Rọ Aruọwha Ta Usiuwoma Wọhọ Epanọ Jesu O ru
Rọ Aruọwha Ta Usiuwoma Wọhọ Epanọ Jesu O ru
‘Ma gbaudu nọ ma rọ ta usiuwoma kẹ owhai.’—1 TẸS. 2:2.
1. Fikieme emamọ usi Uvie na u ro siuru gaga?
O RẸ were gaga re a yo emamọ usi. Yọ usi nọ o mai woma kpobi họ emamọ usi Uvie Ọghẹnẹ. Emamọ usi nana o kẹ omai imuẹro inọ uye-oruẹ, ẹyao, edada, uweri, gbe uwhu i bi ti kuhọ. U ru uzuazọ ebẹdẹ bẹdẹ lọhọ, o fere ẹjiroro Ọghẹnẹ via, u te je dhesẹ kẹ omai epanọ ma re ro wo emamọ usu kugbe Ọghẹnẹ. Whọ rẹ sai roro nnọ eva e hae were ohwo kpobi nọ o yo emamọ usi nọ Jesu o je whowho na. Rekọ u yoma gaga inọ orọnikọ ahwo kpobi a jẹ ovuẹ riẹ rehọ họ.
2. Eme họ otofa eme ọ Jesu na, inọ: ‘Mẹ nyaze ti fi ohẹriẹ họ’?
2 Jesu ọ ta kẹ ilele riẹ nọ: “Wha roro nọ me ti fi udhedhẹ họ akpọ họ; [mẹ] ze ti fi udhedhẹ họ họ, rekọ ọpia. Mẹ nyaze ti fi ohwo avọ ọsẹ riẹ họ oma ohẹriẹ, ọmọtẹ avọ oni riẹ, oviaye avọ oniọrọo riẹ; ahwo uwou obọ ohwo a rẹ te jọ ewegrẹ riẹ.” (Mat. 10:34-36) Ukpenọ a rẹ jẹ emamọ usi na rehọ, ahwo buobu a se riẹ. Ahwo jọ a mukpahe enọ i je whowho usi na, makọ imoni rai dede.
3. Eme ma gwọlọ re ma sae ruabọhọ ẹta usiuwoma na?
3 Ovuẹ ọvo nọ Jesu o whowho na oye ma bi whowho nẹnẹ re, yọ ahwo buobu nọ a bi yo ovuẹ mai a be se iẹe wọhọ epanọ ibuobu a se orọ Jesu. Nọ oware nọ ma rẹro riẹ. Jesu ọ ta kẹ ilele riẹ nọ: “Odibo ọrẹ ro vi Olori riẹ hẹ. Re a te kpokpo mẹ, a re kpokpo owhai re.” (Jọn 15:20) Evaọ ekwotọ buobu, a bi kpokpo omai hi, rekọ ma be nyaku ahwo nọ e be rọ omai jijehwẹ jẹ se ovuẹ mai. Fiki onana, ma gwọlọ ẹrọwọ gbe udu re ma sae rọ aruọwha ruabọhọ ewhowho emamọ usi na.—Se 2 Pita 1:5-8.
4. Fikieme o rọ gwọlọ nọ Pọl o re wo aruọwha evaọ ẹta usiuwoma na?
4 O sae jọ nọ o be hae jọ bẹbẹ kẹ owhẹ ẹsejọ re whọ ta usiuwoma, hayo abọjọ usiuwoma ota na o be hae lẹliẹ udu bru owhẹ. Otẹrọ ere, who roro nọ whẹ ọvo onana o be via kẹ hẹ. Pọl ukọ na ọ jọ ọtausiuwoma aruọwha ọnọ ọ riẹ Ikereakere na ziezi, rekọ o jọ bẹbẹ kẹe ẹsejọ re ọ ta usiuwoma. O kere se Ileleikristi obọ Tẹsalonika nọ: “Dede nọ ma make ruẹ uye gaga, a te je ru omai omavo eva obọ Filipai, wọhọ epanọ wha riẹ re, ma wo udu eva Ọghẹnẹ mai no ma re ro dhesẹ usiuwoma Ọghẹnẹ kẹ owhai eva evie ẹbẹbẹ na ghele.” (1 Tẹs. 2:2) A jọ obọ Filipai rọ ekpọ fa Pọl avọ Sailas ogbẹnya riẹ, a te fi ai họ ekarọ evaọ uwou-odi. (Iruẹru 16:16-24) Ghele na, Pọl avọ Sailas a gbaudu ruabọhọ ẹta usiuwoma na. Ẹvẹ ma rẹ sai ro ru epọvo na? Re ma ruẹ uyo na, joma ta ẹme kpahe oware nọ u fi obọ họ kẹ idibo Ọghẹnẹ erọ oke anwae nọ a jẹ rọ rehọ aruọwha ta usiuwoma kpahe Jihova, ma vẹ jẹ te ta kpahe epanọ ma rẹ rọ raro kele oriruo rai.
A rọ Udu Dhe Ewegrẹ avọ Aruọwha
5. Fikieme idibo Jihova a rọ gwọlọ aruọwha?
5 Jesu Kristi họ ohwo nọ ọ mai wo aruọwha. Ghele na, no emuhọ ahwo-akpọ ze a rọ gwọlọ aruọwha mi idibo Jihova. Fikieme? Nọ Adamu avọ Ivi a raha uzi no evaọ Idẹn, Jihova ọ tẹ ruẹaro nnọ egrẹ ọ te jọ udevie enọ e be gọ Ọghẹnẹ avọ enọ e be gọ Setan. (Emu. 3:15) Egrẹ nana o nwani dhesẹ oma via okenọ Keni o kpe Ebẹle, ọzae nọ o kiẹrẹe. Uwhremu na, ewegrẹ a te mukpahe Enọk, ọzae okiẹrẹe ọfa ọnọ ọ rria taure Ẹvo na o te ti ku. Ọ ruẹaro inọ Ọghẹnẹ ọ te tha avọ ikọ-odhiwu ibuobu riẹ, a vẹ te raha ahwo muomu. (Jud 14, 15) Ovuẹ nana yọ ovuẹ nọ ahwo a gwọlọ yo ho. Ahwo a mukpahe Enọk, yọ Jihova ọ gbẹ rehọ uzuazọ riẹ hẹ a hai ti kpei no. Enọk o gine wo aruọwha.—Emu. 5:21-24.
6. Fikieme Mosis ọ rọ gwọlọ aruọwha okenọ ọ jẹ ta ẹme kẹ Fẹro?
6 Je roro kpahe udu nọ Mosis o wo okenọ ọ ta ẹme kẹ Fẹro, osu nọ ahwo a rri wọhọ ọghẹnẹ, ọmọ ọghẹnẹ ọre nọ a re se Ra. O sae jọ nọ ọ jẹ gọ ẹmema nọ a rehọ uwoho obọ riẹ ru, wọhọ epanọ Fẹro efa a jẹ hai ru. Ẹme nọ Fẹro ọ ta kpobi oye ahwo a re ru. Fẹro nọ ọ jọ osu ologbo, ọnọ ọ vọ avọ omoya jẹ rrọ uzou gaga, ohwo ọvo ọ rẹ ta oware nọ o re ru kẹe he. Nọ ohwo nọ Mosis, othuru-igodẹ gheghe, ọ nya bru unuẹse buobu, yọ orọnikọ a zizie ei hi, yọ a tubẹ gwọlọ rọ ẹro rue riẹ hẹ. Kọ eme Mosis ọ ta kẹe? Iye nọ e te wha ọraha ze. Kọ eme ọ gwọlọ mi Fẹro? Inọ o siobọno irigbo riẹ nọ i bu te ima buobu! Kọ Mosis ọ gwọlọ aruọwha? Avro ọ riẹ hẹ!—Ik. 12:3; Hib. 11:27.
7, 8. (a) Didi edawọ i te idibo Ọghẹnẹ erọ oke anwae? (b) Eme u fi obọ họ kẹ idibo Ọghẹnẹ yena rọ aruọwha kru egagọ uzẹme ga?
7 No anwọ oke yena ze, eruẹaro gbe uvi idibo Ọghẹnẹ efa a rọ aruọwha dadamu kẹ egagọ uzẹme no. Akpọ Setan o gboja kẹ ai no. Pọl ọ ta nọ: “A rọ itho fi e jọ, a bẹre e jọ ewẹe ivẹ, a rọ epia kpe e jọ; a rehọ eviẹ igodẹ gbe ewe bi zuo nya, iyogbere, a kẹ rai uye, ruai yoyoma.” (Hib. 11:37) Eme o fi obọ họ kẹ idibo Ọghẹnẹ yena kru ẹgbakiete rai? Taure o te ti kere eme nana, Pọl ọ kake fodẹ oware nọ o kẹ Ebẹle, Abraham, Sera, gbe amọfa ẹgba thihakọ. Ọ ta nọ: “O nọ a ya eya riẹ [na] u te rai obọ họ, rekọ [evaọ ẹrọwọ] a jọ eva ugbo kpararo ruẹe a je dedie.” (Hib. 11:13) Ababọ avro, eruẹaro wọhọ Elaeja, Jerimaya, gbe idibo Ọghẹnẹ efa enọ e jọ akpọ taure Jesu ọ tẹ te ze a kru egagọ uzẹme ga a te je thihakọ fiki imuẹro nọ a wo inọ eyaa Jihova i ti rugba.—Tait. 1:2.
8 Idibo Ọghẹnẹ erọ oke yena a je rẹro eghale nọ a ti wo evaọ obaro. Nọ a tẹ kparoma ze no, Kristi Jesu avọ ibe-izerẹ riẹ nọ i bu te 144,000 a ti fi obọ họ kẹ ai te ẹgbagba je “no igbo egbogbo.” (Rom 8:21) Ofariẹ, Jerimaya avọ idibo Ọghẹnẹ efa enọ i wo aruọwha a kru udu ga fiki ọkpọ eyaa nọ Jihova ọ ya kẹ Jerimaya na: “A reti lele owhẹ họre; rekọ a rẹte kpare-obọ vi owhẹ hẹ, keme mẹ avọ owhẹ a gbẹrọ, mẹ rẹ te thọ owhẹ, ere ỌNOWO na ọ tae.” (Jeri. 1:19) Nẹnẹ, nọ ma te roro kpahe eghale nọ Ọghẹnẹ ọ ya eyaa rai kẹ omai gbe imuẹro riẹ inọ ọ te thọ omai evaọ abọ-ẹzi, ma re kru udu ga.—Itẹ 2:7; se 2 Ahwo Kọrint 4:17, 18.
Uyoyou O Wọ Jesu Rọ Aruọwha Ta Usiuwoma
9, 10. Ẹvẹ Jesu o ro dhesẹ aruọwha evaọ okenọ ọ jọ aro (a) isu egagọ na, (b) elakpa, (c) ozerẹ okpehru na, (d) Pailet?
9 Oriwiruo mai, Jesu, o dhesẹ aruọwha evaọ idhere sa-sa. Wọhọ oriruo, dede nọ enọ e jọ ọkwa a mukpahe Jesu, ọ ta ẹme nọ Ọghẹnẹ ọ gwọlọ inọ ahwo na a re yo kẹ ai o tẹ make rọnọ eme na e te were ai ezọ họ. Ọ rehọ ababọ ozodhẹ fere eviẹhọ gbe iwuhrẹ erue erọ isu egagọ na via. Ọghẹnẹ o brukpe ahwo nana no, yọ Jesu ọ rọ aruọwha ta onana kẹ ai. Jesu ọ ta kẹ ai ẹdẹjọ nọ: “O da omẹ kẹ owhai hrọ, whai otu ikere-obe gbe Farisi, eviẹwẹ na. Keme wha wọhọ iki nọ a ralọ fuafo nọ ehru rai i re wowoma, rekọ o bọ eva rai evọ avọ igbenhwa ahwo owhuowhu gbe egbegbe kpobi. Whaọ ere wha rọ, wha bi dhesẹ oma rai rọ ahwo okiẹrẹe, rekọ eva rai e vọ avọ [eviẹhọ] gbe umuomu.”—Mat. 23:27, 28.
10 Okenọ elakpa a nyaze ti mu ei evaọ ọgbọ Getsemane, Jesu ọ rọ aruọwha dhesẹ oma riẹ kẹ ai. (Jọn 18:3-8) Uwhremu na, a tẹ rehọ iẹe kpohọ Sanhẹdrin rai, ozerẹ okpehru na ọ tẹ jẹ nọe enọ. Dede nọ ọ riẹ inọ ozerẹ okpehru na ọ be gwọlọ edhere nọ o re ro kpei, avọ aruọwha Jesu ọ ta kẹe inọ ọye omariẹ họ Kristi na, Ọmọ Ọghẹnẹ. O te fibae inọ a te rue riẹ nọ ọ “keria obọze Ogaga, nọ ọ rẹ te tha avọ igho ehru.” (Mak 14:53, 57-65) U kri hi, a tẹ rọ Jesu bru Pailet, ọnọ ọ hai siobọnoi. Rekọ okenọ a jẹ ta eme iyoma kpahe iẹe, Jesu ọ kpunu hu. (Mak 15:1-5) Onana kpobi o gwọlọ aruọwha.
11. Ẹvẹ aruọwha o ro wo obọ kugbe uyoyou?
11 Jesu ọ ta kẹ Pailet nọ: “Fiki onana a je yẹ omẹ, fiki onana mẹ jẹ ze evaọ akpọ na, re me se isẹi kẹ uzẹme.” (Jọn 18:37) Jihova o vi Jesu inọ o whowho emamọ usi na, yọ Jesu ọ rọ evawere ru ere keme o you Ọsẹ obọ odhiwu riẹ. (Luk 4:18, 19) Jesu o you ahwo re. Ọ riẹ inọ eware e re rai oma gaga. Epọvo na re, fikinọ ma you Ọghẹnẹ je you erivẹ mai, oye jabọ ma be rọ rehọ aruọwha ta usiuwoma na.—Mat. 22:36-40.
Ẹzi Ọfuafo Ọ rẹ Kẹ Omai Ẹgba Ta Usiuwoma avọ Aruọwha
12. Eme o wha evawere se ilele na?
12 Nọ Jesu o whu no, eva e jẹ were ilele riẹ keme Jihova o ru rai wo ẹvi. Evaọ ẹdẹ ọvo, evaọ usu ahwo Ju gbe enọ i kurẹriẹ ruọ egagọ Ju nọ e ziọ Jerusalẹm kẹ ehaa Pẹntikọst na, ahwo idu esa (3,000) e họ-ame! Ma riẹ nnọ usi yena u do ruọ ẹwho na soso. Ebaibol e ta nọ: “Ozọ u tezi mu ahwo kpobi; ikọ na a tẹ rọ eware igbunu avọ eka buobu eruo.”—Iruẹru 2:41, 43.
13. Fikieme inievo na a rọ lẹ kẹ aruọwha, kọ eme o no rie ze?
13 Avọ evedha, isu egagọ na a te mu Pita avọ Jọn, a te fi ai họ uwou-odi aso hẹrioke, a tẹ kpokpa họ ai obọ inọ a gbẹ rọ odẹ Jesu ta ẹme he. Nọ a siobọno ai no, a tẹ ta oware nọ o via kẹ inievo na, aikpobi a tẹ lẹ kpahe uye nọ u bi te ai na, inọ: “Ọnowo . . . ru kẹ idibo ra re a wo aruọwha nọ a rẹ rọ ta ẹme ra.” Eme o no rie ze? “Ẹzi Ẹri ọ tẹ ze vọ ai kpobi oma, a jẹ rọ aruọwha ta ẹme Ọghẹnẹ.”—Iruẹru 4:24-31.
14. Ẹvẹ ẹzi ọfuafo na o bi ro fi obọ họ kẹ omai evaọ usiuwoma ota?
14 Muẹrohọ inọ ẹzi ọfuafo Jihova oye u fi obọ họ kẹ ilele na ta ẹme Ọghẹnẹ avọ aruọwha. Orọnikọ ẹgba obọ mai ma be rọ rehọ aruọwha ta usiuwoma kẹ amọfa ha, makọ kẹ enọ e be wọso ovuẹ mai. Jihova ọ rẹ kẹ omai ẹzi ọfuafo riẹ otẹrọnọ ma yare riẹ. Wọhọ epanọ Jihova o fi obọ họ kẹ ilele Jesu na, o ti fi obọ họ kẹ omai rọ aruọwha ta usiuwoma na ghelọ ọwọsuọ.—Se Olezi 138:3.
Ileleikristi Nẹnẹ A be Ta Usiuwoma Avọ Aruọwha
15. Ẹvẹ usiuwoma na o be rọ hẹriẹ ahwo nẹnẹ?
15 Wọhọ epanọ o jọ evaọ oke ilele Jesu na, usiuwoma na o gbẹ be hẹriẹ ahwo. Ahwo jọ a rẹ jẹe rehọ ziezi, iruo mai i bi tu amọfa oma. Ahwo jọ a rẹ ta ẹme oyoma mai, se omai ẹkoko, tube mukpahe omai, wọhọ epanọ Jesu ọ ruẹaro riẹ. (Mat. 10:22) Ẹsejọ, ahwo a rẹ jọ etehe-ughe, irediyo, gbe ebe-usi gu erue kpahe omai jẹ raha odẹ mai. (Ol. 109:1-3) Ghele na, idibo Jihova evaọ otọakpọ na soso a be rọ aruọwha whowho emamọ usi na.
16. Oware vẹ o via nọ u dhesẹ nnọ aruọwha o rẹ sai nwene eriwo ahwo nọ ma be ta usiuwoma kẹ?
16 Aruọwha ra o rẹ sae lẹliẹ ahwo nwene oghẹrẹ nọ a bi rri ovuẹ Uvie na. Oniọvo-ọmọtẹ jọ evaọ Kyrgyzstan ọ ta nọ: “Ẹdẹjọ nọ mẹ jẹ ta usiuwoma, ọzae jọ nọ mẹ nyaku ọ ta kẹ omẹ nọ: ‘Mẹ rọwo Ọghẹnẹ, rekọ orọnikọ Ọghẹnẹ Ileleikristi rai na ha. Whọ tẹ wariẹ ziọ uwou mẹ na, mẹ te rọ arakọ le owhẹ!’ O thuru arakọ ologbo jọ fihọ oria jọ. Rekọ okenọ ma jẹ ghale Usi Uvie avọ 37 na, ‘Ekuhọ Egagọ Erue Ọ Kẹlino!,’ mẹ tẹ jiroro nọ me re zihe kpohọ uwou ọvo na sọ mẹ te ruẹ omọfa jọ evaọ uviuwou ọzae na. Rekọ ọzae ọvo na ọye o rovie ẹthẹ. Mẹ tẹ lẹ se Jihova ovovẹrẹ jẹ ta nọ: ‘Mẹ kareghẹhọ ẹme nọ ma ta edẹ esa nọ i kpemu, yọ mẹ kareghẹhọ arakọ ra re. Rekọ mẹ rẹ sae nya uwou ra vrẹ hẹ keme mẹ rọwo Ọghẹnẹ uzẹme ọvo na wọhọ owhẹ re. Kẹle na Ọghẹnẹ ọ te raha egagọ iyoma no. Whọ te jọ obe-ovẹvẹ nana se kpahe onana ziezi.’ U gbe omẹ unu gaga inọ ọzae na o mi omẹ Usi Uvie na. Me te kpohọ uwou ọfa. U kri hi ọzae na o te kru Usi Uvie na họ obọ be dhẹ bru omẹ ze. Ọ ta nọ: ‘Me se rie no. Eme me re ru re Ọghẹnẹ ọ siọ omẹ ba ekpe?’” A te mu obe họ ewuhrẹ kugbe ọzae na, o te je mu iwuhrẹ họ ẹnya.
17. Ẹvẹ aruọwha oniọvo jọ u ro fi obọ họ kẹ ọmọ-uwuhrẹ riẹ nọ o wo ozọ?
17 Aruọwha mai o rẹ sai je fi obọ họ kẹ amọfa wo aruọwha. Evaọ obọ Russia, oniọvo-ọmọtẹ jọ nọ ọ jọ omoto je kperẹ o te je fi emagazini họ ada kẹ omọfa jọ evaọ omoto na. Koyehọ ọzae jọ ọ họrọ no oria nọ ọ keria ze, o te fru obe na no obọ oniọvo na, ọ tẹ nware obe na, je gbolo iei fihọ otọ. Avọ eka nọ ọ be la oniọvo na, ọ tẹ nọe oria nọ ọ be rria, jẹ vẹvẹ oniọvo na unu inọ ọ gbẹ jọ ẹwho na ta usiuwoma ha. Oniọvo-ọmọtẹ na ọ tẹ lẹ se Jihova kẹ obufihọ, ọ tẹ jẹ kareghẹhọ eme ọ Jesu: “Wha dhozọ enọ i re kpe oma na ha.” (Mat. 10:28) Ọ tẹ rọ unu kpotọ ta kẹ ọzae na nọ, “Me re dhesẹ oria nọ mẹ be rria kẹ owhẹ hẹ, yọ mẹ te gbẹ jọ ẹwho na ta usiuwoma.” O te no omoto na nwrotọ. Oniọvo na ọ riẹ hẹ inọ ọmọ-uwuhrẹ Ebaibol riẹ jọ ọ jọ evaọ omoto na. Aye na o bi kpohọ iwuhrẹ hẹ fiki ozọ. Rekọ nọ ọ ruẹ aruọwha oniọvo nana no, aye na ọ tẹ jiroro nnọ o re mu iwuhrẹ họ ẹnya.
18. Eme o ti fi obọ họ kẹ owhẹ ta usiuwoma avọ aruọwha wọhọ epanọ Jesu o ru?
18 Evaọ akpọ oyoma nana, o gwọlọ aruọwha re ma ta usiuwoma wọhọ epanọ Jesu o ru. Eme o ti fi obọ họ kẹ omai ru ere? Fi udu họ eghale nọ e rrọ obaro. Ru re uyoyou ra kẹ Ọghẹnẹ gbe ọrivẹ o jọ gaga. Lẹ se Jihova kẹ aruọwha. Hae kareghẹhọ ẹsikpobi inọ whẹ ọvo ọ rrọ usu hu, Jesu ọ rrọ kugbe owhẹ. (Mat. 28:20) Ẹzi ọfuafo ọ te kẹ owhẹ ẹgba. Yọ Jihova ọ te ghale owhẹ jẹ thọ owhẹ. Fikiere joma kru udu ga jẹ ta nọ: “Ọnowo họ ọthuke mẹ, ozọ o gbẹ sai mu omẹ hẹ; eme ohwo ọ sai ru omẹ?”—Hib. 13:6.
Didi Uyo Whọ Te Kẹ?
• Fikieme idibo Ọghẹnẹ a rọ gwọlọ aruọwha?
• Eme ma wuhrẹ kpahe aruọwha ro mi . . .
ahwo ẹrọwọ taure Kristi ọ tẹ te ziọ akpọ?
Jesu Kristi?
Jihova ọ rẹ kẹ omai udu nọ ma rẹ rọ ta usiuwoma Ileleikristi ọsosuọ na?
ibe Ileleikristi mai nẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 21]
Jesu ọ rọ ababọ ozọ fere eviẹhọ isu egagọ na via