Ang Biblia Nagapabag-o sang Kabuhi

Ngaa ang isa ka babayi nga nadulaan sing pagsalig sa relihion nagahinguyang na karon sing madamo nga tion sa pagtudlo sa iban parte sa Dios? Ano ang nagpahulag sa isa ka lalaki nga nanamian sa masingki nga mga hampang nga mangin mahidaiton? Ngaa nagbag-o man ang isa ka lalaki nga nagadroga, nagapahubog, kag nagapangita pirme sing away ukon isa ka street fighter? Basaha ang ila mga panaysayon.

MALIP-OT NGA BIOGRAPIYA

NGALAN: PENELOPE TOPLICESCU

EDAD: 40

PUNGSOD: AUSTRALIA

KABUHI SADTO: NADULAAN SING PAGSALIG SA RELIHION

ANG AKON NAGLIGAD: Natawo ako sa Sydney, Australia, pero nagsaylo kami sa New Guinea sang duha na ako ka tuig. Nag-istar kami sa Rabaul sing mga duha ka tuig kag sa Bougainville sing walo ka tuig. Wala pa sadto sing TV sa New Guinea, amo nga kami sang akon manghod nga lalaki pirme naga-swimming, nagapanalom, kag naga-camping.

Sang mga pulo na ako ka tuig, nangin interesado ako sa relihion. Katoliko si nanay, amo nga ginapaupod niya ako sa mga pagtuon sa Biblia nga ginahimo sang isa sa mga madre sa amon lugar. Sang dies anyos ako, nagpabunyag ako subong Katoliko.

Pero sang nagtin-edyer na ako kag nagbalik kami sa Australia, ginduhaduhaan ko na ang akon mga ginapatihan. Sang hayskul ako, natun-an ko ang ancient history, kag pirme namon ginaistoryahan ni Tatay ang ginsuguran sang relihion kag ang ginakabig namon nga mga mito kag mga leyenda sa Biblia. Sang ulihi, nag-untat ako subong Katoliko.

Sang 16 anyos ako, nagbulagay ang akon mga ginikanan. Binudlayan gid sini si Nanay, amo nga nag-upod ako kay Tatay kag sa iya bag-o nga asawa. Ang akon manghod naman nag-upod kay Nanay, kag nagsaylo sila sa iban nga lugar sa Australia. Grabe gid ang akon kasubo. Mga duha man ka tuig bag-o kami nag-ayuhay liwat ni Nanay. Sini nga tion, nagsugod ako sa pagpahubog kag pagdroga. Kag pirme man ako sa mga party. Nag-untat man ako sa pag-eskwela, nangita sing obra, kag nangin imoral ang akon pagkabuhi sang mga beintehon pa lang ako.

Sang 25 anyos ako, nangin interesado ako liwat sa Biblia. Sa akon bag-o nga ginaubrahan,  nakilala ko si Liene, isa ka matahom nga babayi nga matinahuron gid sa iya boss, bisan pa indi sini maayo ang pagtratar sa iya. Sang ginpamangkot ko sia kon ngaa wala sia nagabato sa iya boss, nagsiling sia nga nagatuon sia sa Biblia upod sa mga Saksi ni Jehova kag ginatinguhaan niya nga sundon ang iya mga natun-an. Gin-agda ako ni Liene nga magtuon sa Biblia upod sa iya. Abi ko anay, matun-an ko ang tanan niya nga nahibaluan sa Biblia sa isa lamang ka oras. Pero sina nga gab-i, natatluhan ka oras si Liene sa pagsabat sang akon mga pamangkot. Nalipay gid ako kay ang tanan niya nga sabat naghalin mismo sa Biblia.

Nadumduman ko pa sang isa ka gab-i, pagkatapos sang amon paghambalanay ni Liene, naga-drive ako sang salakyan pauli kag naugot ako sa Dios kay ulihi ko na nahibaluan ang kamatuoran parte sa iya. Nahibaluan ko nga matinlo sa moral ang mga Saksi, kag nahunahuna ko nga ulihi na ang tanan para bag-uhon ko ang akon batasan. Nahunahuna ko man nga daw indi ko masarangan nga magbantala sa mga balay pareho sa ginahimo sang mga Saksi. Ginpadayon ko ang pagtuon sa Biblia sa mga Saksi kay gusto ko pangitaan sing sala ang ila mga ginatudlo, kag para may rason ako dayon nga indi na mag-upod sa ila. Pero narealisar ko sang ulihi nga wala gid sing sala ang ila ginatudlo.

KON PAANO GINBAG-O SANG BIBLIA ANG AKON KABUHI: Ginakonsiensia pa gid ako samtang nagadugang ang akon natun-an nga mga prinsipio sa Biblia. Para magmulumag-an ang akon sala, gin-untatan ko ang pagdroga. Pero sang nagsaylo ako sa iban nga pungsod, nagpahubog naman ako kag nagkadto pirme sa mga party. Kon ginatinguhaan ko na gani nga sundon ang mga prinsipio sa Biblia, nagabalik naman ako sa akon malain nga ginahimo. Indi ko ini gusto amo nga nagapangamuyo ako kay Jehova. Bisan pa sini, ginakonsiensia gihapon ako.

Nabuligan ako sang natun-an ko kon paano ginpatawad ni Jehova si Hari David sang nakasala sia upod kay Batseba. Ginbaton ni David ang iya sala sang ginlaygayan sia, kag wala niya ginpakamatarong ang iya mga ginhimo. Mapainubuson niya nga ginbaton ang disiplina. (2 Samuel 12:1-13) Kon nakahimo ako sing sala, ginadumdom ko ini nga kasaysayan amo nga mas mahapos para sa akon nga mangayo sing patawad kay Jehova. Pero sang ulihi, nahunahuna ko nga sa baylo nga mangamuyo ako sa tapos ako masulay, dapat ako mangamuyo antes ako masulay, kag nakabulig gid ini.

MGA BENEPISYO: Madali ako maakig sadto. Pero ang Efeso 4:29-31 nakabulig sa akon nga kinahanglan likawan ang “paghinakit kag kaakig kag kasingkal.” Samtang ginapunggan ko ang akon kaakig, natun-an ko nga kontrolon ang akon mga ginahambal. Dugang pa, ang ginsiling ni Jesus nga “dapat nga ang inyo Huo magakahulugan sang Huo” nakabulig man sa akon nga tindugan ang akon mga desisyon.—Mateo 5:37.

Si Nanay, nga namatok anay sa akon pagpakig-upod sa mga Saksi, nagsiling nga ginapabugal gid niya ako. Nagsiling pa sia, “Kabalo ako nga isa na ikaw ka maayo nga tawo subong, indi bangod sang pagpadaku sa imo kundi bangod sang imo natun-an parte kay Jehova.” Nalipay gid ako sa iya ginsiling.

Nabatyagan ko nga may katuyuan kag may pulos na ang akon kabuhi subong. Kami sang akon bana bug-os tion nga nagatudlo sa Biblia sa sulod na sang siam ka tuig. Huo, nagatudlo ako sa balay kag balay, kag amo ini ang pinakamaayo ko nga nahimo.

 MALIP-OT NGA BIOGRAPIYA

NGALAN: DENIS BUSIGIN

EDAD: 30

PUNGSOD: RUSYA

KABUHI SADTO: KARATIDOR

ANG AKON NAGLIGAD: Natawo ako sa siudad sang Perm’ kag nagdaku sa Furmanov, isa ka siudad nga may 40,000 ka pumuluyo sa rehiyon sang Ivanovo, Rusya. Ang Furmanov isa ka matahom nga siudad, kag madamo sing kakahuyan nga may nagadalag ukon nagapula nga mga dahon kon tigragas. Sang dekada otsenta kag nobenta, nagdamo pa gid ang mga krimen sa sini nga siudad. Gamay lang ang kinitaan sang akon pamilya. Nagaistar kami sang akon mga ginikanan kag manghod sa apartment nga may isa lang ka kuarto, amo nga nagaginutok kami.

Nagtuon ako sing karate sang pito ako ka tuig. Nanamian gid ako sini, kag daw amo na lang ini ang akon kabuhi. Yara ako pirme sa gym sa akon libre nga tion kag ang akon mga abyan mahiligon man sa isport. Sang 15 anyos ako, nangin red belter na ako, kag pagkadason nga tuig nangin brown belter naman. Upod ako sa karate team nga nagsambuwa sa Russian kag Eurasian championship tournament. Daw maayo diri ang akon palaabuton, pero nagbag-o ang akon kabuhi sang 17 anyos ako.

Ako kag ang akon mga abyan nakahimo sing krimen kag nadakpan kami. Napriso ako sing duha ka tuig. Mabudlay gid ang kabuhi sa prisuhan. Pero, didto ko una nga nakita ang Biblia. Ginbasa ko ang Genesis, Salmo, kag ang Bag-o nga Katipan. Ginsaulo ko pa gani ang Amay Namon kag ginasulitsulit ko ini kada gab-i antes ako magtulog kay sa pensar ko makabulig ini sa akon.

Ginpagua ako sa prisuhan sang tuig 2000, apang wala gihapon sing direksion ang akon kabuhi. Gani, nagdroga ako. Sa sini man nga tion napatay si Nanay. Palangga ko gid sia kag daw indi ko gid mabaton ang iya pagkadula. Pero gin-untatan ko ang pagdroga kag nagkadto naman liwat sa gym. Nagsaylo man ako sa siudad sang Ivanovo. Nagtrabaho ako didto sa isa ka grocery store. Ang assistant sang nagadumala diri isa sa mga Saksi ni Jehova. Ginpaathag niya sa akon ang pila ka kamatuoran sa Biblia. Dayon nangita sia sang isa ka lalaki nga Saksi para magtudlo sa akon sa Biblia sing regular.

KON PAANO GINBAG-O SANG BIBLIA ANG AKON KABUHI: Natandog gid ako sang natun-an ko ang katuyuan sang Dios nga ang duta mangin paraiso, kag gusto ko gid magkabuhi sa amo sina nga kahimtangan. Sang ulihi nahangpan ko nga may mataas nga talaksan nga ginapatuman si Jehova sa iya mga katawhan. Sang una, ang kaugalingon ko lang pirme ang akon ginapanumdom. Pero natun-an ko nga gusto gali ni Jehova nga ulikdan ko ang iban kag ipakita ang kaayo kag pagkamahidaiton nga wala ko anay ginahimo.

Sang ginpamalandungan ko ang gugma ni Jehova kag ang tanan niya nga ginhimo para sa akon, subong sang paghatag niya sang iya Anak para sa akon mga sala, napahulag ako nga bag-uhon ang akon pagkabuhi. Halimbawa, natun-an ko sa Salmo 11:5 nga ginadumtan ni Jehova ang kasingki. Gani, gin-untatan ko ang pagtan-aw sang masingki nga mga palaguaon sa TV.  Kag bisan pa mabudlay gid, gin-untatan ko ang masingki nga mga isport. Sa bulig sang prinsipio sa 1 Corinto 15:33, naintiendihan ko nga ang akon ginaupdan may daku gid nga impluwensia sa akon. Matuod gid ini nga prinsipio sa akon, kay napriso ako bangod sa akon mga kaupod. Gani, namat-od ako nga indi na makig-upod sa mga tawo nga mahiligon sa masingki nga mga isport.

MGA BENEPISYO: Ang pagpakig-upod sa mga Saksi ni Jehova kag ang pagtuon sa Biblia nakabulig sa akon nga mangin bunayag. Halimbawa, natun-an ko sa Hebreo 13:5 nga kinahanglan ang pagkakontento kag likawan ang gugma sa kuarta. Nakabulig ini sa akon nga indi na magbinutig kag magpangawat.

Ginapabaloran ko gid pirme ang mga pag-abyanay. Sang una, nakita ko ang nagkalaguba nga mga pag-abyanay bangod sa pagkamaiyaiyahon ukon kahadlok. Ang mga Saksi ni Jehova indi perpekto, pero ginarespeto nila ang mga talaksan sang Dios kag ginatinguhaan nga sundon ang iya laygay kon paano pakig-angutan ang iban. Karon, may matuod na ako nga mga abyan.

Wala ako nakahibalo sang akon madangatan kon wala ko gintun-an kag ginsunod ang mga talaksan sa Biblia. Mahimo napriso naman ako liwat ukon nahalitan ko naman ang kabuhi sang iban. Pero karon, may matahom ako nga asawa kag duha ka anak. Nalipay kami subong pamilya nga tudluan ang iban sang kamatuoran parte sa Dios.

MALIP-OT NGA BIOGRAPIYA

NGALAN: JOSÉ CARLOS PEREIRA DA SILVA

EDAD: 31

PUNGSOD: BRAZIL

KABUHI SADTO: STREET FIGHTER

ANG AKON NAGLIGAD: Nagdaku ako sa isa ka iskwater sa Americana, São Paulo. Wala diri sing matinlo nga ilimnan kag kasilyas. Bantog ini nga lugar nga pirme lang may krimen.

Nagdaku ako nga maisog kag mapintas. Pirme lang ako nagaentra sa mga street fight, gani ginakahadlukan ako sang akon mga kaingod. Maisog man ako tulukon bangod sa akon pamayo kag panghulag. Pirme ako nagakatulugan sa kalye sa sobra nga kahulugbon. Nagadroga man ako pareho sa akon mga utod. Ang isa ko pa gani ka utod napatay bangod sa overdose.

KON PAANO GINBAG-O SANG BIBLIA ANG AKON KABUHI: Sang nakilala ko ang mga Saksi ni Jehova, ginpakita nila sa akon sa Biblia nga himuon sang Dios ang duta nga paraiso. (Lucas 23:42, 43; Bugna 21:3, 4) Natun-an ko man nga ang mga patay wala na sing hinalung-ong, gani wala ginasilutan sang Dios ang malain nga mga tawo sa impierno. (Manugwali 9:5, 6) Napaumpawan gid ako sini. Bangod sa akon mga natun-an parte sa Dios, namat-od ako nga bag-uhon ang akon kabuhi. Pero indi mahapos nga untaton ko ang pagdroga, pagpahubog,  pagpangita sing kontra, kag pagpamuyayaw.

Pero, napalig-on gid ako sa ginsiling ni apostol Pablo sa 1 Corinto 6:9-11. Ini nga mga bersikulo nagapakita nga ang mga Cristiano sang una may malain man nga mga batasan pareho sa akon. Pero nagasiling man ini: “Amo sina anay ang pila sa inyo. Apang ginhugasan na kamo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo kag sang espiritu sang aton Dios.” Ini nga bersikulo nagahatag sa akon sing paglaum nga masarangan ko nga magbag-o agod mapahalipay ang Dios.

Sang nakig-upod ako sa mga Saksi ni Jehova, nakumbinsi ako nga sila gid ang matuod nga Cristiano. Nahibal-an nila nga maisog kag mapintas ako anay, pero gin-abiabi gid nila ako kag ginpalangga.

MGA BENEPISYO: Kon wala ako nakatuon sa Biblia kag kon wala ko ginbag-o ang akon kabuhi, patay na ako siguro subong. Pero, nalipay ako subong nga nabuligan ko ang akon utod nga magtuon sa Biblia kag mag-untat sa pagdroga. Gin-agda ko man nga magtuon sa Biblia ang akon mga paryente. Nagapasalamat gid ako nga gindedikar ko ang akon kabuhi nga mag-alagad sa Dios nga nagapalangga gid sa akon!

[Blurb sa pahina 24]

“Nahunahuna ko nga sa baylo nga mangamuyo ako sa tapos ako masulay, dapat ako mangamuyo antes ako masulay, kag nakabulig gid ini”