Tutanginina Yesu Muna Longa ye Zola
Tutanginina Yesu Muna Longa ye Zola
“E mpova ina ke yavovele nkutu muntu ko.”—YOA. 7:46.
1. O wantu aweyi bamonanga muna mpila kalongelanga o Yesu?
YINDULA kiese bamonang’o wantu vava bawanga malongi ma Yesu. Muna Nkand’a Nzambi tutanganga una bamona awana bawa malongi mandi. Kasikil’owu, muna Nsangu Zambote kasoneka, Luka wayika vo esi Nazarete ‘basivika mpe muna mambu mangemba mavaika muna nu’andi.’ Matai wavova vo awana bawa Elongi dia Yesu vana Mongo ‘bayizengeneka mun’elongi diandi.’ I bosi, Yoane wavova vo makesa mana matumwa mu kwenda kanga Yesu bavutuka moko-moko yo vova vo: “E mpova ina ke yavovele nkutu muntu ko.”—Luka 4:22; Mat. 7:28; Yoa. 7:46.
2. Yesu nkia mpila kalongelanga?
2 Makesa mamana ke bavuna ko. Ka lukatikisu ko vo Yesu i Nlongi anene ona wazinga kala. Yesu walonganga mu mpila yakiá, yaleboka ye kondwa lukatikisu. Wasadilanga yingana ye yuvu mu mpila yafwana. Walonganga mun’owu wa nsatu z’awana banwanga, kiakala mvwama yovo asukami. Malongi kalonganga ke makala mpasi ko mu bakula, kana una vo mambu masina. Kansi, mambu mama ke mau kaka ko makitula Yesu se Nlongi anene.
Zola i Fu Kisundidi o Mfunu
3. Nze nlongi, o Yesu aweyi kaswaswanena ye afidi a mabundu a lumbu yandi?
3 Ka lukatikisu ko vo muna asoneki ye Afarisi mwakala ye akwa zayi wayingi ana bakala ye ngangu za longa. Adieyi diaswasanesa mpila kalongelanga Yesu ye wantu awaya? Afidi a mabundu a lumbu yandi ke bazolanga asukami ko. Muna kuma kiaki, babavezanga yo kubabadikila nze ‘wantu asibwa.’ (Yoa. 7:49) Nswaswani ye afidi awaya, Yesu wafwilanga wantu e nkenda, kadi “bavwa zavunwa yo tendangiana, nze mameme makondwa mvungudi.” (Mat. 9:36) Nkwa kiese ye walakazi kakala. Kansi, afidi a mabundu ke bakala ye zola ko muna Nzambi. (Yoa. 5:42) Yesu wazolanga S’andi yo vanga luzolo lwandi kuna kiese kiawonso. Afidi a mabundu babendomona e diambu dia Nzambi mu kuma kia zolela ya yau kibeni. Kansi, Yesu wazolanga ‘diambu dia Nzambi’ kadi walonganga dio kw’akaka, sasila dio, tanina dio yo zingila ngwizani ye diambu diadi. (Luka 11:28) Elo, Kristu wasonganga zola muna mpila kalongelanga, una kakadilanga yo wantu kalonganga.
4, 5. (a) Ekuma dinina mfunu dia longa ye zola? (b) Ekuma zayi ye ngangu zinina mpe o mfunu muna longa?
4 Adieyi tuvova mu kuma kieto? Nze alandi a Kristu, tuzolele tanginina mbandu andi muna salu kieto kia umbangi ye muna zingu kieto. (1 Pet. 2:21) Ekani dieto ke dia zayisa kaka zayi wa Nkand’a Nzambi ko, kansi yo tangininanga mpe e fu ya Yave, musungula zola kwandi. Twakala yo zayi wayingi yovo ve, ngangu zayingi za longa yovo ve, o zola tusonganga kulenda sadisa mu simba ntima mi’awana tulonganga. Muna toma sala salu kia kitula wantu s’alongoki, tufwete tanginina Yesu muna longanga ye zola.
5 Kieleka, muna kala nlongi ambote, tufwete zaya dina tulonganga yo kala ye ngangu za zayisa zayi wau kw’akaka. Yesu wasadisa alongoki andi mu kala yo zayi ye ngangu. Yave muna nkubik’andi okutusadisanga mu kala yo zayi ye ngangu. (Tanga Yesaya 54:13; Luka 12:42.) Kana una vo i wau, tufwete sianga ngindu ye ntima mieto muna mambu tulonganga. Avo tusadila zayi, ngangu yo songa zola vava tulonganga akaka, nluta miayingi tubaka. Aweyi tulenda songela zola vava tulonganga? Yesu ye alongoki andi aweyi bavangila wo? Yambula twazaya.
Tufwete Zola Yave
6. Vava tuvovanga mu kuma kia muntu tuzolanga, aweyi tuvangilanga wo?
6 Tuyangalelanga vova dina tuzolanga. Vava tuvovanga diambu dina tuzolanga, mu kiese tuvovelanga dio. Ediadi divangamanga musungula vava tuyikanga muntu ona tuzolanga. Tukalanga ye kiese kia zayisa kw’akaka mana tuzeye mu kuma kia muntu ndioyo. Tukunsanisinanga, kunzitisa ye kuntanina. Tuvanganga wo kadi tuzolele vo akaka batuntwa yo yangalela muntu ndioyo kumosi ye fu yandi.
7. O zola kwa Yesu muna Nzambi, adieyi kwamfila mu vanga?
7 Muna sadisa akaka bazola Yave, entete tufwete kunzaya ye kunzola. Vana ntandu, o zola Nzambi i diambu dilutidi o mfunu muna nsambil’aludi. (Mat. 22:36-38) Yesu mbandu ambote katusonga. Wazolanga Yave muna nsi a ntim’andi yawonso, fulumwinu, nyindu ye ngolo zandi zawonso. Wau vo mvu miayingi kakala kun’ezulu kumosi ye S’andi, Yesu watoma kunzaya. Nkia nluta diatwasa? Yesu wavova vo: “Nzolele Se.” (Yoa. 14:31) O zola kwaku kwamonekanga muna mawonso kavovanga yo vanga. Kwamfilanga mu vanga oma mayangidikanga Nzambi. (Yoa. 8:29) O zola kwaku, kwamfila mu senzeka luvunu lw’afidi a mabundu ana bayikanga vo Nzambi basunzulanga. Kwamfila mpe mu vova oma ma Yave kw’akaka yo kubasadisa banzaya yo kunzola.
8. O zola muna Nzambi, adieyi kwafila alongoki a Yesu mu vanga?
8 Nze Yesu, alongoki andi muna tandu kiantete Yave bazolanga. O zola kwaku kwabafila mu samun’e nsangu zambote kuna vema ye unkabu. Bazadisa Yerusaleme ye malongi mau kana una vo basiwanga kitantu kw’afidi a mabundu. Alongoki ke bayambula vova ko mana bamona yo wa. (Mav. 4:20; 5:28) Bazaya wo vo Yave wakala yau yo kubasambula. Kieleka, Yave wabasambula kikilu, kadi una vavioka tezo kia mvu 30 vava Yesu kafwa, Paulu wa ntumwa wasoneka vo nsangu zambote zasamunwa “muna nsema wawonso, wina kunansi ezulu.”—Kol. 1:23.
9. Aweyi tulenda siamisina zola kweto muna Nzambi?
9 Avo tuzolele kala alongi ambote, yeto mpe tufwete kwamanana siamisa zola kweto muna Nzambi. Aweyi tulenda wo vangila? Tulenda wo vanga muna mokenanga yo Nzambi muna sambu. Tusiamisanga mpe zola kweto muna Nzambi vava tulongokanga e Diambu diandi, ye nkanda mibakulwisanga Nkand’a Nzambi yo kalanga muna konso lukutakanu lw’Akristu. Ekolo tunungunukanga muna zayi wa Nzambi, o zola kwandi mpe kuwokela muna ntima mieto. Vava tusonganga zola kwa Nzambi muna mvovo ye mavangu, akaka bemona o zola kwaku, yo lenda mpe kubatunta mu sadila Yave.—Tanga Nkunga 104:33, 34.
Tufwete Zolanga Dina Tulonganga
10. Adieyi dikitulanga muntu se nlongi ambote?
10 Nlongi ambote i ndiona ozolanga dina kelonganga. Kafwete kwikila vo dina kelonganga dialudi ye diamfunu. Avo nlongi ozolele dina kelonganga, e kiese kiandi kimoneka kw’awana kelonganga yo kubakasakesa. Kansi, avo nlongi ke zolanga dina kelonganga ko, aweyi kalenda sadisila alongoki andi mu vwa dina bewanga o mfunu? Sungamena vo mbandu aku nze nlongi a Diambu dia Nzambi ilenda kasakesa akaka. Yesu wavova vo: “Konso ona wakunkuka, okala nze nlongi andi.”—Luka 6:40.
11. Ekuma Yesu kazolelanga mana kalonganga?
11 Yesu wazolanga mana kalonganga. Wazayanga wo vo mambu mamfunu kakala mau mu zayisa, i sia vo, ludi mu kuma kia S’andi ezulu, “mvovo mia Nzambi” ye “mambu ma moyo a mvu ya mvu.” (Yoa. 3:34; 6:68) Nze ntemo, malongi kalonga o Yesu masenzeka o bi yo sengomona oma mambote. Vuvu mevananga yo fiaulwisa ana bevunginikwanga kw’afidi a nsambila zaluvunu yo bangikwa kwa Nkadi Ampemba. (Mav. 10:38) Zola kwa Yesu muna ludi ke kwamoneka kaka muna malongi mandi ko, kansi muna mawonso kavanga.
12. O Paulu wa ntumwa aweyi kabadikilanga e nsangu zambote?
12 Nze Yesu, alongoki andi batoma zolanga e ludi bazaya mu kuma kia Yave yo Kristu, kadi atantu ke balenda kubayoyesa ko mu lembi kio samuna kw’akaka. Paulu wasonekena Akristu kuna Roma vo: “Vo i mono, nkubamene o kunusamunwin’e nsangu zambote . . . Kadi kimwene nsangu zambote nsoni ko: kadi i nkum’a Nzambi muna luvuluku lua konso on’okwikilanga.” (Roma 1:15, 16) Paulu wabadikilanga nsangu zambote se diambu dia luzitu. Wasoneka vo: “Oku kwa mono, . . . kwavewa nsambu zazi, za samunwin’azula e nsangu zambote za umvwama wa Kristu.” (Ef. 3:8) Ke diampasi ko mu yindula e kiese kakala kiau Paulu vava kalonganga akaka mu kuma kia Yave ye makani mandi.
13. Nkia kuma tufwete zolela nsangu zambote?
13 E nsangu zambote zina muna Nkand’a Nzambi zikutusadisanga mu zaya Mvangi eto yo kala ye ngwizani ambote yo yandi. E nsangu zazi zivananga mvutu za yuvu yamfunu muna zingu kieto, zina yo nkuma wa singika e zingu kieto, zikutuvananga e vuvu yo kutukumika muna ntangw’ampasi. Vana ntandu, zisonganga una tulenda vwila zingu kilembi suka. Ke vena zayi ko usundidi zayi wa nsangu zambote. E nsangu zazi lukau lwantalu katuvana Yave, kiese kiayingi zikututwasilanga. E kiese kiwokelanga vava tuzayisanga zo kw’akaka.—Mav. 20:35.
14. Aweyi tulenda wokesela zola kweto mu mana tulonganga?
14 Adieyi lenda vanga mu siamisa zola kwaku muna nsangu zambote? Ekolo tanganga Nkand’a Nzambi, ezak’e ntangwa fwete vundanga mu badika dina otangidi. Kasikil’owu, lenda yindula vo ngeye mpe wakala kumosi yo Yesu muna salu kiandi ova ntoto yovo kangala kumosi ye Paulu wa ntumwa. Lenda kuyibadikila vo una muna nz’ampa yo mona zingu kiambote kikala mo. Yindula e nsambu otambulanga mu kuma kia lemvokela nsangu zambote. Avo owokese zola kwaku muna nsangu zambote, awana olonganga bemona zola kwaku. Muna kuma kiaki, tufwete toma badikanga mana tulongokanga yo sia sungididi mu mana tulonganga.—Tanga 1 Timoteo 4:15, 16.
Tufwete Zolanga Wantu
15. Ekuma o nlongi kafwete zolela alongoki andi?
15 Nlongi ambote ovuvikanga alongoki andi kimana basia sungididi mu mana belongokanga yo kala ye kiese kia vova mana beyindulanga. Nlongi una ye zola olonganga o zayi kadi alongoki andi kevwanga mfunu. Olonganga mun’owu wa nsatu ye tezo kia umbakuzi w’alongoki. Ozayanga e ngangu ye zingu kia alongoki andi. Vava alongi besonganga zola kwaku, alongoki bebakulanga dio. O longa yo longoka dikitukanga se diakiese.
16. O Yesu aweyi kasongela zola kwa wantu?
16 Yesu zola kwa mpila yayi kasonganga. E mpila isundidi kasongela zola i vana moyo a kimuntu kiandi kialunga mu vuluza akaka. (Yoa. 15:13) Ekolo kasalanga salu kiandi, Yesu wasianga ngolo za lungisa e nsatu za nitu za wantu kalonganga, mu sungula nsatu zau za mwanda. Vana fulu kia vingila vo wantu beza kwa yandi, wakangalanga kia malu mu kwenda kubasamunwina nsangu zambote. (Mat. 4:23-25; Luka 8:1) Nkwa luzindalalu yo umbakuzi kakala. Vava alongoki andi bavavanga singikwa, Yesu wavanganga wo yo zola kwawonso. (Maku 9:33-37) Wabakasakesa muna kubasonga vo yau mpe besinga kala alongi ambote a nsangu zambote. Ke vena muntu ko walonganga ye zola nze Yesu. O zola kasonga kw’alongoki andi kwabafila mu kunzola yo lunda nkanikinu miandi.—Tanga Yoane 14:15.
17. Alongoki a Yesu aweyi basongela zola kw’akaka?
17 Nze Yesu, alongoki andi mpe basonganga zola ye ngemba kw’awana balonganga. Muna zizidila lubangamu yo sia e zingu kiau mu vonza, basadisa akaka yo zindalala samuna nsangu zambote. Ekwe zola basonga kw’awana batambulwila e nsangu zambote! Kieleka, mvovo mia Paulu wa ntumwa misonganga zola kwaku vava kasoneka vo: “Twakala yo lulembamu vovo nwina, nze ndezi iwonzakene wan’andi: wauna tukunulengokelw’e mioyo, tuzolele wo beni o kunukawulwila, ke nsangu zambote za Nzambi kaka ko, emieto mioyo mpe, e kuma kadi, nuzolelo kikilu kwa yeto.”—1 Tes. 2:7, 8.
18, 19. (a) Ekuma tusilanga ngolo za samuna nsangu zambote? (b) Yik’e nona kisonganga vo o zola kweto kumonekanga kw’akaka.
18 Diau adimosi mpe mu lumbu yeto, Mbangi za Yave besamunanga nsangu zambote mu nz’amvimba mu vava awana bazolele zaya Nzambi yo kunsadila. Muna mvu 17 miviokele, tezo kia zunda dia mafuku (1 bilhão) ma ola twasala mu samuna nsangu zambote yo kitula wantu s’alongoki. Twakinu sala e salu kiaki kuna vema kwawonso, kana una vo ntangwa, ngolo ye nzimbu zivavwanga muna kio sala. Nze Yesu, tuzeye dina kazolele Es’eto ezulu vo wantu bavwa o zayi ufilanga ku moyo a mvu ya mvu. (Yoa. 17:3; 1 Tim. 2:3, 4) O zola kukutufilanga mu sadisa akwa ntima miansongi mu zaya yo zola Yave nze yeto.
19 O zola tusonganga kumonekanga kw’akaka. Kasikil’owu, mpangi mosi ankento una vo mviti a nzila kuna Estados Unidos, osonekanga nkanda mu fiaulwisa awana befwilwanga azolw’au. Yakala dimosi wavutula vo: “Entete yasivika mu mona ngolo ovanganga mu sonekena wantu ana kuzeye ko mu kubasadisa bazizidila e mpasi. Edi kaka ndenda vova vo ngeye zola una kwau muna mfinangani zaku ye muna Nzambi ona ofilanga wantu mu nzil’a moyo.”
20. Ekuma dinina mfunu diakala ye zola vava tulonganga?
20 Nsoneki mosi wavova vo, vava muntu kesadilanga ngangu kumosi ye zola, lenda sala salu kiambote. Vava tulonganga, tufwete sadisanga alongoki bazaya Yave yo kunzola ye nsi a ntima wawonso. Kieleka, muna kala alongi ambote, tufwete kala yo zola muna Nzambi, zola e ludi yo zola wantu. Avo tukala yo zola kwaku yo songa ko muna salu kia umbangi, ke tukala kaka ye kiese kia vana ko, kansi kia zaya vo Yesu tutangininanga yo yangidika Yave.
Nkia Mvutu Ovana?
• Vava tusamunang’e nsangu zambote kw’akaka, ekuma tufwete kadila yo . . .
zola muna Nzambi?
zola mu dina tulonganga?
zola mun’awana tulonganga?
[Yuvu ya Longoka]
[Foto ina muna lukaya lwa 15]
E mpila kalongelanga o Yesu, aweyi yaswaswanena ye asoneki ye Afarisi?
[Foto ina muna lukaya lwa 18]
Nlongi ambote okalanga yo zayi, ngangu ye zola