De leki Yesus, èn sori lobi gi den sma di yu e gi leri

„Noiti ete wan sma taki leki a man disi.”​—YOH. 7:46.

1. San den sma ben taki fu a fasi fa Yesus ben gi leri?

PRAKSERI o moi a ben musu de fu yere fa Yesus ben e gi sma leri! Bijbel e fruteri wi sortu krakti a ben abi tapu den sma di ben e miti en. Fu eksempre, na Evangelie skrifiman Lukas, skrifi taki den sma fu Nasaret „bigin . . . fruwondru fu den moi sani di a ben taki”. Mateyus skrifi taki den sma di ben arki a Bergitaki fu Yesus, ben „fruwondru fu a fasi fa a ben gi leri”. Èn Yohanes ben taki dati den skowtu di ben musu go grabu Yesus, ben drai kon baka sondro Yesus. Den ben taki: „Noiti ete wan sma taki leki a man disi.”​—Luk. 4:22; Mat. 7:28; Yoh. 7:46.

2. Na sortu fasi Yesus ben e gi leri?

² A sani di den skowtu dati ben taki, ben tru. Fu tru, Yesus ben de a Moro Bigi Leriman di ben de na libi oiti! A ben e gi sma leri na wan fasi di makriki fu frustan, èn nowan sma ben man krutu den sani di a ben taki. Te a ben e gebroiki agersitori, èn te a ben e poti aksi gi sma, dan a ben e du dati na wan koni fasi. A ben e fiti den leri fu en na den sma di ben e arki en, awansi den ben de heihei sma noso mofina sma. Den tru tori di Yesus ben e leri sma, ben makriki fu frustan èn den ben de prenspari tori trutru. Ma a no den sani dati wawan ben meki taki Yesus ben de a Moro Bigi Leriman.

A moro prenspari fasi na lobi

3. Fa a fasi fa Yesus ben e gi sma leri, ben e difrenti fu a fasi fa den kerki fesiman na ini a ten fu en ben e du dati?

³ A no de fu taki, dati sonwan fu den leriman fu Wèt nanga den Fariseiman, ben abi koni, èn den ben sabi fa fu gi leri. Fu san ede a fasi fa Yesus ben e gi leri ben e difrenti fu a fasi fa den man dati ben e gi leri? Den kerki fesiman fu a ten dati, no ben lobi den mofinawan. Na presi fu dati, den ben e wisiwasi den èn den ben e si den leki „frufruktu sma” (Yoh. 7:49). Tra fasi leki dati, Yesus ben abi sari-ati nanga den sma disi, „bika sma ben pina den èn den ben waka bruyabruya leki skapu di no abi skapuman” (Mat. 9:36). Yesus ben abi safu-ati, a ben abi sari-ati, èn a ben e sori switifasi gi sma. Wan tra sani, na taki den kerki fesiman no ben abi trutru lobi gi Gado (Yoh. 5:42). Ma Yesus ben lobi en Tata èn a ben e du a wani fu En nanga prisiri. Den kerki fesiman ben drai Gado wortu fu den eigi bun, ma Yesus ben lobi „a wortu fu Gado”. A ben e gi sma leri fu a wortu fu Gado, a ben e fruklari a wortu, a ben e opo taki gi a wortu, èn a ben e libi na wan fasi di ben e kruderi nanga den  gronprakseri fu a wortu disi (Luk. 11:28). Iya, Krestes ben abi bigi lobi gi a wortu fu Gado, èn dati ben de fu si na den sani di a ben e leri sma, na a fasi fa a ben e handri nanga sma, èn na a fasi fa a ben e gi den rai.

4, 5. (a) Fu san ede a de prenspari fu sori lobi gi den sma di wi e gi leri? (b) Te wi e gi leri, dan fu san ede a prenspari tu fu abi sabi èn fu de wan bun leriman?

⁴ Fa a de nanga wi? Leki bakaman fu Krestes, wi wani teki na eksempre fu en te a abi fu du nanga a diniwroko fu wi èn nanga a libi fu wi (1 Petr. 2:21). Sobun, wi no e suku nomo fu gi sma leri fu Bijbel, ma wi wani sori den difrenti fasi fu Yehovah tu, spesrutu a lobi fu en. Awansi wi abi furu sabi noso pikinso nomo, awansi wi man gi bun leri noso awansi wi no man du dati, te wi e sori lobi gi sma, dan wi o man naki na ati fu den sma di wi e fruteri a bun nyunsu. Te wi wani abi bun bakapisi na ini a wroko di wi e du fu meki disipel, dan wi musu sori lobi gi den sma di wi e gi leri, neleki fa Yesus ben e du dati.

⁵ A no de fu taki dati te wi wani de bun leriman, dan wi musu abi nofo sabi èn wi musu sabi fa fu gi leri. Yesus ben yepi den disipel fu kon abi sabi èn fu tron bun leriman. Èn na ini a ten disi, Yehovah e gebroiki na organisâsi fu en fu yepi wi fu doro den marki dati. (Leisi Yesaya 54:13; Lukas 12:42.) Ma toku, wi no musu gi leri soso nanga wi frustan, ma wi musu gi leri tu nanga wi ati. Te wi abi sabi, te wi sabi fa fu gi bun leri, èn te wi abi lobi gi sma, dan wi o abi bun bakapisi te wi e gi leri. Na sortu fasi wi kan sori lobi te wi e gi sma leri? Fa Yesus nanga den disipel fu en ben e du dati? Wi sa poti prakseri na a tori dati.

Wi musu lobi Yehovah

6. Fa wi e taki fu wan sma di wi lobi?

⁶ Wi lobi fu taki fu den sani di wi lobi. Te wi e taki fu den sani di wi lobi, dan wi heri fesi èn sosrefi a fasi fa wi e du, e sori taki wi breiti èn taki wi de fayafaya. Dati de so spesrutu te wi e taki fu wan sma di wi lobi. Nofo tron, wi e angri fu fruteri sma san wi sabi fu a sma dati. Wi e prèise a sma dati, wi e lespeki en, èn wi e opo taki gi a sma disi. Wi e du dati fu di wi wani taki tra sma musu kon lobi a sma nanga den fasi fu en, neleki fa wi e du dati.

7. San Yesus ben du fu di a lobi Yehovah?

⁷ Fosi wi kan leri tra sma fu lobi Yehovah, dan wi musu sabi Yehovah, èn wi musu lobi en tu. Te yu e luku en bun, dan wan sma di de na ini a tru anbegi, musu lobi Gado (Mat. 22:36-38). Yesus ben de wan tumusi moi eksempre gi wi te a abi fu du nanga a tori dati. A ben lobi Yehovah nanga en heri ati, nanga en heri frustan, nanga en heri sili èn nanga ala en krakti. Yesus ben sabi en hemel Tata heri bun, fu di a ben de milyardmilyard yari na hemel makandra nanga En. San ben de a bakapisi? Yesus ben taki: „Mi lobi a Tata” (Yoh. 14:31). A lobi dati ben de fu si na ini ala sani di Yesus ben e taki èn ben e du. Fu di a ben abi a lobi disi, meki ala ten a ben e du san Gado feni bun (Yoh. 8:29). A lobi disi ben e gi en deki-ati fu krutu den kerki fesiman di ben taki na wan hoigrifasi taki den ben e teki presi gi Gado. A lobi disi ben gi Yesus deki-ati tu fu taki fu Yehovah èn fu yepi trawan fu kon leri sabi a Gado disi èn fu kon lobi En.

8. San den disipel fu Yesus du fu di den ben lobi Gado?

⁸ Neleki Yesus, den fosi disipel fu en ben lobi Yehovah tu, èn a lobi disi gi den deki-ati fu preiki a bun nyunsu fayafaya èn sondro frede. Na ala sei fu Yerusalem den ben e gi sma leri, èn den ben e du dati aladi den ben e kisi gens fu den makti kerki fesiman. Den disipel no ben man tapu fu taki fu den sani di den ben si èn ben yere (Tori. 4:20; 5:28). Den ben sabi taki Yehovah ben de nanga den èn taki a ben o blesi den. Èn a ben blesi den trutru! Fu taki en leti, sowan 30 yari baka di Yesus dede, na apostel Paulus ben man skrifi taki a bun nyunsu ben preiki „gi ala sma na grontapu”.​—Kol. 1:23.

9. Fa wi kan tranga a lobi di wi abi gi Gado?

⁹ Efu wi wani de bun leriman trutru, dan wi musu du ala san wi man fu tan tranga a lobi di wi abi gi Gado. Fa wi kan du dati? Wi kan du dati te wi abi a gwenti fu taki nanga Gado na ini begi. Wan tra fasi fa wi e tranga a lobi di wi abi gi  Gado, na te wi e leisi den Bijbel publikâsi, èn te wi e go na den Kresten konmakandra. Te wi e kon sabi Gado moro bun, dan na ati fu wi o furu nanga lobi gi en. Èn te wi e taki èn e handri na wan fasi di e sori taki wi lobi Gado, dan trawan o man si dati, èn kande den sa kon lobi Yehovah tu.​—Leisi Psalm 104:33, 34.

Wi musu lobi den sani di wi e leri sma

10. San na wan prenspari fasi di wan bun leriman musu abi?

¹⁰ Wan prenspari fasi di wan bun leriman musu abi, na taki a musu lobi den sani di a e leri sma. A leriman musu bribi taki den sani dati na tru tori, taki den prenspari, èn taki den e tyari wini kon gi sma. Efu wan leriman lobi den sani di a e leri trawan, dan den sma di a e gi leri o man si dati, èn dati sa abi bigi krakti na den tapu. Ma efu wan leriman no abi warderi trutru gi den sani di a e leri sma, dan fa a kan fruwakti taki den studenti fu en sa warderi den sani di den e yere? Na eksempre fu yu leki leriman fu Gado Wortu de prenspari trutru èn a kan abi krakti tapu a studenti fu yu. Yesus ben taki: „Te a sma leri ala sani kaba, dan a o kon de leki a sma di gi en leri.”​—Luk. 6:40, Nyun Testamenti.

11. Fu san ede Yesus ben lobi den sani di a ben e leri sma?

¹¹ Yesus ben lobi den sani di a ben e leri sma. A ben sabi taki a ben abi wan warti sani fu prati nanga trawan. Den sani disi ben de den tru tori fu en hemel Tata, den sani di ’Gado ben taki’, èn den „wortu di e gi sma têgo libi” (Yoh. 3:34; 6:68). Den tru tori di Yesus ben e leri sma ben de leki wan brenki leti, fu di den ben e tyari kon na krin san ogri, èn den ben e sori krin san bun. Den tru tori dati ben e gi howpu nanga trowstu na den sma di ben abi sakafasi. Den falsi kerki leriman ben e wisiwasi den sma disi, èn Didibri ben e kwinsi den (Tori. 10:38). A lobi di Yesus ben abi gi den tru tori fu Gado, no ben de fu si nomo na den sani di a leri sma, ma a ben de fu si tu na ala sani di a ben e du.

12. Fa na apostel Paulus ben e denki fu a bun nyunsu?

¹² Neleki fa Yesus ben lobi den tru tori di a ben e leri sma, na so den disipel fu en ben abi so furu lobi nanga warderi gi den tru tori fu Yehovah èn fu Krestes, taki noti ben kan tapu den fu prati den nanga tra sma. Luku san na apostel Paulus ben skrifi gi den Kresten na ini Rome: „Mi e angri fu preiki a bun nyunsu . . . Bika mi no e syen gi a bun nyunsu; fu taki en leti, disi na a krakti di Gado e gebroiki fu frulusu ala sma di e bribi” (Rom. 1:15, 16). Paulus ben si en leki wan grani fu fruteri trawan den tru tori fu Gado. A ben skrifi: „Gado sori mi a no-frudini bun-ati disi . . . so taki mi kan fruteri den trakondre sma a bun nyunsu di abi fu du nanga a kefalek bigi gudu fu Krestes” (Ef. 3:8). A no de fu taki dati Paulus ben de fayafaya di a ben e leri trawan fu Yehovah èn fu a wani fu En.

13. Sortu reide wi abi fu lobi a bun nyunsu?

¹³ A bun nyunsu di de fu feni na ini Gado Wortu, e yepi wi fu kon leri sabi a Mekiman èn fu kon tron sma di a lobi. A bun nyunsu dati e gi moi piki tapu prenspari aksi fu a libi, a man kenki wi libi, a kan gi wi howpu, èn a kan tranga wi na ini muilek ten. A bun nyunsu e sori wi tu fa wi kan kon abi wan koloku libi di sa de fu têgo. Nowan tra tori warti noso prenspari moro a bun nyunsu. A de wan tumusi warti presenti fu Gado, èn a e gi wi bun furu prisiri. Èn wi sa kisi moro prisiri te wi e prati a presenti dati nanga trawan.​—Tori. 20:35.

14. Fa wi kan kon abi moro lobi gi den sani di wi e leri sma?

¹⁴ San yu kan du fu kon abi moro lobi gi a bun nyunsu? Te yu e leisi Gado Wortu, dan yu musu teki pikinso ten fu poti prakseri na den sani di yu ben leisi. Fu eksempre, pruberi fu si fa yu e wroko makandra nanga Yesus, aladi a e du a diniwroko fu en na grontapu, noso pruberi fu si fa yu e du zendelingwroko makandra nanga na apostel Paulus. Pruberi fu si yusrefi na ini a nyun grontapu, èn prakseri fa a libi o de heri tra fasi. Prakseri den blesi di yu kisi fu di yu e gi yesi na a bun nyunsu. Efu yu tan abi wan tranga lobi gi a bun nyunsu, dan den sma di e kisi leri fu yu, o man si a lobi disi. Dati meki a bun te wi e denki dipi fu den sani di wi leri èn te wi e poti prakseri na den sani di wi e leri sma.​—Leisi 1 Timoteyus 4:15, 16.

 Wi musu lobi sma

15. Fu san ede wan leriman musu lobi en studenti?

¹⁵ Wan bun leriman e meki den studenti fu en firi bun, so taki den de klariklari fu teki leri èn fu taki fa den e denki fu den sani di den e leri. Wan lobi-ati leriman e gi leri fu di a e broko en ede trutru nanga en studenti. Te a e gi leri, dan a e hori a situwâsi fu a studenti na prakseri, èn a e yepi a studenti fu frustan den sani di a e leri en. A e hori na prakseri san den studenti fu en man du, èn san na a situwâsi fu den. Te leriman abi a lobi disi, dan den studenti o man si dati. Èn boiti taki a leriman sa prisiri fu gi a den studenti leri, den studenti o prisiri tu fu kisi leri fu en.

16. Na sortu fasi Yesus sori lobi gi sma?

¹⁶ Yesus ben sori a sortu lobi dati. A moro prenspari fasi fa Yesus ben sori lobi gi libisma, na di a gi en volmaakti libi so taki wi kan kisi frulusu (Yoh. 15:13). Di Yesus ben e du a diniwroko fu en, dan a ben de klariklari fu yepi sma èn fu leri den sani fu en Papa. Yesus no ben e fruwakti taki sma ben musu kon na en fu yere a bun nyunsu. Na presi fu dati, a ben e waka hondrohondro kilometer nanga futu fu fruteri sma a bun nyunsu (Mat. 4:23-25; Luk. 8:1). Yesus ben abi pasensi èn a ben e frustan fa sma ben e firi. Te den disipel fu en ben musu kisi piri-ai, a ben gi den dati na wan lobi-ati fasi (Mark. 9:33-37). A ben gi den deki-ati fu di a taigi den taki a ben abi na overtoigi taki den ben o de bun preikiman fu a bun nyunsu. Nowan leriman oiti ben abi moro lobi leki Yesus. Fu di Yesus ben e sori lobi gi den disipel fu en, meki den kon lobi en tu èn den gi yesi na den komando fu en.​—Leisi Yohanes 14:15.

17. Fa den disipel fu Yesus ben e sori lobi gi trawan?

¹⁷ Neleki Yesus, den disipel fu en ben e sori bigi lobi gi den sma di den ben e fruteri a bun nyunsu. Aladi sma ben frufolgu den èn aladi den ben kan lasi den libi, toku den ben e dini trawan èn toku den ben e fruteri sma a bun nyunsu. Iya, den ben abi trutru lobi gi den sma di ben e gi yesi na a bun nyunsu! Den wortu di na apostel Paulus ben skrifi, moi srefisrefi. A ben skrifi: „Wi ben handri nanga unu na wan switi fasi, neleki te wan mama e gi den pikin fu en bobi èn a e sorgu den. We, fu di wi abi dipi firi gi unu, meki wi ben prisiri trutru fu fruteri unu a bun nyunsu fu Gado; ma a no dati wawan wi du, wi ben gi unu wi eigi libi tu, bika wi ben kon lobi unu srefisrefi.”​—1 Tes. 2:7, 8.

18, 19. (a) Fu san ede wi de klariklari fu gebroiki wi ten, wi krakti, nanga den gudu fu wi, fu du a preikiwroko? (b) Gi wan eksempre di e sori taki sma e si a lobi di wi abi gi trawan.

¹⁸ Na ini a ten disi, Yehovah Kotoigi e preiki tu na heri grontapu fu feni sma di wani kon sabi Gado, so taki den kan dini en. Fu taki en leti, na ini den 17 yari di pasa, wi gebroiki moro leki wán milyard yuru ibri yari fu preiki a bun nyunsu èn fu meki disipel. Èn wi e go doro nanga a wroko dati. Aladi wi musu gebroiki wi ten, wi krakti, nanga den gudu fu wi fu du a wroko disi,  toku wi e du a wroko nanga wi heri ati. Neleki Yesus, wi e frustan taki wi lobi hemel Tata wani taki sma musu kisi a sabi di kan meki den kisi têgo libi (Yoh. 17:3; 1 Tim. 2:3, 4). Te wi abi lobi gi trawan, dan wi o yepi reti-ati sma fu kon leri sabi Yehovah, èn fu kon lobi en soleki fa wi e du dati.

¹⁹ Tra sma e si a lobi di wi abi gi trawan. Fu eksempre, wan pionier sisa di e libi na ini Amerkankondre, e skrifi brifi fu trowstu sma di lasi wan lobiwan na ini dede. Luku san wan man ben skrifi en baka: „Na a bigin mi ben fruwondru taki wan sma ben kan du so furu muiti fu skrifi wan brifi gi wan tra sma di a no sabi srefisrefi, soso fu di a wani yepi a sma dati fu horidoro na ini muilek ten. A musu de so taki yu lobi tra sma èn a Gado di e tiri sma na ini den libi.”

20. O prenspari a de fu sori lobi gi den sma di wi e gi leri?

²⁰ Wan skrifiman ben taki dati te wan sma e meki, noso e du wan sani nanga lobi, dan yu kan fruwakti taki a sani dati sa de wan tumusi bun sani. Te wi e gi studenti leri, dan wi musu yepi den fu frustan o prenspari a de fu kon leri sabi Yehovah èn fu kon lobi en. Iya, te wi wani de bun leriman, dan dri sani de prenspari. Wi musu lobi Gado, wi musu lobi den tru tori fu en, èn wi musu lobi tra sma. Te wi e du muiti fu kon abi a lobi dati, èn te wi e sori a lobi dati gi den sma di wi e miti na ini a diniwroko fu wi, dan wi sa prisiri srefisrefi fu di wi e gi sma sani. Ma wi sa de koloku tu fu di wi sabi taki wi e teki na eksempre fu Yesus, èn taki Yehovah feni wi bun.

San yu ben sa piki?

• Te wi e fruteri trawan a bun nyunsu, dan fu san ede a de prenspari taki wi abi . . .

lobi gi Gado?

lobi gi den sani di wi e leri sma?

lobi gi den sma di wi e gi leri?

[Aksi fu a tori disi]

[Prenki na tapu bladzijde 15]

Fu san ede a fasi fa Yesus ben e gi leri, ben e difrenti fu a fasi fa den leriman fu Wèt èn den Fariseiman ben e gi leri?

[Prenki na tapu bladzijde 18]

Te wi wani de bun leriman, dan wi musu abi sabi, wi musu sabi fa fu gi leri, èn san moro prenspari, wi musu abi lobi