Faaaʻoaʻo iā Iesu—I le Aʻoaʻo ma le Alofa

“E leai lava se tagata ua tautala e pei o lenei tagata.”—IOA. 7:46.

1. Na faapeʻī le tali mai a tagata i le auala na aʻoaʻo atu ai Iesu?

SEʻI faaāta i le mafaufau le manaia o le faalogologo atu a o aʻoaʻo mai Iesu! O loo faamatala mai i le Tusi Paia le auala na aafia ai i latou na feiloaʻi ma ia. O se faataʻitaʻiga, ua taʻua i le Evagelia a Luka e faapea o tagata i le aai o Iesu, sa “ofo i latou i le logolelei o ana fetalaiga.” Ma ua faapea mai Mataio, o i latou na faalogologo i lana Lauga i luga o le Mauga, ‘na matuā ofo i lana aʻoaʻo atu.’ Ua faapea mai foʻi Ioane, na taʻua e leoleo na auina atu e puʻe mai Iesu ae leʻi aumaia o ia, e faapea: “E leai lava se tagata ua tautala e pei o lenei tagata.”—Luka 4:22; Mata. 7:28; Ioa. 7:46.

2. Na faapeʻī le auala na aʻoaʻo atu ai Iesu?

² E saʻo lelei na leoleo. E lē fesiligia le mea moni, o Iesu o le Faiaʻoga sili o ē uma na soifua mai. Na manino ma faigofie lana aʻoaʻo, ma e saʻo ma tonu ona manatu uma. E poto tele o ia i le faia o talafaatusa ma fesili. Sa fua lana aʻoaʻo iā i latou na talanoa atu i ai, e tusa pe maualuluga pe faatauvaa. O upu moni na ia aʻoaʻo atu e faigofie ona malamalama i ai, ae e loloto foʻi o latou uiga. Peitaʻi, e lē na o le pau nei o vala na ala ai ona avea Iesu ma Faiaʻoga sili.

E Sili Ona Tāua le Alofa

3. Na faapefea ona eseese le aʻoaʻo atu a Iesu ma taʻitaʻi lotu o ona aso?

³ Atonu o nisi o le ʻautusiupu ma le ʻau Faresaio sa iai le poto ma le tomai e aʻoaʻo atu ai. Ae o le ā le eseesega o le latou aʻoaʻo atu ma le aʻoaʻo atu a Iesu? Sa lē alolofa taʻitaʻi lotu i tagata lautele, ae sa latou ʻinoʻino ma manatu i nei tagata, o ē ua “faamalaiaina.” (Ioa. 7:49) Peitaʻi sa ese mai ai Iesu, na alofa mutimutivale o ia iā i latou, ona “ua pei i latou o mamoe ua faamanuʻalia ma faileagaina, ua leai so latou leoleo mamoe.” (Mata. 9:36) O ia o se tagata e māfana, alofa ma agalelei. E leʻi alolofa foʻi taʻitaʻi lotu i le Atua. (Ioa. 5:42) Peitaʻi, sa alofa Iesu i lona Tamā ma fiafia e fai lona finagalo. Sa faauigasesē e taʻitaʻi lotu afioga a le Atua ina ia faafetaui ma o latou manatu, ae sa naunau tele Iesu i “le afioga a le Atua,” ma sa ia aʻoaʻo atu, faamatala atu, lagolagoina, ma ola ai. (Luka 11:28) Ioe, sa matuā naunau lava Keriso i mea na ia aʻoaʻo atu, ma na faaalia i le auala na ia feutagaʻi ai ma tagata, ma le auala na ia aʻoaʻo ai i latou.

4, 5. (a) Aiseā e tāua ai ona aʻoaʻo atu ma le alofa? (e) Aiseā e tāua ai foʻi ona iai le malamalama ma le tomai i le aʻoaʻo atu?

 ⁴ Ae faapefea i tatou? I le avea ai ma soo o Keriso, e tatou te naunau e faaaʻoaʻo iā te ia i la tatou faiva ma i o tatou olaga. (1 Pete. 2:21) O lea la, e lē gata e tāua iā i tatou ona faailoa atu le upu moni o le Tusi Paia, ae ia faaatagia atu foʻi uiga o Ieova, aemaise lava lona alofa. E tusa pe tele pe itiiti lo tatou malamalama ma o tatou tomai tau aʻoaʻo atu, ae o le faaalia o le alofa o le a fesoasoani iā i tatou e pāʻia ai loto o ē o loo tatou talaʻi atu i ai. Ina ia taulau moni lava i la tatou galuega o le faia o isi ma soo, e ao ona tatou faaaʻoaʻo iā Iesu e ala i le aʻoaʻo atu ma le alofa.

⁵ E moni e manaʻomia ona tatou malamalama i le mataupu, ma ia iai le tomai e aʻoaʻo atu ina ia avea ai ma faiaʻoga lelei. Na fesoasoani Iesu i ona soo ina ia faia faapea, ma ua fesoasoani mai foʻi Ieova iā i tatou e faia faapea i aso nei, e ala mai i lana faalapotopotoga. (Faitau le Isaia 54:13; Luka 12:42.) Peitaʻi, e lē gata e ao ona fai ma o tatou sini le aʻoaʻo atu ma le tomai, ae ia aʻoaʻo atu foʻi ma le lotoatoa. Pe a ō faatasi le malamalama, le tomai, ma le alofa, o le a maua ni iʻuga e sili ona faafiafiaina ai. O ā la auala e tatou te faaalia ai le alofa pe a tatou aʻoaʻo atu? Na faapefea ona faia faapea e Iesu ma ona soo? Seʻi o tatou iloiloina pe faapefea.

E Tāua le Alofa iā Ieova

6. O le ā le auala e tatou te talanoa ai e uiga i se tagata e pele iā i tatou?

⁶ E tatou te fiafia e talanoa i mea e tatou te naunau i ai. E vaaia i o tatou foliga le naunau ma le māfana pe a talanoa i mea e pele iā i tatou. Ua sili ona moni lea tulaga pe a tatou talanoa e uiga i se tagata e tatou te alolofa i ai. Ma o le tulaga masani, e tatou te faanaunau ia faailoa atu i isi mea e uiga i lenā tagata. E tatou te viiviia ma faaaloalogia o ia, ma puipui foʻi i lona igoa lelei, ona e tatou te mananaʻo ia fiafia isi iā te ia ma ona uiga e pei foʻi o i tatou.

7. O le ā na uunaʻia Iesu e fai ona o lona alofa i le Atua?

⁷ E tatau ona tatou iloa Ieova ma alolofa iā te ia, ona mafai lea ona tatou atiaʻe i isi le alofa mo ia. O le māfuaaga, ona e faavae le tapuaʻiga moni i le alofa i le Atua. (Mata. 22:36-38) Sa faataatia e Iesu se faaaʻoaʻoga e sili ona lelei. Sa ia alofa iā Ieova ma lona loto atoa, manatu atoa, tagata atoa, ma le malosi atoa. Ona na faatasi Iesu ma lona Tamā i le lagi i le tusa ma le faitau piliona o tausaga, o lea sa ia iloa lelei ai o ia. O le ā le iʻuga? Na faapea mai Iesu, “Ou te alofa i le Tamā.” (Ioa. 14:31) Sa atagia mai lenā alofa i mea uma lava na faia e Iesu ma ana fetalaiga. Sa uunaʻia o ia i taimi uma e lenā alofa e faia mea e finagalo malie i ai le Atua. (Ioa. 8:29) Sa uunaʻia ai o ia e taʻusalaina taʻitaʻi lotu o ē na faapea mai ma le faafiaamiotonu, o i latou o sui o le Atua. Sa uunaʻia ai foʻi o ia e talanoa e faatatau iā Ieova, ma fesoasoani i isi ia iloa le Atua ma alolofa iā te ia.

8. O le ā na uunaʻia soo o Iesu e fai ona o le alolofa i le Atua?

⁸ I le pei o Iesu, sa alolofa foʻi ona soo o le uluaʻi senituri iā Ieova, ma na uunaʻia ai i latou e talaʻi atu le tala lelei ma le lototele ma le maelega. Sa latou faatumu Ierusalema i la latou aʻoaʻoga, e ui lava na matuā tetee ane taʻitaʻi lotu iā i latou. Sa leʻi taofia ai le ʻausoo mai le talanoa e uiga i mea na latou vāai ma faalogo i ai. (Galu. 4:20; 5:28) Sa latou iloa na faatasi Ieova ma i latou ma e na te faamanuiaina i latou, ma e mautinoa lava na ia faia faapea! Auā a o leʻi atoa le 30 tausaga talu ona mavae le maliu o Iesu, sa tusi le aposetolo o Paulo e faapea, na mafai ona talaʻia le tala lelei “i le lalolagi aoao.”—Kolo. 1:23.

9. E mafai faapefea ona faamalosia lo tatou alofa i le Atua?

⁹ Pe afai e tatou te mananaʻo e avea ma faiaʻoga e taulau moni lava, e manaʻomia foʻi la ona tatou faamautinoa o loo faaauau ona faamalosia lo tatou alofa i le Atua. E faapefea ona tatou faia lenā tulaga? E ala i le talanoa atu  pea i le Atua i le tatalo. E faamalosia foʻi lo tatou alofa i le Atua e ala i le suʻesuʻeina o lana Afioga, faitau lomiga faale-Tusi Paia, ma auai i sauniga. A o tuputupu aʻe lo tatou iloa o le Atua, o le a tumu ai o tatou loto i le alofa iā te ia. O lea la, o le a mātauina e isi lo tatou alofa i le Atua e ala i a tatou upu ma gaoioiga, ma e latou te ono fia faalatalata atu ai iā Ieova.—Faitau le Salamo 104:33, 34.

Ia Naunau i Mea o Loo Aʻoaʻo Atu

10. E faapefea ona iloa se faiaʻoga lelei?

¹⁰ E iloa se faiaʻoga lelei ona o lona naunau i mea o loo ia aʻoaʻo atu. E ao ona ia talitonu o na mea, e moni, e aogā, ma e tāua. E iloa lelei le naunau o le faiaʻoga i lana mataupu ona o lona fiafia i ai, ma o le a matuā taaʻina ai i latou o loo ia aʻoaʻoina. Ae afai e lē tāua i le faiaʻoga lana mataupu, e lē mafai la ona ia faatalitalia i latou o loo ia aʻoaʻoina e faatāua mea o loo latou faalogo mai i ai. E tāua tele lau faaaʻoaʻoga o se faiaʻoga o le Afioga a le Atua. Ona na faapea mai Iesu: “O lē ua aʻoaʻoina lelei o le a pei o lona faiaʻoga.”—Luka 6:40.

11. Aiseā na naunau ai Iesu i mea na ia aʻoaʻo atu?

¹¹ Na matuā naunau Iesu i mea na ia aʻoaʻo atu. Na ia iloa e iai se mea tāua e ao ona ia faailoa atu—o le upu moni lea e uiga i lona Tamā, o “afioga a le Atua” ma “upu o le ola e faavavau.” (Ioa. 3:34; 6:68) I le pei o se malamalama pupula, na avea ai upu moni na aʻoaʻo atu e Iesu ma auala e faaalia ai mea e lē fiafia i ai Ieova, ae faamatilatila ai mea lelei. Na mafai ai ona maua le faamoemoe ma faamāfanafanaina ai ē e lotomaulalo na faasesēina e taʻitaʻi lotu pepelo, ma mafatia ona o le Tiapolo. (Galu. 10:38) Sa iloa le naunau o Iesu i mea na ia aʻoaʻo atu, e lē gata i ana aʻoaʻoga ae faapea foʻi i mea na ia faia.

12. O le ā le lagona o le aposetolo o Paulo e faatatau i le tala lelei?

¹² I le pei o Iesu, sa naunau ma matuā tāua i ona soo le upu moni e faatatau iā Ieova ma Keriso, ma na lē mafai ai e tagata tetee ona faavaivaia i latou, mai le talanoa atu i isi e faatatau i lenā upu moni. Na tusi Paulo i uso Kerisiano i Roma e faapea: “Ua ou naunau tele ai e folafola atu le tala lelei . . . Ou te lē mā i le tala lelei; ona o le mana lea o le Atua e faaolaina ai ē ua faatuatua.” (Roma 1:15, 16) Sa manatu Paulo o se faaeaga tāua le faailoa atu o le upu moni. Na tusi o ia e faapea: “Ua tuuina mai iā te aʻu, . . . lenei agalelei faifua ina ia ou talaʻi atu le tala lelei i nuu ese, e faatatau i oloa lē masuʻesuʻeina a Keriso.” (Efe. 3:8) E lē faigatā ona faaata i mafaufau le matuā naunau o Paulo, a o ia aʻoaʻoina isi e faatatau iā Ieova ma Ana fuafuaga.

13. O ā māfuaaga e ala ai ona tatou naunau i le tala lelei?

¹³ Ua mafai ona tatou iloa Lē na faia i tatou ma maua se mafutaga māfana ma ia, ona o le tala lelei mai le Afioga a le Atua. Ua faamalieina ai i tatou i tali o fesili tāua o le olaga, ma o loo iai le mana e suia ai o tatou olaga, e maua ai le faamoemoe, ma faamalosia ai i tatou i taimi faigatā. Ua faasino mai ai foʻi le ala e maua ai le olaga e iai se uiga, ma e lē gata mai. E leai se isi poto e sili atu ona tāua pe aogā i lo le tala lelei. O se meaalofa e sili ona tāua ua tuuina mai iā i tatou, ma e maua ai le fiafia tele. Ae o le a faateleina lo tatou fiafia pe a tufa atu lenā meaalofa i isi.—Galu. 20:35.

14. E faapefea ona faamalosia lo tatou naunau i mea o loo tatou aʻoaʻo atu?

¹⁴ O le ā e fai ina ia faamalosia atili ai lou naunau i le tala lelei? A o tatou faitauina le Afioga a le Atua, ia manatunatu i mea o loo e faitau i ai. O se faaaʻoaʻoga, ia faaata i lou mafaufau o loo lua ō faatasi ma Iesu a o fai lana faiva i le lalolagi, po o lua faimalaga faatasi foʻi ma le aposetolo o Paulo. Faaata i lou mafaufau o loo e iai i le lalolagi fou, ma iloa ai le tulaga ese o le olaga o le a iai. Ia manatunatu i faamanuiaga ua e maua ona o lou ola e tusa ai ma le tala lelei. Pe a faaauau ona e faamalosia lou naunau i le tala lelei, o le a mātau mai e i latou o loo e aʻoaʻoina. O se māfuaaga lelei tele lea e ao ai ona tatou manatunatu loloto i mea ua tatou iloa, ma uaʻi lelei i mea o  loo tatou aʻoaʻoina atu.—Faitau le 1 Timoteo 4:15, 16.

E Tāua le Alofa i Tagata

15. Aiseā e ao ai i se faiaʻoga ona alofa i ē o loo ia aʻoaʻoina?

¹⁵ Pe afai e lelei se faiaʻoga, o le a lagona e i latou o loo ia aʻoaʻoina le fiafia, ma naunau i mea o loo aʻoaʻoina ma fiafia e fai so latou sao. O le alofa moni o le faiaʻoga iā i latou o loo ia aʻoaʻoina, ua māfua ai ona ia faailoa atu le poto. E fua lana aʻoaʻo atu i o latou manaʻoga ma mea ua latou iloa. E manatunatu o ia i o latou tulaga ma mea e latou te mafaia. E lagona e i latou o loo aʻoaʻoina le alofa o le faiaʻoga, ma o le a fiafia ai lē o loo aʻoaʻo atu faapea ma lē o loo aʻoaʻoina.

16. O ā auala na faaalia ai e Iesu le alofa i tagata?

¹⁶ O le alofa lenā sa faaalia e Iesu. O le faailoaga sili o lona alofa, o le foaʻiina mai lea o lona soifua lelei atoatoa ina ia laveaʻiina ai isi. (Ioa. 15:13) I le taimi o lana faiva, sa nofosauni Iesu i taimi uma e fesoasoani i tagata ma aʻoaʻo i latou e faatatau i lona Tamā. Nai lo le faatalitali ia ō mai tagata iā te ia, sa femaliuaʻi o ia i le faitau selau o maila ina ia faailoa atu le tala lelei iā i latou. (Mata. 4:23-25; Luka 8:1) Sa onosai o ia ma malamalama i tulaga o tagata. Ina ua manaʻomia ona faasaʻo ona soo, sa ia faia ma le alofa. (Mare. 9:33-37) Sa ia faalaeiau i latou e ala i le faaalia o lona mautinoa e faapea, o le a latou taulau i le talaʻia o le tala lelei. E leai se isi sa sili ona avea ma faiaʻoga alofa nai lo o Iesu. O lona alofa i ona soo, na uunaʻia ai i latou e alolofa iā te ia ma tausi i ana poloaʻiga.—Faitau le Ioane 14:15.

17. Sa faaalia faapefea e soo o Iesu le alofa i isi?

¹⁷ I le pei o Iesu, sa faaalia foʻi e ona soo le alofa loloto ma le naunau iā i latou na talaʻi atu i ai. Na latou auauna atu i isi ma taulau i le talaʻia o le tala lelei, e ui i sauāga ma lamatiaga i o latou ola. Maʻeu le lagona alofa na latou faaalia i tagata na taliaina le tala lelei! E faaalia le alofa faapelepele o le aposetolo o Paulo ina ua ia tusi e faapea: “Na matou alolofa māfana iā te outou, e pei ona tausi faapelepele e se failele ana fanau. O lea la, ona o le alofa faapelepele iā te outou, sa matou matuā fiafia ai e avatu iā te outou e lē na o le tala lelei a le Atua, ae faapea foʻi ma o matou ola, auā ua matou alolofa iā te outou.”—1 Tesa. 2:7, 8.

18, 19. (a) Aiseā ua tatou lotomalilie ai e faaaogā mea uma ua iā i tatou e fai ai le galuega talaʻi? (e) Taʻu mai se faaaʻoaʻoga e faamaonia ai o loo mātau mai e isi lo tatou alofa.

¹⁸ Ua faapena foʻi i aso nei, o loo saʻilia e Molimau a Ieova i le lalolagi aoao i latou o loo naunau e iloa le Atua ma auauna iā te ia. O le mea moni, ua sosoo tausaga e 17 ua teʻa atu nei o tatou faaaluina le sili atu i le tasi piliona itula, i tausaga taʻitasi i le galuega talaʻi ma le faia o soo, ma o loo faaauau pea ona tatou faia. Ua tatou lotomalilie e fai e ui e manaʻomia  ai ona faaalu o tatou taimi, malosi, ma mea faitino. I le pei o Iesu, ua tatou malamalama o loo faanaunau lo tatou Tamā alofa i le lagi, ia maua e tagata le poto lea e taʻitaʻia ai i le ola e faavavau. (Ioa. 17:3; 1 Timo. 2:3, 4) Ua uunaʻia i tatou e le alofa ia fesoasoani i ē loto faamaoni e iloa Ieova ma alolofa iā te ia e pei foʻi o i tatou.

¹⁹ Ua mātau mai e isi lo tatou alofa. O se faataʻitaʻiga, ua faia e se tuafafine paeonia i Amerika ni tusi e faamāfanafana ai tagata ua maliliu ē e pele iā i latou. Na tali mai se tamāloa i lana tusi e faapea: “O le lagona muamua na oo ifo iā te aʻu o le ofo, ona o le taumafaiga a se tagata e tusi mai i se isi e lē masani ai, ina ia fesoasoani mai ia mafai ona onosaia taimi faigatā. Pau le manatu ua oo mai, e te alofa i ou uso a tagata, faapea ma le Atua o lē e taʻitaʻia tagata i ala o le ola.”

20. Aiseā e tāua ai ona aʻoaʻo atu ma le alofa?

²⁰ E mafai ona faapea atu a ō faatasi le alofa ma le tomai, o le a e faatalitalia la se iʻuga e sili ona lelei. I le aʻoaʻo atu, e tatou te taumafai e fesoasoani i ē o loo tatou aʻoaʻoina ina ia iloa Ieova, ma alolofa iā te ia. Ioe, ina ia avea ma faiaʻoga e taulau moni, e manaʻomia ona tatou alolofa i le Atua, naunau i le upu moni, ma alolofa i tagata. A o tatou atiaʻe lenā alofa ma faaalia atu i la tatou faiva, o le a tatou maua ai le olioli ona o le foaʻi atu, atoa ma le faamalieina i le iloa e faapea, o loo tatou faaaʻoaʻo iā Iesu ma faafiafia Ieova.

O le ā Lau Tali?

• A o tatou aʻoaʻo atu i isi le tala lelei, aiseā e tāua ai ona tatou . . .

alolofa i le Atua?

naunau i mea o loo tatou aʻoaʻo atu?

alolofa i ē o loo tatou aʻoaʻoina?

[Fesili mo le Suʻesuʻega]

[Ata i le itulau 15]

O le ā le eseesega o le aʻoaʻo atu a Iesu ma le aʻoaʻo a le ʻautusiupu ma le ʻau Faresaio?

[Ata i le itulau 18]

Ina ia lelei le aʻoaʻo atu, e manaʻomia le malamalama, tomai, ae sili ai o le alofa