Bible Okpụhọde Mme Owo

Nso ikpanam eyenan̄wan emi ekesikopde itekesịt aban̄a ido ukpono abiat ekese ini idahaemi ekpep mbon en̄wen n̄kpọ aban̄a Abasi? Nso ikanam eren emi ekesimade afai afai mbre mbuba akabarede etie emem emem idahaemi? Ete kiet emi ekesidade n̄kpọsọn̄ ibọk, akpa mmịn, esinyụn̄ an̄wana en̄wan ke efak, akasan̄a didie okpụhọde uwem esie? Yak mmọ ẹda inua mmọ ẹtịn̄.

ENYỊN̄: PENELOPE TOPLICESCU

ISUA EMANA: 40

IDỤT: AUSTRALIA

UTỌ OWO EMI ENYE EKEDIDE: IDO UKPONO EKESITETEK ENYE ESỊT

NTE N̄KESIDUDE UWEM: N̄kamana ke Sydney, ke Australia, edi ke ini n̄kedide isua iba kpọt, nnyịn ima ikpọn̄ Australia ikodụn̄ ke New Guinea. Ima idụn̄ ke Rabaul ke n̄kpọ nte isua iba ekem ikodụn̄ isua itiaita ke Bougainville. Ke ini n̄kedide eyenọwọn̄, TV ikodụhe ke New Guinea, ntre ami ye eyeneka mi ima isika ewọk inyụn̄ isika nsio nsio ebiet.

Mma ntọn̄ọ ndima n̄kpọ Abasi ke ini n̄kedide n̄kpọ nte isua duop. Sia eka mi ekedide owo Catholic, enye ama ọdọhọ mi nsika yak nun kiet emi okodụn̄de ekpere nnyịn ekpep mi Bible. Ẹma ẹduọk mi mmọn̄ ke Catholic ke ini n̄kesịmde isua 10.

Edi ke ini ikafiakde inyọn̄ Australia, mma n̄kpon esisịt, nnyụn̄ ndikụt ke se ẹkesinamde ke ufọkabasi nnyịn ikenenke. N̄kekpep mbụkeset ke ufọkn̄wed ntaifiọk, ntre ami ye ete mi ima isitie ineme iban̄a nte ido ukpono ọkọtọn̄ọde, ye mme mbụk Bible oro nnyịn ikekerede ke edi n̄ke. Nte ini akakade, mma mfiak Ufọkabasi Catholic.

Mama ye Papa ẹma ẹdian̄ade ẹtie ke ini n̄kedide isua 16. N̄kpọ ama ọsọn̄ ye Mama, ntre, mma nnyọn̄ n̄kodụn̄ ye Papa ye owo emi enye okoyomde ndidọ, ke adan̄aemi eyeneka mi eketienede eka mi aka obio en̄wen. Ekenen̄ede etie nte ke nnyeneke owo ini oro. Akada mi ofụri isua iba mbemiso n̄kekemede ndifiak ndiana eka mi idem. Mma ntọn̄ọ ndin̄wọn̄ mmịn, nda n̄kpọsọn̄ ibọk, nnyụn̄ nsika usọrọ. N̄kamaha ndika aba n̄wed, ntre mma n̄koyom utom nnam nnyụn̄ ndu oburobụt uwem.

 Mma ntọn̄ọ ndifiak nnyene udọn̄ ke Bible ke ini n̄kedide isua 25. Mma nnyene utom en̄wen, ndien ke obufa itieutom mi, mma nsobo eyenan̄wan kiet emi ekerede Liene, ata eti eyenan̄wan emi esinen̄erede okpono eteutom nnyịn kpa ye oro eteutom nnyịn ekenen̄erede ọsọn̄ ido ye enye. Mma mbụp enye ntak emi enye mîsisọn̄ọke eteutom nnyịn enyịn. Enye ama ọdọhọ ke ikpep Bible ye Mme Ntiense Jehovah ndien ke in̄wana ndida item Bible ndu uwem. Enye ama obụp m̀mê n̄kpama ndikpep Bible. Ikọ esie ikan̄wan̄ake mi, n̄kekere ke enye ọkọdọhọ ke mmekeme ndida hour kiet mfiọk ofụri se idude ke Bible. Liene ama ada ofụri hour ita mbubreyo oro ọbọrọ kpukpru mbụme oro n̄kobụpde. Se ikenemde mi ikan edi nte ke enye akada Bible ọbọrọ kpukpru mbụme oro.

Ke nteti se iketịbede mbubreyo oro ke mma n̄keneme nneme ye Liene mma, ekedi ke n̄wat moto, ke nyat esịt ye Abasi ke ntak emi enye mîkabakke iwụt mi akpanikọ. Mma mfiọk ke Mme Ntiense Jehovah isidụhe oburobụt uwem, ntre n̄kekere ke ndikemeke aba ndinam ukpụhọde. Mfịna mi efen ekedi nte ke ndikemeke ndisan̄a ke ufọk ke ufọk n̄kwọrọ ikọ nte Mme Ntiense Jehovah ẹsinamde. Mma n̄ka iso n̄kpep Bible, edi n̄koyom ndikụt ndudue nnọ mmọ man ntre ukpepn̄kpọ oro ke usụn̄ emi esịt mîdibiomke mi. Edi mma ndifiọk ke n̄kọduọn̄ọ inụn̄ ke nsia ebiọn̄.

NTE BIBLE OKOKPỤHỌREDE UWEM MI: Nte n̄kosụk n̄kpepde mban̄a nti ido uwem oro Abasi oyomde nnyịn idu, ntre ke esịt akamia mi ufen. Mma ntre uda n̄kpọsọn̄ ibọk man esịt edifịna mi aba. Mma n̄kpọn̄ do n̄ka obio efen n̄kafiak ntọn̄ọ ndin̄wọn̄ mmịn nnyụn̄ n̄ka usọrọ. Eketie nte ke kpukpru ini oro ndomode ndida item Bible ndu uwem, ke ana mfiak nduọ nnyịne ke akani ido uwem mi. Bụt ama esinam mi, mma nnyụn̄ nsibọn̄ akam n̄kpe Jehovah ubọk, edi bụt okosụk ananam mi.

Ndikot nte Jehovah akatuade Edidem David mbọm ke enye ama ekesịn efịbe ye Bath-sheba, ama enen̄ede an̄wam mi. David ama enyịme ndudue esie, ikonyụn̄ in̄wanake nditịn̄ ikọ nnyan̄a idem. Enye n̄ko ama osụhọde idem ọbọ ntụnọ. (2 Samuel 12:1-13) Mma nsitie n̄kere mbụk emi kpukpru ini oro n̄kafiakde nduọ, ndien emi ama anam n̄keme ndikpe Jehovah ubọk nte adahado ọnọ mi. Ekem mma mbiere ndisibọn̄ akam mbemiso nsobode idomo utu ke ndibet tutu mma ndodụk idomo mbemiso ndibọn̄ akam; emi ama enen̄ede an̄wam mi.

UFỌN ORO MBỌDE: Mma nsisọp iyatesịt etieti. Edi se idude ke Ephesus 4:29-31 enen̄ede an̄wam mi n̄kụt ufọn editre “iyatesịt ye ifụtesịt.” Nte n̄kosụk n̄kpepde ndikara esịt mi, mma n̄kpep n̄ko ndikara edeme mi. Ke adianade do, ikọ Jesus oro, “Yak ikọ mbufo Ih edi Ih” ama an̄wam mi nsisọn̄ọ nda ke ubiere mi.—Matthew 5:37.

Idem eka mi emi mîkoyomke ndi Ntiense ama ọdọhọ ke mmanam imọ inen̄ede ikop inemesịt. Enye ọkọdọhọ mi ete, “Se ekpepde aban̄a Jehovah anam edi se edide mfịn, idịghe se nnyịn ikekpepde fi anam.” Esịt ama enen̄ede enem mi ndikop enye etịn̄de utọ ikọ oro.

Uwem mi enen̄ede enyene se ọwọrọde idahaemi. Ami ye ebe mi imekpep mme owo Bible kpukpru ini ke ofụri isua usụkkiet idahaemi. Ih, mmesika ufọk mme owo n̄kọkwọrọ ikọ nnọ mmọ, ndien esitie mi nte ke mfọnn̄kan utom oro akanam nnamde edi emi.

 ENYỊN̄: DENIS BUSIGIN

ISUA EMANA: 30

IDỤT: RUSSIA

UTỌ OWO EMI ENYE EKEDIDE: AMA NDIN̄WANA KARATE

NTE N̄KESIDUDE UWEM: N̄kamana ke Perm’, edi n̄kokpon ke Furmanov emi odude ke Ivanovo ke Russia. N̄kpọ nte owo 40,000 ẹdu ke obio emi. Furmanov edi ata ediye obio emi enyenede ndiye eto, ndien ke ini idọk, ikọn̄ eto emi ẹsidi utouto, ekem ẹkabade ẹdi ndatndat. Ke iduọk isua 1980 ye 1990, afai ama okpon etieti ke ikpọ obio. Nnyịn ikenyeneke n̄kpọ. Ufọk nnyịn ama esifaha etieti, sia kpukpru nnyịn—ami, ete ye eka mi, ye ekpri eyeneka mi—ikodụn̄ ke ubetufọk kiet kpọt.

Mma ntọn̄ọ ndikpep en̄wan karate ke ini n̄kedide isua itiaba. Mma mma karate tutu; mma nsịn ibuot nsịn itọn̄ n̄n̄wana karate. N̄kesiwak ndidu ke ufọk usịn̄ede idem nnyụn̄ nnyene mme ufan do. Ntisịm isua 15, mma ndọk n̄kesịm idaha ndibọbọ ndatndat n̄kpahaisịn ke karate, ndien ke isua kiet ama ekebe, mma n̄kpon owo ke karate n̄kesịm idaha ndibọbọ nsan̄nsan̄ n̄kpahaisịn. Mma ntiene ndu ke otu mbon oro ẹkekade mbuba karate ke Russia ye ke Europe ye Asia. Eketie nte ke n̄kpọ ọmọn̄ ọfọn̄, edi kpukpru n̄kpọ ama okpụhọde ke ini n̄kedide isua 17.

Ami ye mme ufan mi ima inam idiọkn̄kpọ ndien ẹma ẹmụm nnyịn. Ẹma ẹbiere n̄kpọkọbi isua iba ẹnọ mi. Uwem ama ọsọn̄ etieti ke ufọk-n̄kpọkọbi. Akpa ini oro n̄kokụtde Bible ekedi ke ufọk-n̄kpọkọbi. Mma n̄kot Genesis, Mme Psalm, ye Obufa Testament. Mma mmụm Akam Ọbọn̄ nsịn ke ibuot nsinyụn̄ ntịn̄ ofụri okoneyo mbemiso ndụkde idap. N̄kekere ke oro ayan̄wam mi.

Ẹma ẹsio mi ke ufọk-n̄kpọkọbi ke isua 2000, edi n̄kọfiọkke se n̄kpadade uwem mi nnam. Mma ntọn̄ọ ndida n̄kpọsọn̄ ibọk. Ikebịghike eka mi ama akpa. Enye ke n̄kama n̄kan ke ofụri uwem mi, n̄kpa esie ama abiak mi ke usụn̄ emi mmen̄kemeke nditịn̄. Nte ededi, mma nsịn ukeme ntre ndida n̄kpọsọn̄ ibọk, mfiak ntọn̄ọ karate. Mma n̄wọrọ n̄kodụn̄ ke akwa obio Ivanovo. Do mma n̄kenyene utom ke ufọkurua oro ẹsinyamde n̄kpọudia. Udiana akwaowo ufọkurua emi ekedi kiet ke otu Mme Ntiense Jehovah. Eyenan̄wan emi ama anam ndusụk n̄kpọ ke Bible an̄wan̄a mi, onyụn̄ anam ndutịm man owo esidi edikpep mi Bible kpukpru ini.

NTE BIBLE OKOKPỤHỌREDE UWEM MI: Ama enen̄ede enem mi ndikụt ke Bible nte ke Abasi aduak ndinam isọn̄ emi akabade Paradise, ndien ama enen̄ede ọdọn̄ mi ndinam se Abasi oyomde man ndot nditiene ndu ke Paradise. Mma ndi ndifiọk ke enyene mme ibet oro Jehovah Abasi oyomde mme owo ẹnịm. Mma ndifiọk n̄ko ke Jehovah oyom n̄kere mban̄a mme owo nnyụn̄ nnyene edu oro mmen̄kenyeneke akpa—utọ nte mfọnido ye emem.

Mma ntọn̄ọ nditie n̄kere kpukpru se Jehovah anamde ọnọ mi—utọ nte ediyak Eyen esie edifak mi osio ke idiọkn̄kpọ—ima Abasi emi ama anam n̄kpụhọde usụn̄ uwem mi. Ke uwụtn̄kpọ, mma n̄kpep ke Psalm 11:5 nte ke  Jehovah imaha afai. Ntre, mma ntre ndise mme edinam TV oro ẹsiode afai ye usua. Okposụkedi oro mîkememke utom, mma ntre karate. Se idude ke 1 Corinth 15:33 ama anam n̄kụt ke edi odụk nsan̄a ye inọ, etiene eyịp. Se ikadade mi ikesịn ke ufọk-n̄kpọkọbi owụt ke itie N̄wed Abasi emi edi ata akpanikọ. Ntre, mma ntre ndidụk ndụk ye mbon oro ẹmade afai afai mbre.

UFỌN ORO MBỌDE: Mmesitịn̄ akpanikọ idahaemi ke ntak emi nnamde ufan ye Mme Ntiense Jehovah nnyụn̄ n̄kpepde Bible. Ke uwụtn̄kpọ, mmekpep ke Mme Hebrew 13:5 ke ana nyụhọ ke se nnyenede nnyụn̄ mfep uma-okụk. Itien̄wed emi an̄wam mi ntre usu nsu ye uyịpinọ.

Nsidaha mme ufan mi mbre mbre. Mmokụt nte idiọkitọn̄ m̀mê ndịk asuande ufan. Mmọfiọk ke mme Ntiense Jehovah idịghe mfọnmma owo, edi mmokụt ke mmọ isidaha ibet Abasi ibre mbre ndien ke mmọ ẹsinam n̄kpọ ye mme owo nte Abasi etemede. Mmenyene nti ufan idahaemi, oro edi, Mme Ntiense Jehovah.

Mmesikere nte uwem mi ekpetiede ke mmen̄kpekekpepke Bible nnyụn̄ ndu uwem nte enye etemede. Ekeme ndidi ẹkpefiak ẹmụm mi ẹkesịn ke ufọk-n̄kpọkọbi, mîdịghe ke n̄kpasan̄a mbak ibak idahaemi. Edi ami ndi emi mfịn ye ata ediye an̄wan ye nditọiren iba, ndien enen̄ede enem kpukpru nnyịn ndinam mme owo ẹfiọk Abasi.

ENYỊN̄: JOSÉ CARLOS PEREIRA DA SILVA

ISUA EMANA: 31

IDỤT: BRAZIL

UTỌ OWO EMI ENYE EKEDIDE: EYEN INỌ, EYEN EKPO

NTE N̄KESIDUDE UWEM: N̄kokpon ke São Paulo—ndedehe obio emi mme ubuene ẹsidụn̄de ke Americana. Nnyịn ikenyeneke eti edin̄wọn̄ mmọn̄ ye eti itie uduọn̄ọ mbio m̀mê itie unam ndek. Ẹkesikot efak nnyịn efak nditọ ekpo.

N̄kọtọn̄ọ ke ekpri n̄kpep ndisịn ntịme nnyụn̄ mbak ibak. Idụhe en̄wan oro mmen̄kesịneke, ntre mme owo ẹkesifefehe mi ke efak nnyịn. Nte n̄kesisịnede ọfọn̄ ye nte n̄kesikamade idem ama enen̄ede owụt ke ndi eyen inọ. Mma nsikpa mmịn ediwak ini. Mma nsitiene akpaneka mi nda n̄kpọsọn̄ ibọk. Ọkpọsọn̄ ibọk okonyụn̄ owot eyeneka mi kiet.

NTE BIBLE OKOKPỤHỌREDE UWEM MI: Mme Ntiense Jehovah ẹma ẹwụt mi ke Bible ke Abasi aduak ndinam ofụri isọn̄ akabade paradise. (Luke 23:42, 43; Ediyarade 21:3, 4) Ẹma ẹwụt mi n̄ko ke mme akpan̄kpa ifiọkke n̄kpọ ndomokiet, ntre ke Abasi isitụhọkede ndiọi owo ke ikan̄ hell. (Ecclesiastes 9:5, 6) Eketie nte ke ẹduọk mi mbịtmbịt mmọn̄ ke ibuọt. Se n̄kekpepde emi mban̄a Abasi ama anam ọdọn̄ mi ndikpụhọde edu mi. Edi ikememke utom ndikpụhọde, akpan akpan nditre  uda n̄kpọsọn̄ ibọk, un̄wọn̄ mmịn, un̄wana en̄wan, ye ndisio inua nnọ owo.

Ikọ apostle Paul ke 1 Corinth 6:9-11 ama enen̄ede esịn udọn̄ ọnọ mi. Itie N̄wed Abasi oro owụt ke ndusụk mme Christian ke eyo Paul ẹma ẹsinam ndusụk ndiọi n̄kpọ oro n̄kesinamde. Edi itien̄wed oro ọdọhọ n̄ko ete: “Ndusụk mbufo ẹketie ntem. Edi ẹmeyet mbufo, ẹmenam mbufo ẹsana, ẹmebat mbufo ke edinen ke enyịn̄ Ọbọn̄ nnyịn Jesus Christ ye ke spirit Abasi nnyịn.” Itien̄wed oro ama anam mfiọk ke ami n̄ko mmekeme ndinam ukpụhọde oro edinemde Abasi esịt.

Ke ini n̄kọtọn̄ọde ndinam ufan ye Mme Ntiense Jehovah, mma mfiọk ke mmọ ẹdi ata mme Christian. Kpa ye oro edide mmọ ẹma ẹfiọk ke n̄kedi eyen inọ, mmọ ẹkesụk ẹdadara mi ẹnyụn̄ ẹyak mi ndu ke otu mmọ.

UFỌN ORO MBỌDE: Ekeme ndidi n̄kpodụhe uwem nsịm idahaemi ke mmen̄kpekekpepke Bible nnyụn̄ nnam ukpụhọde ke uwem mi. Mmokop inemesịt ndin̄wam kiet ke otu nditọeka mi ekpep Bible onyụn̄ etre ndida n̄kpọsọn̄ ibọk. Mmesịn udọn̄ n̄ko nnọ mme iman mi eken ẹtiene ẹkpep Bible. Mmenen̄ede n̄kop inemesịt ndiyak uwem mi nnọ Abasi emi enen̄erede ama nnyịn!

[Se ẹwetde ke ikpọ abisi ke page 24]

“Mma mbiere ndisibọn̄ akam mbemiso nsobode idomo utu ke ndibet tutu mma ndodụk idomo mbemiso ndibọn̄ akam; emi ama enen̄ede an̄wam mi”