Mwimbujolenu Yesu Kuhitila muKutañisha naKukeña

‘Hikudi muntu wahoshahu dehi neyi iwuku.’—YOWANU 7:46.

1. Indi antu elilidi hantañishilu yaYesu?

 TOÑOJOKENU chatiyileñawu antu kuwaha hakutiya chatañishileñayi Yesu. MuBayibolu twatañañamu chuma cheliluwu antu atiyili chatañishileñayi Yesu. Chakutalilahu, Nsañu yaYiwahi yaLuka yashimuna nawu antu amuNazareta ‘ahayamini mazu amawahi afumini kukanwa kindi.’ Matewu washimuna nindi antu atiyililili chatañishileñayi Yesu Mpanji yahaMpidi ‘ahayamini kutañisha kwindi.’ Nawa Yowanu wahosha nindi atulama atemesheluwu nawu amukwati Yesu afuntili makasakasa nakuhosha nawu: “Hikudi muntu wahoshahu dehi neyi iwuku.”—Luka 4:22; Matewu 7:28; Yowanu 7:46.

2. Jinjilanyi jazatishileñayi Yesu hakutañisha?

² Ana atulama hiyatwambiluku. Chakadi nikujina, Yesu wadiña Ntañishi wabadika antu ejima. Watañishileña chatiyakana, nawa kwosi muntu watadikileña nantañishilu yindi yayiwahi. Wazatishileña yakutalilahu nimalwihu chachiwahi. Wadiña nakuhimpa ntañishilu yindi kwesekeja nawantu atañishileñayi, chili antu akweti yifulu yeneni chili antu asekesheluwu. Nsañu yalala yatañishileñayi yadiña yatiyakana ilaña yalema nankashi. Hela chochu, bayi neyi yumiyi diyi yamuletesheli Yesu kwikala Ntañishi wabadika neyi chadiñayuku.

Kukeña hiChililu Chalema Nankashi

3. Hakwikala ntañishi, Yesu wambukiluku ñahi nawanlomboli jansakililu amumafuku indi?

³ Hadaha, hakachi kawansoneki niaFwarisi, hadiña antu amaana adiñi nakashinshi niwuswa wakuleja akwawu kashinshi kenaka. Chumanyi chaletesheli njila yatañishilileñamu Yesu kwambukaku nayawaFwarisi niansoneki? Akulumpi jansakililu amunana mafuku hiyakeñeli atuzweñuku. Ilaña, ayidiwili nakuyimona neyi antu “ashiñewa.” (Yowanu 7:49) Kwambukaku, Yesu wayitiyilili luwi, muloña “akabakeni, apalañeni neyi nyikoku yakadi kabiña.” (Matewu 9:36) Wadiña naluwi niwushona. Kubombelahu, anlomboli jansakililu hiyamukeñeli Nzambi chachenuku. (Yowanu 5:42) Hela chochu, Yesu wamukeñeli Tata yindi nawa watiyileña kuwaha kwila nkeñelu yindi. Anlomboli jansakililu aheñesheleña mazu aNzambi kulonda ahetelumu aweni, Ilaña Yesu wakeñeli “mazu aNzambi”—watañishileña mazu aNzambi, kuyilumbulula, kuyihakwilaku, nikuyizatisha muwumi windi. (Luka 11:28) Kafwampi, kukeña dikwalombweleña yuma yatañishileñayi Kristu, chazatileñayi nawantu, nichayitañishileñayi.

4, 5. (a) Muloñadi kutañisha nakukeña chikwalemena? (b) Muloñadi kwiluka nsañu nikukuluka yitembi chikwalemena hakutañisha?

 ⁴ Indi etu twatela kwiladi? Hakwikala atumbanji twaKristu, twakeñaña kumwimbujola mumudimu wetu wakushimwina nimuwumi wetu. (1 Petulu 2:21) Dichi, hitwekala hohu namudimu wakudizisha chalala chamuBayiboluku, ilaña twakeñaña kumwekesha yililu yaYehova, sweje-e kukeña kwindi. Chili tweluka nsañu yayivulu chili tweluka yantesha hohu indi kwiji twakuluka yitembi mukudizisha chili nehi, kukeña kutwamwekeshaña kwatukwashaña kushika hanyichima yawantu itwashimwinaña. Hakwila nawu tuzateña chachiwahi mumudimu wetu wakwilisha atumbanji, twatela kumwimbujola Yesu kuhitila mukutañisha nakukeña.

⁵ Hela chochu, hakwila twikali antañishi amawahi twatela kwiluka nsañu yetu nawa twatela kwiluka chachiwahi mwakutañishila. Yesu wayikwashili atumbanji twindi kwiluka yuma yejima yiyedi, nawa Yehova kuhitila mukuloñesha kwindi nakutukwasha kwila mwenimu makonu. (Tañenu Isaya 54:13; Luka 12:42.) Ilaña, hitwatela kukolela hohu hakutañisha nsañu yitunakutoñojokaku, chiña namuchima wetu cheñi. Neyi chakwila kwiluka, kukuluka yitembi, nikukeña jendela hamu, chikufumamu tukutañishaña chachiwahi nawa tukuzañalalaña chikupu. Hanu dinu, munjilanyi mutunateli kumwekeshela kukeña neyi tunakutañisha? Indi Yesu niatumbanji twindi elili ñahi mwenimu? Tushinshikenu cheliluwu.

Twatela Kumukeña Yehova

6. Twahoshaña ñahi hadi muntu itwakeña?

⁶ Twatiyaña kuwaha kuhosha hayuma yitwakeña. Neyi tunakuhosha hayuma yitwakeña twazañalalaña, nawa njila mutukuyihoshela yikumwekeshaña muzañalu chikupu. Chumichi chamwekanaña sweje-e neyi tunakuhosha hadi muntu itwakeña. Kakavulu, twafwilaña kulejaku amakwawu yuma yitweluka hadi ona muntu. Twamuhamekaña, kumulemesha, nikumuhakwilaku. Twelaña mwenimu muloña twakeñaña amakwawu amukeñi ona muntu niyililu yindi neyi chitwamukeña.

7. Indi Yesu chamukeñeliyi Nzambi chamuletesheli kwiladi?

⁷ Henohu kanda tuyisañumuni antu kumukeña Yehova, twatela kumwiluka nikumukeña. Kafwampi, kudifukula kwalala kwashindamena hakumukeña Nzambi nankashi. (Matewu 22:36-38) Yesu wemika chakutalilahu chachiwahi. Wamukeñeli Yehova namuchima windi wejima, namaana, nawumi niñovu yindi. Hamuloña wakwila washakamini naTata yindi wamwiwulu hadaha mabiliyoni ayaaka, Yesu wamwilukili chikupu. Chumanyi chafuminimu? Yesu wahosheli nindi: ‘Namukeña Tata.’ (Yowanu 14:31) Kukeña kweniku kwamwekeneni muyuma yejima yakoñeleñayi niyahosheleñayi Yesu. Kwamusañumwineña kwila yuma yamutiyishileña Nzambi kuwaha. (Yowanu 8:29) Kwamuletesheli kuhiisha namuloña anlomboli jansakililu adifwikijileña nawu emeneneñaku Nzambi. Kukeña kwamusañumwini cheñi kulejaku amakwawu hadi Yehova nikuyikwasha kumwiluka nikumukeña Nzambi.

8. Kukeña kwamukeñeluwu Nzambi kwaletesheli atumbanji twaYesu kwiladi?

⁸ Kufwana Yesu, atumbanji twindi amuyaaka nkulakaji yakusambila amukeñeli Yehova, nawa kukeña kweniku kwayiletesheli kudikita hakushimwina nsañu yayiwahi nawa chakubula woma. Awanishili muYerusalema mwejima nantañishilu yawu, hela chakwila anlomboli jansakililu asweja ñovu ayidimbulwileña. Atumbanji akanini chikupu kuleka kuhosha yuma yamwenuwu nikutiya. (Yililu 4:20; 5:28) Elukili nawu Yehova wayikwashileña nikuyikiswila—nawa wayikiswilili. Kafwampi, yaaka 30 yamanini wanyi kufuma hampinji yafwiliyi Yesu, kapostolu Pawulu wasonekeli nindi nsañu yayiwahi anayishimwini “mwahita kuleña kwejima kwekala mwishina dewulu.”—Akolosi 1:23.

9. Tunateli kukolesha ñahi kukeña kwetu kutwamukeña Nzambi?

⁹ Neyi tunakukeña kwikala antañishi amawahi, anetu nawa twatela kutwalekahu kukolesha wulunda wetu naNzambi. Tunateli kwila ñahi mwenimu? Kuhitila mukuhosha naNzambi mukulomba kakavulu. Twakoleshaña cheñi kukeña kutwamukeña Nzambi kuhitila mukudiza Izu  dindi, ninyikanda yashindamena haBayibolu, nikuwanika kukupompa kwawakwaKristu. Chitwasweja kumwiluka Nzambi, tukusweja kumukeña. Dichi, chitwamwekesha nawu twamukeña Nzambi muyuma yitwahoshaña nikwila, amakwawu akumona chumichi nawa chikuletesha akundami kudi Yehova.—Tañenu Masamu 104:33, 34.

Twatela Kulemesha Nsañu Yitwatañishaña

10. Chumanyi chaleteshaña muntu kwikala ntañishi wamuwahi?

¹⁰ Chuma chaleteshaña muntu kwikala ntañishi wamuwahi hikukeña nsañu yatañishañayi nawa watela kukuhwelela nindi yalala, nawa yalema. Neyi chakwila, ntañishi yasha muchima kuyuma yatañishañayi, akumumona chinakudikitayi, nawa antu akudizishañayi akwilaña mwomumu. Kwambukaku, neyi chakwila ntañishi walemesha wanyi nsañu yatañishañayi, wukukuhwelela ñahi atudizi indi kulemesha nsañu yinakudizawu? Bayi mudiwula chakutalilahu chenu hakwikala ntañishi Wezu daNzambuku. Yesu wahosheli nindi: ‘Muntu himuntu neyi nadizi dehi, wukwesekana nankuluñaña yindi.’—Luka 6:40.

11. Muloñadi Yesu chakeñeleliyi nsañu yatañishileñayi?

¹¹ Yesu wakeñeli nsañu yatañishileñayi. Welukili nindi wadiña nansañu yalema yakutañisha amakwawu, walala kutalisha hadi Tata yindi wamwiwulu, “mazu aNzambi” ‘nimazu awumi wahaya nyaka.’ (Yowanu 3:34; 6:68) Kufwana chejeji chatoñekaña, nsañu yalala yatañishiliyi Yesu yamwekesheli hatooka to-o yuma yatama nikuhosha hayuma yayiwahi. Yaleteli kuchiñeja nawa yakundejeli antu adizoza adimbiluwu kudi anlomboli jansakililu yakutwamba niakabishiluwu kudi Diyabolu. (Yililu 10:38) Kukeña kwaYesu kwakeñeliyi nsañu yalala hikwawanikaña munsañu yatañishiliyi hohuku, ilaña nimuyuma yejima yakoñeliyi.

12. Indi kapostolu Pawulu watiyileña ñahi kushimwina nsañu yayiwahi?

¹² Kufwana Yesu, atumbanji twindi akeñeli nikulemesha chikupu nsañu yalala yaYehova niKristu chakwila akwankunyi nawu hiyayikañesheli kushimwina nsañu yeniyi kudi amakwawuku. Pawulu wayisonekeleli akwawu akwaKristu nindi: “Ami nakeñi nankashi, mwashikila ñovu jami jejima, kushimwinenu . . . nsañu yayiwahi nawa. Muloña hinatiyaña nsonyi yansañu yayiwahuku; diyi ñovu yaNzambi yakwamwina nachu antu ejima akukuhwelela.” (Aroma 1:15, 16) Pawulu welukili nindi kushimwina nsañu yalala hikukooleka kwakweni. Wasonekeli nindi: “Ami . . . enkawu luwi ilu lwakushimwina aJentili maheta aKristu akañanya kwilukewa.” (Aefwesesa 3:8) Tuneluki chikupu netu Pawulu wadikitileña hakutañisha amakwawu hadi Yehova ninkeñelu Yindi.

13. Nyiloñanyi yatwileñelaña kukeña nsañu yayiwahi?

¹³ Nsañu yayiwahi yekala Mwiizu daNzambi yatukwashaña kumwiluka Nleñi nikwikala nawulunda wawuwahi nayena. Nsañu yayiwahi yatulejaña ñakwilu yamalwihu alema amuwumi nawa yikweti ñovu yakuhimpa chihandilu chetu, yatwileñelaña kwikala nakuchiñeja, nikutukundeja hampinji yitukumona makabi. Kubombelahu, nsañu yalala yashimunaña njila yawumi wakadi kukuma. Kwosi maana abadika kulema neyi nsañu yayiwahuku. Atwinka chamukunkulu chabadika kulema, chatuleñelaña kwikala namuzañalu weneni. Nawa twekalaña namuzañalu nankashi neyi tulejaku amakwawu ichi chamukunkulu.—Yililu 20:35.

14. Tunateli kusweja ñahi kukeña nsañu yitwatañishaña?

¹⁴ Chumanyi chimwatela kwila kulonda musweji kukeña nsañu yayiwahi? Hampinji yimunakutaña Izu daNzambi, hudikilenu mpinji yikwawu kulonda mutoñojoki hansañu yimunakutaña. Chakutalilahu, fwikijenu neyi mudi naYesu hampinji yashimwinineñayi hamaseki hela munakwenda hamu nakapostolu Pawulu. Fwikijenu neyi mudi mwituña dadiha, nawa toñojokenu wumi chiwakekala. Toñojokenu hankisu yimwatambwila hamuloña wakwovwahila nsañu yayiwahi. Neyi musweja kukeña nsañu yayiwahi, antu imwadizishaña akwiluka kukeña kumukweti. Dichi, chuma chachiwahi chitwatela kwila, hikudikwatisha muyuma yitwadizaña nikusha kashinshi kuyuma  yitwatañishaña.—Tañenu 1 Timotewu 4:15, 16.

Twatela Kukeña Antu

15. Muloñadi ntañishi chatela kukeñelayi atudizi indi?

¹⁵ Ntañishi wamuwahi wakeñaña atudizi indi ekali akasunuka kulonda akeñeña kudiza nikuhoshahu hansañu yinakudizawu. Ntañishi wukweti kukeña wakwashaña atudizi indi kwiluka nsañu muloña wayakamenaña chikupu. Wahimpaña ntañishilu yindi kwesekeja nayuma yinakukeñeka kudi atudizi nichadizañawu nsañu. Washaña maana chikupu kuwuswa nikukankila kwawatudizi indi. Neyi antañishi ekala nakukeña kwamuchidiwu, atudizi akwiluka nawu akweti kukeña nawa akudiluñishaña kudiza, antañishi niwena akutiyaña kuwaha kutañisha.

16. Munjilanyi mwamwekesheleliyi Yesu nindi wakeña antu?

¹⁶ Yesu wamwekesheli kukeña kwamuchidiwu. Wamwekesheli kukeña kwindi kwasweja kuhitila mukuhana wumi windi wawanina kulonda kukuula nachu antu. (Yowanu 15:13) Mpinji yejima Yesu wadiña wadiloñesha kukwasha antu nikuyitañisha hadi Tata yindi. Chatela ahembeleli antu enzi kudi yena, Yesu wendeleña yintampu yayilehi hamaseki kulonda kushimwina antu nsañu yayiwahi. (Matewu 4:23-25; Luka 8:1) Wadiñi wawunda nawa welukileña kukankila kwawantu. Neyi nakufumba atumbanji twindi, wayifumbileña mukukeña. (Maku 9:33-37) Wayikolesheli kuhitila mukuyikuhwelela nindi akekala akwakushimwina ashikahu ansañu yayiwahi. Kwosi muntu niwumu wekala ntañishi wukweti kukeña kubadika Yesuku. Kukeña kwayikeñeliyi atumbanji twindi kwayisañumwini kumukeña nikwovwahila nshimbi jindi.—Tañenu Yowanu 14:15.

17. Indi atumbanji twaYesu akeñeli ñahi antu amakwawu?

¹⁷ Kufwana Yesu, atumbanji twindi akeñeli chikupu antu ashimwinineñawu. Omikili makabisha nikusha wumi wawu hakatoña hakukalakela amakwawu, nawa ashimwinini chachiwahi nsañu yayiwahi. Akeñeli hama antu akwashiluwu kuspiritu. Mazu akapostolu Pawulu amwekeshaña kukeña kwadiñiyi naku hampinji yasonekeliyi nindi: ‘Twadiñi amwovu mukachi kenu, neyi chalelañayi mumbanda anyanindi yomweni. Chitwaswejeli kuyikunda, hitwakuminini dakutiya kuwaha kuyishimwina nsañu yayiwahi hohuku, ilaña twatiyili kuwaha kuyinka niwumi wetwetu aweni nawa, muloña twaswejeli kuyikeña.’—1 Atesalonika 2:7, 8.

18, 19. (a) Muloñadi wutwadihaninaña kukalakala mudimu wakushimwina? (b) Shimunenu chakutalilahu chinakumwekesha nawu antu amakwawu amonaña kukeña kutukweti.

¹⁸ Chochimu, aYinsahu jaYehova makonu ashimwinaña mukaayi kejima kulonda kukeñakeña antu afwilaña kumwiluka nikumukalakela Nzambi. Kafwampi, hayaaka 17 yinahituhu twakalakalaña maora akubadika habiliyoni yimu hachaaka hachaaka mukulondashana, nawa tunakutwalekahu  kukalakala iwu mudimu. Twelaña mwenimu mukudikeñela, hela chakwila mudimu wakushimwina wakeñekaña kuzatisha mpinji yetu, ñovu nimaheta. Kufwana Yesu, tweluka netu Tata yetu wamwiwulu wukweti kukeña wakeñaña nindi antu ejima eluki nsañu yalala yalombolaña kuwumi wahaya nyaka. (Yowanu 17:3; 1 Timotewu 2:3, 4) Kukeña kwatusañumunaña kukwasha antu akashinshi kumwiluka nikumukeña Yehova neyi chitwamukeña.

¹⁹ Antu amonaña kukeña kutwamwekeshaña kudi amakwawu. Chakutalilahu, muhela wumu nawa payiniya wakuUnited States wasonekaña nyikanda yakukundeja antu afwishaña antu akeñawu. Iyala wumu wamusonekeleli iwu muhela nindi: “Nasambilili kuhayama hakumona muntu hakwikala nampinji yakusonekela muntu wabula kwilukayi mukanda kulonda kumukwasha kuumika makabi. Nukuhosha hohu nami wakeña akwenu antu niNzambi wayilombolaña munjila yawumi.”

20. Munjilanyi mwalemena kutañisha nakukeña?

²⁰ Chelukewa nawu neyi twikala nakukeña nikwiluka kutañisha, yuma yawahaña chikupu. Muntañishilu yetu, twakeñaña kukwasha atudizi etu kumwiluka Yehova nikumukeña. Eña, hakwila nawu twikali antañishi amawahi, twatela kumukeña Nzambi, kukeña nsañu yalala, nikukeña antu. Chitwekala nakukeña kwamuchidiwu nikumwekesha kukeña kweniku mumudimu wakushimwina, tukwikala namuzañalu bayi neyi wafumaña mukuhana hohuku, ilaña nimuzañalu wakwiluka netu tunakumwimbujola Yesu nikumuzañalesha Yehova.

Mukwakula Nenudi?

• Hampinji yitunakutañisha antu amakwawu nsañu yayiwahi, muloñadi chichalemena . . .

kumukeña Nzambi?

kukeña nsañu yitwatañishaña?

kukeña antu itwatañishaña?

[Malwihu aKuzatisha haKudiza]

[Mwevulu wudi hefu 17]

Chumanyi chaletesheli njila yatañishilileñamu Yesu kwambukaku nawaFwarisi niansoneki?

[Mwevulu wudi hefu 20]

Kutañisha chachiwahi kwakeñekaña kwiluka nsañu nikwiluka kutañisha, sweje-e dinu kukeña