Jesusta qatipakuspa kuyakuywan yachachiy

“Manam pipas pay hinaqa rimarqachu.” (JUAN 7:46.)

1. ¿Imaynataq runakuna tarikurqaku Jesuspa yachachisqanta uyarispanku?

¡MAYNA sumaqchá karqa Jesuspa rimasqanta uyariyqa! Bibliapim leenchik paypa yachachisqanta uyarispanku runakuna imayna tarikusqankuta. Ejemplopaq, Lucasmi willakun Nazaretmanta kaqkuna Jesuspa ‘sumaqllaña nisqankunata uyarispanku llapallanku admirakusqankumanta’. Mateopas willanmi Orqopi Yachachiyta ‘tukuruptin runakuna admirasqallaña kasqankumanta’. Juanñataqmi nin presochaq riq guardiakuna hinalla kutimuspa kayna nisqankumanta: “Manam pipas pay hinaqa rimarqachu” (Luc. 4:22; Mat. 7:28; Juan 7:46).

2. ¿Imaynatam Jesus yachachirqa?

² Chay guardiakunaqa cheqaptam rimarqaku. Jesusqa mayqan runamantapas aswan allin yachachiqmi karqa. Facil entiendenatam yachachirqa hinaspa manam pipas ima niytapas atiqchu yachachisqanmantaqa. Yachaywanmi servichikurqa rikchanachiykunatawan tapukuykunata. Apukunapiwan wakchakunapas uyariqkum paykunapaq hina yachachiptin. Llapankum entiendeqku sasa kaqkunamanta yachachisqantapas. Manam chayta ruraspallachu Jesusqa allin Yachachiq karqa.

Kuyakuyqa ancha allinmi

3. ¿Imanasqataq Jesusqa religionpi punta apaqkunamanta aswan allin yachachiq karqa?

³ Fariseokunapipas hinaspa Diospa leynin yachachiqkunapipas karqachá yachayniyoq allin yachachiqkunaqa. Hinaptinqa, ¿imanasqataq Jesusqa aswan allin yachachiq karqa? Puntataqa, religionpi punta apaqkunam runakunata mana kuyarqakuchu, aswanqa despreciaqkum (Juan 7:49). Jesusmi ichaqa runakunata llakipayaq, nisqanman hinaqa ‘wischusqa, cheqesqa hinaspa mana michiqniyoq ovejakuna hinam karqaku’, chaymantapas payqa karqa allin runa, llampu sonqo hinaspa kuyapayakuqmi (Mat. 9:36). Chaynataq, paykunaqa manam Diostaqa kuyarqakuchu (Juan 5:42). Jesusmi ichaqa tukuy sonqonwan Taytanta kuyarqa hinaspa munaynintapas kusisqa rurarqa. Chaymantapas, Diospa leynin yachachiqkunawan fariseokunaqa munasqankuman hinam “Diospa Palabranta” yachachiqku, Jesusmi  ichaqa kuyarqa, chaymi: yachachirqa, explicarqa, defienderqa hinaspa tukuypi kasukurqa (Luc. 11:28). Kuyakuyniyoq kasqantaqa qawachirqam rimasqanpi, runakunawan imayna kasqanpi hinaspa imayna yachachisqanpipas.

4, 5. a) ¿Imanasqataq kuyakuywan yachachiyqa ancha allin? b) ¿Imanasqataq yachayniyoq hinaspa allin yachachiq kaypas ancha allin?

⁴ Cristianokunaqa Jesustam qatipakuyta munanchik lliw kawsayninchikpi chaynataq Dios serviyninchikpipas (1 Ped. 2:21). Chaymi Bibliamanta yachachispapas kallpanchakunanchik Diospa sumaq kayninkunata qatipakunapaq, aswanraqmi kuyakuynintaqa. Achka yachayniyoq kaspa otaq manapas, allin yachachiq kaspa otaq manapas, kuyakuq kaspam runakunapa sonqonmanqa chayasun. Hinaptinqa, allin yachachiq kanapaqqa Jesuspa ejemplonta qatipakuspam kuyakuywan yachachinanchik.

⁵ Yachayniyoq hinaspa allin yachachiq kayqa ancha allinmi. Jesusmi qatiqninkunata chayna kanankupaq yanaparqa, ñoqanchiktapas Jehová Diosmi llaqtanwan yanapawanchik (leey Isaias 54:13 hinaspa Lucas 12:42). Chayna kaptinpas, yachachispaqa manam yachasqallanchiktachu servichikuna aswanqa sonqonchiktawanmi. Chaymi yachachisqanchik allinpi tukunanpaqqa: yachayniyoq, allin yachachiq hinaspa kuyakuq kananchik. Hinaptinqa, ¿imaynatam kuyakuywan yachachichwan? ¿Imaynatam Jesuswan qatiqninkuna yachachirqaku?

Jehová Diostam kuyananchik

6. ¿Imaynatam kuyasqanchik runakunamanta rimanchik?

⁶ Llapallanchiktam gustawanchik munasqanchikkunamanta rimayqa. Ñoqanchikpaq imapas ancha valorniyoq kaptinqa kusisqallañam chaymanta rimanchik. Aswanraqmi kuyasqanchik runamanta rimaspanchikqa. Munanchikmi kuyasqanchik runa imayna kasqanmanta hukkuna yachanankuta. Paymantaqa haykapipas allintam rimanchik, contranpi mana allinta rimaptinkuñataq defiendenchik. Munanchiktaqmi ñoqanchik hina payta qawanankuta.

7. ¿Imatam Jesusqa rurarqa Diosta kuyasqanrayku?

⁷ Huk runakunapas Jehová Diosta kuyanankuta munaspanchikqa, ñoqanchikmi Diosta allintapuni reqsinanchik hinaspa tukuy sonqonchikwan kuyananchik. Cheqap yupaychayqa kuyakuypim takyasqa kachkan (Mat. 22:36-38). Kaymantaqa Jesusmi allin ejemplota qowarqanchik, payqa tukuy sonqonwan, vidanwan yuyayninwan hinaspa tukuy kallpanwanmi Diosta kuyarqa. Wara-waranqa watakuna Taytanwan kuska hanaq pachapi kaspanmi, Jesusqa allinta reqsirqa chaymi anchata kuyarqa. Nirqam: ‘Taytaytam kuyani’, nispa (Juan 14:31, NM). Chayna kuyasqantam qawachirqa rimasqanpi hinaspa rurasqanpipas, kuyasqanmi kallpancharqa Diospa munayninta tukuy tiempo rurananpaq (Juan 8:29). Kallpancharqataqmi Dios serviq tukuqkunapa llulla kasqankuta qawachinanpaq hinaspa predicananpaq, chaynapi Taytanta runakuna reqsispa kuyanankupaq.

8. ¿Imatam Jesuspa qatiqninkuna rurarqaku Diosta kuyaspanku?

⁸ Punta pachak watapi cristianokunapas tukuy sonqonkuwanmi Diosta kuyarqaku, chaymi mana manchakuspa hinaspa kusisqallaña predicarqaku. Religionkunapi punta apaqkuna harkakuptinkupas Jerusalenpim lliw runakunata yachachirqaku. Manam saqerqakuchu rikusqankumantawan uyarisqankumanta willakuytaqa (Hech. 4:20; 5:28). Yacharqakum Jehová Dios paykunata yanapaspan bendecinantaqa. Jesuspa wañukusqanmanta yaqa 30 wata pasaruptinmi, Pablopas nirqa ‘kay pachapi llapallan runakuna’ predicasqaña kasqanta (Col. 1:23).

9. ¿Imatam rurananchik Diosta astawan kuyananchikpaq?

⁹ Allin yachachiq kanapaqqa, Diostam sapa punchaw astawan kuyananchik. ¿Imaynatam  chayta rurachwan? Jehová Diosta sapa kuti mañakuspa, Palabrantawan Bibliamanta qellqakunata leespa chaynataq huñunakuykunaman rispa. Diosta astawan reqsispaqa astawanmi kuyasun. Rimasqanchikwan hinaspa rurasqanchikwan Dios kuyasqanchikta qawachiptinchikqa, hukkunam cuentata qokuspanku Payman asuykunqaku (leey Salmo 104:33, 34).

Diosmanta yachasqanchiktam kuyana

10. ¿Imaynataq allin yachachiqqa?

¹⁰ Allin yachachiqqa kuyanmi cheqap yachachisqanta, convencisqam kachkan yachachisqan ancha valorniyoq kasqanmanta. Kusisqa kasqanqa sutillam, chaymi estudiaqkunatapas yanapanqa. Mana chaninchaptinqa estudiaqkunapas mana valorniyoqtam qawanqaku. Ama qonqasunchu, Bibliamanta yachachispa ejemplo qosqanchik ancha allin kasqanta, Jesusqa nirqam: “Pipas yachachiqninmanta [. . .] astawan yachaspanqa yachachiqnin hinam kanqa”, nispa (Luc. 6:40).

11. ¿Imanasqataq Jesusqa kuyarqa cheqapmanta yachachisqanta?

¹¹ Jesusqa kuyarqam cheqap yachachisqantaqa. Yacharqam Diosmanta willakusqan hinaspa ‘wiñay kawsay qokuq’ yachachisqan ancha valorniyoq kasqanta (Juan 3:34; 6:68). Cheqap yachachisqanqa achki hinam karqa, chaywanmi reqsinku imam allin kaqta otaq mana allin kaqtapas. Diablopa ñakarichisqan chaynataq religionpi punta apaqkunapa engañasqan runakunamanmi consuelotawan suyakuyta qorqa (Hech. 10:38). Yachachisqanta kuyasqanmi qawakurqa imayna yachachisqanpi hinaspa tukuy ima rurasqanpipas.

12. ¿Imaynatam Pablo qawarqa allin noticiamanta willakuyta?

¹² Imaynam Jesus cheqapmanta yachachisqanta kuyarqa, chaynam qatiqninkunapas Jehová Diosmantawan Churinmanta cheqap yachayta anchata kuyarqaku. Chaymi enemigonkupas upallachiytaqa mana atirqakuchu. Pablom Romapi iñiqkunata nirqa: ‘Llumpaytam munachkani Jesucristomanta allin noticiakuna willaykuyta. Manam penqakunichu [. . .] allin noticia willakuytaqa. Chay willakuywanmi Dios atiyninwan salvan llapallan iñiqkunata’, nispa (Rom. 1:15, 16). Pabloqa cheqapmanta willaytaqa anchatam chanincharqa. Kaynatam qellqarqa: “Ñoqataraqmi Dios favoreceykuwarqa mana judio kaqkunaman Cristomanta hatun valorniyoq pakasqa kaq allin noticiata willakunaypaq”, nispa (Efe. 3:8). Arí, Pabloqa kusisqallañam predicarqa Diosmanta hinaspa ima rurananmantapas.

13. ¿Imanasqataq Diosmanta allin noticiakunata kuyanchik?

¹³ Diospa Palabranpi allin noticiakunam yanapawanchik Unanchaqninchikta astawan reqsinanchikpaq hinaspa amistadta rurananchikpaqpas. Sasa tapukuykunatam contestawanchik, vidanchikta cambiawanchik, suyakuyta qowanchik, sasachakuypipas kallpanchawanchikmi. Chaymantapas, wiñay kawsakuymanmi pusawanchik. Chaykunaqa ancha allin noticiakunam. Mana tupachiy atina regalom hinaspa kusichiwanchikmi. ¡Anchatam kusikunchik hukkunaman willaspanchikqa! (Hech. 20:35.)

14. ¿Imatam rurachwan Diosmanta allin noticiakunata astawan kuyananchikpaq?

¹⁴ ¿Imatam rurawaq Diosmanta allin noticiata astawan kuyanaykipaq? Diospa Palabranta leespaykim yuyaymananayki. Ejemplopaq, piensay Jesuswan kuska predicasqaykita otaq Pablowan viajasqaykita. Piensaytaq mosoq pachapi kasqaykita hinaspa imayna chaypi tarikusqaykipipas. Chaymantapas, yuyariy kasukusqaykirayku bendicionkuna chaskisqaykimanta. Chaynaqa amayá qonqasunchu, allin noticiata kuyaptinchikqa estudiaqkunapas cuentatam qokunqaku. Chaymi kallpanchakunanchik yachasqanchikkunapi yuyaymananapaq hinaspa allinta yachachinapaqpas (leey 1 Timoteo 4:15, 16).

 Runakunatam kuyana

15. ¿Imanasqataq allin yachachiqqa estudiantenkunata kuyanan?

¹⁵ Allin yachachiqqa allinta tanteaspam imatapas ruran, chaynapi estudiachisqankuna yachayta munanankupaq hinaspa rimarinankupaqpas. Paykunapim interesakun, yachachinpas entiendey atisqankuman hinaspa necesitasqankuman hinam. Estudiantenkunata kuyaptinqa paykunaqa cuentatam qokunqaku. Hinaptinmi, yachachiq kusikun yachachisqanmanta, paykunañataq yachasqankumanta.

16. ¿Imaynatam Jesus qawachirqa runakuna kuyasqanta?

¹⁶ Jesusqa sonqomantam runakunata kuyarqa. Chaymi vidanta qorqa paykunata salvananpaq (Juan 15:13). Kuyakuynintaqa qawachirqataqmi runakunata yachachispanpas. Mana samaspam runakunapa necesitasqanta atienderqa, astawanqa Diosmantam yachachirqa. Payman hamunankuta suyananmantaqa, karu llaqtakunatam chakiwan rirqa predicananpaq (Mat. 4:23-25; Luc. 8:1). Pacienciakuq hinaspa entiendeqmi karqa. Qatiqninkunata correginan kaptinqa kuyakuywanmi corregirqa (Mar. 9:33-37). Allin yachachiq kanankupi confiasqantam qawachirqa, chayqa paykunataqa kallpancharqachá. Manamá pipas karqachu Jesus hina kuyaspa yachachiqqa. Chayna kaptinmi qatiqninkuna kuyarqa hinaspa kasukunankupaqpas kallpanchasqa karqaku (leey Juan 14:15).

17. ¿Imaynatam Jesuspa qatiqninkuna qawachirqaku runakuna kuyasqankuta?

¹⁷ Jesuspa qatiqninkunapas predicasqan runakunatam kuyarqaku. Hukkunata yanapanankupaqwan allin noticiamanta willakunankupaqmi, qatikachasqa kaytapas mana manchakuspanku vidankutapas peligropi churarqaku. ¡Anchatamá kuyarqaku yachachisqanku runataqa! Qawasunchik Pablopa kayna qellqasqanta: “Qamkunawanqa llampu sonqollam karqaniku. Ñoqaykuqa karqaniku wawankuna uywachkaq mama hinam. Qamkunataqa llumpaytam kuyarqaykiku chaymi qoytaqa munarqaykiku Diosmanta allin noticiallatañachu aswanqa kikiykupa vidaykutawanñam, chaynataqa munarqaniku llumpayta kuyasqaykuraykum” (1 Tes. 2:7, 8).

18, 19. a) ¿Imanasqataq kallpanchakunchik predicananchikpaq? b) ¿Imaynatam yachanchik kuyasqanchikmanta runakuna cuentata qokusqankuta? Willarimuy huk ejemplowan.

¹⁸ Jehová Diospa testigonkunaqa kunanpas allpantinpim maskachkanku Diosta reqsispa serviy munaq runakunata. Chaymi 17 wataña sapa wata 1.000 millon masnin horata predicachkanchik hinaspa yachachichkanchik. Kusisqam tiemponchikta, kallpanchikta hinaspa kapuqninchiktapas servichikunchik.  Jesus hinam yachanchik, Diosqa munanmi runakuna wiñay kawsayman apaq yachayta reqsinankuta (Juan 17:3; 1 Tim. 2:3, 4). Kuyakuymi kallpanchawanchik allin sonqoyoq runakunata Diosmanta yachachinanchikpaq, chaynapi ñoqanchik hina kuyanankupaq.

¹⁹ Runakunaqa cuentatam qokunku kuyasqanchikmanta. Ejemplopaq, Estados Unidos nacionpi huk precursoram runakunapa familianku wañukuptin consuelaq cartata qellqaq. Huk kutitam kayna niq cartata chaskirqa: “Qallariypiqa anchatam admirakurqani, sasa tiempopi yanapanaykipaq mana reqsisqaykiman qellqamusqaykimanta. Ichaqa cuentatam qokuni runamasikita hinaspa ñanninchik kanchaykuq Diosta kuyasqaykimanta”.

20. ¿Imanasqataq kuyakuywan yachachiyqa ancha allin?

²⁰ Kuyaspa allin yachachiq kaptinchikqa allinpim tukunqa. Yachachisqanchik runakunatam yanapananchik Jehová Diosta allinta reqsinankupaq hinaspa kuyanankupaqpas. Yachamusqanchikman hinaqa, allin yachachiq kanapaqqa kuyananchikmi: Diosta, cheqap yachayta hinaspa runakunatapas. Predicasqanchikpi chayna kuyakuyta qawachispanchikqa, manam yachachisqallanchikmantachu kusisqa kasun, astawanqa Jesusta qatipakusqanchikmanta hinaspa Jehová Diosta kusichisqanchikmantapas.

¿Yuyachkankichu?

• Bibliamanta yachachispaqa, ¿imanasqataq . . .

. . . Diosta kuyana?

. . . Diosmanta yachachisqanchikta kuyana?

. . . runakunata kuyana?

[Kay yachachikuypa tapukuyninkuna]

[15 kaq paginapi dibujo]

¿Imanasqataq Jesusqa fariseokunamantawan Diospa leynin yachachiqkunamantaqa allin yachachiq karqa?

[18 kaq paginapi dibujo]

Allin yachachiq kanapaqqa: yachayniyoqmi kananchik, astawanqa kuyakuqmi