Iula Yesu—Fundija na Buswe

“Kasha kekwaikelepo unena pamo bwa uno muntu!”—YOA. 7:46, MB.

1. Lelo bantu bālongele namani pa kwimvwana Yesu ufundija?

 LANGA’PO bidi mwātulumukile bantu pa kwimvwana Yesu ufundija! Bible witulombola mu kīpi muswelo wādi wiivwana bantu pa kwitana na Yesu. Kimfwa, Luka, mulembi wa Evanjile unena’mba bantu ba mu kibundi kyātamine’mo Yesu “ne kutendela batendela myanda miya ya buntu yadi imutamba mu kyakanwa mwandi.” Mateo nandi usekununa amba boba bātejeje Yesu paādi ufundija mu Busapudi bwa ku Lūlu bādi ‘ke batendela kufundija kwandi.’ Kadi Yoano nandi ulombola mwāmwenine amba bamudyavita bātuminwe kukwata Yesu bājoka makasa kebanena’mba: “Kasha kekwaikelepo unena pamo bwa uno muntu!”—Luka 4:22; Mat. 7:28; Yoa. 7:46, MB.

2. Lelo Yesu wādi ufundija namani?

² Bano bamudyavita kēbetupilepo. Bine kekwaikele’po Mufundiji mukatampe pamo bwa Yesu. Wādi ufundija bimvwanika, bipēla, kadi kebipatanwapo. Wādi wingidija byelekejo ne bipangujo na bwino. Wādi ukwatañanya bufundiji bwandi na bantu baādi wisamba nabo, bekale bakata nansha batyetye. Bubinebine bwaādi ufundija bwādi bupēla kwivwanija abo’ko bwa mushike. Inoko, ke’nkapo bino bintu bilengeje Yesu atelwe bu Mufundiji mukatampe.

Ngikadila Mikatampe—Buswe

3. Mu bufundiji, le Yesu wādi mwishile namani na bendeji ba bipwilo ba mu mafuku’a?

³ Mu basonekeji ne Bafadiseo, namo mwādi bantu bañeni bādi na buyuki ne bwino bwa kufundija. Lelo mufundijijo wa Yesu wēshidile pa bika na wabo? Bendeji ba bipwilo ba mu mafuku’a kebādipo basenswe bantu bonso. Ino bādi bebafutulula, ne kwibamona bu ‘bafingwe mafingo.’ (Yoa. 7:49) Ino Yesu aye, wādi wibevwanina lusa, mwanda “basusukile ne kususuka, ne kusansana badingakana pamo na mikōko yampikwa mukumbi.” (Mat. 9:36) Wādi wibasangela, wibafwila lusa, ne kwibakwata na kanye. Kadi bendeji ba bipwilo kebādipo basenswe Leza bya binebine. (Yoa. 5:42) Inoko Yesu wādi uswile Shandi ne wāloelelwe kulonga kiswa-mutyima Kyandi. Bendeji ba bipwilo banyengakanya binena Leza na milangwe yabo, ino Yesu wādi usenswe “mwanda wa Leza”—wāfundije’o, wāshintulula’o, wābingija’o, ne kulonda’o mu būmi bwandi. (Luka 11:28) I amo, buswe bwādi bumweke mu būmi bwa Yesu,  buludika byafundija, muswelo waikele na bantu, ne mu mufundijijo wandi mwine.

4, 5. (a) Mwanda waka kidi na mvubu kufundija na buswe? (b) Mwanda waka buyuki ne bwino nabyo bidi na mvubu pa kufundija?

⁴ Lelo batwe netu? Byotudi balondi ba Kidishitu, tusakanga kumwiula mu mwingilo ne mu būmi bwetu. (1 Pet. 2:21) Nanshi, kyotusaka ke’nkapo kufundija buyuki bwa mu Bible, ino i ne kumwekeja ngikadila ya Yehova, nakampata buswe. Twikale na buyuki bungi nansha butyetye, bwino buvule nansha bwa nabyanabya, buswe botudi nabo bukakwasha kutenga mityima ya boba botusapwila. Pa kusaka kubwanya senene mwingilo wetu wa kulonga bana ba bwanga, tufwaninwe kwiula Yesu na kufundija na buswe.

⁵ Shako, pa kwikala bafundiji bayampe, i biyampe kuyuka bidi bine bya kufundija ne bwino bwa kufundija’byo. Yesu wākweshe bandi bana ba bwanga bayuke byonso bibidi; Yehova nandi witukwashanga tuyuke’byo kupityila ku bulongolodi bwandi. (Tanga Isaya 54:13; Luka 12:42.) Kadi, tufwaninwe kwielela’ko kufundija na ñeni kadi ne mityima yetu yonso. Shi twingidije buyuki, bwino, ne buswe byonso pamo, tukalupula bipa bisangaja. Penepo, i mu miswelo’ka motukalombola buswe kitatyi kyotufundija? Le Yesu ne bana bandi ba bwanga bālombwele’bo namani? Tutalei.

Tufwaninwe Kuswa Yehova

6. I muswelo’ka otwisambilanga pa muntu otusenswe?

⁶ Tuloelelwanga kwisambila pa bintu byotusenswe. Potwisambila pa bintu bitusangaja, twikalanga tunena na bupyasakane ne na buzanzamuke. Ye mobikadilanga ne potwisambila pa muntu otusenswe. Divule, tupyasakenanga kulombola bakwabo byobya byotuyukile pa muntu’wa. Tumutumbika, tumwanya, kadi tumubingija. Kyotunenanga namino i pa mwanda tusakanga bakwabo nabo basangele uno muntu ne ngikadila yandi.

7. Lelo buswe bwa Yesu bwaādi uswele Leza bwāmulengeje alonge bika?

⁷ Kumeso kwa kukwasha bakwabo baswe Yehova, tufwaninwe bidi kumuyuka ne kumuswa. Ke pantu, butōtyi bwa bine bwimanine pa buswe bwa kuswa Leza. (Mat. 22:36-38) Yesu wāshile kimfwa kibwaninine. Wādi uswele Yehova na mutyima, ñeni, muya, ne bukomo bwandi bonso. Yesu wāyukile Shandi biyampe mwanda wāikele nandi myaka mivule momwa mūlu. Byāfula namani? Yesu unena amba, “nsenswe Tata.” (Yoa. 14:31) Buno buswe bwādi bumweke mu byonso byādi binena Yesu ne byaādi ulonga. Buswe bwāmutonwene alonge nyeke bintu bisangaja Leza. (Yoa. 8:29) Bwāmulengeje atuluje bendeji ba bipwilo bādi betela na buzanzangi bu batumwe na Leza. Bwāmutonwene esambe myanda ya Yehova ne kukwasha bakwabo bayuke ne kusanswa Leza.

8. Buswe bwa kuswa Leza bwātonwene bana ba bwanga ba Yesu balonge bika?

⁸ Pamo bwa Yesu, bana bandi ba bwanga ba mu myaka katwa kabajinji bādi basenswe Yehova, ne buno buswe bwābatonwene basapula myanda miyampe na bukankamane ne bupyasakane. Bāsambakanya Yelusalema na bufundiji bwabo, nansha byobādi bakankajibwa byamalwa na bendeji ba bipwilo. Bana ba bwanga kebādipo mwa kulekela kunena bintu byobāivwene ne byobāmwene. (Bil. 4:20; 5:28) Bādi bayukile amba Yehova udi nabo ne ukebeselanga—ne kwibesela wēbesele! Na bubine, kepāpityilepo nansha myaka 30 mine Yesu pa kufwa, mutumibwa Polo wāsoneka’mba myanda miyampe ibasapulwa mu “bipangibwa byonso bya muno munshi.”—Kol. 1:23.

9. Lelo tukatamija namani buswe bwetu bwa kuswa Leza?

⁹ Shi bine tusaka kwikala bafundiji bafike’po, netu tufwaninwe kujingulula shi twendelelanga na kukomeja buswe botuswele Leza. Le tukebukomeja namani? Na kwisamba na Leza kitatyi kivule kupityila mu milombelo. Kadi tukomejanga buswe botuswele Leza na kwifunda Kinenwa kyandi, na kutanga mabuku  esambila pa Bible, ne na kutanwa ku kupwila. Potwenda tuvudija buyuki bwa Leza, ne mityima yetu nayo yenda imusanswa pakatampe. Nanshi, shi tuswe Leza mu binenwa ne bilongwa, bakwabo nabo baketumona kadi bakakokelwa kudi Yehova.—Tanga Mitōto 104:33, 34.

Tufwaninwe Kuswa Byotufundija

10. Lelo mufundiji muyampe uyukilwanga paka?

¹⁰ Mufundiji muyampe uyukilwanga pa kuswa bine byafundija. Ufwaninwe kwibitabija amba i bya binebine, bya kamweno, kadi bya mvubu. Shi mufundiji utele mutyima pa byafundija, buzanzamuke bwandi bukamweka, kadi bukatenga boba bafundija. Pakwabo kadi, shi mufundiji kasangedilepo bintu byafundija, le ukasakila namani boba bebifunda basangele’byo? Kokalanga’mba kimfwa kyobe kya bu mufundiji wa Kinenwa kya Leza kekidipo na mvubu. Yesu wānene amba: “Yewa ufundijibwa, wafunda biyampe, ukekala’nka pamo bwa mufundiji wandi.”—Luka 6:40, MB.

11. Mwanda waka Yesu wādi usenswe byafundija?

¹¹ Yesu wādi uswile byaādi ufundija. Wāyukile amba udi na bintu bya bulēme bya kupāna—bubinebine butala padi Shandi wa mūlu, bine “binenwa bya kwa Leza,” ne “binenwa bya muya wa nyeke ne nyeke.” (Yoa. 3:34; 6:68) Pamo’nka bwa mwinya, bubinebine bwādi bufundija Yesu bwāsokwele patōka bintu bibi ne bintu biyampe. Bwāletele lukulupilo ne kusenga bakōkele bādi bongolwa na bendeji ba bipwilo bya bubela ne kususulwa na Dyabola. (Bil. 10:38) Buswe bwa Yesu bwaādi uswele bubinebine bwāmwekele mu byaādi ufundija ne mu byonso byaādi ulonga.

12. Lelo mutumibwa Polo wādi umona muswelo’ka kusapula myanda miyampe?

¹² Pamo bwa Yesu, bana bandi ba bwanga nabo bāsenswe bininge bubinebine butala padi Yehova ne padi Kidishitu ne kwibukwata na mutyika, enka nenki balwana kebābwenyepo kwibakankaja kulombola’bo bakwabo. Polo wāsonekele banababo Bene Kidishitu ba mu Loma amba: “Po pa mwanda o mpangila lubilo ku mutyima wami, nsapule myanda-miyampe . . . Nkifupo bumvu īno myanda-miyampe ya Kidishitu, ke-mintu i ya bukomo bwa Leza bwa lupandilo lwa bonso bakwitabija.” (Loma 1:15, 16) Polo wādi umwene kusapula bubinebine bu ntumbo. Wālembele amba: “Kudi ami ko bwapebwa buno buntu, . . . [amba nsapule] kudi baJentaila bya bupeta bwa Kidishitu bwampikwa kukōkejamo kulonda.” (Ef. 3:8) I kipēla kulanga buzanzamuke bwa Polo pa kufundija bakwabo myanda ya Yehova ne mpango Yandi.

13. I bubinga’ka botusanshilwa myanda miyampe?

¹³ Myanda miyampe itanwa mu Kinenwa kya Leza itukwashanga tuyuke Umpangi ne kwisanswa nandi. Ino myanda miyampe ilondolola senene bipangujo bya mvubu mu būmi ne idi na bukomo bwa kwalamuna būmi bwetu, kwitupa lukulupilo, ne kwitukomeja mu kitatyi kya malwa. Kadi, itushitwilanga dishinda dya kukamona būmi bulumbuluke bwampikwa mfulo. Kekudipo buyuki nansha bumo butabukile myanda miyampe bulēme. I kyabuntu kilēme bininge kyotupēlwe, kadi kituletela nsangaji mikatampe. Kadi myanda miyampe itubwejanga’ko nsangaji kitatyi kyotusapwila’yo bakwetu.—Bil. 20:35.

14. I muswelo’ka otukokeja kukomeja buswe botuswele byobya byotufundija?

¹⁴ Le i bika byokokeja kulonga mwanda wa kuningija buswe bwa kuswa myanda miyampe? Potanga Kinenwa kya Leza, imana bidi, languluka pa byotanga’bya. Kimfwa, fwatakanya na abe wenda pamo na Yesu mu mwingilo wandi wa pano pa ntanda nansha na abe wenda lwendo na mutumibwa Polo. Wimone bwa abe udi mu ntanda impya, ne kulanga mukekadila būmi bupya. Langulukila pa madyese oeselwe pa mwanda wa kukōkela kokōkele myanda miyampe. Shi ukomeje nyeke buswe boswele myanda miyampe, boba bofundija bakamona’bo. Nansha i kyendele’mo, twendelele kulanguluka pa byotufundile ne kuta mutyima ku byotufundija.—Tanga 1 Temote 4:15, 16.

 Tufwaninwe Kuswa Bantu

15. Mwanda waka mufundiji ufwaninwe kuswa boba bafundija?

¹⁵ Mufundiji muyampe utūkijanga mutyima wa boba bafundija amba bate mutyima ku byobya byobefunda ne kwisamba’po na nsangaji. Mufundiji wa buswe upanga boba bafundija buyuki mwanda wibatele mutyima bya binebine. Ukwatañanyanga bufundiji na bisakibwa ne mungya mwimvwanino wabo. Utalanga na katentekeji bukomo bwabo ne ngikadilo yobadi’mo. Shi bafundiji badi na buno buswe, befundi bakebujingulula, nabya kufundija ne kufunda kukatobala.

16. Lelo i mu miswelo’ka mwālombwele Yesu amba uswile bantu?

¹⁶ Yesu wālombwe buswe bwa uno muswelo. Kilomboji kikatampe kya buswe bwandi i kya kupāna būmi bwandi bubwaninine bwa bu muntu amba bakwabo bapande. (Yoa. 15:13) Mu mwingilo wandi, Yesu wādi uta bantu mutyima ku ngitu ne nakampata ku mushipiditu pampikwa kukōka. Pa kyaba kya kwilaija bantu bāye kwadi, aye wādi wenda ñendo ya tutwa na tutwa twa makilometele lwa panshi mwanda wa kukebasapwila myanda miyampe. (Mat. 4:23-25; Luka 8:1) Wādi na mutyima mutūke kadi wibevwana. Balondi bandi pobādi basakilwa kulemununwa, wēbalemunwine na buswe. (Mako 9:33-37) Wēbakankamikile na kwibakulupija amba bakekalanga basapudi ba myanda miyampe bayuke’byo. Kekwaikele’po muntu nansha umo ufundija na buswe pamo bwa Yesu. Buswe bwandi ku bana bandi ba bwanga bwēbatonwene nabo bamuswe ne kulama bijila byandi.—Tanga Yoano 14:15.

17. Lelo bana ba bwanga ba Yesu bālombwele namani buswe ku bakwabo?

¹⁷ Pamo bwa Yesu, bana bandi ba bwanga bālombwele buswe bukatampe ne kisanso ku boba bobādi basapwila. Bāūminina mu kupangwapangwa ne kyaka kya lufu, bāingidila bakwabo kadi bābwanya kusapula myanda miyampe. Bine, bādi basenswe bantu bobākweshe ku mushipiditu! Na bubine bino binena bya mutumibwa Polo bitenga ku mutyima, bya amba: “Twadi bakikōkeji kyonka mubukata mwenu, pamo bwa inamuntu udi na bāna ba ku kyadi; i yenka namino, pa mwanda wa kwimwabila ne lusalusa, twadi tuloelelwe kwimupa, ke myanda-miyampe ya Leza yonka, mhm, i ne mityima yetu mīne kumo, ke-mwi-bantu pano bānwe mwi baswe betu byamalwa.”—1 Tes. 2:7, 8.

18, 19. (a) Mwanda waka twipānanga na mutyima tō mu busapudi? (b) Leta kimfwa kilombola amba buswe bwetu bumonwanga na bantu.

¹⁸ Ne mu bino bitatyi namo mo monka, Batumoni ba Yehova bendanga ntanda yonso bakimba boba babila kuyuka Leza ne kumwingidila. O mwanda, mu myaka 17 yapityile’i twadi tupityija mansaa mudiyala ne musubu  mwaka ne mwaka mu mwingilo wa kusapula ne kulonga bana ba bwanga—kadi tukyendelela nao. Tusapulanga na mutyima tō, nansha byobitulomba kupāna kitatyi, bukomo, ne bintu byetu. Pamo bwa Yesu, twimvwanije amba Tata wetu wa buswe udi mūlu usakanga bantu batambule buyuki butwala ku būmi bwa nyeke. (Yoa. 17:3; 1 Tem. 2:3, 4) Buswe bwitutononanga tukwashe boba ba mityima myoloke bayuke Yehova ne kumusanswa pamo netu.

¹⁹ Buswe botulombola bumonwanga na bantu. Kimfwa, kaka umo pania wa mu États-Unis ulembanga mikanda ya kukankamika boba bafwilwa. Muntu umo wāmulondolwele amba: “Dibajinji natulumukile pa kumona muntu ulonga bukomo bwa kulembela muntu okebeyukilepo nandi mwanda wa kumukwasha ōminine mu bitatyi bya matompo. Namone bine amba usenswe bantu ne Leza mwine ye umuludika.”

20. Mwanda waka i kya kamweno kufundija na buswe?

²⁰ Banenanga’mba shi muntu ekale na buswe ne bwino, nankyo ukekala wa kutendelwa. Potufundija, tusakanga kukwasha befundi bekale na mutyima wa kuyuka Yehova ne kumusanswa. Bine, pa kwikala bafundiji bafike’po, i biyampe twikale na buswe—tuswe Leza, tuswe bubinebine, kadi tuswe ne bantu. Shi tutamije buno buswe ne kwikala nabo mu mwingilo wetu, tukamona nsangaji ya kupāna kadi tukaloelelwa pa kuyuka’mba tubaiula Yesu ne kusangaja Yehova.

Usa Kulondolola Namani?

• Potufundija bantu myanda miyampe, mwanda waka i biyampe kwikala na . . .

• buswe bwa kuswa Leza?

• buswe bwa byotufundija?

• buswe bwa botufundija?

[Bipangujo bya Kifundwa]

[Kifwatulo pa paje 17]

Lelo mufundijijo wa Yesu wādi mwishile namani na wa basonekeji ne Bafadiseo?

[Kifwatulo pa paje 20]

Kufundija biyampe kulomba kwikala na buyuki, bwino, ne kupityidila buswe