Imitá Hesus—Siña Hende ku Amor

“Nunka un hende no a papia manera e hòmber akí ta papia.”—JUAN 7:46.

1. Kon hende a reakshoná riba e manera ku Hesus tabata siña nan?

IMAGINÁ bo ki emoshonante lo mester tabata pa tende Hesus siña hende! Beibel ta duna nos un idea di e impakto ku el a hasi riba esnan ku a tend’é. Por ehèmpel, Lukas, un di e eskritornan di Evangelio, ta konta ku e hendenan di e stat kaminda Hesus a lanta a “keda strañá di e palabranan agradabel ku tabata sali for di su boka.” Mateo ta konta ku esnan ku a skucha Hesus ora e tabata duna e Sermon Riba Seru “a keda asombrá di su siñansa.” I Juan ta bisa ku e ofisialnan ku nan a manda arestá Hesus a regresá man bashí i a bisa: “Nunka un hende no a papia manera e hòmber akí ta papia.”—Luk. 4:22; Mat. 7:28; Juan 7:46.

2. Ki métodonan di siñansa Hesus a usa?

² E ofisialnan ei no tabata ekiboká. Sin duda, Hesus tabata e Maestro di mas grandi ku a yega di biba. E tabata siña hende na un manera kla, simpel i ku un lógika ku ningun no por a kuestioná. E tabata un eksperto den uso di ilustrashon i pregunta. E tabata adaptá su siñansa na e hendenan ku e tabata papia kuné, sea ku nan tabata hende prominente òf hende komun i koriente. E bèrdatnan ku el a siña nan tabata fásil pa komprondé i tòg hopi profundo. Ma no ta e kosnan akí so a hasi Hesus e gran Maestro ku e tabata.

Amor—E Kualidat di Mas Importante

3. Komo maestro, den ki sentido Hesus tabata diferente for di e lidernan religioso di su tempu?

³ Entre e eskriba- i fariseonan sigur tabatin hòmbernan inteligente ku tabatin konosementu i kapasidat pa siña hende. Pero kiko a hasi Hesus su manera di siña asina diferente for di nan? E lidernan religioso di e tempu ei no tabatin amor pa e pueblo komun. En bes di esei, nan a despresiá nan, i a mira nan komo hende “maldishoná.” (Juan 7:49) Hesus, en kambio, a haña duele di nan, ya ku nan tabata “kansá i plamá, manera karné sin wardadó.” (Mat. 9:36) E tabata un hòmber tierno, kompasivo i bondadoso. Ademas, e lidernan religioso no tabatin berdadero amor pa Dios. (Juan 5:42) Hesus, sinembargo, tabata stima su Tata i tabatin delisia den hasi su boluntat. E lidernan religioso tabata trose e palabranan di Dios na nan kumbinensia, pero Hesus tabata stima “e palabra di Dios”; el a siñ’é, splik’é, defend’é i a biba na armonia ku su prinsipionan. (Luk. 11:28) Sí, tur loke Kristu a hasi a duna prueba di e amor profundo ku e tabatin; esei tabata bisto den loke el  a siña hende, kon el a trata ku nan i kon el a instruí nan.

4, 5. (a) Pakiko ta importante pa nos siña hende ku amor? (b) Ora nos ta siña hende, pakiko konosementu i kapasidat tambe ta importante?

⁴ Kiko di nos awe? Komo siguidó di Kristu, nos sigur ke imit’é den nos sirbishi i den nos bida. (1 Ped. 2:21) Pues, nos meta no ta solamente pa siña hende konosé Beibel, sino tambe pa reflehá e kualidatnan di Yehova, foral su amor. Sea ku nos tin hopi konosementu òf djis un poko, sea ku nos ta un maestro hopi kapas òf poko limitá, e amor ku nos ta demostrá lo yuda nos yega na kurason di e hendenan ku nos ta prediká na dje. Pa nos por ta realmente efektivo den nos trabou di hasi disipel, nos tin ku imitá Hesus den siña hende ku amor.

⁵ Klaru ku pa nos por ta un bon maestro, nos mester tin konosementu di e tópiko ku nos ke papia di dje i tambe e kapasidat pa duna e konosementu ei. Hesus a yuda su disipelnan haña ámbos, i Yehova, pa medio di su organisashon, ta yuda nos haña nan awe. (Lesa Isaias 54:13 i Lukas 12:42.) Pero nos meta mester ta pa siña hende no solamente ku nos mente sino tambe ku nos kurason. Ora nos tin konosementu i tambe e kapasidat i amor, e resultado di nos esfuersonan pa siña hende por duna nos hopi satisfakshon. Den ki maneranan anto nos por demostrá amor ora nos ta siña hende? Kon Hesus i su disipelnan hasi esei? Laga nos wak.

Nos Mester Stima Yehova

6. Kon nos ta papia di un persona ku nos ta stima?

⁶ Semper nos ta gusta papia di e kosnan ku nos ta stima. Ora nos ta papia di algu ku nos ta enkantá kuné, nos ta hasié ku entusiasmo, i hende por mira na nos kara ku nos ta felis. Esaki ta spesialmente e kaso ora nos ta papia tokante un persona ku nos ta stima. Por lo general, nos ta ansioso pa kompartí ku otro hende loke nos sa di e persona ei. Nos ta elogi’é, papia bon di dje i defend’é. Nos ta hasi esei pasobra nos ke pa otro hende tambe sinti nan atraí na e persona ei i na su kualidatnan.

7. Kiko e amor ku Hesus tin pa Dios a motiv’é pa e hasi?

⁷ Promé ku nos por yuda otro hende haña amor pa Yehova, nos mes mester konos’é i stim’é. Al fin i al kabo, adorashon berdadero ta basá riba amor pa Dios. (Mat. 22:36-38) Hesus a pone e ehèmpel perfekto. El a stima Yehova ku henter su kurason, mente, alma i forsa. Despues ku el a pasa tal bes míles di miónes di aña den shelu huntu ku su Tata selestial, Hesus a siña konos’é hopi bon. Ku ki resultado? Hesus a bisa: “Mi ta stima e Tata.” (Juan 14:31) E amor ei a keda reflehá den tur loke Hesus a bisa i hasi. Esei semper a motiv’é pa hasi e kosnan ku ta agradá Dios. (Juan 8:29) Esei a impuls’é pa kondená e lidernan religioso komo hipókrita, pasobra nan tabata pretendé di ta representá Dios. Esei a motiv’é tambe pa papia tokante Yehova i pa yuda hende konosé Dios i stim’é.

8. Amor pa Dios a motivá Hesus su disipelnan pa hasi kiko?

⁸ Meskos ku Hesus, su disipelnan di promé siglo tambe a stima Yehova, i e amor akí a motivá nan pa prediká e bon notisia ku entusiasmo i kurashi. Nan a yena Yerusalèm ku nan siñansa, ounke e lidernan religioso influyente a oponé nan. E disipelnan simplemente no por a stòp di papia di e kosnan ku nan a mira i tende. (Echo. 4:20; 5:28) Nan tabata sa ku Yehova tabata ku nan i ku lo el a bendishoná nan—lokual el a hasi debidamente! De echo, ménos ku 30 aña despues di Hesus su morto, apòstel Pablo por a skirbi ku e bon notisia a ser prediká “den henter kreashon bou di shelu.”—Kol. 1:23.

9. Kon nos por krese den nos amor pa Dios?

⁹ Si nos ke ta un maestro berdaderamente efektivo, nos tambe tin ku hasi sigur di sigui krese den nos amor pa Dios. Kon nos por hasi esei? Papiando regularmente ku Dios pa medio di orashon. Tambe nos ta krese den nos amor pa Dios ora nos ta studia su Palabra, lesa publikashonnan basá riba Beibel i asistí na reunionnan kristian. Segun ku nos konosementu di Dios ta oumentá, e amor ku nos ta sinti di kurason  tambe lo bira mas grandi. E ora ei, segun ku nos ta ekspresá nos amor pa Dios ku echo i palabra, otronan lo mira esei i lo por sinti nan atraí na Yehova.—Lesa Salmo 104:33 i 34.

Nos Mester Stima Loke Nos Ta Siña Hende

10. Kiko ta un karakterístika di un bon maestro?

¹⁰ Un karakterístika di un bon maestro ta ku e ta stima loke e ta siña hende. E mes mester ta konvensí ku loke e ta siña hende ta bèrdat, ku e ta importante i ku e ta balioso. Si un maestro ta interesá den loke e ta siña hende, su entusiasmo lo ta bisto, i lo e tin hopi influensia riba e hendenan ku e ta siña. Di otro banda, si un maestro mes no ta duna muchu balor na loke e ta siña otronan, kon e por ferwagt pa su studiantenan sí balorá loke nan ta tende? Nunka balotá bo ehèmpel komo maestro di e Palabra di Dios. Hesus a bisa: “Un disipel bon instruí lo bira manera su maestro.”—Luk. 6:40, BPK.

11. Pakiko Hesus a stima loke el a siña hende?

¹¹ Hesus tabata stima loke el a siña hende. E tabata sa ku e tabatin algu presioso pa kompartí, esta, e bèrdat tokante su Tata selestial, e “palabranan di Dios” i e “palabranan di bida eterno.” (Juan 3:34; 6:68) Meskos ku un lus briante, e bèrdatnan ku Hesus a siña hende a saka na kla loke tabata malu i a resaltá loke tabata bon. E bèrdatnan akí a duna speransa i konsuelo na hende humilde ku tabata víktima di engaño di e lidernan religioso falsu i oprimí pa Diabel. (Echo. 10:38) E amor ku Hesus tabatin pa e bèrdat ta bisto no solamente den su siñansanan, sino tambe den tur loke el a hasi.

12. Kiko apòstel Pablo a pensa di e evangelio òf bon notisia?

¹² Meskos ku Hesus, su disipelnan tambe a stima i balorá e bèrdat tokante Yehova i Kristu asina tantu ku nan oponentenan no por a desanimá nan di kompartié ku otro hende. Pablo a skirbi su kompañeronan kristian na Roma: “Di mi parti, mi ta ansioso pa prediká e evangelio . . . Pasobra mi no tin bèrgwensa di e evangelio, pasobra esaki ta e poder di Dios pa salbashon pa tur ku ta kere.” (Rom. 1:15, 16) Pablo a haña ku tabata un onor pa el a proklamá e bèrdat. El a skirbi: “Na ami . . . e grasia akí a wòrdu duná, pa prediká na e paganonan e rikesa insondabel di Kristu.” (Efe. 3:8) No ta difísil pa imaginá ku ki entusiasmo Pablo tabata siña otro hende tokante Yehova i Su propósito.

13. Ki motibu nos tin pa stima e bon notisia?

¹³ E bon notisia ku nos por haña den e Palabra di Dios ta yuda nos konosé e Kreador i forma un amistat kuné. E bon notisia ei ta duna kontesta satisfaktorio riba preguntanan importante di bida i e tin e poder pa transformá nos bida, pa duna nos speransa i pa fortifiká nos den tempu di difikultat. Ademas, e ta mustra nos e kaminda ku lo hiba na un bida ku propósito ku lo no kaba nunka. No tin ningun konosementu mas presioso òf mas importante ku e bon notisia. Esei ta un regalo presiosísimo ku nos a risibí i ku ta duna nos gran goso. I nos ta haña mas goso ainda ora nos kompartí e regalo ei ku otro hende.—Echo. 20:35.

14. Kon nos por hasi e amor ku nos tin pa loke nos ta siña hende krese mas ainda?

¹⁴ Kiko bo por hasi pa bo amor pa e bon notisia por krese asta mas ainda? Ora bo ta lesa e Palabra di Dios, para de bes en kuando pa meditá riba loke bo ta lesa. Por ehèmpel, imaginá bo ta kompañá Hesus durante su sirbishi aki riba tera òf ta biaha huntu ku apòstel Pablo. Mira bo mes den e mundu nobo i visualisá kon diferente bida lo ta. Meditá riba e bendishonnan ku bo a risibí pa motibu ku bo a aseptá e bon notisia. Si bo mantené bo amor pa e bon notisia fuerte, e hendenan ku bo ta siña lo sinti e amor ei. Ta bon anto pa nos meditá kuidadosamente riba loke nos mes a siña i presta atenshon na loke nos ta siña otro hende.—Lesa 1 Timoteo 4:15 i 16. *

 Nos Mester Stima Hende

15. Pakiko un maestro mester stima su studiantenan?

¹⁵ Un bon maestro ta laga su studiantenan sinti nan kómodo, di manera ku nan ta haña gana di partisipá aktivamente den e estudio i sinti nan kontentu di por ekspresá nan mes. Un maestro amoroso ta duna konosementu pasobra e tin berdadero interes den su studiantenan. E ta adaptá su siñansa na nan nesesidatnan i nivel di komprondementu. E ta tene kuenta ku e kapasidat i sirkunstansianan di su studiantenan. Ora un maestro tin e klase di amor ei, su studiantenan lo ripará esei, i e proseso di siñansa lo bira algu agradabel.

16. Menshoná algun manera ku Hesus a mustra amor pa hende.

¹⁶ Hesus a mustra e klase di amor ei. E muestra di mas grandi di su amor tabata ora el a entregá su bida humano perfekto pa otro hende por haña salbashon. (Juan 15:13) Durante su sirbishi riba tera, semper e tabata kla pa yuda hende i foral pa siña nan tokante su Tata. En bes di warda hende yega serka dje, é a biaha sientos di kilometer na pia pa kompartí e bon notisia ku nan. (Mat. 4:23-25; Luk. 8:1) Hesus tabatin pasenshi i komprenshon. Ora e mester a korigí su disipelnan, el a hasi esaki ku amor. (Mar. 9:33-37) El a animá nan ekspresando su konfiansa ku nan lo a bira bon predikadó di e bon notisia. Hamas tabatin un maestro mas amoroso ku Hesus. E amor ku el a mustra na su disipelnan a motivá nan pa nan, na nan turno, stim’é i warda su mandamentunan.—Lesa Juan 14:15.

17. Kon Hesus su disipelnan a mustra amor pa hende?

¹⁷ Meskos ku Hesus, su disipelnan tambe a manifestá un amor profundo i kariño pa e hendenan ku nan a prediká na dje. Ounke nan a wanta persekushon i a riska nan bida, nan a sirbi otro hende i tabatin éksito den prediká e bon notisia. Nan a haña masha kariño pa e hendenan ku nan a duna yudansa spiritual! E palabranan ku apòstel Pablo a skirbi en bèrdat ta masha konmovedor: “Nos tabata kariñoso meimei di boso, manera un mènchi [òf, mama] ta kuida su mes yunan ku ternura. Teniendo pues un amor grandi pa boso, a agradá nos pa no solamente kompartí e evangelio di Dios ku boso, ma tambe nos mes bida, pasobra boso a bira masha stimá pa nos.”—1 Tes. 2:7, 8.

18, 19. (a) Pakiko nos ta dispuesto pa hasi sakrifisio pa kumpli ku e trabou di prediká? (b) Duna un ehèmpel pa mustra kon otro hende ta tuma nota di e amor ku nos ta demostrá.

¹⁸ Meskos tambe, den nos tempu, Testigunan di Yehova ta bai den tur skina di tera en buska di hende ku tin masha gana di konosé Dios i sirbié. De echo, durante e último 17 añanan, tur aña nos a dediká mas di mil mion ora na e trabou di prediká i hasi disipel, i nos ta sigui hasi e trabou ei. Ounke e trabou di prediká  ta eksigí tempu, energia i rekurso material di nos parti, nos ta hasié di buena gana. Meskos ku Hesus, nos ta komprondé ku nos Tata selestial amoroso ta deseá pa hende haña e konosementu ku ta hiba na bida eterno. (Juan 17:3; 1 Tim. 2:3, 4) Amor ta motivá nos pa yuda hende di kurason onrado konosé Yehova i siña stim’é meskos ku nos.

¹⁹ Otro hende ta tuma nota di e amor ku nos ta demostrá. Por ehèmpel, un ruman muhé pionero na Merka ta skirbi karta di konsuelo na hende ku a pèrdè un ser kerí. Un hòmber a kontestá e ruman lo siguiente: “Mi promé reakshon tabata di sorpresa. Mi a haña straño ku un persona ta hasi asina tantu esfuerso pa skirbi un karta na un hende ku e no konosé mes, pa e por yud’é karga su ferdrit. E úniko konklushon ku mi por a yega na dje ta ku bo mester ta stima bo próhimo i e Dios ku ta guia hende riba e kaminda di bida.”

20. Kon importante ta pa siña hende ku amor?

²⁰ Un hende a yega di bisa ku ora bo stima un kos i sa kon pa hasié bon, e produkto final lo ta un hoya. Den nos dunamentu di siñansa, nos ta buska moda di yuda nos studiantenan desaroyá un mente ku konosé Yehova i un kurason ku ta stim’é. Sí, pa nos por ta un maestro berdaderamente efektivo, nos mester tin amor pa Dios, amor pa e bèrdat i amor pa hende. Segun ku nos ta kultivá e klase di amor ei i ta manifest’é den nos sirbishi, nos ta eksperensiá no solamente e goso di duna, sino tambe e satisfakshon di sa ku nos ta imitá Hesus i agradá Yehova.

[Nota]

Kon Lo Bo Kontestá?

• Ora nos ta siña hende e bon notisia, pakiko ta importante pa nos tin . . .

amor pa Dios?

amor pa loke nos ta siña hende?

amor pa e hendenan ku nos ta siña?

[Preguntanan di Estudio]

[Plachi na página 23]

Kiko a hasi Hesus su manera di siña diferente for di e manera di e eskriba- i fariseonan?

[Plachi na página 26]

Bon manera di siña hende ta eksigí konosementu, kapasidat i, riba tur kos, amor