Kpebe Uwụtn̄kpọ Jesus—Kpep Mme Owo N̄kpọ ke Ima

“Akananam owo ndomokiet itịn̄ke ikọ ntem.”—JOHN 7:46.

1. Didie ke mme owo ẹkenam n̄kpọ ẹban̄a usụn̄ oro Jesus ekesikpepde n̄kpọ?

KERE nte idem akaduaide mbon oro ẹkekopde ukwọrọikọ Jesus! Bible etịn̄ nte ikọ esie okotụkde mme owo. Ke uwụtn̄kpọ, Luke emi eketienede ewet Gospel ọdọhọ ke mbon Nazareth ẹma “ẹdu ke n̄kpaidem ndikop ndinem ikọ eke [ẹkewọn̄ọde Jesus] ke inua.” Matthew ọdọhọ ke “idem ama akpa otuowo” oro ẹkekopde Ukwọrọikọ oro Jesus ọkọkwọrọde ke Obot, “aban̄a usụn̄ ukpepn̄kpọ” Jesus. John n̄ko ọdọhọ ke mme asan̄autom oro ẹkedọn̄de ẹkemụm Jesus ẹma ẹfiak ẹnyọn̄ ubọk ubọk ẹnyụn̄ ẹdidọhọ ẹte: “Akananam owo ndomokiet itịn̄ke ikọ ntem.”—Luke 4:22; Matt. 7:28; John 7:46.

2. Didie ke Jesus ekesikpep mme owo n̄kpọ?

² Mme asan̄autom oro ikanamke ndudue. Jesus ekedi akakan Andikpep oro akanam odude.Ukpepn̄kpọ esie ama an̄wan̄a owo, emem, inyụn̄ idịghe se owo akpafan̄ade. Enye ama esinọ uwụtn̄kpọ onyụn̄ obụp mbụme. Ukpepn̄kpọ esie ama an̄wan̄a mme akama ikpọ itie ye nditọ ubuene. Enye ekekpep ntotụn̄ọ Ikọ Abasi, edi anam enye an̄wan̄a mme owo. Edi idịghe n̄kukụre se ikanamde enye edi akwa Andikpep edi emi-o.

Ima Ekedi Akpan Edu Esie

3. Didie ke Jesus okokpụhọde ye mme adaiso ido ukpono eyo esie?

³ Anaedi ata mme ọfiọkn̄kpọ owo ẹma ẹdu ke otu mme ewetn̄wed ye mme Pharisee oro ẹkenyenede ifiọk ekem ndikpep mme owo n̄kpọ. Nso ikanam ukpepn̄kpọ Jesus okpụhọde ye eke mmọ? Mme adaiso ido ukpono ini oro ikamaha nditọ ubuene. Mmọ ẹkesise mme usụhọde owo emi ke ndek ẹnyụn̄ ẹda mmọ nte “mbon oro ẹma ẹkesụn̄i.” (John 7:49) Edi Jesus ama okop mbọm aban̄a nditọ ubuene sia “[ẹkefiomode] ẹnyụn̄ ẹsuande mmọ nte erọn̄ eke mînyeneke andikpeme.” (Matt. 9:36) Enye ama esitua mme owo mbọm, ọfọn ido, onyụn̄ enem itie. Ke adianade do, mme adaiso ido ukpono oro ikamaha Abasi. (John 5:42) Edi Jesus ama ama Ete esie onyụn̄ enem enye ndinam uduak Ete esie. Mme adaiso ido ukpono oro ẹma ẹyụrọde ikọ Abasi ẹnịm nte ẹmama, edi Jesus ama ama “ikọ  Abasi”—enye ama ekpep mme owo ikọ Abasi, anam enye an̄wan̄a mmọ, onyụn̄ odu uwem nte ikọ Abasi etemede. (Luke 11:28) Ke akpanikọ, Christ ekesinam kpukpru n̄kpọ ke ima, edide ekpep owo n̄kpọ, m̀mê ọnọ owo item.

4, 5. (a) Ntak emi anade ikpep mme owo n̄kpọ ke ima? (b) Ntak emi onyụn̄ oyomde inyene ifiọk ye usọ man ikeme ndikpep mme owo n̄kpọ?

⁴ Nso kaban̄a nnyịn? Sia idide mme anditiene Christ, nnyịn ikpenyene ndikwọrọ ikọ nte enye ekesikwọrọde inyụn̄ idu uwem nte enye okodude. (1 Pet. 2:21) Ke ntre, nnyịn iyom ndikpep mme owo Bible, nnyụn̄ nnyene mme edu Jehovah, akpan akpan ima. Edide imenen̄ede ifiọk ndikpep mme owo n̄kpọ m̀mê inen̄ekede ifiọk, ima oro imade mme owo ayanam se ikpepde osụhọde odụk mmọ ọwọn̄esịt. Edieke iyomde ndinen̄ede n̄kụt unen ke utom unam mbet nnyịn, ana ikpep mme owo n̄kpọ ke ima kpa nte Jesus akanamde.

⁵ Edi akpanikọ nte ke man idi nti mme andikpep, ana ifiọk se idikpepde mme owo inyụn̄ inyene usọ. Jesus ama ekpep mme mbet esie ndikwọrọ ikọ, Jehovah onyụn̄ ada esop esie ekpep nnyịn n̄kpọ n̄ko. (Kot Isaiah 54:13; Luke 12:42.) Edi ana nnyịn iyak se ikpepde mme owo oto nnyịn esịt, utu ke ndinyụn̄ nsion̄o ikọ ke ibuot nnọ mmọ. Edieke inyenede ifiọk, usọ unọ ukpep, ye ima, iyenyene nti utịp. Edi didie ke ikeme ndikpep mme owo n̄kpọ ke ima? Didie ke Jesus ye mme mbet esie ẹkenam emi? Ẹyak ise.

Ana Ima Jehovah

6. Didie ke isitịn̄ iban̄a owo emi nnyịn imade?

⁶ Imesima nditịn̄ mban̄a mme n̄kpọ oro nnyịn imade. Ke ini itịn̄de iban̄a mme n̄kpọ emi, imesituak inua imam inyụn̄ itịn̄ ke ofụri esịt. Emi esinen̄ede etịbe ke ini itịn̄de iban̄a owo emi nnyịn imade. Imesima ndisian mbon efen se ifiọkde iban̄a owo oro. Imesitoro enye, ikpono enye, inyụn̄ ida inọ enye. Nnyịn isinam kpukpru emi sia iyomde mme owo ẹma enye ẹnyụn̄ ẹdiọn̄ọ nti ido esie.

7. Nso ke Jesus akanam ke ntak emi enye akamade Abasi?

⁷ Ana idiọn̄ọ inyụn̄ ima Jehovah mbemiso ikemede ndinam mbon en̄wen ẹtiene ẹma enye. Ke akpanikọ, owo oro mîmaha Abasi ikemeke ndituak ibuot nnọ enye. (Matt. 22:36-38) Jesus ama enịm mfọnn̄kan uwụtn̄kpọ ke afan̄ emi. Enye ama ama Jehovah ke ofụri esịt, ekikere, ukpọn̄, ye ukeme esie. Enye ama enen̄ede ọdiọn̄ọ Ete esie sia okodude ata anyan ini ye enye ke heaven. Ntak edi oro enye ọkọdọhọde ete: “Ami mmama Ete.” (John 14:31) Jesus ama owụt emi ke se enye eketịn̄de onyụn̄ anamde. Ima emi akanam enye esinam n̄kpọ oro enemde Abasi esịt kpukpru ini. (John 8:29) Ima emi okonyụn̄ anam enye asua ọnọ mme adaiso ido ukpono oro ẹkenamde nte ikpep mme owo ikọ Abasi. Ima emi okonyụn̄ anam enye ekpep mme owo n̄kpọ aban̄a Jehovah onyụn̄ anam mmọ ẹma Jehovah.

8. Nso ke mme mbet Jesus ẹkenam ke ntak emi mmọ ẹkemade Abasi?

⁸ Mme mbet Jesus oro ẹkedude ke akpa isua ikie ẹma ẹnyụn̄ ẹma Jehovah, ndien emi ama anam mmọ ẹkwọrọ eti mbụk ifịk ifịk. Mmọ ẹma ẹkwọrọ ikọ ke ofụri Jerusalem, kpa ye oro mme adaiso ido ukpono ẹkebiọn̄ọde mmọ. Mmọ iketreke nditịn̄ mban̄a mme n̄kpọ emi mmọ ẹkekụtde ẹnyụn̄ ẹkopde. (Utom 4:20; 5:28) Mmọ ẹma ẹfiọk ke Jehovah odu ye mmimọ, n̄ko ke enye ọyọdiọn̄ mmimọ. Jehovah ama onyụn̄ ọdiọn̄ mmọ. Ke nditịm ntịn̄, ikọyọhọke isua 30 tọn̄ọ Jesus akakpa, apostle Paul ama ewet ete ke ẹkwọrọ eti mbụk “ẹnọ kpukpru edibotn̄kpọ ke idak ikpaenyọn̄.”—Col. 1:23.

9. Didie ke ikeme ndinen̄ede mma Abasi?

⁹ Edieke iyomde ndidi nti mme andikpep, ana nnyịn n̄ko inen̄ede ima Abasi. Didie ke ikeme ndinam emi? Se idin̄wamde nnyịn edi ndibọn̄ akam nnọ Abasi kpukpru ini. N̄kpọ  en̄wen oro ẹdin̄wamde nnyịn inen̄ede ima Abasi edi ndikpep Bible, n̄kot mme n̄wed oro esop Abasi osiode, nnyụn̄ ndụk mme mbono esop ikọt Abasi. Adan̄a nte inyenede ekese ifiọk iban̄a Abasi, ntre n̄ko ke idinen̄ede ima enye. Ndien ke ini itịn̄de ikọ inyụn̄ inam n̄kpọ oro ẹwụtde ke imama Abasi, mbon en̄wen ẹyekụt ẹnyụn̄ ẹsan̄a ẹkpere Jehovah.—Kot Psalm 104:33, 34.

Ana Ima Se Ikpepde

10. Nso inam owo edi eti andikpep?

¹⁰ Se inamde owo edi eti andikpep edi enye ndima se enye ekpepde. Ana enye enịm ke se imọ ikpepde edi akpanikọ, edi akpan n̄kpọ, onyụn̄ enyene ufọn. Edieke andikpep amade se enye ekpepde, enye edikpep n̄kpọ emi ke ofụri esịt, ndien emi eyenen̄ede otụk mbon oro enye ekpepde. Edi, edieke andikpep mînen̄ekede ima se enye ekpepde, enye akpasan̄a didie odori enyịn̄ ke mbon oro enye ekpepde n̄kpọ ẹyeda se enye ekpepde ke akpan n̄kpọ? Enen̄ede ọfọn nnyịn inịm eti uwụtn̄kpọ nte mme andikpep Ikọ Abasi. Jesus ọkọdọhọ ete: “Owo ekededi eke ẹtịmde ẹkpep eyetie nte andikpep enye.”—Luke 6:40.

11. Ntak emi Jesus akamade se enye ekekpepde?

¹¹ Jesus ama ama se enye ekekpepde. Enye ama ọdiọn̄ọ ke imọ ikpep mme owo n̄kpọ iban̄a Ete imọ eke heaven, kpa “mme ikọ eke ẹtode Abasi” ye “ikọ nsinsi uwem.” (John 3:34; 6:68) Akpanikọ oro Jesus ekekpepde mme owo ama anam mmọ ẹfiọk se idiọkde ye se ifọnde. Akpanikọ emi ama anam mbon nsụhọdeidem oro mme adaiso nsunsu ido ukpono ẹkebian̄ade, Devil onyụn̄ otụhọrede, ẹkop ndọn̄esịt ẹnyụn̄ ẹnyene idotenyịn. (Utom 10:38) Kpukpru se Jesus akanamde, idịghe se enye ekekpepde kpọt, owụt ke enye ama enen̄ede ama akpanikọ.

12. Didie ke apostle Paul akada eti mbụk?

¹² Mme mbet Jesus n̄ko ẹma ẹnen̄ede ẹma akpanikọ oro mmọ ẹkekpepde ẹban̄a Jehovah ye Christ inyụn̄ iyakke mme asua ẹkpan mmọ nditịn̄ akpanikọ emi nnọ mbon en̄wen. Paul ekewet nditọete esie ke Rome ete: “Ke n̄kan̄ mi mmenyene ọkpọsọn̄ udọn̄ nditan̄a eti mbụk n̄ko nnọ mbufo . . . Koro bụt inamke mi iban̄a eti mbụk; ke akpanikọ, enye edi odudu Abasi emi ọwọrọde edinyan̄a ọnọ owo ekededi eke enyenede mbuọtidem.” (Rome 1:15, 16) Paul akada ke edi n̄kpọ ukpono imọ ndikwọrọ eti mbụk. Enye ekewet ete: “Ami . . . ke ẹkenọ mfọnido oro owo mîdotke, man n̄kpatan̄a eti mbụk emi aban̄ade inyene Christ oro ayan̄ade owo ifiọk, nnọ mme idụt.” (Eph. 3:8) Mme ikọ emi anam ikụt ifịk oro Paul ekesịnde ndikpep mme owo n̄kpọ mban̄a Jehovah ye uduak Esie.

13. Ntak emi ikpamade eti mbụk-e?

¹³ Eti mbụk oro odude ke Ikọ Abasi anam nnyịn idiọn̄ọ Andibot inyụn̄ isan̄a ikpere enye. Kpa enye n̄ko ọbọrọ mme akpan mbụme oro isibụpde, onyụn̄ enyene odudu ndikpụhọde nnyịn, ọnọ nnyịn idotenyịn, onyụn̄ ọsọn̄ọ nnyịn idem ke ini afanikọn̄. Ke adianade do, enye owụt nnyịn usụn̄ oro ikpasan̄ade man inyene nsinsi uwem. Idụhe ifiọk ndomokiet oro ọsọn̄de urua nte eti mbụk emi. Enye edi ọsọn̄urua enọ oro Abasi ọnọde nnyịn, enye onyụn̄ anam nnyịn ikop idatesịt. Imesinen̄ede ikop idatesịt ke ini ikwọrọde eti mbụk inọ mme owo.—Utom 20:35.

14. Didie ke ikeme ndinen̄ede mma se ikpepde?

¹⁴ Nso ke akpanam man etetịm ama eti mbụk? Ke ini okotde Ikọ Abasi, bet esisịt, kere se osụk okotde oro. Ke uwụtn̄kpọ, kere nte asan̄ade ye Jesus aka ukwọrọikọ m̀mê etienede apostle Paul aka. Kere nte odude ke obufa ererimbot, onyụn̄ okụtde nte kpukpru n̄kpọ ẹdide mbufa. Kere ban̄a mme ufọn oro enyenede ke ntak emi anamde se eti mbụk emi ọdọhọde. Edieke afo enen̄erede ama eti mbụk, mbon oro afo ekpepde n̄kpọ ẹyekụt. Ntem, ọfọn itie ikere mme n̄kpọ oro ikpepde  inyụn̄ inọ ntịn̄enyịn ke se ikpepde owo.—Kot 1 Timothy 4:15, 16.

Ana Ima Mme Owo

15. Ntak emi andikpep akpamade nditọ ukpepn̄kpọ esie?

¹⁵ Eti andikpep esinam nditọ ukpepn̄kpọ esie ẹkop inemesịt man mmọ ẹma ndisịn idem n̄kpep n̄kpọ nnyụn̄ nnọ ibọrọ. Andikpep emi enyenede ima ekpep nditọ ukpepn̄kpọ esie n̄kpọ ke ntak emi enye amade mmọ. Enye esikpep mmọ n̄kpọ etiene ukeme mmọ. Edieke mme andikpep ẹmade nditọ ukpepn̄kpọ mmọ ntem, mmọ ẹyefiọk ẹnyụn̄ ẹnen̄ede ẹkop inem ukpepn̄kpọ oro.

16. Nso ye nso ke Jesus akanam ndiwụt ke imama mme owo?

¹⁶ Jesus ekesinyụn̄ ama mme owo ntre. Akakan usụn̄ emi enye okowụtde nte imade owo ekedi enye ndiyak ukpọn̄ esie nnọ man ẹnyan̄a owo. (John 15:13) Ke ini Jesus okodude ke isọn̄, enye ama esin̄wam mme owo onyụn̄ ekpep mmọ n̄kpọ aban̄a Ete esie. Enye iketiehe-tie ibet mme owo ẹdi ẹbịne imọ, edi ama esisan̄a ediwak itiat ọkọkwọrọ eti mbụk ọnọ mmọ. (Matt. 4:23-25; Luke 8:1) Enye ama esime ime ye mme owo. Ke ini mme mbet esie ẹkenamde ndudue, enye ama enen̄ede mmọ ke ima. (Mark 9:33-37) Enye ama esisịn udọn̄ ọnọ mmọ onyụn̄ enyene mbuọtidem ke mmọ ẹyetan̄a eti mbụk ifịk ifịk. Baba owo kiet inyeneke utọ ima emi Jesus ekenyenede nte andikpep. Ima emi enye akamade mme mbet esie ama anam mmọ ẹma enye nde ẹnyụn̄ ẹnịm ibet esie.—Kot John 14:15.

17. Didie ke mme mbet Jesus ẹkewụt ke imama mme owo?

¹⁷ Mme mbet Jesus n̄ko ẹma ẹnen̄ede ẹma mbon oro mmọ ẹkekwọrọde ikọ ẹnọ. Ẹma ẹkọbọ mmọ, ndien akayak nsịn̄, ndusụk mmọ ẹkpetaba uwem mmọ ke ntak ukwọrọikọ, edi mmọ ẹma ẹsụk ẹkụt unen. Mmọ ẹma ẹnen̄ede ẹma mbon oro ẹkekpan̄de utọn̄ ẹnọ eti mbụk. Se apostle Paul ekewetde enen̄ede otụk owo ke idem, enye ekewet ete: “Nnyịn iketie sụn̄sụn̄ ke otu mbufo, nte emi eka ọbọkde nditọ esiemmọ. Ntre, sia inyenede esịt ima inọ mbufo, nnyịn ima inen̄ede ikop inemesịt, idịghe ke edinọ mbufo eti mbụk Abasi kpọt, edi n̄ko ke edinọ mbufo ukpọn̄ nnyịn, sia nnyịn imade mbufo.”—1 Thess. 2:7, 8.

18, 19. (a) Ntak emi nnyịn inyịmede ndinam se ikekeme man ika iso ikwọrọ ikọ? (b) Nọ uwụtn̄kpọ emi anamde inịm ke mme owo ẹsikụt ima oro imade mmọ.

¹⁸ Kpasụk ntre, Mme Ntiense Jehovah ẹkwọrọ ikọ ke ofụri ererimbot idahaemi, ẹyom mbon oro ẹnen̄erede ẹnyene udọn̄ ndikpono Abasi. Ke nditịm ntịn̄, ke isua 17 emi ẹbede mi, imesikwọrọ ikọ ibe biliọn  hour kiet kpukpru isua inyụn̄ ikpep mme owo n̄kpọ, ndien ke ika iso inam utom emi. Nnyịn inam emi ke imaesịt, okposụkedi emi esidade ini, odudu, ye ukeme nnyịn. Ukem nte Jesus, nnyịn n̄ko imọfiọk ke edima Ete nnyịn eke heaven oyom mme owo ẹnyene ifiọk emi edinamde mmọ ẹnyene nsinsi uwem. (John 17:3; 1 Tim. 2:3, 4) Ima anam nnyịn in̄wam mbon esịt akpanikọ ẹtiene nnyịn ẹfiọk ẹnyụn̄ ẹma Jehovah.

¹⁹ Mbon en̄wen ẹkụt ima emi nnyịn imade mme owo. Ke uwụtn̄kpọ, eyenete an̄wan kiet emi edide asiakusụn̄ ofụri ini ke United States esiwet leta ọnọ ẹsọk mbon oro owo mmọ akpade. Ete kiet ama ọbọrọ leta esie ete: “Idem ama enen̄ede akpa mi nte owo abiatde ini ewet leta ọnọ ẹsọk owo emi enye mîdiọn̄ọke man ọdọn̄ owo oro esịt ke ini nnanenyịn. N̄kukụre se n̄kemede nditịn̄ edi nte ke mbufo ẹmama mme owo ẹnyụn̄ ẹma Abasi emi owụtde mme owo usụn̄ uwem.”

20. Ntak ọfọnde ndikpep mme owo n̄kpọ ke ima?

²⁰ Ẹdọhọ ke owo ama enyene ima afiak enyene usọ unam n̄kpọ ke enye eyekeme ndinam n̄kpọ enen̄ede ọfọn. Ke ini ikpepde mme owo n̄kpọ, imesinam mmọ ẹdiọn̄ọ Jehovah ẹnyụn̄ ẹma enye. Ke akpanikọ, man idi nti mme andikpep, ana ima Abasi, ima akpanikọ, inyụn̄ ima mme owo. Ima inyene utọ ima emi, iyokop inemesịt inyụn̄ ikop uyụhọ ke ntak emi ikpebede Jesus inyụn̄ idat Jehovah esịt.

Didie ke Afo Ọkpọbọrọ?

• Ke ini ikpepde mme owo Bible, ntak emi ikpamade . . .

Abasi?

se nnyịn ikpepde mme owo?

nditọ ukpepn̄kpọ nnyịn?

[Mme Mbụme Ukpepn̄kpọ]

[Ndise ke page 15]

Nso ikanam usụn̄ emi Jesus ekesikpepde mme owo n̄kpọ okpụhọde ye usụn̄ emi mme ewetn̄wed ye mme Pharisee ẹkesikpepde?

[Ndise ke page 18]

Ana eti andikpep enyene ifiọk, usọ, onyụn̄ enen̄ede enyene ima