Beibele e Fetoša Maphelo

Ke ka baka la’ng mosadi yo a bego a lahlegetšwe ke tumelo bodumeding ga bjale a fetša nako ya gagwe e ntši a thuša ba bangwe go ithuta ka Modimo? Ke’ng seo se tutueleditšego monna yoo a bego a rata dipapadi tša bošoro go rata khutšo? Ke bjang monna yo a bego a lemaletše dihlare-tagi, go nwa le yo e bego e le ntwa-dumela a ilego a kgona go fetoša bophelo bja gagwe? Ela hloko seo ba se bolelago.

PEGO YA BOPHELO BJA GAGWE

LEINA: PENELOPE TOPLICESCU

NYWAGA: 40

NAGA: AUSTRALIA

BOPHELO BJA PELE E E-BA MOKRISTE: GO NYAMIŠWA KE BODUMEDI

BOPHELO BJA-KA BJA NAKONG E FETILEGO: Ke belegetšwe Sydney, Australia, eupša ge ke be ke e-na le nywaga e mebedi lapa lešo le ile la hudugela New Guinea. Re ile ra dula Rabaul mo e nyakilego go ba nywaga e mebedi, ke moka ra dula Bougainville nywaga e seswai. Mehleng yeo go be go se na thelebišene kua New Guinea, ka gona nna le moratho wa-ka re gotše re rata go bapalela ka ntle—re rutha, le go rutha re tsentše phaephe ya go re thuša go hema gotee le go hloma mešaša.

Ge ke be ke e-na le nywaga e lesome, ke ile ka thoma go kgahlegela bodumedi. Mma e be e le Mokatholika, ka gona o ile a šišinya gore ke tsene diklase tša Beibele le moitlami yo mongwe yo a dulago lefelong la rena. Ke ile ka amogela Bokatholika gomme ka kolobetšwa ke e-na le nywaga e lesome.

Lega go le bjalo, ka morago ga gore re boele Australia le go tsena ga-ka mahlalagading, ke ile ka thoma go belaela ditumelo tša-ka. Nakong ya ge ke le sekolong se se phagamego, ke ile ka ithuta histori ya bogologolo, gomme nna le tate re bile le dipoledišano tše ditelele mabapi le mathomo a bodumedi le seo re bego re se lebelela e le dinonwane tša ka Beibeleng. Mafelelong, ke ile ka tlogela Bokatholika.

Batswadi ba-ka ba ile ba arogana ge ke be ke e-na le nywaga e 16. Mma o be a phela ka thata, gomme ke ile ka feleletša ka go dula le tate gotee le mmeeletšwa wa gagwe. Kgaetšedi’a-ka o ile dula le Mma, gomme ba ile ba hudugela karolong e nngwe ya Australia. Nakong ye ya bophelo bja-ka ke ile ka ikwa ke lewa ke bodutu kudu. Go ntšere nywaga e mebedi pele ke gwerana le mma gape. Ke ile ka thoma go nwa bjala, go diriša dihlare-tagi le go ya meletlong. Ke ile ka tlogela sekolo, ka  hwetša mošomo gomme ka senya nywaga ya-ka ya mathomong ya bo-20 ke phela bophelo bjo bo gobogilego.

Ge ke e-ba le nywaga e 25, ke ile ka thoma go nagana ka Beibele gape. Ke ile ka thoma mošomo o mofsa gomme ka kopana le Liene, ngwanenyana yo mobotse yoo a bego a bontšha mothwadi wa gagwe botho ka mehla, gaešita le ge mothwadi yoo a be a sa mo sware gabotse. Ge ke mmotšiša gore ke ka baka la eng a sa itefeletše go mothwadi wa gagwe, o ile a hlalosa gore o be a ithuta Beibele le Dihlatse tša Jehofa gomme o be a leka go diriša melao ya motheo ya Beibele bophelong bja gagwe. Liene o ile a kgopela go ithuta Beibele le nna. Ka ge ke be ke sa kwešiše seo a bego a se bolela, ke be ke nagana gore o be a re nka ithuta sohle seo a bego a se tseba ka Beibele ka iri e tee feela. Bošegong bjoo, Liene o ile a fetša diiri tše tharo a araba dipotšišo tša-ka mabapi le Beibele. Ke ile ka kgahlwa ke gore dikarabo ka moka tšeo a nneilego tšona di be di thekgwa ke mangwalo a Beibele.

Ke gopola ge ke be ke otlela ke lebile gae mantšiboeng ao ka morago ga go boledišana le Liene gomme ke ikwa ke galefetše Modimo bakeng sa go se ntumelele go ithuta therešo ka yena ka pela. Ke be ke tseba gore Dihlatse di phela bophelo bjo bo hwekilego boitshwarong gomme ke nagana gore ke be nka se sa kgona go fetoša mekgwa ya-ka. Le gona ke be ke nagana gore ke be nka se kgone go dira boboledi ka ntlo le ntlo go swana le Dihlatse. Ke ile ka tšwela pele ke ithuta Beibele le Dihlatse, eupša maikemišetšo a-ka e be e le go nyaka diphošo dithutong tša bona e le gore ke kgaotše go ithuta le bona ke e-na le letswalo le lebotse. Ka letšatši le lengwe ke ile ka lemoga gore ke be nka se hwetše phošo dithutong tša bona.

KAMOO BEIBELE E FETOTŠEGO BOPHELO BJA-KA: Ge ke be ke dutše ke ithuta ka ditekanyetšo tša Beibele tša boitshwaro, letswalo la-ka le be le ntshwenya le go feta. Ke ile ka tlogela go diriša dihlare-tagi e le gore ke se ikwe ke e-na le molato. Eupša ke ile ka hudugela moše wa mawatle gomme ka ikhwetša ke boetše mokgweng wa go ya meletlong le go nwa. Go bonagala eka nako le nako ge ke be ke leka go dira tšwelopele ya go phela ka go dumelelana le melao ya motheo ya Beibele, ke be ke boela mekgweng ya-ka ya kgale. Ke lewa ke dihlong, ke be ke rapela Jehofa, eupša ke be ke sa ikwa ke e-na le molato.

Ge ke be ke ithuta ka tsela yeo Kgoši Dafida a ilego a dirišana le Batseba le kamoo Jehofa a ilego a dirišana le bona ka kgaugelo, seo se ile sa nthuša. Dafida o be a e-na le sebete ka mo go lekanego moo a ilego a amogela phošo ya gagwe ge a be a newa keletšo, gomme ga se a ka a leka go lokafatša ditiro tša gagwe. Le gona o ile a amogela tayo ka boikokobetšo. (2 Samuele 12:1-13) Nako le nako ge ke be ke palelwa, ke ile ka nagana ka pego yeo gomme go be go e-ba bonolo gore ke kgopele Jehofa tshwarelo. Ke moka ke ile ka dira phetho ya go rapela pele ke ineela molekong go e na le go rapela ka morago, gomme se se ile sa dira phapano e kgolo.

KAMOO KE HOLEGILEGO KA GONA: Ke be ke le motho yo a felago pelo. Lega go le bjalo, lengwalo la Baefeso 4:29-31 le nthušitše gore ke bone go nyakega ga gore ke pheme “kgalako yohle e bošula le bogale.” Ge ke be ke dutše ke ithuta go laola kgalefo ya-ka, ke ile ka ithuta le go laola leleme la-ka. Go oketša moo, keletšo ya Jesu e rego “anke Ee ya lena e be Ee” e nthušitše go ba motho yo a gatago mogato.—Mateo 5:37.

Mma, yoo mathomong a bego a ganetša go kopana ga-ka le Dihlatse, ka morago o ile a mpotša gore o be a ikgantšha ka nna. O ile a ba a re, “Ke a tseba gore o bile mosadi yo o lego yena, e sego ka baka la tsela yeo o godišitšwego ka yona, eupša ka baka la seo o ithutilego sona ka Jehofa.” Ke ile ka thabišwa kudu ke go mo kwa a rialo.

Eupša ga bjale ke bona gore bophelo bja-ka bo na le morero. Nywageng e senyane e fetilego, nna le monna wa-ka re be re dutše re le barutiši ba nako e tletšego ba Beibele. Ee, ke dira boboledi ka ntlo le ntlo, gomme ga bjale ke bona gore wo ke modiro o putsago kudu woo ke ilego ka o dira.

PEGO YA BOPHELO BJA GAGWE

LEINA: DENIS BUSIGIN

NYWAGA: 30

NAGA: RUSSIA

BOPHELO BJA PELE E E-BA MOKRISTE: MORATI WA KARATE

BOPHELO BJA-KA BJA NAKONG E FETILEGO: Ke belegetšwe motseng wa Perm’ gomme ka godišetšwa Furmanov, motseng o nago le badudi ba ka bago ba 40 000 karolong ya Ivanovo, Russia. Furmanov ke motse o bogegago woo o nago le mehlare e mentši e mebotse yeo e fetogago e tshehla le e mehwibidu lehlabula. Ka bo-1980 le bo-1990, bosenyi bo ile bja oketšega motseng woo. Lapa lešo le be le phela ka tšhelete e nyenyane. Ke be ke dula le batswadi ba-ka le moratho wa-ka foleteng e nago le phapoši e tee, ka go rialo re be re pitlagana.

Ge ke be ke e-na le nywaga e šupa, ke ile ka thoma go ithuta karate. Ke be ke rata papadi ye; bophelo bja-ka ka moka bo be bo dikologile go yona. Ke be ke fetša nako ya-ka e ntši ke le boithobollong, ka gona bagwera ba-ka ka moka e be e le bo-radipapadi. Ge ke e-ba le nywaga e 15, ke be ke šetše ke hweditše lepanta le lehwibidu ka karate gomme ngwageng o latetšego, ka hwetša lepanta le letsootho (brown). Ke be ke le karolo ya sehlopha sa karate seo se bego se tsenela diphadišano tša dinkgwete tša Russia le Eurasia. Bokamoso bo be bo bonagala bo phadima, eupša ge ke be ke e-na le nywaga e 17, bophelo bja-ka ka moka bo ile bja fetoga.

Nna le bangwe ba bagwera ba-ka re ile ra dira bosenyi gomme ra išwa kgolegong. Ke ile ka ahlolelwa nywaga e mebedi kgolegong. Bophelo bja kgolegong bo be bo le thata. Lega go le bjalo, ke bone Beibele la mathomo ge ke be ke le kgolegong. Ke badile Genesi, Dipsalme le Testamente e Mpsha. Ke ile ka ba ka swara thapelo ya Tatawešo ka hlogo le go e boeletša bošegong bjo bongwe le bjo bongwe pele ke robala, ke nagana gore go dira bjalo go be go ka nthuša ka tsela e itšego.

Ke ile ka lokollwa kgolegong ka 2000, eupša bophelo bja-ka bo be bo hloka tlhahlo le morero. Ke ile thoma go diriša dihlare-tagi gampe. Ka nako yeo mma o be a šetše a hwile. Ke be ke mo rata kudu, gomme e bile tahlegelo e kgolo kudu go nna. Lega go le bjalo, ke ile ka kgona go kgaotša go diriša dihlare-tagi gomme ka thoma go ya boithobollong gape. Ke ile ka ba ka hudugela motseng wa Ivanovo. Moo ke ile ka hwetša mošomo lebenkeleng la go rekiša dijo. Mothuši yo mogolo wa ka lebenkeleng leo e be e le yo mongwe wa Dihlatse tša Jehofa. O ntlhaloseditše tše dingwe tša ditherešo tša motheo tša Beibele gomme a rulaganya gore Hlatse e nngwe e ithute Beibele le nna ka mehla.

KAMOO BEIBELE E FETOTŠEGO BOPHELO BJA-KA: Ge ke be ke ithuta Beibele, ke ile ka tutueletšega ka mo go tseneletšego ge ke be ke ithuta ka morero wa Modimo wa go dira lefase paradeise, gomme ke be ke nyaka go swanelegela go ba karolo ya bokamoso bjoo. Gatee-tee ke ile ka lemoga gore Jehofa Modimo o na le ditekanyetšo tše phagamego tšeo a nyakago gore batho ba phele ka tšona. Ke feditše nako e ntši ya bophelo bja-ka ke nagana ka nna feela. Eupša ke ithutile gore Jehofa o be a nyaka gore ke nagane ka batho ba bangwe le go hlagolela dika tšeo ke bego ke se natšo ka nako yeo—dika tšeo di akaretšago botho le go rata khutšo.

Ge ke be ke thoma go nagana ka mo go tseneletšego ka seo Jehofa a ntiretšego sona—bjalo ka go neela ka Morwa wa gagwe e le sehlabelo bakeng sa dibe tša-ka—go leboga Modimo bakeng sa lerato la gagwe go ntutueleditše go dira diphetogo bophelong bja-ka. Ka mohlala, ke ithutile go tšwa go  Psalme 11:5 gore Jehofa o hloile bošoro. Ka gona ke ile ka kgaotša go bogela mananeo a thelebišene ao a kgothaletšago bošoro le lehloyo. Le gona ke ile ka tlogela dipapadi tša bošoro, eupša go be go se bonolo. Molao wa motheo wo o hwetšagalago go 1 Bakorinthe 15:33 o nthušitše go lemoga gore bao ke kgethago go gwerana le bona ba tla ba le tutuetšo e kgolo go nna. Taba ya gore ke ile ka golegwa ke bohlatse bja molao woo wa motheo. Ka gona ke ile ka dira phetho ya go kgaotša go gwerana le bao maphelo a bona a theilwego dipapading tša bošoro.

KAMOO KE ILEGO KA HOLEGA KA GONA: Go kopanela le Dihlatse tša Jehofa gotee le go ithuta Beibele go nthušitše go ba motho yo a botegago. Ka mohlala, ke ile ka ithuta mabapi le go nyakega ga gore ke kgotsofale le go lwantšhana le lerato la tšhelete go tšwa go Baheberu 13:5. Go diriša keletšo ye go nthušitše go phema go bolela maaka le go utswa.

Ke be ke le motho wa go tšeela segwera godimo. Nakong e fetilego, ke ile ka bona segwera sa batho se fela ka baka la megabaru le poifo. Dihlatse tša Jehofa ga se tša phethagala, eupša ke ile ka ithuta gore di hlompha ditekanyetšo tša Modimo le go leka ka thata go diriša keletšo ya gagwe ge di dirišana le ba bangwe. Gare ga tšona, ke na le bagwera ba kgonthe.

Ke ipotšiša gore bophelo bja-ka bo ka be bo le bjang ge nkabe ke sa ka ka ithuta go phela ka go dumelelana le ditekanyetšo tša Beibele. Mohlomongwe nkabe ke boetše kgolegong goba ke tlaiša le go kweša batho ba bangwe bohloko. Lega go le bjalo, ga bjale ke na le mosadi yo ke mo ratago le barwa ba babedi, gomme re le lapa, re hwetša lethabo la kgonthe ka go thuša ba bangwe go ithuta therešo ka Modimo.

PEGO YA BOPHELO BJA GAGWE

LEINA: JOSÉ CARLOS PEREIRA DA SILVA

NYWAGA: 31

NAGA: BRAZIL

BOPHELO BJA PELE E E-BA MOKRISTE: NTWA-DUMELA

BOPHELO BJA-KA BJA NAKONG E FETILEGO: Ke goletše mekutwaneng e šilafetšego ya Americana, kua São Paulo. Re be re se na meetse a hlwekilego a go nwa goba tshepedišo e swanetšego ya go lahla ditšhila. Lefelo leo le be le tumile ka bošoro e bile le tletše ka bosenyi.

Ke gotše ke rata bošoro e bile ke le yo bogale. Ke be ke dula ke e-lwa le batho, ka gona batho ba tikologong yeo ba be ba ntšhaba. Moaparo wa-ka, tsela ya go itokiša le kamoo ke itshwarago ka gona di be di dira gore ke bonagale ke le motho yo kotsi. Ke be ke e-nwa kudu, gantši go fihlela ke idibala. Go swana le bana bešo, ke be ke diriša dihlare-tagi. Ge e le gabotse, ngwanešo yo mongwe o ile a hwa ka baka go diriša dihlare-tagi ka mo go feteletšego.

KAMOO BEIBELE E FETOTŠEGO BOPHELO BJA-KA: Ge ke kopana le Dihlatse tša Jehofa, di ile tša mpontšha go tšwa Beibeleng gore Modimo o tla dira lefase ka moka paradeise. (Luka 23:42, 43; Kutollo 21:3, 4) Ke ile ka ithuta gore bahu ga kwe selo, ka gona Modimo ga a otle batho ba babe mollong wa dihele. (Mmoledi 9:5, 6) Se se ile sa nkimolla e le ruri. Seo ke ithutilego sona ka Modimo se nneile kganyogo e matla ya go fetoša bophelo bja-ka. Eupša go be go se bonolo go dira diphetogo tšeo, e lego go tlogela go diriša dihlare-tagi, go nwa, go lwa le go rogana.

 Lega go le bjalo, ke kgothaditšwe kudu ke mantšu a moapostola Paulo a begilwego go 1 Bakorinthe 6:9-11. Lengwalo leo le bontšha gore Bakriste ba bangwe ba lekgolong la pele la nywaga ba be ba kile ba ba le e mengwe ya mekgwa e mebe yeo ke bego ke e-na le yona. Eupša ditemana tšeo gape di re: “Seo ke se ba bangwe ba lena le bego le le sona. Eupša le hlatswitšwe la hlweka, eupša le kgethagaditšwe, eupša le boletšwe le lokile leineng la Morena wa rena Jesu Kriste le ka moya wa Modimo wa rena.” Mantšu ao a nneile kholofelo ya gore le nna ke be nka kgona go dira diphetogo tše di nyakegago bophelong bja-ka e le gore ke kgahliše Modimo.

Ge ke be ke thoma go kopanela le Dihlatse tša Jehofa, ke be ke kgodišegile gore e be e le bodumedi bja therešo. Ba be ba tseba ka boitshwaro bja-ka bja nakong e fetilego bja go rata bošoro le bja go ba yo bogale, lega go le bjalo ba ile ba nkamogela ka borutho le lerato.

KAMOO KE ILEGO KA HOLEGA KA GONA: Ge nkabe ke sa ka ka ithuta Beibele le go fetoša bophelo bja-ka, mohlomongwe nkabe ke hwile gona bjale. Go e na le moo, ke ile ka thabela go thuša yo mongwe wa bana ba gešo go ithuta Beibele le go tlogela go lemalela dihlare-tagi. Le gona, ke ile ka kgothaletša le ba bangwe ba leloko go thoma go ithuta Beibele. Ruri ke leboga gore ke ile ka kgona go neela bophelo bja-ka go hlankeleng Modimo, yo a re hlokomelago kudu!

[Ntlhakgolo go letlakala 24]

“Ke ile ka dira phetho ya go rapela pele ke ineela molekong go e na le go rapela ka morago, gomme se se ile sa dira phapano e kgolo”