Labib i sanz lavi

Akoz en madanm ki ti’n perdi konfyans dan larelizyon i aprezan pas en kantite letan pour ed lezot aprann konn Bondye? Kwa ki ti motiv en zonm ki ti kontan bann sport vyolan pour vin en dimoun ki kontan lape? Konman ki en zonm ki ti bwar, servi drog e lager lo semen in reisi sanz son fason viv? Silvouple lir sa ki zot annan pour dir.

PROFIL

NON: PENELOPE TOPLICESCU

LAZ: 40

PEI NATAL: LOSTRALI

LEPASE: DEZAPWENTE AVEK LARELIZYON

MON LAVI DAN LEPASE: Mon ti ne Sydney, Lostrali, me ler mon ti annan zis de-z-an mon fanmir ti al reste Nouvel Gine. Pour preski de-z-an nou ti reste Rabaul e apre, nou ti reste pour wit an Bougainville. I ti napa televizyon sa lepok Nouvel Gine, alors mwan ek mon frer ti pas en kantite letan dan naze, snorkling e kanpe.

Ler mon ti annan apepre di-z-an, mon ti konmans enterese avek larelizyon. Manman ti en Katolik, alors i ti sizere ki mon etidye Labib avek en leser ki ti reste dan zanmirant. Mon ti aksepte lansennyman Katolik e a laz di-z-an mon ti batize.

Me, apre ki nou ti’n retourn Lostrali e mon ti pe vin en adolesan, mon ti konmans annan dout lo mon krwayans relizye. Ler mon ti pos segonder, mon ti etidye listwar. Nou de mon papa nou ti koz en kantite lo lorizin larelizyon e lo sa ki nou ti krwar ti bann lezann ek zistwar envante dan Labib. Avek letan mon ti rezet lansennyman Katolik.

Ler mon ti annan sez an mon paran ti separe. I ti difisil pour manman aksepte sa sityasyon e apre serten letan mon ti al reste avek mon papa ek son fiyanse. Mon frer ti reste avek manman e zot ti al reste en lot bor Lostrali. A sa staz dan mon lavi, mon ti santi mwan vreman tousel. I ti pran mwan de-z-an avan mon ti kapab reganny en bon relasyon avek mon manman. Mon ti konmans bwar, servi drog e zis anmize. Mon ti aret lekol e mon ti rod en louvraz. Dan mon bann ven-t-an an montan, mon ti gaspiy mon lavi par viv en lavi imoral.

 Ler mon ti ganny vennsenk an, mon ti konmans mazin lo Labib ankor. Mon ti sanz landrwa travay e mon ti zwenn Liene. Liene ti en bon fiy e i ti toultan poli anver son sef, menm si son sef ti vreman brit anver li. Ler mon ti demann li akoz i pa reponn son sef dan en fason brit, i ti eksplik mwan ki i ti pe etidye Labib avek Temwen Zeova e i ti pe esey aplik bann prensip Labib dan son lavi. Liene ti ofer pour etidye Labib avek mwan. Akoz en mal konprenezon, mon ti krwar ki i ti oule dir ki mon ti kapab aprann tou sa ki i ti konnen dan Labib dan zis enn erdtan. Sa zour swar, Liene ti pran trwa-z-erdtan pour reponn mon bann kestyon lo Labib. Mon ti enpresyonnen akoz tou larepons ki i ti donn mwan ti baze lo Labib.

Mon rapel sa zour swar ler mon ti pe retourn dan lakour apre mon diskisyon avek Liene. Mon ti ankoler avek Bondye akoz i pa ti’n permet mwan aprann laverite konsernan li pli boner. Mon ti konnen ki bann ­Temwen ti viv en lavi moralman prop e mon ti krwar ki i ti tro tar pour mwan kapab sanz mon bann labitid. Mon ti osi panse ki mon pa ti pou zanmen kapab al prese portanport parey bann Temwen i fer. Mon ti kontinyen etidye Labib avek bann Temwen avek bi pour trouv en keksoz mal avek zot lansennyman ki alor ti pou permet mwan aret annan kontak avek zot, me avek en konsyans kler. En zour mon ti realize ki mon pa ti pou ­zanmen trouv en keksoz mal avek zot lansennyman.

KI MANNYER LABIB IN SANZ MON LAVI: Pli mon ti aprann konsernan bann standar moral dan Labib, pli mon konsyans ti fatig mwan. Pour ki mon konsyans i aret fatig mwan, mon ti aret servi drog. Me apre mon ti al reste dan en lot pei pour en pe letan e mon ti konmans bwar e anmize. I ti paret ki sak fwa ki mon ti esey fer progre pour viv an armoni avek bann prensip Labib, mon ti repran mon bann vye labitid. Avek laont mon ti priy Zeova, me kantmenm sa mon ti santi mwan mal.

Ler mon ti aprann konsernan sa ki ti arive ant Lerwa David ek Batseba e lafason ki Zeova ti azir anver zot avek mizerikord, sa ti ed mwan. David pa ti esey zistifye son aksyon me avek kouraz ler i ti ganny konseye i ti admet son fot e avek limilite i ti aksepte disiplin ki i ti gannyen. (2 Samyel 12:1-13) Sak fwa mon ti tonbe, mon ti mazin sa resi e i ti pli fasil pour mwan demann Zeova pardon. Apre mon ti deside pour priye avan mon tonm dan tantasyon olye apre e sa ti fer en gran diferans.

KI BYENFE MON’N GANNYEN: Mon ti toultan annan en move tanperaman. Me sa teks dan Efezyen 4:29-31 ti ed mwan vwar sa nesesite pour evite annan ‘move santiman, iritasyon ek lakoler.’ Anmezir ki mon ti aprann kontrol mon tanperaman, mon ti aprann kontrol mon fason koze. Deplis, konsey Zezi pour “dir wi kan i wi” ti ed mwan pour vin pli determinen.—Matye 5:37; nou ki’n met an italik.

Mon manman ki o konmansman ti opoz mwan akoz mon ti pe asosye avek bann Temwen ti plitar dir mwan ki i fyer akoz mwan. I ti menm dir: “Mon konnen ki sa madanm ki ou’n vini ozordi i pa akoz lafason ki ou’n ganny elve me i akoz sa ki ou’n aprann konsernan Zeova.” Mon ti vreman kontan pour tann li dir sa.

Mon aprezan santi ki mon lavi i annan sans ek en bi. Mon msye ek mwan nou’n ansenny Labib aplentan pandan sa dernyen ne-v-an. Wi mon al prese portanport e aprezan mon santi ki sa i sa travay pli satisfezan ki mon’n deza fer.

 PROFIL

NON: DENIS BUSIGIN

LAZ: 30

PEI NATAL: LARISI

LEPASE: KONTAN KARATE

MON LAVI DAN LEPASE: Mon ti ne dan lavil Perm e grandi dan lavil Furmanov kot i annan apepre 40,000 zabitan dan rezyon Ivanovo, Larisi. Furmanov i en zoli lavil avek en kantite zoli pye dibwa ki son fey i vin zonn ek rouz pandan lotonn. Dan bann lannen 1980 ek 1990, lakantite krim dan lavil ti ogmante. Mon fanmir ti viv en lavi vreman senp lo en pti revini. Mon ti reste avek mon paran ek mon pti frer dan en apartman zis en lasanm, alor i ti vreman sere.

Mon ti konmans aprann karate a laz set an. Mon ti kontan sa sport e mon lavi antye ti santre toultour li. Mon ti pas tou mon letan lib dan gym, alor tou mon bann zanmi ti bann dimoun ki ti fer sport. A laz 15 an, mon ti’n fini ganny mon sentir rouz dan karate e enn an plitar mon ti ganny mon sentir gri. Mon ti form parti en tim karate ki ti pran par dan bann konpetisyon Larisi, Lerop ek Lazi. Mon lavenir ti paret briyan, me ler mon ti annan 17 an mon lavi antye ti sanze.

Serten mon bann zanmi ek mwan ti komet en lofans e nou ti ganny arete. Mon ti ganny en santans de-z-an prizon. Lavi dan prizon ti difisil. Me, i ler mon ti ankor dan prizon ki mon ti vwar Labib pour premye fwa. Mon ti lir Zenez, bann Psonm ek Nouvo Testaman. Mon ti menm aprann sa lapriyer Notreper par ker e tou le swar mon ti resit li avan al dormi an krwayan ki sa ti pou ed mwan dan en fason ou en lot.

Mon ti ganny large dan prizon an 2000, me mon pa ti konnen ki mon ti pou fer avek mon lavi e mon ti napa en bi. Mon ti konmans servi drog e preski sa menm letan mon manman ti mor. Mon manman ti sa dimoun ki mon ti pli kontan e i ti difisil pour mwan fer fas avek son lanmor. Mon ti reisi aret servi drog e mon ti rekonmans al dan gym ankor. Mon ti al reste dan lavil Ivanovo e mon ti ganny en louvraz dan en laboutik. Asistan sef dan laboutik ti en Temwen Zeova. I ti eksplik mwan serten lansennyman debaz dan Labib e i ti fer laranzman pour mwan etidye Labib regilyerman avek en lot Temwen.

KI MANNYER LABIB IN SANZ MON LAVI: Pandan mon letid Labib, mon ti aprann konsernan plan Bondye pour fer later vin en paradi. Sa ti vreman tous mwan e mon ti anvi fer tou sa ki ti neseser pour mwan kapab viv dan sa paradi. Mon ti realize apre ki Zeova i annan bann standar o nivo ki i anvi dimoun i swiv. Mon ti’n pas en kantite mon lavi pe mazin zis mon lekor. Me mon ti aprann ki Zeova ti anvi mon mazin lezot e devlop bann kalite ki mon ti napa a sa moman, tel parey labonte e kontan lape.

Anmezir mon ti konmans mazin seryezman lo tou sa ki Zeova ti’n fer pour mwan, tel parey donn son Garson konman en sakrifis pour mon pese, rekonesans pour lanmour Bondye ti motiv mwan pour fer bann sanzman dan mon lavi. Par egzanp, mon ti aprann dan Psonm 11:5 ki Zeova i ay vyolans. Alors mon ti aret get bann progranm televizyon ki promot vyolans  ek laenn. Avek bokou zefor, mon ti aret partisip dan bann sport vyolan. Sa prensip dan 1 Korentyen 15:33 ti ed mwan realize ki bann dimoun ki mon ti frekante ti pou annan en gran lefe lo mwan. Lefet ki mon ti’n al dan prizon i laprev ki sa prensip i vre. Alors mon ti aret frekant bann dimoun ki zot lavi ti santre lo bann sport vyolan.

KI BYENFE MON’N GANNYEN: Asosye avek Temwen Zeova e etidye Labib in ed mwan pour vin en dimoun onnet. Par egzanp mon ti aprann dan Ebre 13:5 konsernan sa bezwen pour kontant nou avek sa ki nou annan e pour lalit kont lanmour pour larzan. Met sa konsey an pratik in ed mwan pour aret vole e koz manti.

Fer zanmi i en keksoz ki mon’n toultan apresye. Mon ti vwar dan lepase bann dimoun ki ti gat zanmi akoz lafreyer oubyen vorasite. Temwen Zeova pa parfe, me mon’n aprann ki zot respekte standar Bondye e zot fer tou zot mye pour aplik son konsey dan lafason ki zot tret lezot. Parmi zot mon’n aprezan fer bann vre zanmi.

Mon zis mazinen ki mannyer mon lavi ti pou ete si mon pa ti’n aprann viv dapre bann standar Labib. Petet mon ti pou’n retourn dan prizon oubyen fer lezot dimoun ditor. Me aprezan mon annan en bon madanm ek de garson e konman en fanmir nou trouv vre lazwa kan nou ed lezot dimoun aprann laverite konsernan Bondye.

PROFIL

NON: JOSÉ DA SILVA

LAZ: 31

PEI NATAL: BREZIL

LEPASE: LAGER LO SEMEN

MON LAVI DAN LEPASE: Mon ti grandi dan en landrwa byen sal kot dimoun pov ti reste dan bann geto, São Paulo. Nou pa ti ganny akse avek delo ki ti bon pour bwar e ti napa en bon kondisyon lizyenn. Sa landrwa ti repite pour vyolans ek en kantite krim.

Mon ti grandi konman en dimoun vyolan e agresif. Mon ti toultan enplike dan bann lager lo semen e sa ti fer dimoun dan zanmirant per mwan. Mon laparans ek latitid ti donn lenpresyon ki mon ti for. Mon ti bwar en kantite, souvan ziska ler mon ti perdi konnesans. Parey mon bann frer, mon ti osi servi drog. Annefe, enn mon bann frer ti mor akoz i ti pran tro bokou.

KI MANNYER LABIB IN SANZ MON LAVI: Ler mon ti zwenn Temwen Zeova, zot ti montre mwan dan Labib ki Bondye pou fer later antye vin en paradi. (Lik 23:42, 43; Revelasyon 21:3, 4) Mon ti osi aprann ki bann mor pa konsyan nanryen e alors Bondye pa pini bann move dimoun dan en lanfer dife. (Eklezyast 9:5, 6) Sa ti en gran soulazman pour mwan. Sa ki mon ti aprann konsernan Bondye ti motiv mwan pour sanz mon lavi. Me i pa ti fasil pour mwan fer sa bann sanzman, pour aret servi drog,  aret bwar, lager ek sa labitid pour servi langaz obsenn.

Me mon ti ganny en kantite lankourazman avek parol zapot Pol ki’n ganny rikorde dan 1 Korentyen 6:9-11. Sa bann verse i montre ki dan premye syek, a en serten moman bann Kretyen ti annan serten sa bann move labitid ki mon ti’n devlope. Me sa bann verse i osi dir: “Koumsa menm ki serten parmi zot ti ete. Me zot in ganny lave, zot in ganny pirifye, zot in ganny zistifye o non Senyer Zezi-Kri e dan Lespri nou Bondye.” Sa parol ti donn mwan lespwar ki mon ti pou kapab osi fer bann sanzman neseser dan mon lavi pour fer plezir Bondye.

Ler mon ti konmans asosye avek bann Temwen, mon ti konvenki ki zot ti sa vre larelizyon. Zot ti konn mon pase, ki mon ti en dimoun vyolan e agresif, me menm sa avek lanmour zot ti akeyir mwan parmi zot.

KI BYENFE MON’N GANNYEN: Si mon pa ti’n etidye Labib e sanz mon fason viv, petet mon ti pou’n fini mor. Me o kontrer mon’n trouv plezir pour ed enn mon bann frer konn Labib e aret servi drog. Mon’n osi ankouraz lezot manm mon fanmir pour konmans etidye Labib. Mon vreman rekonesan ki mon’n kapab dedye mon lavi pour servi Bondye, sa enn ki vreman enterese avek nou.

[Ekstre lo paz 24]

“Mon ti deside pour priye avan mon tonm dan tantasyon olye apre e sa ti fer en gran diferans”