Amwiiye Jesu Kwiinda Mukuyiisya Munzila Yaluyando

“Takunabede muntu uuamba bobuya.”—JOH. 7:46.

1. Ino mbuti bantu mbobakacita nobakamvwa mbwaakali kuyiisya Jesu?

KAMUYEEYA buyo mbocakali kunoneezya kumvwa naakali kuyiisya Jesu. Mu Bbaibbele tubala mbwaakabajatikizya bantu mbaakali kuyiisya. Mucikozyanyo, mulembi wa Makani Mabotu Luka waamba kuti bantu baku Nazareta “ba[ka]gambwa kumajwi aaluzyalo aazwa kumulomo wakwe.” Matayo waamba kuti bantu ibakali kumuswiilila Jesu naakali kuyiisya mu Mulumbe waa Cilundu “[b]akakankamana kukwiisya kwakwe.” Awalo Johane waamba kuti bamapulisa ibakatumidwe kuya kumujata Jesu bakapiluka cinkwamaanza, kabati: “Takunabede muntu uuamba bobuya.”—Lk. 4:22; Mt. 7:28; Joh. 7:46.

2. Ino ninzila nzi zyakuyiisya nzyaakabelesya Jesu?

² Bamapulisa aaba bakaliluzi. Cakutadooneka, Jesu wakali Mwiiyi mupati kwiinda iwakaponede. Wakali kuyiisya munzila iimvwika alimwi kunyina wakali kukonzya kukazya nzila mbwaakali kuyiisya. Wakali kubelesya zikozyanyo amibuzyo munzila iili kabotu. Wakali kucinca-cinca mubandi wakwe kubantu mbaakali kuyiisya kweelana abukkale bwabo. Nokuba kuti makani ngaakabayiisya akali mapati, pesi wakaayiisya munzila ngubauba. Nokuba boobo, eezyi tazili nzezyintu zilikke izyakapa kuti Jesu abe Mwiiyi mupati.

Bube Bupati Nduyando

3. Mbuli mwiiyi, ino Jesu wakaindene buti abasololi babukombi bamumazuba ngaakali kupona anyika?

³ Akati kabalembi aba Falisi, kulangilwa kuti kwakali bantu basongo ibakajisi luzyibo mukuyiisya. Ino ncinzi cakapa kuti kuyiisya kwa Jesu kwiindane akwabantu aaba? Basololi babukombi bamumazuba aayo tiibakali kubayanda bantu buyo. Muciindi caboobo, bakali kubasampaula akwaamba kuti ‘baloombwezedwe’ naa kusinganizyigwa. (Joh. 7:49) Mukwiimpana, Jesu “wakabafwida luzyalo, nkaambo kakuti bakalikatede akumwaika mbuli imbelele zitakwe mweembezi.” (Mt. 9:36) Wakali kusangaalizya, wakali alubomba abuuya. Kuyungizya waawo, basololi babukombi tiibakali kumuyanda Leza. (Joh. 5:42) Pele Jesu wakali kubayanda Bausyi alimwi wakali kuyanda kucita kuyanda kwabo. Basololi babukombi bakali kwaacinca “makani aa-Leza” akaambo kakuyanda kulikkomanisya lwabo beni, pele Jesu wakali kwaayanda—wakali  kwaayiisya, kwaapandulula, kwaakwabilila, alimwi wakapona kweelana anzyaakali kuyiisya. (Lk. 11:28) Masimpe, Kristo wakali siluyando. Luyando lwakwe lwakali kulibonya muzyintu nzyaakali kuyiisya, mbwaakali kweendelezya bantu alimwi ambwaakali kubalailila.

4, 5. (a) Ino nkaambo nzi ncociyandika kuyiisya caluyando? (b) Ino nkaambo nzi alwalo luzyibo ncoluyandika mukuyiisya?

⁴ Ino mbuti kuli ndiswe? Mbotuli basikutobela Kristo, tuyanda kwiiya mbwaakacita notukambauka alimwi anotucita zyintu mubuumi bwesu. (1 Pet. 2:21) Aboobo, makanze eesu taali buyo aakuyiisya bantu luzyibo lwamu Bbaibbele, pele alimwi tuyanda kutondezya bube bwa Jehova, ikapati luyando. Kufumbwa naa tujisi luzyibo lunji naa pe, tulicizyi kuyiisya kabotu naa pe, luyando ndotujisi luya kutugwasya kubasika amyoyo bantu mbotukambaukila. Kutegwa tuzwidilile mumulimo wesu wakugwasya bantu kuba basikwiiya, tweelede kwiiya Jesu kwiinda mukuyiisya caluyando.

⁵ Masimpe ngakuti, kutegwa tube bamayi babotu, tweelede kuzizyiba kabotu zyintu nzyotuyiisya alimwi akuba aluzyibo mukuyiisya. Jesu wakabagwasya basikwiiya bakwe kuba aluzyibo oolu, awalo Jehova, kwiinda mumbunga yakwe ulatugwasya mbubwenya. (Amubale Isaya 54:13; Luka 12:42.) Nokuba boobo, taluli luzyibo lulikke luyandika mukuyiisya, pele alimwi tweelede kubayanda bantu mbotuyiisya. Ikuti katuzizyi nzyotuyiisya, katuli aluzyibo mukuyiisya alimwi aluyando, tulakonzya kuba bamayi babotu. Aboobo, ino muunzila nzi motukonzya kutondezya luyando ciindi notuyiisya? Ino mbuti Jesu abasikwiiya bakwe mbobakacita boobu? Atulange-lange.

Tweelede Kumuyanda Jehova

6. Ino mbuti mbotwaamba kujatikizya muntu ngotuyanda?

⁶ Tulakkomana kwaamba zyintu nzyotuyanda. Ciindi notwaamba cintu ncotuyandisya, bantu balakonzya kubona kuti tulikkomene. Eeci cilacitika ikapati notwaamba muntu ngotuyanda. Kanji-kanji, tulayandisya kwaambila bamwi zyintu nzyotuzyi kujatikizya muntu ooyu. Tulamulumbaizya, kumulemeka alimwi akumucingilila. Tulacita oobu akaambo kakuyanda kuti bantu bambi abalo bamuyande.

7. Ino luyando ndwaakajisi Jesu kuli Leza lwakamupa kucita nzi?

⁷ Katutanagwasya bantu bambi kuti bamuyande Jehova, tweelede kusaanguna kumuzyiba alimwi akumuyanda. Kayi bukombi bwakasimpe buyeeme akuyanda Leza. (Mt. 22:36-38) Jesu wakapa cikozyanyo cibotu kapati. Wakamuyanda Jehova amoyo wakwe woonse, mizeezo yakwe yoonse, buumi bwakwe boonse alimwi anguzu zyakwe zyoonse. Akaambo kakuti wakakkala a Bausyi kujulu kwamyaka minji kapati, Jesu wakabazyiba kabotu. Ino eeci cakamupa kucita buti? Jesu wakaamba kuti: “Ndamuyanda Taata.” (Joh. 14:31) Luyando oolu lwakalibonya muzyintu zyoonse Jesu nzyaakaamba akucita. Lwakamupa kuti ciindi coonse kacita zyintu zimukkomanisya Leza. (Joh. 8:29) Eeci cakamupa kubasinsa basololi babukombi basikuupaupa ameso ibakali kwaamba kuti baiminina Leza. Alimwi cakamupa kuyiisya bantu kuti bamuzyibe Jehova akumuyanda.

8. Ino luyando ndobakajisi basikwiiya ba Jesu lwakabapa kucita nzi?

⁸ Mbubwenya mbuli Jesu, basikwiiya bakwe bamumwaanda wamyaka wakusaanguna bakali kumuyanda Jehova, eeci cakabapa kukambauka makani mabotu cabusicamba alimwi abusungu. Nokuba kuti basololi babukombi bakali kubakazya, bakakambauka mu Jerusalemu yoonse. Basikwiiya tiibakaleka kwaamba zyintu nzyobakabona alimwi akumvwa. (Inc. 4:20; 5:28) Bakalizyi kuti Jehova wakali ambabo akuti uyoobalongezya—alimwi wakabalongezya ncobeni. Mpoonya nokwakainda myaka iitandila ku 30 kuzwa Jesu naakafwa, mwaapostolo Paulo wakakonzya kwaamba kuti makani mabotu “akakambaukilwa bantu boonse baansi ano.”—Kol. 1:23.

9. Ino mbuti mbotukonzya kumuyanda kapati Leza?

⁹ Ikuti katuyanda kuba bamayi bayiisya kabotu, andiswe tweelede kubona kuti twazumanana kumuyanda Leza. Ino mbuti mbotukonzya kucita  boobo? Tulakonzya kucita oobo kwiinda mukupaila kuli nguwe lyoonse. Alimwi ikubala Jwi lyakwe, mabbuku aamba zyamu Bbaibbele alimwi akujanika kumiswaangano ya Bunakristo akwalo kulakonzya kutugwasya kuzumanana kumuyanda. Ikuti naa twamuzyiba kabotu Leza tulatalika kumuyanda kapati. Mpoonya, mbotwaambaula ambotucita zyintu tulatondezya kuti tulamuyanda Leza, abalo bantu bambi batubona balakonzya kukulwaizyigwa kumuyanda Jehova.—Amubale Intembauzyo 104:33, 34.

Tweelede Kuziyanda Zyintu Nzyotuyiisya

10. Ino ncinzi icipa muntu kuba mwiiyi mubotu?

¹⁰ Cintu cipa kuti muntu kali mwiiyi mubotu nkuziyanda zyintu nzyayiisya. Weelede kusyoma kuti nzyamasimpe, zilagwasya alimwi zilayandika kapati. Ikuti mwiiyi kabikkila maano kuzyintu nzyayiisya, ulalibonya kusungwaala, alimwi ulabakulwaizya aabo mbayiisya. Kulubazu lumwi, ikuti mwiiyi katazibikkili maano zyintu nzyayiisya, ino basikwiiya inga bazibikkila buti maano zyintu nzyobaiya? Ncomucita nomuyiisya Jwi lya Leza cilakonzya kumujatikizya ngomuyiisya. Jesu wakati: “Sikwiiya . . . amanizya kwiiya, awalo ulaba mbuli wakamwiisya.”—Lk. 6:40, BT.

11. Ino nkaambo nzi Jesu ncaakali kuziyanda zyintu nzyaakali kuyiisya?

¹¹ Jesu wakali kuziyanda zyintu nzyaakali kuyiisya. Wakalizyi kuti wakajisi cintu ciyandika kapati ncaakali kuyandika kwaambila bantu—kasimpe kajatikizya Bausyi bakujulu, “majwi aa-Leza” “[a]majwi aabuumi ubutamani.” (Joh. 3:34; 6:68) Mbuli mumuni uumweka, kasimpe nkaakayiisya Jesu kakayubununa zyintu zibi alimwi akutondezya zyintu zibotu. Kakapa bulangizi aluumbulizyo kubantu ibalibombya balo ibakali kweenwa abasololi babukombi alimwi akudyaamininwa a Diabolosi. (Inc. 10:38) Luyando ndwaakajisi Jesu kukasimpe lulalibonya kutali buyo muzyintu nzyaakali kuyiisya, pele amuzyintu nzyaakali kucita.

12. Ino mbuti mwaapostolo Paulo mbwaakalimvwa kujatikizya makani mabotu?

¹² Mbubwenya mbuli Jesu, basikwiiya bakwe bakali kukayanda kapati kasimpe kajatikizya Jehova a Kristo cakuti basikukazya tiibakakonzya kubakasya kwaambila bambi. Paulo wakalembela Banakristonyina baku Roma kuti: “Ndayandisya kumukambaukila Makani Mabotu . . . Nkaambo nsiusi insoni ku-Makani Mabotu aa-Kristo pe, nkaambo ninguzu zya-Leza zyakufutula boonse basyoma.” (Rom. 1:15, 16) Paulo wakacibona kuba coolwe cipati kukambauka kasimpe. Wakalemba kuti: “Ndakapegwa olu luzyalo, kuti nkakambauke akati kabamasi buvubi butaambiki bwa-Kristo.” (Ef. 3:8) Tacikatazyi kweezyeezya Paulo mbwaakali kukayandisya kasimpe naakali kuyiisya bambi kujatikizya Jehova alimwi amakanze aakwe.

13. Ino ntwaambo nzi tupa kuti katwaayanda makani mabotu?

¹³ Makani mabotu aali mu Jwi lya Leza alatugwasya kuzyiba Mulengi alimwi akuba acilongwe anguwe. Makani mabotu aaya alatugwasya kujana bwiinguzi kumibuzyo iiyandika kapati mubuumi alimwi alijisi nguzu zyakucinca bube bwesu, atupa bulangizi akutuyumya ciindi camapenzi. Kuyungizya waawo, atusololela kubuumi bubotu ibutamani. Taakwe luzyibo luli loonse luyandika kapati kwiinda makani mabotu. Ncipego ciyandika kapati ncotwakapegwa, icitupa kukkomana kapati. Alimwi tulakkomana kapati ciindi notwaambila bambi kujatikizya cipego eeci.—Inc. 20:35.

14. Ino mbuti mbotukonzya kuzumanana kuziyanda zyintu nzyotuyiisya?

¹⁴ Ino ncinzi ncomukonzya kucita kutegwa muzumanane kwaayanda makani mabotu? Ciindi nomubala Jwi lya Leza, amuzinzibale kuyeeya kujatikizya nzyomubala. Mucikozyanyo, amweezyeezye kuti mulabeleka a Jesu mumulimo wakwe waanyika naa kuti mubeleka antoomwe amwaapostolo Paulo. Amweezyeezye kuti muli munyika mpya, akubona buumi mbobwiindene kapati ambomupona mazuba aano. Amuzinzibale kuyeeya zilongezyo nzyomujisi akaambo kakutobela makani mabotu. Ikuti mwazumanana kwaayanda makani mabotu, aabo mbomuyiisya bayoolubona luyando oolu. Aboobo, kuli twaambo tubotu ncotweelede kuzinzibala kuyeeya zyintu nzyotwakaiya  akubikkila maano kuzyintu nzyotuyiisya.—Amubale 1 Timoteo 4:15, 16.

Tweelede Kubayanda Bantu

15. Ino nkaambo nzi mwiiyi ncayelede kubayanda bantu mbayiisya?

¹⁵ Mwiiyi mubotu upa kuti basikwiiya bakwe bazikkomanine zyintu nzyayiisya kutegwa lyoonse kabayanda kwiiya alimwi akutola lubazu. Uyiisya kabotu akaambo kakuti ulababikkila kapati maano bantu mbayiisya. Ulacinca-cinca nzila yakuyiisya kweelana anzyobayandika alimwi aluzyibo ndobajisi basikwiiya bakwe. Ulabikkila maano kubukkale bwabo akuzyiba zyintu nzyobakonzya kucita. Ikuti bamayi kababayanda boobu, mbobayiisya balazyiba alimwi eeci cipa kuti kuyiisya akwiiya kakukkomanisya.

16. Ino muunzila nzi Jesu mwaakatondezya luyando kubantu?

¹⁶ Jesu wakatondezya luyando luli boobu. Citondezyo cipati caluyando lwakwe ncakulyaaba akutuula buumi bwakwe bulondokede kutegwa tukonzye kufwutulwa. (Joh. 15:13) Ciindi naakali mumulimo wakwe waanyika, Jesu wakalilibambilide lyoonse kugwasya bantu alimwi akubayiisya kujatikizya Bausyi. Muciindi cakulindila kuti bantu baboole kuli nguwe, wakali kweenda amaulu misinzo milamfwu kapati kutegwa abakambaukile makani mabotu. (Mt. 4:23-25; Lk. 8:1) Wakali kubakkazikila moyo alimwi akumvwisya kulezya kwabo. Ciindi basikwiiya bakwe nobakali kuyandika lulayo, wakabalaya munzila yaluyando. (Mk. 9:33-37) Wakabakulwaizya kwiinda mukutondezya lusyomo muli mbabo lwakuti bayooba bakambausi bamakani mabotu bacita kabotu. Taakwe muntu uuli woonse iwakali mwiiyi siluyando mbuli mbwaakabede Jesu. Luyando ndwaakatondezya basikwiiya bakwe lwakabakulwaizya kumuyanda awalo alimwi akubamba milazyo yakwe.—Amubale Johane 14:15.

17. Ino mbuti basikwiiya ba Jesu mbobakatondezya luyando kubantu?

¹⁷ Mbubwenya mbuli Jesu, basikwiiya bakwe bakali kubayanda kapati bantu mbobakali kukambaukila. Kabaliyumya mumasukusyo akulibikka muntenda, bakazwidilila mukukambaukila bantu makani mabotu. Elo kaka bakali kubayanda bantu mbobakagwasya kwiiya kasimpe! Masimpe, imajwi aamwaapostolo Paulo atondezya mbwaakali kulimvwa naakalemba kuti: “Twakaba batete myoyo akati kanu, mbuli uunyonsya mbwabukata bana bakwe mwini. Lino mbuli mbotwakali kumusukamina, cintu ncitwakali kuyanda kumwaambila kaciteensi Makani aa-Leza luzutu pele amyoyo yesu tubeni, nkaambo mwakali bayandwi besu.”—1 Tes. 2:7, 8.

18, 19. (a) Ino nkaambo nzi ncotulyaaba mumulimo wakukambauka? (b) Amupe cikozyanyo citondezya kuti bantu balaibona milimo yesu yaluyando.

¹⁸ Mbubwenya buyo amazuba aano, Bakamboni ba Jehova balakambauka munyika yoonse ikuyandaula bantu ibayanda kumuzyiba Leza akumubelekela. Mubwini, mumyaka iili 17 yainda, tubeleka mawoola aainda kucuulu catuulunzuma  amwaka mumulimo wakukambauka akugwasya bantu kuba basikwiiya—alimwi tulazumanana mumulimo ngomunya ooyu. Tulacita oobu cakuliyandila, nokuba kuti mulimo wakukambauka uyandika kubelesya ciindi, nguzu alimwi alubono lwesu. Mbuli Jesu, tulizyi kuti Taateesu wakujulu siluyando uyanda kuti bantu babe aluzyibo ilusololela kubuumi butamani. (Joh. 17:3; 1 Tim. 2:3, 4) Luyando lutupa kugwasya babombe myoyo kuti abalo bamuzyibe Jehova alimwi akumuyanda.

¹⁹ Bantu balabona ikuti tulabayanda. Mucikozyanyo, mucizyi imupainiya kucisi ca United States ulalemba magwalo kuumbulizya bantu ibakafwidwa bayandwa babo. Mukwiingula lugwalo lwakwe, mwaalumi umwi wakalemba kuti: “Ndakasaanguna kugambwa kuti muntu umwi inga walemba lugwalo kumuntu ngobatazyibene limwi, ikumugwasya nali mumakatazyo. Ncondikonzya kwaamba ncakuti mulabayanda bantunyoko a Leza uubasololela munzila yabuumi.”

20. Ino kuyiisya caluyando kuyandika buti?

²⁰ Mwaalumi umwi wakaamba kuti, ikuti naa luyando aluzyibo mwazibelesya kabotu, zilakonzya kumugwasya kapati. Notuyiisya, tulasoleka kubagwasya bantu kuti bamuzyibe Jehova alimwi akumuyanda kapati. Masimpe, ikutegwa tube bamayi bacibwene, tuyandika kumuyanda Leza, kukayanda kasimpe abantu. Ikuti twaba aluyando luli boobu akulutondezya mumulimo wesu wakukambauka, tulakkomana akukkutila akaambo kakuzyiba kuti twiiya nzyaakacita Jesu akukkomanisya Jehova.

Ino Inga Mwaingula Buti?

•Ciindi notuyiisya bantu makani mabotu, ino nkaambo nzi ncociyandika kapati . . .

kumuyanda Leza?

kuziyanda zyintu nzotuyiisya?

kubayanda bantu mbotuyiisya?

[Mibuzyo yaciiyo]

[Cifwanikiso icili apeeji 15]

Ino ncinzi cakapa kuti kuyiisya kwa Jesu kwiindane akwabalembi aba Falisi?

[Cifwanikiso icili apeeji 18]

Kuba mwiiyi mubotu, muntu weelede kuzizyiba nzyayiisya, kuba aluzyibo mukuyiisya alimwi kwiinda zyoonse, kuba aluyando