Sundoga si Jesus—Pagtudlo Uban ang Gugma
Sundoga si Jesus—Pagtudlo Uban ang Gugma
“Wala pa gayoy laing tawo nga nakasulti ug sama niini.”—JUAN 7:46.
1. Unsay reaksiyon sa mga tawo sa paagi sa pagtudlo ni Jesus?
HANDURAWA kon unsa gayod ka makaiikag nga madunggan si Jesus nga magtudlo! Gihubit sa Bibliya kon unsay epekto ni Jesus ngadto sa nakahibalag kaniya. Pananglitan, ang magsusulat sa Ebanghelyo nga si Lucas nag-ingon nga ang mga tawo sa Nasaret “nahibulong sa madanihong mga pulong nga nanggula gikan sa iyang baba.” Si Mateo misulat nga kadtong naminaw kang Jesus sa iyang Wali sa Bukid “nahingangha sa iyang paagi sa pagpanudlo.” Ug si Juan nakaobserbar nga ang mga polis nga gipadala aron sa pagdakop kang Jesus wala makaako sa pagbuhat niana, nga nag-ingon: “Wala pa gayoy laing tawo nga nakasulti ug sama niini.”—Luc. 4:22; Mat. 7:28; Juan 7:46.
2. Unsang mga paagi sa pagtudlo ang gigamit ni Jesus?
2 Wala masayop ang maong mga polis. Dili malalis nga si Jesus mao ang labing bantogang Magtutudlo nga nabuhi sukad. Ang iyang pagpanudlo dali kaayong masabtan ug walay makakuwestiyon sa iyang pangatarongan. Siya hanas kaayong migamit ug mga ilustrasyon ug mga pangutana. Iyang gipasibo ang iyang paagi sa pagtudlo sa iyang kaestorya, sila man taas ug posisyon o ordinaryong mga tawo. Ang kamatuoran nga iyang gitudlo sayon sabton apan makapatandog kaayo. Apan, dili kay kana ra ang naghimo kang Jesus nga dakong Magtutudlo.
Labing Hinungdanong Hiyas—Gugma
3. Ingong magtutudlo, sa unsang paagi si Jesus nalahi sa mga lider sa relihiyon sa iyang adlaw?
3 Taliwala sa mga eskriba ug Pariseo, lagmit dihay intelihenteng mga tawo nga dunay kahibalo ug kahanas sa pagpaambit niana. Unsay nakapalahi sa paagi sa pagpanudlo ni Jesus? Ang mga lider sa relihiyon niadtong panahona walay gugma sa ordinaryong mga tawo. Hinunoa, ilang gitamay sila, nga nag-isip kanila ingong “tinunglong katawhan.” (Juan 7:49) Sa kasukwahi, si Jesus naluoy kanila, sanglit sila “pinanitan ug nagkatibuagsa sama sa mga karnero nga walay magbalantay.” (Mat. 9:36) Siya malumo, mabination, ug maluloton. Dugang pa, ang mga lider sa relihiyon walay tinuod nga gugma sa Diyos. (Juan 5:42) Apan, si Jesus nahigugma sa iyang Amahan ug nalipay sa pagbuhat sa iyang kabubut-on. Ang mga lider sa relihiyon nagtuis sa pulong sa Diyos alang sa ilang kaayohan, apan si Jesus nahigugma “sa pulong sa Diyos”—iya kanang gitudlo, gipatin-aw, gidepensahan, ug gituman. (Luc. 11:28) Oo, si Kristo nagpakitag halalom nga gugma diha sa iyang gitudlo, sa iyang pagpakiglabot sa mga tawo, ug sa paagi sa iyang pagtudlo kanila.
4, 5. (a) Nganong hinungdanon ang pagtudlo uban ang gugma? (b) Sa pagpanudlo, nganong hinungdanon usab ang kahibalo ug kahanas?
4 Komosta sa atong bahin? Ingong mga sumusunod ni Kristo, gusto natong sundogon siya diha sa atong ministeryo ug sa atong pagkinabuhi. (1 Ped. 2:21) Busa, ang atong tumong dili lamang ang pagpaambit ug kahibalo sa Bibliya kondili ang pagpakita usab sa mga hiyas ni Jehova, ilabina ang gugma. Daghan man kitag nahibaloan o diyutay ra, hanas man kita sa pagpanudlo o dili, ang gugma nga atong gipakita motabang kanato nga maabot ang kasingkasing sa atong gisangyawan. Aron mahimong epektibo kaayo sa paghimog mga tinun-an, kinahanglang sundogon nato si Jesus pinaagi sa pagtudlo uban ang gugma.
5 Siyempre, aron mahimong maayong mga magtutudlo, kinahanglan nga aduna kitay kahibalo bahin sa atong itudlo ug kahanas sa pagpaambit niana. Si Jesus nagtabang sa iyang mga tinun-an sa pagbaton niana, ug si Jehova nagtabang usab kanato karon pinaagi sa iyang kongregasyon. (Basaha ang Isaias 54:13; Lucas 12:42.) Bisan pa niana, kinahanglang himoon natong tumong nga magtudlo dili lamang pinaagi sa atong hunahuna kondili pinaagi usab sa atong kasingkasing. Kon kita adunay kahibalo, kahanas, ug gugma, ang resulta sa atong pagpanudlo makapatagbaw kaayo. Nan, sa unsang mga paagi kita makapakitag gugma sa dihang kita nagatudlo? Giunsa kana pagpakita ni Jesus ug sa iyang mga tinun-an? Tan-awon nato.
Kinahanglang Higugmaon Nato si Jehova
6. Sa unsang paagi kita mag-estorya bahin sa tawo nga atong gihigugma?
6 Ganahan tang moestorya bahin sa mga butang nga atong gimahal. Sa dihang kita maghisgot bahin niana, dayag kaayo ang atong kalipay ug kadasig. Tinuod kini ilabina kon kita nag-estorya bahin sa usa ka tawo nga atong gihigugma. Kasagaran, gusto natong moestorya sa uban kon unsay atong nahibaloan bahin nianang tawhana. Ato siyang dayegon, pasidunggan, ug depensahan. Ato kanang gibuhat tungod kay gusto nato nga ang uban madani usab kaniya ug sa iyang mga hiyas.
7. Unsay gibuhat ni Jesus tungod sa iyang gugma sa Diyos?
7 Sa dili pa nato maugmad sa uban ang gugma kang Jehova, kinahanglan nga kita nakaila ug nahigugma kaniya. Kon buot hunahunaon, ang matuod nga pagsimba gipasukad sa gugma alang sa Diyos. (Mat. 22:36-38) Si Jesus nagpakitag hingpit nga panig-ingnan. Iyang gihigugma si Jehova sa tibuok niyang kasingkasing, hunahuna, kalag, ug kusog. Kay dugayng nakauban ni Jesus ang iyang langitnong Amahan, tingali sulod sa bilyonbilyon ka tuig, siya nakaila kaayo kaniya. Unsay resulta niana? “Gihigugma ko ang Amahan,” si Jesus miingon. (Juan 14:31) Ang maong gugma nakita diha sa tanan nga gisulti ug gibuhat ni Jesus. Kana nagpalihok kaniya sa pagbuhat kanunay sa mga butang nga makapahimuot sa Diyos. (Juan 8:29) Nagtukmod kana kang Jesus sa pagkondenar sa mga lider sa relihiyon, nga sinalingkapawng nangangkon nga naghawas sa Diyos. Nagpalihok usab kana kaniya sa pagsulti bahin kang Jehova ug sa pagtabang sa uban nga makaila ug mahigugma sa Diyos.
8. Unsay gibuhat sa mga tinun-an ni Jesus tungod sa ilang gugma sa Diyos?
8 Sama kang Jesus, ang iyang unang-siglong mga tinun-an nahigugma kang Jehova, ug kini nga gugma nagpalihok kaniya sa pagsangyaw sa maayong balita uban ang kaisog ug kasibot. Ilang gipuno ang Jerusalem sa ilang pagtulon-an, bisan tuod gisupak sila sa gamhanang mga lider sa relihiyon. Ang mga tinun-an dili gayod makahunong sa pagsulti bahin sa mga butang nga ilang nakita ug nadungog. (Buh. 4:20; 5:28) Sila nahibalo nga si Jehova nagauban kanila ug magpanalangin kanila—ug gibuhat gayod niya kana! Gani, wala pay 30 ka tuig human sa kamatayon ni Jesus, si apostol Pablo nakasulat nga ang maayong balita nawali na “sa tibuok kalalangan ilalom sa langit.”—Col. 1:23.
9. Sa unsang paagi mapalig-on nato ang atong gugma sa Diyos?
9 Kon buot nato nga mahimong epektibo kaayong mga magtutudlo, kinahanglan usab natong tinoon nga kita padayong nagpalig-on sa atong gugma sa Diyos. Sa unsang paagi mahimo nato kana? Pinaagi sa pagpakigkomunikar kanunay sa Diyos diha sa pag-ampo. Atong mapalig-on usab ang atong gugma sa Diyos pinaagi sa pagtuon sa iyang Pulong, pagbasa sa mga publikasyon nga gibase sa Bibliya, ug pinaagi sa pagtambong sa Kristohanong mga tigom. Samtang mouswag ang atong kahibalo sa Diyos, ang atong kasingkasing matugob sa gugma alang kaniya. Unya, samtang atong ipakita ang atong gugma sa Diyos pinaagi sa pulong ug buhat, ang uban makamatikod niana ug mahimong madani kang Jehova.—Basaha ang Salmo 104:33, 34.
Kinahanglang Mahalon Nato ang Atong Itudlo
10. Unsay timailhan sa usa ka maayong magtutudlo?
10 Ang timailhan sa usa ka maayong magtutudlo mao nga iyang gimahal ang iyang itudlo. Kinahanglang motuo siya nga kana maoy tinuod, hinungdanon, ug bililhon. Kon ganahan siya sa iyang itudlo, madayag ang iyang kadasig, nga mag-impluwensiya gayod sa iyang gitudloan. Sa laing bahin, kon wala mahala sa usa ka magtutudlo ang iyang gitudlo, madahom ba niya nga mahalon kana sa iyang mga estudyante? Hinungdanon gayod ang imong ehemplo ingong magtutudlo sa Pulong sa Diyos. Si Jesus miingon: “Ang matag estudyante nga maayong pagkabansay mahisama sa iyang magtutudlo.”—Luc. 6:40, The New Berkeley Version in Modern English.
11. Nganong gimahal ni Jesus ang iyang gitudlo?
11 Gimahal ni Jesus ang iyang gitudlo. Siya nahibalo nga duna siyay bililhong butang nga angayng ipaambit—ang kamatuoran bahin sa iyang langitnong Amahan, ang “mga pulong sa Diyos” ug “mga pulong bahin sa kinabuhing walay kataposan.” (Juan 3:34; 6:68) Sama sa sanag kaayo nga kahayag, ang kamatuoran nga gitudlo ni Jesus nagyagyag kon unsay daotan ug nagpasiugda kon unsay maayo. Kini naghatag paglaom ug kahupayan ngadto sa mga mapaubsanon nga nalimbongan sa mini nga mga lider sa relihiyon ug gidaogdaog sa Yawa. (Buh. 10:38) Ang pagmahal ni Jesus sa kamatuoran makita dili lamang sa iyang gitudlo kondili sa tanan usab niyang gibuhat.
12. Unsay pagbati ni apostol Pablo sa maayong balita?
12 Sama kang Jesus, gimahal ug gipabilhan pag-ayo sa iyang mga tinun-an ang kamatuoran bahin kang Jehova ug Kristo nga dili sila mapugngan sa mga magsusupak sa pagpaambit niana sa uban. Si Pablo misulat sa mga Kristohanon sa Roma: “Ako may kaikag nga ipahayag usab ang maayong balita . . . Kay wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo.” (Roma 1:15, 16) Giisip ni Pablo nga usa ka kadungganan ang pagmantala sa kamatuoran. Siya misulat: “Nganhi kanako, . . . kining dili-takos nga kalulot gihatag, aron ipahayag ko ngadto sa kanasoran ang maayong balita bahin sa dili-matugkad nga bahandi ni Kristo.” (Efe. 3:8) Dili lisod handurawon ang kadasig ni Pablo samtang siya nagtudlo sa uban bahin kang Jehova ug sa Iyang katuyoan.
13. Nganong angayng mahalon ang maayong balita?
13 Ang maayong balita nga makita diha sa Pulong sa Diyos motabang kanato sa pagkaila sa Maglalalang ug sa pagbaton ug suod nga relasyon kaniya. Kana maghatag ug makapatagbawng mga tubag sa hinungdanong mga pangutana sa kinabuhi ug adunay gahom sa pagbag-o sa kinabuhi, paghatag ug paglaom, ug pagpalig-on kanato panahon sa kalisdanan. Dugang pa, kini nagtabang kanato nga makabaton ug makahuloganong kinabuhi nga wala gayoy pagkatapos. Wala nay lain pang kahibalo nga mas bililhon o mas hinungdanon kay sa maayong balita. Bililhon kaayo kana nga gasa, nga maghatag kanatog dakong kalipay. Ug mosamot pa ang atong kalipay kon atong ipaambit ang maong gasa.—Buh. 20:35.
14. Sa unsang paagi molalom ang atong gugma sa atong ginatudlo?
14 Unsay imong mahimo aron molalom ang imong gugma sa maayong balita? Samtang nagbasa sa Pulong sa Diyos, hunong sa makadiyot ug hinuktoki ang imong gibasa. Pananglitan, handurawa nga kauban ka ni Jesus sa iyang yutan-ong ministeryo o nagpanaw ka uban ni apostol Pablo. Handurawa nga atua ka sa bag-ong kalibotan ug kon unsa ka nindot ang kinabuhi didto. Palandonga ang mga panalangin nga imong nadawat tungod sa imong pagkamasinugtanon sa maayong balita. Kon gimahal nimo pag-ayo ang maayong balita, mamatikdan kana sa imong gitudloan. Nan, maayo gayod nga atong palandongon ang atong nakat-onan ug hatagag pagtagad ang atong ginatudlo.—Basaha ang 1 Timoteo 4:15, 16.
Kinahanglang Higugmaon Nato ang mga Tawo
15. Nganong angayng higugmaon sa magtutudlo ang iyang mga estudyante?
15 Ang usa ka maayong magtutudlo mangitag paagi nga komportable ang iyang mga estudyante aron ganahan silang mokat-on ug makigbahin sa panaghisgot. Ang usa ka mahigugmaong magtutudlo mopaambit sa iyang kahibalo tungod kay siya nahingawa sa iyang mga estudyante. Iyang ipasibo ang iyang pagtudlo sa ilang panginahanglan ug katakos sa pagsabot. Iyang hatagag pagtagad ang katakos ug kahimtang sa iyang mga estudyante. Kon mabatonan sa mga magtutudlo ang maong gugma, makita kana sa mga estudyante, ug mahimong makalilipay ang pagtudlo ug pagkat-on.
16. Sa unsang mga paagi nga si Jesus nagpakitag gugma sa mga tawo?
16 Gipakita ni Jesus kanang matanga sa gugma. Ang iyang kinadak-ang pagpasundayag sa gugma mao ang paghalad sa iyang hingpit nga tawhanong kinabuhi aron maluwas ang uban. (Juan 15:13) Panahon sa iyang ministeryo, si Jesus kanunayng andam sa pagtagana sa panginahanglan sa mga tawo sa pisikal ug ilabina sa espirituwal. Inay maghulat nga duolon sa mga tawo, siya mibaktas ug gatosan ka milya aron sa pagpaambit kanila sa maayong balita. (Mat. 4:23-25; Luc. 8:1) Siya mapailobon ug masinaboton. Sa dihang kinahanglang badlongon ang iyang mga tinun-an, siya naghimo niana uban ang gugma. (Mar. 9:33-37) Siya nagdasig kanila pinaagi sa pagpakitag pagsalig nga sila mahimong epektibong mga magmamantala sa maayong balita. Wala pay magtutudlo nga milabaw kang Jesus sa pagpakitag gugma. Ang gugma nga iyang gipakita sa iyang mga tinun-an nagpalihok kanila sa paghigugma usab kaniya ug sa pagtuman sa iyang mga sugo.—Basaha ang Juan 14:15.
17. Sa unsang paagi ang mga tinun-an ni Jesus nagpakitag gugma sa uban?
17 Sama kang Jesus, ang iyang mga tinun-an nagpakitag halalom nga gugma niadtong ilang gisangyawan. Sila nag-alagad sa uban ug milampos sa pagwali sa maayong balita, bisan pag sila nagsagubang ug mga paglutos ug nameligro ang ilang kinabuhi. Gimahal nila pag-ayo kadtong misanong sa maayong balita. Makapatandog gayod ang mga pulong ni apostol Pablo, kinsa misulat: “Kami nahimong malumo sa inyong taliwala, sama sa usa ka nagpasusong inahan nga nagpangga sa iyang kaugalingong mga anak. Busa, kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.”—1 Tes. 2:7, 8.
18, 19. (a) Nganong andam man kitang mohimog mga sakripisyo diha sa buluhatong pagsangyaw? (b) Paghatag ug pananglitan nga ang gugma nga atong gipakita namatikdan sa uban.
18 Sa modernong panahon usab, ang mga Saksi ni Jehova nagsangyaw sa tibuok yuta sa pagpangita niadtong nangandoy nga makaila ug moalagad sa Diyos. Gani, sulod na sa 17 ka tuig, kita nakagugol ug kapin sa usa ka bilyong oras matag tuig diha sa pagsangyaw ug paghimog mga tinun-an—ug kita nagpadayon pa sa pagbuhat niana. Kita kinabubut-ong nagbuhat niana, bisan tuod nagkinahanglan kanag pagsakripisyo sa atong panahon, kusog, ug materyal nga mga butang. Sama kang Jesus, kita nakasabot nga ang atong mahigugmaong langitnong Amahan nagtinguha nga ang mga tawo makabaton sa kahibalo nga motultol sa kinabuhing walay kataposan. (Juan 17:3; 1 Tim. 2:3, 4) Ang gugma magtukmod kanato sa pagtabang sa mga tawong matinud-anog kasingkasing nga makaila ug mahigugma kang Jehova sama kanato.
19 Ang gugma nga atong gipakita namatikdan sa uban. Pananglitan, ang usa ka payunir nga sister sa Amerika magpadalag sulat aron sa paghupay niadtong namatyan ug mga minahal. Usa ka tawo ang mibalos: “Sa sinugdan natingala ko nga dunay naningkamot sa pagpadalag sulat sa dili niya kaila aron tabangan kini sa pagsagubang sa malisod nga panahon. Makaingon gyod ko nga duna kay gugma sa imong isigkatawo ug sa Diyos kinsa nagagiya sa mga tawo diha sa dalan sa kinabuhi.”
20. Unsa ka hinungdanon ang pagtudlo uban ang gugma?
20 Dunay panultihon nga sa dihang mag-uban ang gugma ug kahanas, motungha ang usa ka obra maestra. Sa atong pagpanudlo, kita maningkamot sa pagtabang sa atong mga estudyante nga makaila kang Jehova ug mahigugma kaniya. Oo, aron mahimong epektibong mga magtutudlo, kinahanglan nga atong batonan kining tulo ka gugma—gugma alang sa Diyos, gugma alang sa kamatuoran, ug gugma alang sa katawhan. Samtang atong ugmaron kanang matanga sa gugma ug ipakita kana diha sa atong ministeryo, bation nato dili lamang ang kalipay sa paghatag kondili ang katagbawan usab sa pagkahibalo nga atong gisundog si Jesus ug gipahimut-an si Jehova.
Unsay Imong Tubag?
• Samtang kita nagtudlo sa uban sa maayong balita, nganong hinungdanon nga kita adunay . . .
gugma sa Diyos?
gugma sa atong ginatudlo?
gugma sa atong gitudloan?
[Mga Pangutana sa Pagtuon]
[Hulagway sa panid 15]
Unsay nakapalahi sa paagi sa pagtudlo ni Jesus nianang sa mga eskriba ug Pariseo?
[Hulagway sa panid 18]
Aron mahimong maayong magtutudlo gikinahanglan ang kahibalo, kahanas ug, labaw sa tanan, ang gugma