Bibele Yi Hundzula Vutomi Bya Vanhu

Ha yini wansati loyi a a heleriwe hi ripfumelo eka vukhongeri sweswi a heta nkarhi wakwe wo tala a ri eku pfuneni ka vanhu van’wana leswaku va dyondza hi Xikwembu? I yini leswi susumeteleke wanuna loyi a a rhandza mintlangu ya madzolonga leswaku a rhandza ku rhula? Xana wanuna loyi a a rhandza swidzidziharisi, byala ni ku vanga tinyimpi exitarateni u swi kotise ku yini ku cinca ndlela leyi a a hanya ha yona? Hlaya leswi vanhu lava va swi vulaka.

MATIMU YAKWE HI KU KOMISA

VITO: PENELOPE TOPLICESCU

MALEMBE: 40

TIKO LERI A VELEKIWEKE EKA RONA: AUSTRALIA

LESWI TSHAMEKE SWI N’WI HUMELELA: A NDZI ANAKANYA LESWAKU VUKHONGERI A BYI PFUNI NCHUMU

VUTOMI BYA MINA: Ndzi velekiwe edorobeni ra Sydney, le Australia, kambe loko ndzi ri ni malembe mambirhi ndyangu wa ka hina wu rhurhele eNew Guinea laha sweswi ku vitaniwaka Papua New Guinea. Hi tshame eRabaul ku ringana malembe ya kwalomu ka mambirhi kutani hi rhurhela eBougainville laha hi tshameke malembe ya nhungu. Emasikwini wolawo, a ku ri hava TV eNew Guinea, kutani mina na ndzisana ya mina ya mufana a hi heta nkarhi wo tala hi nga ri kona ekaya, a hi ya eku hlambeleni ni ku tshama enhoveni ematendeni.

Loko ndzi ri ni malembe ya kwalomu ka khume, ndzi sungule ku tsakela vukhongeri. Manana a a ri Mukhatoliki, kutani u ringanyete leswaku ndzi ya etitlilasini ta Bibele ni yin’wana ya tinani leti tshamaka endhawini yoleyo. A ndzi byi rhandza Vukhatoliki naswona ndzi khuvuriwe ndzi ri ni malembe ya khume.

Hambiswiritano, endzhaku ka loko hi tlhelele eAustralia se a ndzi ri muntshwa kutani ndzi sungule ku kanakana leswi a ndzi dyondzisiwe swona malunghana ni vukhongeri. Hi nkarhi lowu a ndzi ri exikolweni xa le henhla, ndzi dyondze matimu ya khale naswona mina ni tata wa mina hi ve ni mabulo yo leha malunghana ni laha vukhongeri byi sunguleke kona ni timhaka leti nga eBibeleni leti a hi ti teka ku ri mintsheketo. Eku heteleleni ndzi tshike Vukhatoliki.

Vatswari va mina va hambanile loko ndzi ri ni malembe ya 16. Manana a a koka exilogweni naswona mina ndzi hetelele ndzi ya tshama na tata wa mina loyi se a a ri ni nsati un’wana. Buti wa mina a a tshama na Manana naswona va rhurhele exifundzheni xin’wana xa tiko ra Australia. A ndzi ri ni xivundza swinene evuton’wini bya mina. Swi teke malembe mambirhi emahlweni ko va ndzi tlhela ndzi tolovelana swinene na mana wa mina. Ndzi sungule ku nwa byala, ndzi tirhisa swidzidziharisi ni ku ya eminkhubyeni. Ndzi tshike xikolo ndzi ya entirhweni ni ku tlanga hi vutomi bya mina loko ndzi ri ni malembe ya kwalomu ka va-20 hi ku va ni mahanyelo yo biha.

Loko ndzi va ni malembe ya 25, ndzi sungule ku  tlhela ndzi anakanya hi Bibele. Ndzi sungule ku ya tirha endhawini yin’wana laha ndzi hlanganeke na Liene, ntombhi yo saseka loyi nkarhi hinkwawo a a ri ni malwandla eka muthori wakwe, hambileswi yena a a n’wi khoma hi ndlela ya tihanyi swinene. Loko ndzi n’wi vutisa leswaku ha yini a vulavula kahle ni muthori wakwe, u hlamusele leswaku a a dyondza Bibele ni Timbhoni ta Yehovha naswona a a ringeta ku tirhisa milawu ya Bibele evuton’wini byakwe. Liene u kombele ku dyondza na mina Bibele. Leswi a ndzi nga swi twisisi leswi a a swi vula, a ndzi anakanya leswaku u vula leswaku ndzi nga dyondza swilo hinkwaswo leswi a a swi tiva hi Bibele hi awara yin’we ntsena. Liene u hete tiawara tinharhu madyambu wolawo a ri karhi a hlamula swivutiso swa mina malunghana ni Bibele. Ndzi tsakisiwe hileswi tinhlamulo hinkwato ta swivutiso leswi a ndzi ri na swona a ti sekeriwe hi matsalwa lama humaka eBibeleni.

Ndzi tsundzuka ndzi ri karhi ndzi chayela movha ndzi ya ekaya madyambu wolawo endzhaku ka bulo ra mina na Liene naswona ndzi hlundzukele Xikwembu hileswi xi nga ndzi pfunangiki khale leswaku ndzi dyondza ntiyiso malunghana na xona. A ndzi swi tiva leswaku Timbhoni ti hanya vutomi lebyi baseke naswona a ndzi ehleketa leswaku a swi nga ha ta koteka leswaku ndzi cinca mikhuva ya mina. Nakambe a ndzi ehleketa leswaku a ndzi nga ta swi kota ku famba hi yindlu ni yindlu ndzi chumayela hilaha Timbhoni a ti endla hakona. Ndzi hambete ndzi dyondza Bibele ni Timbhoni, kambe xikongomelo xa mina a ku ri ku kuma nchumu lowu hoxeke eka tidyondzo ta tona leswaku ndzi ta tshika ku dyondza na tona ndzi ri ni ripfalo leri baseke. Siku rin’wana ndzi xiye leswaku a ndzi nga ta kuma nchumu lowu hoxeke eka tidyondzo ta tona.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi ya emahlweni ndzi dyondza hi milawu ya mahanyelo leyi nga eBibeleni, ripfalo ra mina a ri ya ri ndzi kingindza swinene. Leswaku ripfalo ra mina ri nga ha ndzi kingindzi ndzi tshike ku tirhisa swidzidziharisi. Kambe hi nkarhi wolowo ndzi rhurhele etikweni rin’wana ku ringana nkarhi wo karhi kutani ndzi sungula ku tlhela ndzi ya eminkhubyeni ni ku nwa byala. A swi tikomba onge nkarhi na nkarhi loko ndzi ringeta ku endla nhluvuko ndzi hanya hi ku pfumelelana ni milawu leyi kongomisaka ya Bibele, a ndzi tlhelela eka mahanyelo ya mina ya khale. Ndzi khongele eka Yehovha, kambe a ndzi tama ndza ha karhateka swinene.

Loko ndzi dyondze leswi Hosi Davhida na Bati-xeba va swi endleke ni ndlela leyi Yehovha a va tshinyeke ha yona hi musa, sweswo swi ndzi pfunile. Davhida u ve ni xivindzi xo pfumela xidyoho xakwe loko a tshinyiwa, a nga ringetanga ku tiyimelela eka swiendlo swakwe. Naswona hi ku titsongahata u amukele ndzayo leyi a yi kumeke. (2 Samuwele 12:1-13) Nkarhi na nkarhi loko ndzi tsandzeka ku endla swo karhi, a ndzi anakanya hi rungula rolero naswona swi sungule ku ndzi olovela ku kombela ku rivaleriwa eka Yehovha. Kutani ndzi endle xiboho xo khongela emahlweni ko va ndzi endla xidyoho ematshan’weni yo khongela endzhaku ka loko se ndzi dyohile, naswona sweswo swi ndzi pfunile.

NDLELA LEYI NDZI VUYERIWEKE HA YONA: Minkarhi hinkwayo a ndzi ri ni ximbilwa-mbilwana. Hambiswiritano, tsalwa ra Vaefesa 4:29-31 ri ndzi pfunile ku vona xilaveko xo papalata “ku leva . . . ni ku hlundzuka ni vukarhi.” Loko ndzi ri karhi ndzi dyondza ku lawula ximbilwa-mbilwana, ndzi dyondze ku lawula ndlela leyi a ndzi vulavula ha yona. Ku engetela kwalaho, ndzayo ya Yesu ya leswaku “Ina wa n’wina a a ve Ina” yi ndzi pfunile leswaku ndzi antswisa ndlela leyi a ndzi hanya ha yona.—Matewu 5:37.

Mana wa mina, loyi a a nga swi tsakeli leswaku ndzi tihlanganisa ni Timbhoni, endzhakunyana u ndzi byele leswaku wa tinyungubyisa hi mina. U kale a ku: “Ndza swi tiva leswaku ndlela leyi u hanyaka ha yona sweswi a yi vangiwanga hileswi u kurisiweke xiswona kambe yi vangiwe hileswi u swi dyondzeke hi Yehovha.” Loko ndzi n’wi twa a vula tano swi ndzi tsakisile swinene.

Sweswi vutomi bya mina byi ni xikongomelo. Mina ni nuna wa mina hi ni malembe ya kaye hi ri vadyondzisi va Bibele va nkarhi hinkwawo. Ina, sweswi loko ndzi ya chumayela hi yindlu ni yindlu ndzi titwa ndzi endle ntirho lowu vuyerisaka swinene eka hinkwayo leyi ndzi tshameke ndzi yi endla.

 MATIMU YAKWE HI KU KOMISA

VITO: DENIS BUSIGIN

MALEMBE: 30

TIKO LERI A VELEKIWEKE EKA RONA: Rhaxiya

LESWI A A SWI ENDLA: A A RHANDZA KARATI

VUTOMI BYA MINA: Ndzi velekiwe edorobeni ra Perm’ kutani ndzi kulela eFurmanov, ku nga doroba leri nga ni vaaki va kwalomu ka 40 000 exifundzheni xa Ivanovo, le Rhaxiya. Furmanov i doroba leri xongeke leri nga ni mirhi yo tala yo saseka leyi matluka ya yona ma hundzukaka ma va ya muvala wa xitshopana ni wo tshwuka hi xixikana. Hi va-1980 ni hi va-1990, vugevenga byi ye byi tinyika matimba edorobeni rolero. Ndyangu wa ka hina a wu hanya vutomi byo olova hi swimalana leswi a wu swi kuma. A ndzi tshama ni vatswari va mina swin’we ni ndzisana ya mina ya mufana ekamareni rin’we, laha a hi manyana.

Loko ndzi ri ni malembe ya nkombo, ndzi sungule ku dyondza karati. A ndzi rhandza ntlangu wa karati; a ndzi tinyiketele ngopfu eka wona. A ndzi heta nkarhi wa mina wo tala ndzi ri endhawini yo endla vutiolori, kutani vanghana va mina hinkwavo a ku ri vanhu lava tlangaka mintlangu. Loko ndzi ri ni malembe ya 15, ndzi kume bandhi ro tshwuka eka ntlangu wa karati, ivi hi lembe leri landzelaka ndzi kuma bandhi ra buraweni. A ndzi ri un’wana wa vatlangi va karati lava ngheneleke mphikizano lowu khomeriweke eRhaxiya ni le Eurasia. A swi vonaka ndzi ta va ni vumundzuku lebyinene kambe loko ndzi ri ni malembe ya 17 vutomi bya mina hinkwabyo byi cincile.

Mina ni vanghana va mina hi endle vugevenga naswona hi khomiwile. Ndzi gweviwe ku tshama malembe mambirhi ekhotsweni. Vutomi a byi tika ekhotsweni. Hambiswiritano, ndzi sungule ku vona Bibele ro sungula loko ndzi ri ekhotsweni. Ndzi hlaye Genesa, Tipisalema ni Testamente Leyintshwa. Ndzi tlhele ndzi nhlokohata Xikhongelo xa Hosi naswona a ndzi xi yimbelela vusiku byin’wana ni byin’wana loko ndzi nga si ya eku etleleni, a ndzi anakanya leswaku ku endla tano a swi ta ndzi pfuna hi ndlela yo karhi.

Ndzi ntshunxiwe ekhotsweni hi lembe ra 2000 kambe a ndzi nga swi tivi leswaku ndzi lava ku endla yini hi vutomi bya mina kutani ndzi vone vutomi bya mina byi nga ri na xikongomelo. Ndzi sungule ku tirhisa swidzidziharisi. Hi nkarhi wolowo mana wa mina u file. A ndzi n’wi rhandza ngopfu naswona swi ndzi tikerile ku tiyisela rifu rakwe. Hambiswiritano, ndzi tshike ku tirhisa swidzidziharisi kutani ndzi tlhela ndzi sungula ku ya endhawini yo endla vutiolori. Ndzi tlhele ndzi rhurhela edorobeni ra Ivanovo. Ndzi kume ntirho exitolo xo xavisa swakudya. Mupfuni wa n’wini wa xitolo xexo a a ri Mbhoni ya Yehovha. U ndzi hlamusele tidyondzo tin’wana ta xisekelo leti humaka eBibeleni kutani a hlela leswaku Mbhoni yin’wana ya xinuna yi ta dyondza na mina Bibele nkarhi na nkarhi.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi ri karhi ndzi dyondza Bibele, ndzi khumbeke swinene loko ndzi dyondza hi xikongomelo xa Xikwembu xo endla misava yi va paradeyisi naswona a ndzi lava ku endla leswi lavekaka leswaku na mina ndzi kota ku va eparadeyisini. Hi ku hatlisa ndzi xiye leswaku Yehovha Xikwembu u ni milawu leyi tlakukeke swinene leyi a lavaka leswaku vanhu vakwe va hanya ha yona. Ndzi hete nkarhi wo tala ndzi ri karhi ndzi anakanya hi vutomi bya mina ntsena. Kambe ndzi dyondze leswaku Yehovha u lava leswaku hi anakanya hi vanhu van’wana ni ku hlakulela timfanelo leti a ndzi nga ri na tona hi nkarhi wolowo—to kota musa ni ku rhula.

Loko ndzi ri karhi ndzi sungula ku anakanyisisa hi vuenti hi swilo hinkwaswo leswi Yehovha a ndzi endleleke swona—swo fana ni ku nyikela hi N’wana wakwe tanihi xitlhavelo xa swidyoho swa mina—naswona leswi a ndzi tlangela rirhandzu rakwe ndzi susumeteleke ku cinca ndlela leyi a ndzi hanya ha yona. Hi xikombiso, eka Pisalema 11:5 ndzi dyondze leswaku u venga madzolonga. Kutani ndzi tshike ku hlalela minongonoko ya TV leyi hlohlotelaka madzolonga ni rivengo. Ndzi tshike mintlangu ya madzolonga  hambileswi a swi tika swinene. Nawu lowu kongomisaka lowu nga eka 1 Vakorinto 15:33 wu ndzi pfune ku vona leswaku swilo a swi ta ndzi fambela ximatsi hikwalaho ka vanhu lava a ndzi hlawule ku tihlanganisa na vona. Ku kombisa leswaku nawu wolowo lowu kongomisaka wu tiyisile swi kombisiwe hileswi ndzi tikumeke ndzi ri ekhotsweni. Kutani ndzi endle xiboho xo tshika ku tihlanganisa ni vanhu lava a va rhandza mintlangu ya madzolonga.

NDLELA LEYI NDZI VUYERIWEKE HA YONA: Ku tihlanganisa ni Timbhoni ta Yehovha ni ku dyondza Bibele swi ndzi pfune leswaku ndzi va munhu wo tshembeka. Hi xikombiso, eka Vaheveru 13:5 ndzi dyondze hi xilaveko xo eneriseka ni ku lwisana ni rirhandzu ra mali. Ku tirhisa ndzayo leyi swi ndzi pfune ku tshika ku hemba ni ku yiva.

Minkarhi hinkwayo ndzi swi teka swi ri swa nkoka ku va ni vanghana. Enkarhini lowu nga hundza, ndzi vone vanhu va nga ha vi vanghana hikwalaho ka makwanga kumbe ku chava mahanyelo ya vanghana va vona. Timbhoni ta Yehovha a ti hetisekanga, kambe ndzi dyondze leswaku ti xixima milawu leyi kongomisaka ya Xikwembu naswona ti ringeta hi matimba ku tirhisa ndzayo ya xona eka ndlela leyi ti tirhisanaka ha yona ni vanhu van’wana. Sweswi ndzi ni vanghana va xiviri exikarhi ka tona.

Ndza tivutisa leswaku vutomi bya mina a byi ta va byi ri njhani loko a ndzi nga dyondzanga ku hanya hi milawu leyi kongomisaka leyi nga eBibeleni. Kumbexana i nge ndzi tlhelele ekhotsweni kumbe ndzi ri karhi ndzi vavisa vanhu van’wana ni ku va xanisa. Kambe sweswi, ndzi ni nsati loyi a rhandzekaka ni vana vambirhi va majaha, naswona tanihi ndyangu, hi kuma ntsako wa xiviri hi ku pfuna vanhu van’wana ku dyondza ntiyiso malunghana ni Xikwembu.

MATIMU YAKWE HI KU KOMISA

VITO: JOSÉ CARLOS PEREIRA DA SILVA

MALEMBE: 31

TIKO LERI A VELEKIWEKE EKA RONA: BRAZIL

LESWI A A SWI ENDLA: MUVANGI WA TINYIMPI EXITARATENI

VUTOMI BYA MINA: Ndzi kulele eswidakanini leswi thyakeke swa Americana, le São Paulo. A hi ri hava mati yo tenga kumbe swihambukelo leswi fanelekaka. Ndhawu yoleyo a yi dume hi ku va ni madzolonga ni ku tala hi vugevenga.

Ndzi kule ndzi ri ni madzolonga ni tihanyi. Minkarhi hinkwayo a ndzi katseka eka tinyimpi leti a ti va kona exitarateni, kutani vaakelani va mina a va ndzi chava. Maambalelo, ku tilunghisa ni mahanyelo ya mina a swi kombisa leswaku a ndzi ri ni khombo. A ndzi kukutlela byala, minkarhi yin’wana ku kondza ndzi titivala. A ndzi tirhisa swidzidziharisi ku fana ni vabuti va mina. Entiyisweni, un’wana wa vabuti va mina u file hikwalaho ko tirhisa swidzidziharisi ku tlula mpimo.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi hlangana ni Timbhoni ta Yehovha, ti ndzi kombe eBibeleni leswaku Xikwembu xi ta endla misava hinkwayo yi va paradeyisi. (Luka 23:42, 43; Nhlavutelo 21:3, 4) Ndzi tlhele ndzi dyondza leswaku vafi a va tivi nchumu naswona Xikwembu a xi xupuli vanhu vo biha endzilweni wa tihele. (Eklesiasta 9:5, 6) Sweswo swi ndzi endle leswaku ndzi ntshunxeka. Leswi ndzi swi dyondzeke hi Xikwembu swi ndzi endle ndzi ya ndzi swi navela swinene ku cinca ndlela leyi a ndzi hanya ha yona. Kambe a swi nga olovi ku endla ku cinca ko tano—ku tshika swidzidziharisi, ku nwa, tinyimpi ni mukhuva wa mina wo vulavula nhlambha.

Hambiswiritano ndzi khutaziwe swinene hi marito  ya muapostola Pawulo lama tsariweke eka 1 Vakorinto 6:9-11. Tsalwa rolero ri kombisa leswaku Vakreste van’wana va lembe-xidzana ro sungula va tshame va va ni mukhuva wolowo wo biha lowu fanaka ni lowu mina a ndzi ri na wona. Kambe ndzimana yoleyo yi tlhele yi ku: “Hi leswi van’wana va n’wina a mi ri swona. Kambe mi hlantswiwile mi basa, mi kwetsimisiwile, mi vuriwe lava lulameke hi vito ra Hosi ya hina Yesu Kreste ni hi moya wa Xikwembu xa hina.” Marito wolawo ma ndzi endle ndzi va ni ntshembo wa leswaku na mina a ndzi ta swi kota ku cinca vutomi bya mina leswaku ndzi tsakisa Xikwembu.

Loko ndzi sungula ku tihlanganisa ni Timbhoni ta Yehovha, ndzi tiyisekile leswaku ti hanya hi ndlela leyi Vakreste va ntiyiso va faneleke va hanya ha yona. A ti swi tiva leswaku a ndzi ri munhu wa madzolonga ni tihanyi, kambe ti ye emahlweni ti ndzi amukela hi malwandla ni rirhandzu.

NDLELA LEYI NDZI VUYERIWEKE HA YONA: Loko a ndzi nga dyondzanga Bibele ni ku cinca ndlela leyi a ndzi hanya ha yona, kumbexana i nge ndzi file sweswi. Ematshan’weni ya sweswo, ndzi ni ntsako hileswi ndzi pfuneke un’wana wa vabuti va mina ku dyondza Bibele ni ku tshika ku tirhisa swidzidziharisi leswi se a swi n’wi godzomberile. Naswona ndzi tlhele ndzi khutaza van’wana va maxaka ya mina ku dyondza Bibele. Ndzi tsake ngopfu leswi ndzi koteke ku nyiketela vutomi bya mina leswaku ndzi tirhela Xikwembu lexi khathalaka swinene hi hina!

[Marito lama tshahiweke exihlokweni lama nga eka tluka 24]

“Ndzi endle xiboho xo khongela emahlweni ko va ndzi endla xidyoho ematshan’weni yo khongela endzhaku ka loko se ndzi dyohile, naswona sweswo swi ndzi pfunile”