Bayibolu Yahimpaña Yihandilu Yawantu

Chumanyi chaletesha mumbanda walekeli kukuhwelela munsakililu kutachika kukwasha chikupu amakwawu kudiza hadi Nzambi? Chumanyi chakwashili iyala waswejeli kukeña yisela yandombu yaheli ndombu? Indi iyala wanwineña yitumbu yashetana, kusweja kunwa walwa, nikuzuña nawantu munyikwakwa watwesheli ñahi kuhimpa chihandilu chindi? Tañenu nsañu yashimwinuwu.

CHIHANDILU CHINDI

IJINA: PENELOPE TOPLICESCU

YAAKA: 40

ITUÑA KWAFUMAYI: AUSTRALIA

CHIHANDILU CHAKUNYIMA: NSAKILILU YAMUNEÑESHELI

MPINJI YAKUNYIMA: Navwalikilili mumbaka yaSydney, muAustralia, ilaña chinashikijili yaaka yiyedi, chisaka chetu chabuukilili kuNew Guinea. Twashakamini mumbaka yaRabaul kwakwihi nayaaka yiyedi nawa muBougainville twashakaminumu yaaka yitanu nayisatu. Hayina mpinji, muNew Guinea mwadiña mwosi TV, dichi ami nimana kwami twahemeneneña hohu hanji, kusala, nikujimina hamenji iku tunavwali mwakonena mpepela, nikwila mateeku.

Chinashikili kwakwihi nayaaka ikumi yakuvwalika, natachikili kukeña kwiluka nsakililu. Amama adiña aKatolika, dichi alenjeli nawu niyeña nakudiza Bayibolu natañishi wamumbanda. Nekalili Katolika nawa ampapatishili nayaaka ikumi.

Hela chochu, chitwafuntili kuAustralia nashikili muyaaka yawukankaña, nawa natachikili kujinoka yuma yandizishiluwu kutalisha hansakililu. Hampinji yinadiña kushikola yasekondali, nadizili hansañu yakunyaka, nawa ami niatata twahanjekeleña nankashi hantachikilu yansakililu nihansañu yitwamweneña netu hituheka nitwanu twekala muBayibolu. Nkumininaku, nalekeli kuya muKatolika.

Anvwali jami ambukili hampinji yinadiña nayaaka 16. Chumichi chayikatileña amama kumuchima, nawa nayili nakushakama nawatata nimumbanda akeñeleña kusumbulawu. Mana kwami washakamineña nawaMama, nawa ayili nakushakama kumbaka yacheñi. Haniyi mpinji natachikili kutiya wuudi. Mwahitili yaaka yiyedi hakwila nawu nitachiki cheñi kuhanjeka nawamama. Natachikili kunwa walwa, kuzatisha yitumbu yashetana, nikuwanika kuyidika. Nalekeli shikola, nitachika nikuzata, nawa muyaaka yami yakutachika muma 20 nadiña nakwila yuma yatama.

 Chinashikijili yaaka 25, natachikili kutoñojoka cheñi haBayibolu. Natachikili kuzata mudimu wacheñi nawa nadilukili naLiene, kansi wamumbanda walubanji walemesheleña mukulumpi windi wamudimu, hela chakwila wamumwesheleña ikezeñi. Chinamwihwili muloña wabulileñayi kumwakulayi chatama, wanlejeli nindi wadizileña Bayibolu nawaYinsahu jaYehova nawa wafwilileña kuzatisha nshimbi jamuBayibolu muchihandilu chindi. Dichi Liene wanlejeli nindi nitachiki kudiza nindi Bayibolu. Muloña wakubula kwiluka mwatalishiliyi, natoñojokeli nami watalishili mukwila nindi nidizi yuma yejima yelukiliyi yamuBayibolu muora yimu. Hawufuku weniwu, Liene wakwili malwihu inamwihwileña kutalisha haBayibolu hadi maora asatu. Nazañaleli chikupu muloña wakwili malwihu ejima kuhitila mukuzatisha Bayibolu.

Inakwanuka chinafuntileña kwitala hawufuku weniwu iku nakwendesha motoka hanyima yakuhanjeka naLiene, naneñeli chikupu muloña Nzambi hanleñeleli kudiza chalala swañuku. Nelukili nami aYinsahu ashakamaña chihandilu chakadi majilu nawa natoñojokeli nami hinateli kuhimpa yililu yamuku. Cheñi natoñojokeli nami hinakatwesha kushimwina kwitala nikwitala neyi chashimwinañawu aYinsahuku. Natwalekeluhu kudiza Bayibolu nawaYinsahu, ilaña nakeñeleña kuwana yiluwa muntañishilu yawu kulonda nileki kudiza nawu. Ifuku dimu natoñojokeli nami hinakawana chiluwa muntañishilu yawuku.

BAYIBOLU CHIYAHIMPILI CHIHANDILU CHAMI: Chinatwalekeluhu kudiza nshimbi yamuBayibolu yahosha hayililu yayiwahi, chinleji chami chatwalekeluhu kunkabisha. Nalekeli kunwa yitumbu yashetana kulonda chinleji chami chileki kunkabisha. Ilaña nabuukilili kwituña dacheñi nakushakamaku hadi mpinji yantesha nawa natachikili cheñi kuwanika kuyidika nikunwa walwa. Nelileña chinatachika kuyilaku hambidi mukulondela nshimbi yamuBayibolu, kutwala muna nitachika cheñi kukoña yuma yakunyima. Hamuloña wansonyi, nalombeleña kudi Yehova, ilaña hohamu natiyileña kutama.

Chinadizili hachiluwa chakoñeli Mwanta Davidi naBatisheba nichayanakenenuwu kudi Yehova, chankwashili nankashi. Davidi hadiña nawomaku, nawa chamukwashili kwiteja chiluwa chindi hampinji yamufumbiluwu, chakadi kudiyiñisha yomweni. Nawa mukudizoza wetejeli mwamufumbiluwu. (2 Samweli 12:1-13) Mpinji yejima yinaluwañesheleña, nanukileña iyi nsañu nawa chadiña chaswayi kulomba kwanakena kudi Yehova. Kuhiñahu nalombeleña henohu kanda niputoli chatela kulomba hanyima yakuputola, kwila mwenimu kwankwashileña chikupu.

YUMA YINAHETELUMU: Mpinji yejima nazuwileña swayi. Hela chochu, nsona yaAefwesesa 4:29-31 yankwashili kwiluka nami natela kutondolwela ‘ndulu, nindombu, nikuzuwa.’ Chinadiyuulileña kulonda kubula kuzuwa swañu, nadizili kuyuula idimi dami. Kubombelahu, kufumba kwaYesu kwakwila nawu “Chimukuhoshaña, kuminenu dakwila nenu, Eña, eña; Nehi, nehi” kwankwashileña kwiluka mwakwilila.—Matewu 5:37.

Amama, adiña nakunkañesha kudikunda nawaYinsahu, chimwahitili mpinji anlejeli nawu nayizañalesheleña chikupu. Ahosheli nawu, “Neluki nami wunekali mumbanda walumbuluka bayi neyi hamuloña wankulilu yeyuku, ilaña hamuloña wayuma yiwunadizi hadi Yehova.” Nazañaleli chikupu hakutiya mazu wenawa.

Ichi neluki nami wumi wami walema. Hayaaka yitanu nayiwana yinahituhu, ami nimfumwami tunazati mudimu wampinji yejima wakutañisha Bayibolu. Eñañi, nayaña nakushimwina kwitala nikwitala, nawa neluki nami iwu dimudimu wawuwahi chikupu wunatela kuzataña.

 CHIHANDILU CHINDI

IJINA: DENIS BUSIGIN

YAAKA: 30

ITUÑA KWAFUMAYI: RUSSIA

CHIHANDILU CHAKUNYIMA: MUKWAKUHEMA CHISELA CHAKALATI

MPINJI YAKUNYIMA: Navwalikilili mumusumba waPerm’ nawa nakulilili muFurmanov, mumusumba mwekala antu akushika ku 40,000 mwiluña daIvanovo, muRussia. Furmanov himusumba walubanji mwekala nyitondu yayiwahi yakenukaña wuluya wuchinana niwakunduluka hanyilemba. Muyaaka yamuma 1980 nimuma 1990 muniwu musumba mwaswejeli wubanji. Chisaka chetu hichadiña namali amavuluku nawa chahandileña chihandilu chapela. Nashakamineña nawanvwali jami nimwanyikami weyala mukapeka kamu, dichi mwakeheli chikupu.

Chinashikijili yaaka yitanu nayiyedi, natachikili kudiza chisela chakalati. Ichi chisela nachikeñeli nankashi; wumi wejima washindameneni hakalati. Mpinji yami yejima yakunooka yamaninineña mukapeka mwakudinyikila mujimba, dichi amabwambu jami ejima adiña akwayisela. Chinashikijili yaaka 15, nashikili hachifulu chahewulu chikupu muchisela chakalati. Nadiña hakachi kezanvu dakalati adibecheleña mwituña daRussia niEurasian. Natoñojokeli nami nakahandaña chiwahi kumbidi, ilaña chinashikijili yaaka 17, chihandilu chami chahimpikili.

Ami niamabwambu jami twakoñeli muloña nawa atukasili. Ankasili hadi yaaka yiyedi mukaleya. Chihandilu chamukaleya chakalili chikupu. Hela chochu, hampinji yinadiña mukaleya dihinamweni Bayibolu katachi. Natañili mukanda waKutachika, Masamu, ninyikanda yaChitiyañenu Chachiha. Nahembeleli kumutu kulomba kwekala haMatewu 6:9 nawa nalombeleña mpinji yejima nawufuku hakukama, natoñojokeleña nami hadaha chikunkwashaku.

Añumbiluku mukaleya muchaaka cha 2000, ilaña hinelukili chuma chinateleli kwila muchihandilu chamuku nawa natoñojokeleña nami kwosi chinatela kukoña. Natachikili kunwa yitumbu yashetana. Haniyi mpinji dihafwili amama. Nadiña nayikeña chikupu, nawa chadiña chuma chakala kuumika. Hela chochu, natwesheli kuleka kunwa yitumbu yashetana nawa natachikili cheñi kuyaña kukapeka mwakudinyikila mujimba. Nabuukilili cheñi kumusumba waIvanovo. Natachikili kuzata musitolu yayakudya. Chinlonda chamukulumpi wasitolu yeniyi wadiña hiChinsahu chaYehova. Wanlumbulwilili chalala chamuBayibolu nawa walejeli chinsahu mukwawu kulonda yandizisheña Bayibolu mpinji yejima.

BAYIBOLU CHIYAHIMPILI CHIHANDILU CHAMI: Hampinji yinadizileña Bayibolu, nazañaleli chikupu chinadizili hakufuukula kwaNzambi kwakubalumuna iseki kwikala paradisa, nawa nafwilileña kushikahu kulonda nakekali muparadisa. Cheñi nelukili nami Yehova Nzambi wemika nshimbi jaloña jakeñañayi nindi antu ajilondeleña. Muchihandilu chami nadakameneneña hohu ami aweni. Ilaña nadizili nami Yehova wakeñeleña nindi nakameneña antu amakwawu nikwikala nayililu yinabulili haniyi mpinji, yililu yidi neyi luwi nikukeña kuwunda.

Chinatachikili kutoñojoka chikupu hayuma yejima yankoñeleliyi Yehova, yidi neyi kuhana Mwanindi neyi mulambu wefutu danyiloña hanshidi jami, kuhameka kukeña kwaNzambi kwaleñeleli nihimpi chihandilu chami. Chakutalilahu, nadizili hansona yaMasamu 11:5 nawu Yehova wahela ndombu. Dichi nalekeli kutalaña  maprogiramu aha TV amwekesheleña ndombu nikuhelañana. Hela chakwila chankalilili chikupu, nalekeli yisela yandombu. Nshimbi yekala ha 1 Akorinda 15:33 yankwashili kwiluka nami antu inadikundilinawu adi kunluwañesha chikupu. Hamuloña wakwila ankasili mukaleya chamwekesheli nawu iyi nshimbi yalala. Dichi nafuukwiluhu kuleka kudikunda nawantu akeñeli chikupu yisela yandombu.

YUMA YINAHETELUMU: Kudikunda nawaYinsahu jaYehova nikudiza Bayibolu kunankwashi kwikala muntu wakashinshi. Chakutalilahu, hansona yaAheberu 13:5, nadizili nami natela kuzañalala nayuma yinikweti nikubula kusweja kukeña mali. Kuzatisha iku kufumba kunankwashi kuleka kutwamba nikwiya.

Mpinji yejima nalemesha wubwambu. Kumpinji yakunyima, namweneña wubwambu chiwamanineña hamuloña walwisu hela woma. A Yinsahu jaYehova hiyawaninaku, ilaña neluki nami alemesha nshimbi jaNzambi nawa afwilaña chikupu kuzatisha kufumba kwindi munshakaminu yawu nawakwawu. Nawani amabwambu amawahi hadi aYinsahu jaYehova.

Neluki wanyi chihandilu chami chichadi kwikala neyi nabulili kudiza kwovwahila nshimbi jamuBayibolu. Mutenowu kachi ankasa dehi mukaleya hela nakatishaña nikuyandisha antu. Chayinu mpinji, nikweti mumbanda wamuwahi nianyana awamayala ayedi, nawa chisaka chejima, twatiyaña kuwaha chikupu kukwasha antu amakwawu kudiza walala hadi Nzambi.

CHIHANDILU CHINDI

IJINA: JOSÉ CARLOS PEREIRA DA SILVA

YAAKA: 31

ITUÑA KWAFUMAYI: BRAZIL

CHIHANDILU CHAKUNYIMA: MUKWAMADOMBU MUNYIKWAKWA

MPINJI YAKUNYIMA: Nakulilili mwiluña mwasweja majilu damumusumba waAmericana, muSão Paulo. Mwiluña mwenimu himwadiña menji amawahi akunwa hela nyipayipi mwakuhitila majiluku. Mwiluña denidi mwadiña antu akwamadombu nawa mwenzeli wubanji.

Kufuma kuwansi wami, nadiña mukwandombu nawa wazuwa chikupu. Mpinji yejima nazuñileña nawantu munyikwakwa, dichi antu amuchituñilu antiyileña woma. Nvwalilu yami, mmwekenu niyililu yamwekesheleña wubanji. Nanwineña walwa chikupu, sampu nihwidila. Nanwineña yitumbu yashetana neyi chanwineñawu amana kwami. Kafwampi, mana kwami wafwili hamuloña wakunwa yitumbu yayivulu.

BAYIBOLU CHIYAHIMPILI CHIHANDILU CHAMI: Chinadibulakeni nawaYinsahu jaYehova, antañilili muBayibolu nawu Nzambi wakabalumuna dinu iseki kwikala paradisa. (Luka 23:42, 43; Chimwekeshu 21:3, 4) Nadizili cheñi nami afu hiyeluka chuma chidi chejimaku, dichi Nzambi hababeshaña antu mukesi kaheluku. (Mukwakutaŋisha 9:5, 6) Chumichi chankwashili hama. Yuma yinadizili hadi Nzambi yanleñeleli chikupu kuhimpa chihandilu chami. Ilaña hichadiña chaswayi kuhimpa chihandilu chami—chidi neyi kuleka kunwa yitumbu yashetana,  kunwa walwa, madombu, nichaaku chami chakuzatisha nhoshelu yatamaku.

Hela chochu, mazu akapostolu Pawulu asonekawu ha 1 Akorinda 6:9-11 ankolesheli chikupu. Iyi nsona yahosha nawu akwaKristu amuyaaka nkulakaji yakusambila hampinji yimu niwena adiña nayaaku yatama neyi yinadiña nayu. Hela chochu, mavasi wenawa ahosha cheñi nawu: ‘Ninenu amakwawu dichi chimwadiñi. Ilana ayiwelesheli, ayijilikili, ayilishili aloña mwijina daMwanta Yesu Kristu, nimudi spiritu yaNzambi yetu.’ Awa mazu anletesheli nikuhweleli nami, anami nawa nateli kuhimpa chihandilu chami kulonda kumuzañalesha Nzambi.

Chinatachikili kudikunda nawaYinsahu jaYehova, nelukili chikupu nami chihandilu chawu chamwekesheleña nawu hiyakwaKristu alala. Elukili nawu nadiña samadombu, yililu yami yakuzuwa, ilaña antambwilili nachisambu nikudikundañanawu.

YUMA YINAHETELUMU: Neyi nabulili kudiza Bayibolu nikuhimpa chihandilu chami, mutenowu chiña nafwa dehi. Ilaña, nadiña nakukooleka kwakukwasha mana kwami kudiza Bayibolu nikuleka kunwa yitumbu yashetana. Cheñi nakoleshi antaña jami kutachika kudiza Bayibolu. Nidi namuzañalu chikupu muloña nadihani kulonda kumukalakela Nzambi, watwakamenaña nankashi.

[Mazu ekoku adi hefu 23]

“Nalombeleña henohu kanda niputoli chatela kulomba hanyima yakuputola, nawa ichi chankwashileña chikupu”