi yooti erii? Guyyeppe neeni he uraara gayttido wode, ne laggee yootidobay neeni he uraa eraanne loˈˈo eeshshaa akeekennaadan diggidee? Geeshsha Maxaafaa xeelliyaagankka hegaa malabay hanana danddayees.

NUUNI suure qofaa oyqqidi Geeshsha Maxaafaa nabbabana xayikko, gakkana danddayiyaabaa kiitettida PHauloosi akeekissiis. Ba wodiyan deˈiya issi issi Ayhudata xeelliyaagan PHauloosi: “Eti Xoossau oottanau keehi koyiyoogaa taani markkattais; shin eti Xoossau oottanau keehi koyiyo koshshai tumu eratettaappe gidenna” yaagidi xaafiis.—Roome 10:1.

Ibraysxxe Geeshsha Maxaafaa xuufeti loyttidi qonccissiyaaba gidikkonne, koyro xeetu layttan deˈida issi issi Ayhudati Yesuusi Mase  gidiyoogaa ammananau koyibookkona. Naazireete Yesuusi Masiyaara gayttida Geeshsha Maxaafan odettida gidaa kunttiis; qassi Masee oottanaagee odettido hiraagata ubbaa poliis. Gidikkonne, Yesuusa wode deˈida daro Ayhudati bala qofaa baxuuxi oyqqidoogee Xoossaa Qaalaa eti akeekennaadan oottiis.

Nuuni Geeshsha Maxaafay yootiyo he qofaappe ay tamaarana danddayiyoo? Suure qofaa oyqqidi Geeshsha Maxaafaa nabbabiyoogee koshshiyaaba. Gaasoy baynnan ixxiyoogee woykko kasetidi bala qofaa oyqqiyoogee nabbabiya uri Geeshsha Maxaafaa tumaa akeekennaadan oottana danddayees.

Leemisuwau, Amarkkan huuphessa Kaarolinan deˈiya, haymaanootiyaa xinaatiyaa profeseree Geeshsha Maxaafaa: “darobay issoy issuwaappe dummatiyo, deˈuwaa xeelliyaagan ammanttiya kaaletuwaa immiya issibinne baynna asa qofa” yaagidi qonccissiis. Issi uri Geeshsha Maxaafaa “asa qofa” giidi nabbabiyaaba gidikko, i dosiyoobaara moggottenna baaso siraataa woykko kaaletuwaa aggiiganau koyana danddayennee?

Hegaappe dumma hanotan, nuuni a minttidi xannaˈanaadan Geeshsha Maxaafay minttettees. PHauloosa wode deˈida Beeriyaa asata xeelliyaagan Geeshsha Maxaafay: “‘[Siyidobay] tumakkonne’ yaagidi, ubba gallassi Xoossaa maxaafata tamaariiddi, qaalaa kumetta laamotan ekkidosona” yaagees. (Oosuwaa 17:11) Beeriyaa asatuugaadan neenikka suure qofaa oyqqada Geeshsha Maxaafaa nabbabiyoogee koshshana danddayees. Xoossay xaafissido ufayssiya qofaa akeekanau, suure qofaa oyqqada a Qaalaa nabbaba.