Bibliam yanapashqa hukläyana kawakuyänampaq

Huk warmi religionta haqirishqa këkar, ¿imanirtaq kananqa Diospita yachatsikurna purin? ¿Imataq huk jöventa yanaparqan karateca këta haqinampaq? ¿Alläpa machaq y drogakoq liso joven imanötaq alli nunaman tikrarqan? Kikinkuna willakuyanqanta rikärishun.

REQINAPAQ

SHUTIN: PENELOPE TOPLICESCU

WATAN: 40

NACIONNIN: AUSTRALIA

MÁS REQINAPAQ: ATSKA WATAKUNAM RELIGIONPITA IMATA MUSYËTAPIS MUNARQANTSU

PUNTA KANQÄ: Sydney (Australia) markachömi yurikorqä, ishkë watayoq këkarnam familiäwan ëwkuyarqä Nueva Guinea nishqan nacionman. Tsë nacionchönam ishkë wata yachayarqä Rabaul nishqan markachö y puwaq watanam Bougainville nishqan markachö. Yachayanqä markachö tsë witsankuna televisión mana kaptinmi, turïwan lamarman ëwayaq kayä nadaq, nïkurmi sitiokunata reqipakoq punïpa ëwayaq kayä. Tsënömi kawayarqä wambra kënëkunachö.

10 watayoqnölla këkaptïmi Diospa kaqkuna gustamarqan. Mamanï católica karmi, tsë markachö catequismo yachatsikoq monjaman yachakoq ëwanäpaq nimarqan. Tsënöpam catölicachö tsë watayoqlla këkar bautizakorqä.

Pero Australia nacionman kutirerqa, hukläyanam pensarqä. Hatunyar hatunyarmi rasuntsuraq o manatsuraq nerqä religionnïchö yachakonqäkunapaq. Escuëlachöqa yachatsiyämaq unë pasanqankunatam Historia nishqan cläsechö, y wayïchönam religionkuna mëpita yarqamonqanta y mana rasumpatanö rikarpis Biblia nenqankunata papänïwan cuentanakuyaq kayä. Tsëpitanam católica kanqäpitapis yarqukurerqä.

16 watayoq këkaptïmi teytäwan mama rakikäkuriyarqan. Mamänïwan mana yamë karmi, teytäwan y huk kaq warminwan yachaq ewkorqä. Turïnam mamänïwan quedakurnin huk markapa yachaq ewkuyarqan. Ishkë watataraqmi mamänïwan parlapänakuyarqä. Hapallälla karnin llakikurmi, fiestan fiestan purikorqä, machakur y drogakur kakorqä. Tsëpitanam estudiëtapis haqirerqä, y trabäjota ashirirnam munanqänö kawakorqä. Tsë watakuna ruranqäqa manam imapaq välerqantsu.

Pero 25 watayoq këkarnam Bibliapita yapë yachakïta munarqä. Huk trabäjoman yëkonqächömi reqerqä Liene shutiyoq kuyakoq shipashta, pëqa patronnin lluta parlaq nuna këkaptimpis respetaqmi. Imanirtaq qampis nishunqëkinölla contestankitsu niptëmi, Jehoväpa testïgonkunawanmi yachakïkä y Biblia nenqannö kawëtam tïrä nimarqan. Tsëpitanam huk höralla estudiayänäpaq  nimarqan, tsënam llapan musyanqantachi tsë hörachö yacharatsimanqa nir awnirerqä. Pero tsë paqasqa kima höram tapunqäkunallata contestamarqan. ¡Bibliawanmi llapan tapunqäkunata yachatsimarqan!

Tsëpitaqa, unëna rasumpa kaqta mana yachatsimanqanta Diospaq piñar wayïman ëwëkanqätam yarpä. Kananqa imapaqnataq yachakushaq nerqämi. Noqaqa manachi Jehoväpa testïgonkunanö kawëta o wayin wayin yachatsikïta puëdishaqnatsu nirmi pensarqä. Estudiëkanqäta haqiriptï conciencia yamë kananrëkurmi, creiyanqankunachö mana allita tarita munarlla yachakïkarqa. Pero tsëpitaqa cuentata qokurerqä rasumpa kaqllata yachatsikuyanqantam.

¿IMANÖTAQ BIBLIA YANAPAMASHQA HUKLÄYANA TIKRANÄPAQ? Biblia nenqanta más yachakurmi, mana alli ruranqäkunata cuentata qokorqä y drögakunatapis haqirerqä. Tsëpitanam huk nacionpa ewkorqa, y tsëchönam fiestan fiestan purikur y machakur yapë qallakïkorqä. Allikunatana rurëta munarpis, más mana allikunaman ishkeqnömi karqä. Penqakurmi Jehová Diosman mañakoq kä, tsëpis llakishqallam kakorqä.

David Bat-sëbawan hutsallakonqanta Jehová perdonanqampita yachakïmi alläpa yanapamarqan. Consejayaptin pëqa manam hukta huktatsu parlëkacharqan, ni mana alli rurëninta tsaparäkorqantsu, antis llapan Jehová nenqantam chaskikorqan (2 Samuel 12:1-13). Yapë hutsaman ishkirerqa Davidta perdonanqantam yarpaq kä, tsëmi yanapamarqan perdonta ashir Jehoväman mañakunäpaq. Pero imamampis manaraq ishkir Diosman mañakï alli kanqantam yachakorqä. ¡Tsëmi sïqa alli yanapakun!

¿IMAKUNACHÖTAQ YANAPAMASHQA? Imëkatapis rasllam piñakoq kä, pero Efesios 4:29-31 textochö “mana piñacushpa, mana wäputupänacushpa, mana coleracushpa [...] cawacuyë” nenqanmi rikätsimarqan tsënö kanqäta haqinapaq. Piñakoq këta haqirmi, shimï tsaräkïtapis yachakorqä. Yachakonqänölla ruranäpaqqa yanapamarqan Jesus kënö nenqanmi: “Aunicurga aunicuyanqui cumpliyänayquipä” (Mateo 5:37; MTCS).

Puntataqa, Testïgokunawan yachakunäta mamänï manam munarqantsu, pero tsëpitaqa noqapita kushishqa kanqantam nimarqan. Huk kutinäqa alläpa kushishqam kënö nimarqan: “Jehoväpita yachakushqa karmi alli warmi kananqa kanki, y manam noqakuna yachatsiyanqaqpitatsu”. ¡Imanömi kushikïkorqä tsënö nimaptin!

Kananqa allita rurarnam kawakö. Isqon watanam precursor regularnö Bibliapita yachatsikur nunäwan Jehoväta servikäyä. Awmi, wayin wayinmi yachatsikïkä y kë rurëqa llapan ruranqäpitapis masmi kushitsiman.

REQINAPAQ

SHUTIN: DENIS BUSIGIN

WATAN: 30

NACIONNIN: RUSIA

MÁS REQINAPAQ: KARATECA

PUNTA KANQÄ: Perm markachömi yurerqä, pero Furmanov (Rusia) nishqan markachömi yacharqä, tsë markachöqa 40.000 nunakunanömi yachayaq. Montikunapa raprankuna pukaman y qallwashman tikranqan witsanqa, tsë marka alläpam shumaqyaq. Tsënö karpis,  1980 y 1990 watakunachöqa imëka mana alli rurëkuna mirëkuptinmi, mantsëpaqna kë markä tikrarerqan. Hinamampis, waktsa waktsa familiallam kayarqä. Teytä, mamä y wawqëmi huk cuartoyoqlla ichik wayichö yachayarqä.

Qanchis watayoq këkarllam karateca këta yachakorqä. Alläpam gustëkamaq, tsëmi imëkapitapis puntaman tsëtaraq churaq kä. Mana imapis rurakuna höra ejerciciota rurayänan sitiollachö kaptëmi, tsëchö kaqkunalla amïgokunaqa kayarqan. 15 watayoq këkarmi ganëkorqa puka cintata, y tsëpita huk watatanam marron cintata. Hatun campeonatokunayaqmi equïpöwan chäyarqä. Llapanchöpis allinömi yarqapukïkarqä, pero 17 watäman chärerqa mana allikunamanmi heqarporqä.

Mana allita rurayanqäpitam amïgökunatawan ishkë watapaq carcelman apakayämarqan. Y carcelchö imëka mana allita pasarpis, tsëchöraqmi Bibliata reqerqa. Genesista, Salmosta y mushoq testamentotam leirqä. Padrenuestrota rezakïtapis yachakorqämi, y manaraq patsäkurmi mañakoq kä imallachöpis yanapamanqachi nirnin.

2000 watachönam carcelpita yarqorqä, pero imata ruranapaq kaqta ni imapaq kawanqäta mana musyarmi drogakurna qallëkorqä. Tsë witsankunallam pipitapis más kuyanqä mamanï wanukïkorqan, y tsëqa alläpa llakinëpaqmi noqapaq karqan. Tsënö karpis drögakunata haqirirmi ejerciciokunata rurar yapë qallarqä. Tsëpitanam ewkorqä Ivanovo nishqan markaman y tsëchömi trabäjota tarerqa huk tiendachö. Tsë tiendachö rantikoq warmim Jehoväpa testïgon kanaq, pëmi Bibliachö precisaq yachatsikïkunata parlapämarqan y tsëpitanam huk ollqu Testïgota yachatsimänampaq nerqan.

¿IMANÖTAQ BIBLIA YANAPAMASHQA HUKLÄYANA TIKRANÄPAQ? Patsata Dios huk paraïsoman tikratsimunampaq kaqtam Bibliachö yachakorqä. Imanömi kushikïkorqa tsëta musyarir, y imëkanöpis tsëman chëtam munarqä. Pero llapan mana alli ruranqäkunataraqmi haqina karqan. Y tsë tiempokunachöqa kikëllapaqmi pensaq kä, pero wakinkunapaqpis pensanäta Jehová munanqantam cuentata qokurerqä. Bibliapita yachakonqänö kawarmi kuyakoq y llakipäkoq o ankupäkoq nunana kanä karqan.

Kuyakoq kar y hutsärëkur tsurinta Jehová kachamonqanman yarpëmi yanapamarqan alli nunana kanäpaq. Y maqanakoqkunata Jehová chikenqanta Salmo 11:5 textochö yachakurerqa, televisionchö mananam tsëkunata rikarqänatsu, y karateca këtapis haqirerqämi. Hinamampis 1 Corintios 15:33 textom yanapamarqan alli amïgokunata akranan precisanqanta yachakunäpaq. Noqataqa mana alli amïgokunam carselyaqpis chätsimarqan. Tsënöpam maqanakïta puntaman churaqkunawan amïgonatsu karqä.

¿IMAKUNACHÖTAQ YANAPAMASHQA? Jehoväpa testïgonkuna yanapayämashqa kaptin y Bibliapita shumaq yachakushqa karmi kananqa alli nunana kä. Hebreus 13:5 textochömi yachakorqä qellëllapaq mana ërayäkunäpaq y tarenqällawan kushishqa kawakunäpaq. Kë textopita yachakurmi ulikïta o llullakuyta y suwakïtapis haqirerqä.

Amïgoyoq këqa alläpam precisaq noqapaq. Tsëpis, unëqa rikaq kaq mana markäkïpaq o yärakuypä kayaptin y kikinkunallapaq imatapis munayaptin amigo këpis ushakäreqtam. Pero Testïgokunaqa hukläya nunam kayan. Mana hutsannaq karpis, pëkunaqa Jehoväpa yachatsikïninta alläpam respetayan, y nuna mayinkunawampis alli kawakïtam tïrayan. Tsëmi kananqa alläpa kushishqa kä congregacionchö alli amïgokunata tarishqa karnin.

¡Imamanraq chäman karqan Biblia yachatsikonqannö mana kawarqa! Manam tsëtaqa pensëtapis munätsu, nuna mayïkunata imëka mana allitaraq rurëkunam karqan. Itsachi carselchöpis yapë këkäman karqan. Pero tsëpa rantenqa, alli warmiyoq y ishkë wambrayoqmi kä, y Diospita rasumpa kaqta nuna mayïkunata yachatsirmi kushishqa këkäyä.

REQINAPAQ

SHUTIN: JOSÉ CARLOS PEREIRA DA SILVA

WATAN: 31

NACIONNIN: BRASIL

MÁS REQINAPAQ: MAQANAKURMI PURIKOQ

 PUNTA KANQÄ: São Paulo (Brasil) markachö këkaq Americana nishqan waktsalla sitiochömi winarqä. Tsë yachanqächöqa manam ni yaku ni desagüe kaqtsu, pero mana alli rurëkunaqa alläpam këkoq.

Wambra kanqäpitam liso këta y maqakoq këta yachakorqä. Y cällekunachö imëpis maqanakurlla purikuptëmi, llapan vecïnökunapis mantsayämaq. Portakïnë y vestikïnëpis alläpa melanëpaq këkaptenqa rasuntachi mantsayämaq. Mana mäkonqäyaqmi imëpis machaq kä, y wawqëkunanöllam drogakoqpis kä. Drögata alläpa shoqïnimpam huk wawqënäqa wanorqan.

¿IMANÖTAQ BIBLIA YANAPAMASHQA HUKLÄYANA TIKRANÄPAQ? Jehoväpa testïgonkuna parlapäyämarnëmi, hinantin Patsata huk paraïsoman Dios tikratsimunampaq kaqta Bibliapita yachatsiyämarqan (Lucas 23:42, 43; Apocalipsis 21:3, 4). Hina wanushqakuna ni imata mana mäkuyanqanta y Dios nunakunata ninachö mana rupatsenqantapis yachatsiyämarqanmi (Eclesiastés 9:5, 6). Tsëkunata yachakurerqa alläpam kushikorqä. Diospita llapan yachakonqämi yanapamarqan mana alli rurëkunata haqita munanäpaq. Imam sïqa, hukläya nunana kanäpaqqa haqina karqan, machar kakïta, drogakïta, maqanakur purikïta y lluta parlëkunataraqmi.

1 Corintios 6:9-11 textokunachö nenqanmi alläpa yanapamarqan. Tsëchömi rikätsikun manaraq Diosta reqirnenqa punta kaq cristiänokunapis noqanölla llutanta rurar kayanqanta. Pëkunatam apóstol Pablu kënö nerqan: “Tseno llutan ruraqmi waquinniquicunaqa qamcunapis puntataqa cacuyarqequi, peru cananqa Diosnintsicmi Teyta Jesucristurecur y Santu Espiriturecur, limpiu shonquyoqtana, pellapaqna cayänequipaq, y alli cayänequipaq ticrararatsiyäshushqanqui”. Kë versïculokunam yanapamarqan mana alli rurëkunata haqir noqapis Diosta kushitsinäpaq kaqta.

Jehoväpa testïgonkunawan ëllukarqa cuentata qokurerqä, pëkuna rasumpa kaq cristiano kayanqantam. Y puntata imanö kanqäta musyëkarpis, shumaq y rasumpa kuyakurmi chaskiyämarqan.

¿IMAKUNACHÖTAQ YANAPAMASHQA? Bibliapita mana yachakur y yachakonqänö mana kawarqa, itsachi wanushqanapis käman karqan. Pero kananqa alli nunanam kä. Huk wawqïtapis yanaparqömi Bibliapita yachakunampaq y drögata haqinampaq. Y mana alli rurënëkunata haqinqäta rikarmi wakin kastäkunapis Bibliapita yachakur qallashqa. Pï mëpaqpis yarparëkaq Dios Jehoväpaqna kawanqätaqa alläpam kushikö.