Mä jachʼa imprentar visittʼañäni

INAS Yatiyañataki sat revista uñtʼsta. Inas Jehová Diosan Qhanañchirinakapax utamar jaytapxchiyätam. Jan ukax inas callenakansa yaqha chiqanakansa ¡Despertad! revistamp chika churapxchiyätam. Paypach revistanakaxa, taqinin Bibliat sum yatxatapxañapataki amtamp luratawa. Ukampis Bibliat apstʼat Yatiyañataki revistax uraqpachan sapa phaxsix 35.000.000 ukha revistanakat jilpachaw churasi.

¿Kawkinsa ukat kunjamsa aka revistanakax luraspacha sasin jisktʼasirïtati? Uk yatxatañatakixa, Jehová Diosan Qhanañchirinakapan imprentanakapax walja markanakan utjki ukar visittʼir sarañamawa. Kawkïr liytʼirinakatï jan sarirjamäpsktaxa aka qillqatanwa uñachtʼayapxäma, kunjamas uka imprentanakaxa ukwa fotonakampi ukat qhanañchtʼäwinakampi amuytʼañäni: uka imprentsa visittʼkasma ukham amuytʼma, ukasti Wallkill (Nueva York) markankiwa.

Departamento de Redacción satäkis ukax Brooklyn markankiwa, ukanwa kuna tuqitsa parlasini uk wakichtʼasi. Ukatxa, computadora tuqnämwa Wallkill markar Artes Gráficas satäkis ukar apayasi, ukanwa planchas de impresión uk wakichtʼapxi, phisqa jachʼa offset prensanakataki. Ukaruxa jachʼa rollo papelanak uchapxi, uka rollonakaxa 1.300 kilonakatsa (3.000 libras) jukʼamp jathiwa. Sapüruw papelax 70.000 jan ukax 90.000 kilonak uskupxi, phaxsin niya 1.400 rollonakaw manti. Maquinat dibujonakani ukat qillqstʼat ukham misstanïpanxa khuchhunuqasaw 32 jananakar sukthapisi, ukhamat mä revistar tukuñapataki. Ukat libronak lurañatakixa walja hojanakaw sukʼthapisiñapa, ukxa ukatak lurat talleranwa lurasi, ukanxa pä maquinanakaw libronak lurañatak (maquinas de encuadernación) utji. Uka maquinanakat mayakiw 50.000 thuru tapani libronaka jan ukax 75.000 juchʼus tapani libronak sapüru luraspa, ukat maynïristi niya 100.000 juchʼus tapani libronak lurarakispa.

Pasir marakiw 243.317.564 ukha revistanak apsusiwayi ukat 28.000.000 libronakatxa jilaw apsusiwayaraki, uka libronakatxa 2.600.000 ukhax Bibliakamakïnwa. Uka qillqatanakax 380 kasta arunakanwa lurasi, ukanakasti mä qhawqha tiempow imprentan imasi. ¿Ukat kamachasxisa?

Estados Unidos markankir 12.754 tamanakasa Hawai ukat región del Caribe uksan 1.369 tamanakasa Wallkill ukan imprentax utjki ukaruw qillqatanak mayipxi. Ukat Departamento de Envíos ukan irnaqirinakaw cajonanakar uchasin uka qillqatanak  kawkhantï mayipki ukanakar apayxapxi. Sapa phaxsiw Estados Unidos markankir tamanakarux 14.000.000 ukha kiloni (30.000.000 de libras) qillqatanak apayasi.

Chiqas janiw walja ukat jachʼa maquinanakapakix wali sumätapxa uñjaykiti jan ukasti, artes gráficas, programación de producción, taller de impresión, encuadernación ukat envíos ukanakan taqi chuym irnaqtʼapki uka jillat kullakanakaw wali sumätap uñjayi, jupanakax 19 maranit 92 maraninakäpxiwa.

Ukan taqi chuym irnaqtʼir jilat kullakanakatakixa, uka qillqatanak katuqapki ukanakax Bibliankki uka iwxanak yatiqapxaspa ukat ukarjam sarnaqañ yatiqapxarakispa ukaw jukʼampi askixa. Jumax aka qillqatanak liytʼasin yatxatasma ukhax wali askipunïspawa, ukhamatwa Jehová Diosarusa ukat Jesucristorus sum uñtʼasmaxa, ukwa nänakax munapxta. Chiqas wiñay jakañ katuqañax Jehová Diosar uñtʼañanwa utji (Juan 17:3).

[16 janan fotonakapa]

 [17 janan fotopa]