Paano Mo Maintiendihan ang Biblia?

3. Batuna ang Bulig sang Iban

Sang ang explorer nga si Edward John Eyre naglakbay sing malawig pakadto sa naligwin nga Nullarbor Plain, ang isa ka tribo sa Australia nagtudlo sa iya kon paano makakuha sing tubig sa mga bakulod nga balas kag sa mga kahoy nga eucalyptus. Ginbaton ni Eyre ang bulig sang mga tawo nga eksperiensiado na sa sini nga lugar, amo nga naluwas ang iya kabuhi.

GINAPAKITA sini nga halimbawa nga ang isa ka tawo magamadinalag-on sa isa ka mabudlay nga hilikuton kon magpabulig sia sa mas eksperiensiado sa iya. Amo man sini ang dapat himuon kon nagasugod ka sa pagbasa sang Biblia.

Wala ginpaabot ni Jesus nga maintiendihan dayon sang iya mga sumulunod ang Biblia nga wala sing bulig sang iban. Isa ka bes, “ginbuksan niya ang ila hunahuna agod mahangpan nila ang kahulugan sang Kasulatan.” (Lucas 24:45) Nahibaluan ni Jesus nga nagakinahanglan sing bulig ang mga nagabasa sang Biblia para maintiendihan nila ang mga panudlo sini.

Sin-o ang Magabulig?

Ginsugo ni Jesus ang iya matuod nga mga sumulunod nga buligan ang iban. Antes sia magbalik sa langit, si Jesus nagsugo: “Busa lakat kamo kag maghimo sang mga disipulo sa mga tawo sang tanan nga pungsod, . . . nga nagapanudlo sa  ila nga tumanon ang tanan nga butang nga ginsugo ko sa inyo.” (Mateo 28:19, 20) Ang panguna nga hilikuton sang mga Cristiano amo ang pagtudlo. Nagalakip ini sang pagpaathag kon paano sundon ang mga prinsipio sang Biblia sa adlaw-adlaw nga pagkabuhi. Ginabuligan man sang matuod nga mga Cristiano subong ang iban para maintiendihan ang Biblia.

Wala madugay pagkatapos ginsugo ni Jesus ang iya mga sumulunod, may makapainteres gid nga natabo. Ginasugid sang Biblia nga may isa ka Etiopianhon nga opisyal nga nagabasa sang mga bahin sang tulun-an ni Isaias. May nabasahan sia nga wala niya naintiendihan. Suno sa rekord sang Biblia, amo ini ang bersikulo nga nagpalibog sa iya: “Subong sang isa ka karnero gindala sia sa ilihawan, kag subong sang isa ka kordero nga wala sing tingog sa atubangan sang iya manug-alot, wala man niya gintikab ang iya baba. Sa tion sang pagpakanubo sa iya ginkuha ang paghukom sa iya. Sin-o ang magasugid sang mga detalye sang iya kaliwatan? Bangod ang iya kabuhi sa duta kuhaon.”—Binuhatan 8:32, 33; Isaias 53:7, 8.

Ginpamangkot sang Etiopianhon si Felipe, nga isa ka eksperiensiado nga Cristiano kag madamo  sing nahibal-an sa Kasulatan: “Tuhoy kay sin-o ginapamulong ini sang manalagna? Tuhoy bala sa iya kaugalingon ukon tuhoy sa iban nga tawo?” (Binuhatan 8:34) Ining sinsero nga Etiopianhon bag-o lang nagsimba sa Jerusalem, kag mahimo nangamuyo sia nga giyahan sia sang Dios. Maathag nga malangkagon sia kag mapainubuson nga nagabasa, pero indi niya ini gihapon maintiendihan. Gani, ginpangabay niya si Felipe nga buligan sia. Nalipay gid ang Etiopianhon sa paathag ni Felipe amo nga nangin Cristiano man sia.—Binuhatan 8:35-39.

Ginapadayon sang mga Saksi ni Jehova ang ginhimo ni Felipe kag sang iban pa nga mga Cristiano sang una. Ang mga Saksi ni Jehova sa sobra 235 ka kadutaan boluntaryo nga nagabulig para maintiendihan sang iban kon ano gid ang ginatudlo sang Biblia. Ginahimo nila ini paagi sa pagbinagbinag sing pasunod sang lainlain nga mga topiko sa Biblia. *—Tan-awa ang kahon nga “Makapakumbinsi nga mga Sabat sa mga Pamangkot sa Biblia.”

“Nasabat ang Tanan Ko nga Pamangkot”

Sanday Steven, Valvanera, kag Jo-Anne, nga ginsambit kaina, nagtuon sa Biblia upod sa mga Saksi ni Jehova. “Sang ginkomparar ko ang pila ka prinsipio sa Biblia, nalipay gid ako kay nasabat dayon ang akon mga pamangkot,” siling ni Steven. “Antes ako magtuon sa Biblia, wala gid sing may nagtudlo sa akon kon paano ini himuon. Nalipay ako kay ang Biblia nagaunod gali sing mapuslanon nga mga sabat, kag ang mga ideya sini wala nagasumpakilay.”

Amo man sini ang ginsiling ni Valvanera. “Ang tanan ko nga natun-an matuod gid kag maathag,” siling niya. “Natun-an ko nga indi kinahanglan nga patihan ang tanan nga butang bangod lamang kay ginatudlo ini sang ‘Simbahan’ kundi bangod may rasonable gid ini nga mga paathag.” Si Jo-Anne nagsiling: “Daku gid karon ang akon pagdayaw sa Dios, nga Awtor sang Biblia, bangod nasabat ang tanan ko nga pamangkot. Nahibaluan niya sing abanse nga madamo sing ipamangkot ang mga tawo, amo nga ginpat-od gid niya nga masabat ini tanan sa Biblia.”

May kilala ka bala nga isa ka Saksi ni Jehova? Puede mo sia mapangabay nga ipakita sa imo kon paano tun-an ang Biblia. Kon wala ka gid sing kilala nga Saksi ni Jehova, palihug sulati ang isa sa mga adres nga nalista sa pahina 4 sini nga magasin. Paagi sa balaan nga espiritu sang Dios, bukas nga hunahuna, kag bulig sang isa ka maayo nga manunudlo sa Biblia, ang Pulong sang Dios mahapos lang intiendihon.

[Nota]

[Kahon/Retrato sa pahina 8]

Makapakumbinsi nga mga Sabat sa mga Pamangkot sa Biblia

Amo ini ang pila ka topiko nga ginabinagbinag sang mga Saksi ni Jehova sa ila programa sang pagtudlo sa Biblia:

• Ano ang katuyuan sang Dios para sa duta?

• Diin ang mga patay?

• Nagakabuhi bala kita sa “katapusan nga mga adlaw”?

• Ngaa gintugutan sang Dios ang pag-antos?

• Paano mangin malipayon ang akon pamilya?

[Mga Retrato sa pahina 7]

Para maintiendihan ang Biblia . . . mangamuyo sang espiritu sang Dios, magbasa nga may bukas nga hunahuna, kag magpabulig sa iban