Icikuulwa Ca Lulumbi umo Bapulintila Impapulo

INO magazini mulebelenga limbi te muku wa kubalilapo mwaimonapo. Nalimo Inte sha kwa Yehova balimutandalilapo ku ng’anda ku mwenu no kwisamupeelako Ulupungu lwa kwa Kalinda na Loleni! ifya kumwafwa ukumfwikisha Baibolo. Nangu limbi mwalimona uko baNte bapeela abantu iyi magazini mu misebo na mu ma maliketi. Na kuba, iyi magazini iilembwa cila mweshi ilacila pali 35 milioni, kanshi e magazini iisabankanishiwa sana ukucila pali magazini imbi mu calo.

Bushe mwalibala amutontonkanyapo uko ishi mpapulo shifuma ne fyo bashilemba? Inte sha kwa Yehova balikwata ifikuulwa mu fyalo ifyalekanalekana umo bapulintila impapulo pali fimashini. Nomba lekeni tulande fye pa cikuulwa cimo icaba mwi tauni lya Wallkill, mu citungu ca New York, mu U.S.A. Abengi ababelenga impapulo shesu isonde lyonse kuti cabafya ukuyatandala ku cikuulwa ca Nte sha kwa Yehova uko balembela impapulo ku America, kanshi ifyo twalalondolola e lyo ne fikope ifyo mwalamona fyalamwafwa ukwishiba ifingi pali ici cikuulwa.

Lelo kwena, pa kuti batampe ukupulinta kano pali ifyebo ifyalembelwa libela. E co Dipartimenti iipekanya ifyebo ku Brooklyn, New York ilatuma ifyebo ifilingile ukupulintwa ku Dipartimenti uko bapangila ifikope ukubomfya kompyuta. Lyena mashini ilakopolwela ifi fyebo pa tumalata utwaibela pa kuti fipulintwe. Cila mweshi, dipartimenti iipulinta impapulo mu musumba wa Wallkill, ilapokelela ifimfungwa fya mapepala 1,400 kabili cila bushiku babomfyapo nalimo amatani ya mapepala 80 ukufika kuli 100. Ifimfungwa fya mapepala fimo ifyo babika pali bamashini abakalamba 5 aba kupulintilapo filafina ukucila na pa makilogramu 1,300. Pali aba bamashini epo bakakila utumalata utwakwata ifilembo fya kupulintilapo. Apa pene e po bapulintila amapepala, ukuyaputula bwino no kuyapeta mu tumiina tumiina utukwata amabula 32. Ino magazini mulebelenga kamwiina kamo. Inga amabuuku yena bapanga shani? Ku lubali lumo ulwa ici cimashini uko bapangila amabuuku, utumiina twa mapepala ayapulintwapo balatukambantanya no kupanga amabuuku. Ici cimashini cakwata pabili apo bapangila amabuuku, ulubali lumo lupanga amabuuku 50,000 aya nkupo shakosa e lyo 75,000 aya nkupo shanaka mu bushiku fye bumo. E lyo ulubali lumbi nalo lupanga amabuuku ya nkupo shanaka nalimo 100,000 mu bushiku fye bumo.

Mu 2008, mu cikuulwa ca kupulintilamo, bapulintile ifitabo ukucila pali 28,000,000, e lyo pa fyo bapulintile, paali amaBaibolo ukucila pali 2.6 milioni. E lyo inshita ine iyi bapulintile magazini 243,317,564. Mu cikuulwa umo bapulintila balasungilamo impapulo sha Baibolo nalimo mu ndimi 380. Nomba cinshi cikonkapo nga bapanga impapulo?

Dipartimenti ipulinta impapulo ilapokelela amaorda ya filonganino 12,754 aya mu calo ca United States fye, e lyo na 1,369 ukufuma ku  Caribbean na ku Hawaii. Dipartimenti ituma ifitabo ilalonga ifitabo no kutuma ku baordele. Cila mweshi impapulo ukucila pa makilogramu 14 milioni shilatumwa ku filonganino fya mu United States.

Nomba icacilapo ukucindama muli ici cikuulwa ca kupulintilamo, te fimashini, lelo bantu. Ababomba muli ici cikuulwa ca kupulintilamo balicila pali 300. Kwaba abapekanya ifikope, abatantika ifya kubomba, abapulinta magazini ne fitabo, abakambantanya ifyo bapulintile pa kuti bapange ifitabo, na balonga impapulo no kushitwala mu ncende shalekanalekana. Ababomfi bonse ukutampila ku ba myaka 19 ukushinta kuli 92 tabafola, ni bakabomba abaitemenwa fye abene.

Balitemwa sana abantu abapokelela impapulo no mweo onse no kusambililamo no kukoseleshiwa, kabili abakonka amashiwi ya kwa Lesa aya mu Baibolo ayalandwapo muli ishi mpapulo. Tulesubila ukuti na imwe bene mwaliba pa bantu abatemwa impapulo shesu no kuti impapulo ishipulintwa shakulamwafwa ukutwalilila ukulasambilila pali Yehova Lesa na Yesu Kristu, e pa kuti mwingaba no mweo wa muyayaya.—Yohane 17:3.

[Ifikope pe bula 16]

 [Icikope pe bula 17]