Pashanyeni Ukutemwa Kwa Kwa Yesu Ilyo Mulesambilisha
Pashanyeni Ukutemwa Kwa Kwa Yesu Ilyo Mulesambilisha
“Takwatala akuba nangu umo uulanda ngo yu muntu.”—YOH. 7:46.
1. Bushe abantu baleankulako shani ku fyo Yesu alesambilisha?
ELENGANYENI ifyo caleumfwika bwino ukukutika ku fyo Yesu alesambilisha! Baibolo yalilanda ifyo abalekutika ku fyo alesambilisha baleankulako. Ku ca kumwenako, Luka uwalembele ibuuku limo ilya mbila nsuma atile abantu mu mushi Yesu akulile ‘balipapile pa mashiwi ayasuma ayo alelanda.’ Mateo alembele ukuti bonse abakutike ku lyashi lya kwa Yesu ilya pa lupili ‘balipapile imisambilishishe yakwe.’ Na Yohane atile abashilika abo batumine mu kwikata Yesu balifililwe ukumwikata, batile: “Takwatala akuba nangu umo uulanda ngo yu muntu.”—Luka 4:22; Mat. 7:28; Yoh. 7:46.
2. Bushe imisambilishishe ya kwa Yesu yali shani?
2 Aba bashilika tabalubile. Yesu cine fye aali ni Kasambilisha mukalamba ica kuti pano calo takwingaba umuntu nangu umo uwingafikako. Alelondolola bwino pa kusambilisha, kabili ifyo alesambilisha tafyaleafya ukumfwa. Alebomfya bwino ifilangililo ne fipusho. Imisambilishishe yakwe yalelingana na bantu alesambilisha, nampo nga bantu bakwete ififulo fya pa muulu nelyo nga bantu yaweyawe. Icine Yesu alesambilisha cali icashika nomba tacakosele ukumfwa. Lelo, kwali na cimbi icalengele ukuti Yesu abe Kasambilisha mukalamba.
Ukutemwa Kwalicindama nga Nshi
3. Bushe imisambilishishe ya kwa Yesu yapusene shani ne ya ntungulushi sha mapepo ishaliko mu nshiku shakwe?
3 Pali bakalemba na baFarise, pafwile pali abacenjele sana kabili abaishibe ukusambilisha. Nomba cinshi calengele ukuti belingana imisambilishishe na Yesu? Ishi ntungulushi sha mapepo tashatemenwe abantu yaweyawe. Shalibasuulile, kabili shalebamona fye ukuti ‘balitiipwa.’ (Yoh. 7:49) Lelo Yesu ena aleumfwila aba bantu uluse, pantu “balebacusha kabili bali abapaswa nge mpaanga ishabula kacema.” (Mat. 9:36) Alebasansamukila no kubomfwila ubulanda, kabili ali ne cikuuku kuli bena. Na kabili, ishi ntungulushi sha mapepo tashatemenwe Lesa ukufuma pa nshi ya mitima. (Yoh. 5:42) Lelo Yesu ena alitemenwe Wishi kabili alitemenwe ukucita ukufwaya Kwakwe. Ishi ntungulushi sha mapepo shalenyonganya amashiwi ya kwa Lesa pa kuti shilecita ifyo shalefwaya, lelo Yesu ena alitemenwe “icebo ca kwa Lesa.” E co alesambilisha kabili alecilondolola no kucicingilila, e lyo alekonka ne fyo cilanda. (Luka 11:28) Kanshi, fyonse ifyo Kristu alecita fyalelanga ukutemwa akwete. Uku kutemwa kwalemonekela mu fyo alesambilisha, mu fyo alecitila abantu, na mu nshila alebasambilishishamo.
4, 5. (a) Mulandu nshi cacindamina ukuba no kutemwa ilyo tulesambilisha? (b) Mulandu nshi ukwishiba bwino ifyo tulesambilisha no kwishiba ukusambilisha na fyo fyacindamina?
4 Finshi twingasambililako? Apo tuli basambi ba kwa Kristu, tufwaya ukumupashanya mu mikalile yesu na mu misambilishishe yesu. (1 Pet. 2:21) Kanshi, tatufwaya ukulasambilisha fye abantu icine ca mu Baibolo, lelo tufwaya no kuba ne mibele iyo Yehova akwatako, maka maka ukutemwa. Nampo nga twalishiba ifingi atemwa te fingi twaishiba, e lyo nampo nga twalishiba sana ukusambilisha atemwa tatwaishiba sana, ukutemwa tulanga kukatwafwa ukufika abo tulesambilisha pa mutima. Pa kuti tulebomba bwino umulimo wesu uwa kupanga abasambi, tulingile ukupashanya ukutemwa uko Yesu akwete ilyo tulesambilisha.
5 Kwena, pa kuti tulesambilisha bwino, tulingile ukwishiba bwino ilyashi tulelandapo kabili tulingile ukwishiba ne fya kusambilisha abantu. Yesu alyafwile abasambi bakwe ukwishiba ifi fintu. Na pali lelo, Yehova na o ukupitila mu kuteyanya kwakwe, alatwafwa ukwishiba bwino ifyo tusambilisha abantu ne nshila ya kubasambilishishamo. (Belengeni Esaya 54:13; Luka 12:42.) Na lyo line, tatulingile ukwishiba fye ukusambilisha lelo tulingile no kutemwa ifyo tulesambilisha. Nga ca kuti natwishiba bwino ifyo tulesambilisha, natwishiba ukusambilisha e lyo tuli no kutemwa, ninshi tukalasambilisha bwino. E ico kuti twalanga shani ukutemwa ilyo tulesambilisha? Bushe Yesu na basambi bakwe balelanga shani ukutemwa? Lekeni tumone.
Tufwile Ukutemwa Yehova
6. Bushe imilandile yesu iba shani nga tulelanda pa muntu uo twatemwa?
6 Tulomfwa bwino ukulanda pa fintu ifyo twatemwa. Nga tulelanda pa fyo twatemwa, tulacincimuka kabili tulanda ne nsansa. Ilingi line e fyo ciba na lintu tulelanda pa muntu uo twatemwa. Tulafwaisha ukwebako bambi ifyo uyo muntu aba. Tulamulumbilisha, tulamucindika, kabili tulanda ifisuma pali ena. Ico tucitila ifyo ni co tufwaya abantu bambi nabo batemwa uyo muntu ne mibele yakwe.
7. Bushe ukutemwa Yesu atemenwe Lesa kwalengele alecita finshi?
7 Ilyo tushilatendeka ukwafwa abantu bambi ukutemwa Yehova, intanshi ifwe bene tulingile ukumwishiba no kumutemwa. Na kuba, ukupepa kwa cine kwashimpwa pa kutemwa Lesa. (Mat. 22:36-38) Yesu alitulanga icipasho icisuma ico tufwile ukukonka. Alitemenwe Yehova no mutima wakwe onse, amano yakwe yonse, umweo wakwe onse, na maka yakwe yonse. Yesu alishibe bwino bwino Wishi pantu aali nankwe imyaka iingi nga nshi ku muulu. Finshi fyafumine muli uku kwikala pamo inshita iikalamba? Yesu atile: “Nalitemwa Tata.” (Yoh. 14:31) Ukutemwa kwakwe kwalemoneka mu fintu fyonse ifyo alelanda no kucita. E kwalelenga lyonse alecita ifintu ifyaletemuna Lesa. (Yoh. 8:29) E kwalengele no kuti alesuusha intungulushi sha mapepo ishali no bumbimunda kabili ishaleimona kwati shaleimininako Lesa. Ukutemwa na kabili e kwalengele ukuti alelanda pali Yehova no kula-afwa bambi ukwishiba Lesa no kumutemwa.
8. Bushe ukutemwa Lesa kwalengele abasambi ba kwa Yesu ukucita finshi?
8 Abasambi ba kwa Yesu abaliko mu nshita sha batumwa nabo balitemenwe Yehova nga filya fine Yesu amutemenwe, kabili uku kutemwa e kwalengele babe abashipa kabili abacincila ukubila imbila nsuma. Basalangenye isambilisho lyabo mu Yerusalemu monse. Nangu ca kuti intungulushi sha mapepo shalebakaanya, abasambi balifililwe ukuleka ukulanda ifyo bamwene ne fyo baumfwile. (Imil. 4:20; 5:28) Balishibe ukutila Yehova aali na bena kabili ali no kubapaala. Na cine alibapaalile! Na kuba, mupepi ne myaka 30 ukutula apo Yesu afwilile, umutumwa Paulo alembele ukuti imbila nsuma yalibililwe “ku cibumbwa conse ica mwi samba lya muulu.”—Kol. 1:23.
9. Cinshi cingatwafwa ukutemwa sana Lesa?
9 Na ifwe nga tulefwaya ukulasambilisha bwino, tulingile ukutemwa sana Lesa. Cinshi cingatwafwa ukumutemwa sana? Kulalanda nankwe ukupitila mwi pepo. E lyo fimbi ifingatwafwa, kulasambilila Icebo cakwe, ukulabelenga impapulo shilanda pali Baibolo, no kulasangwa ku kulongana. Nga twaishiba sana Lesa, e lyo tukamutemwa nga nshi. Lyena, nga tulelanga ukuti twalitemwa Lesa mu fyo tusosa no kucita, bambi bakalamona kabili limbi nabo kuti basuka bapalama kuli Yehova.—Belengeni Amalumbo 104:33, 34.
Tufwile Ukutemwa Ifyo Tulesambilisha
10. Cinshi icikalamba icilenga umuntu ukuba kasambilisha musuma?
10 Kasambilisha musuma alatemwa ifyo asambilisha. Alingile ukusumina ukuti ifyo alesambilisha fya cine, kabili fyalicindama. Nga ca kuti kasambilisha nabika amano ku fyo alesambilisha, alaba uwacincimuka pa kusambilisha kabili na bantu alesambilisha kuti bafwaya ukulacita ifyo alebasambilisha. Nomba nga ca kuti kasambilisha tatemenwe ifyo alesambilisha, bushe abo alesambilisha kuti bafimona ukuti fyalicindama? Ica kumwenako cenu nga kasambilisha wa Cebo ca kwa Lesa calicindama nga nshi. Yesu atile: “Onse uo basambilisha bwino akaba nga kasambilisha wakwe.”—Luka 6:40.
11. Mulandu nshi Yesu atemenwe ifyo alesambilisha?
11 Yesu alitemenwe ifyo alesambilisha. Alishibe ukuti fyalicindeme sana. Alesambilisha icine pali Wishi, nangu “amashiwi ya kwa Lesa” atemwa “amashiwi ya mweo wa muyayaya.” (Yoh. 3:34; 6:68) Icine ico Yesu alesambilisha cali ngo lubuuto pantu calelenga abantu ukwishiba icibi ne cisuma. Calelenga abantu abalufiwe ku fisambilisho fya bufi ifyo intungulushi sha mapepo shalesambilisha na bonse abatitikishiwe na Satana Kaseebanya ukuba ne subilo ne cisansamushi. (Imil. 10:38) Ukutemwa Yesu atemenwe icine kwamonekele mu fyo alesambilisha, na mu fyo alecita.
12. Bushe umutumwa Paulo aleumfwa shani pa mbila nsuma alebila?
12 Abasambi ba kwa Yesu nabo balitemenwe icine baishibe pali Yehova na Kristu, kabili balicicindike ica kuti na balebakaanya balifililwe ukubalesha ukwebako abantu bambi. Paulo alembeele Abena Kristu banankwe aba mu Roma ukutila: “Ndefwaisha ukubila imbila nsuma . . . Pantu nshumfwa insoni pa mbila nsuma; na kuba, e maka ya kwa Lesa aya kupususha onse uwaba ne citetekelo.” (Rom. 1:15, 16) Paulo alemona ukuti alicindikwe pa kupeelwa uyu mulimo wa kusabankanya icine. Alembele ukuti: “Ine, . . . napeelwe ici cikuuku ca kwa Lesa, ku kuyabila ku bena fyalo imbila nsuma pa bukankaala bushingapimwa ubwa kwa Kristu.” (Efes. 3:8) Kanshi twamona ukutila Paulo alitemenwe umulimo wa kusambilisha abantu pali Yehova ne fyo afwaya.
13. Mulandu nshi tulingile ukutemenwa imbila nsuma?
13 Imbila nsuma iisangwa mu Cebo ca kwa Lesa ilalenga twaishiba Kabumba wesu kabili ilalenga twaba ifibusa fyakwe. Iyi mbila nsuma ilatwafwa ukusanga ifyasuko ku fipusho fyacindama kabili yalikwata amaka ya kwalula ubumi bwesu. Ilatupeela isubilo, kabili ilatukosha mu nshita ya macushi. Na kabili, ilalenga twakwata isubilo lya kuti ku ntanshi tukaba no bumi ubusuma ku ciyayaya. Takwaba icingawama ukwishiba icingacila pa kwishiba imbila nsuma. Bupe ubusuma nga nshi ubo twapeelwa, kabili ubutuletela insansa. Na kabili tulaba ne nsansa sana nga tulepeelako bambi ubu bupe.—Imil. 20:35.
14. Kuti twacita shani pa kuti tuletemwa sana ifyo tulesambilisha?
14 Finshi mulingile ukucita pa kuti mutwalilile ukutemwa imbila nsuma? Ilyo mulebelenga Icebo ca kwa Lesa, limo limo muletala mwakutumana no kutontonkanya pa fyo mwabelenga. Ku ca kumwenako, elenganyeni ukuti mulebomba na Yesu mu mulimo wa mwi bala nelyo mule-enda no mutumwa Paulo. Elenganyeni ukuti muli mu calo cipya kabili mwelenganye ne fyo imikalile ikaaluka. Tontonkanyeni pa mapaalo ayo mwapokelela pa mulandu wa kumfwila imbila nsuma. Nga mwatemwa sana imbila nsuma, na bo musambilisha bakamona ukuti mwali-itemwa. Kanshi calicindama nga nshi ukulatontonkanyapo sana pa fyo twasambilila no kubika amano ku fyo tusambilisha abantu.—Belengeni 1 Timote 4:15, 16.
Tulingile Ukutemwa Abantu
15. Mulandu nshi kasambilisha alingile ukutemenwa abasambi bakwe?
15 Kasambilisha musuma alafwaya abasambi bakwe ba-angukililwa ilyo alebasambilisha pa kuti balefwaisha no kulandapo ifilefuma ku mutima. Kafundisha uwaba no kutemwa alafunda abasambi bakwe ifintu ifisuma pantu alibabikako sana amano. Abasambilisha ifingabafwa kabili ilyo alebasambilisha, alamona apapela amaka yabo aya kusambilila kabili aleshiba ifyo abasambi bakwe baba. Kasambilisha nga ali no kutemwa kwa musango yu, abasambi bakwe bakeshiba ukuti alibatemwa kabili bakalaumfwa bwino ukusambilila. Kafundisha na o akatemwa ukusambilisha.
16. Bushe Yesu alangile shani ukuti alitemenwe abantu?
16 Yesu alikwete ukutemwa kwa musango yu. Icikalamba icalangile ukutemwa kwakwe, kupeela umweo wakwe uwapwililika pa kuti abantu bakapusuke. (Yoh. 15:13) Ilyo ali pano calo, Yesu aleafwa abantu mu fyo balekabila kabili alebasambilisha pali Wishi. Tale-enekela abantu ukwisa kuli ena, lelo e wale-enda imilundu iingi nga nshi pa makasa ukuya kuli bena pa kuti abashimikile imbila nsuma. (Mat. 4:23-25; Luka 8:1) Aali uwatekanya kabili alebalangulukilako. Ilyo calingile ukuti alungike abasambi bakwe, abalungike mu kutemwa. (Marko 9:33-37) Alekoselesha abasambi bakwe pantu alebalanga ukuti baali abafikapo ukubila imbila nsuma. Takwatala akuba kasambilisha uwaba no kutemwa nga Yesu. Ukutemwa abasambi bakwe kwalengele ukuti nabo bamutemwe no kulakonka amafunde yakwe.—Belengeni Yohane 14:15.
17. Cinshi cilanga ukuti abasambi ba kwa Yesu balitemenwe abantu bambi?
17 Abasambi ba kwa Yesu nabo balitemenwe sana abo baleshimikila imbila nsuma. Baleshipikisha nangu babacushe shani kabili baleibika na mu kapoosa mweo pa kubila ku bantu imbila nsuma. Balitemenwe nga nshi abantu abaleumfwa imbila nsuma! Amashiwi yalembele umutumwa Paulo, yalatulanga ico. Atile: “Twali abanakilila mu kati kenu, nga filya nyina uonsha asakamana bwino abana bakwe. E ico, apo twalimutemwa sana, tatwalefwaisha fye ukumupeela imbila nsuma ya kwa Lesa epela, lelo twalefwaya ukumupeela ne myeo yesu, pantu mwaishileba abatemwikwa kuli ifwe.”—1 Tes. 2:7, 8.
18, 19. (a) Cinshi cilenga ukuti tuleipeelesha ukubomba umulimo wa kushimikila? (b) Shimikeni ica kumwenako cimo icilelangilila ukuti abantu balamona ifyo twatemwa bantu bambi.
18 E fyo caba na muno nshiku, Inte sha kwa Yehova balashimikila icalo fye conse pa kuti bafwaye abengatemwa ukwishiba Lesa no kumubombela. Na kuba, mu myaka yonse 17 iyapita, twalebomba ama-awala ukucila pali bilioni umo cila mwaka mu mulimo wa kushimikila no kupanga abasambi, kabili tucili tulabomba uyu mulimo. Nangu ca kutila pa kushimikila tubomfya inshita yesu, amaka yesu ne fikwatwa fyesu, tubomba uyu mulimo mu kuitemenwa. Nga Yesu, na ifwe twalishiba ukuti Shifwe wa ku muulu uwakwata ukutemwa afwaya abantu baishiba icine icingalenga bakwata umweo wa muyayaya. (Yoh. 17:3; 1 Tim. 2:3, 4) Ukutemwa e kulenga ukuti tuleafwa abafwaya ukusambilila icine ukuti beshibe Yehova no kumutemwa nge fyo na ifwe twamutemwa.
19 Abantu bambi balamona ukuti twaliba no kutemwa. Ku ca kumwenako, nkashi umo painiya mu calo ca United States alalembela abantu amakalata ya ku basansamusha nga ca kuti lupwa lwabo afwa. Umwaume umo alibweseshe kalata kuli uyu nkashi no kumweba ati: “Ilyo napokelele fye kalata nalipapile nati, kanshi kuti kwaba no muntu uwingalemba kalata ya kukoselesha umuntu umbi uo ashaishiba nangu panono. Ico ningalanda fye ca kuti mwalitemwa abantu banenu kabili mwalitemwa na Lesa uutungulula abantu ku mweo.”
20. Bushe ukuba no kutemwa ilyo tulesambilisha kwacindama shani?
20 Kalemba umo atile umuntu nga alikwata ukutemwa kabili alabombesha, imilimo yakwe ilawama sana. Ilyo tulesambilisha, tufwaya ukwafwa abasambi besu ukwishiba Yehova no kumutemwa. Nga fintu twamona, pa kuti tube bakasambilisha basuma, tulingile ukutemwa Lesa, ukutemwa icine, e lyo no kutemwa abantu. Nga twaba no ku kutemwa ilyo tulebomba umulimo wa kushimikila, tulaba ne nsansa ishifuma mu kupeela e lyo kabili ukwishiba ukuti tulepashanya Yesu no kulenga Yehova ukusekelela na ko kulatuletela insansa.
Kuti Mwayasuka Shani?
• Ilyo tulesambilisha bambi imbila nsuma, mulandu nshi cacindamina . . .
ukutemwa Lesa?
ukutemwa ifyo tulesambilisha?
ukutemwa abo tulesambilisha?
[Amepusho]
[Icikope pe bula 15]
Cinshi calengele imisambilishishe ya kwa Yesu ukupusana ne ya bakalemba na baFarise?
[Icikope pe bula 18]
Pa kuti tulesambilisha bwino tulingile ukwishiba ifyo tulesambilisha e lyo no kulasambilisha bwino, ne cacindamisha, tufwile ukuba no kutemwa