Mwimbujolenu Yesu Kuhitila Mukushimwina Chakadi Woma

‘Hitukuumika . . . nakuyishimwinenu nsañu yayiwahi.’—1 ATESALONIKA 2:2.

1. Muloñadi nsañu yayiwahi yaWanta chiyahizumwishilaña antu?

 WENOWU muzañalu wutwatiyaña hakutiya nsañu yayiwahi! Nawa nsañu yayiwahi yaWanta waNzambi diyi nsañu yasweja kutowala. Iyi nsañu yayiwahi yatulejaña nawu makabi, niyikatu, nikuneña, nikufwa kwakamana. Nawa yenzululaña njila yakutambwilamu wumi wahaya nyaka, yamwekeshaña nkeñelu yaNzambi, nawa yatulejaña chitwatela kwikala nawulunda wawuwahi naNzambi. Munateli kutoñojoka nenu antu ejima akuzañalala hakutiya iyi nsañu yadiñi nakushimwinayi Yesu kudi antu. Chawushona, antu amakwawu akaanaña.

2. Lumbululenu mazu aYesu akwila nawu: “Nenzi nakwambula.”

² Yesu walejeli atumbanji twindi nindi: “Bayi mutoñojoka nenu nenzi nakuleta kumwena hanu hesekuku, hinenzi nakuleta kumwenaku, chiña mpoku yakabali. Muloña nenzi nakwambula iyala natata yindi, mwana wamumbanda namama yindi, nimuku windi wamumbanda namuku windi wamumbanda. Akwankunyi namuntu akekala wowu amwitala dindi yomweni.” (Matewu 10:34-36) Chatela eteji nsañu yayiwahi, antu amavulu akaanaña. Amakwawu ekalaña ayilumbu jawantu ashimwinaña nsañu yayiwahi, hela chakwila hiyantu evumu dimu.

3. Yumanyi yakeñekaña hakwila nawu tukalakali mudimu wetu wakushimwina?

³ Neyi hitukushimwina nsañu yadiña nakushimwinayi Yesu, antu chayitiyawu, adikaaninaña neyi chochakaanineñawu kunyima. Twelukaña netu antu akukaana. Yesu walejeli  atumbanji twindi nindi: ‘Nduñu habadikaña nkaaka yinduku. Chankabishiluwu ami, ninenu nawa akayikabisha.’ (Yowanu 15:20) Mumatuña amavulu hiyatukabishaña namahumpuku, ilaña antu atuhelaña nikutusekesha. Dichi, twatela kwikala nachikuhwelelu niwuswa wakuumika mumudimu wetu wakushimwina nsañu yayiwahi chakadi woma.—Tañenu 2 Petulu 1:5-8.

4. Muloñadi Pawulu ‘chomikililiyi’ hakushimwina nsañu yayiwahi?

⁴ Hadaha ninenu chayikalilaña mpinji jikwawu kuya nakushimwina indi kwiji kudi yuma yikwawu yayifwishaña mutentu. Neyi chayikalilaña, dichatiyañawu niakwenu ashinshika. Kapostolu Pawulu wadiñi mukwakushimwina wahamuka welukili chalala nankashi, ilaña mpinji jikwawu chadiñi nakumukalila kushimwina. Pawulu wayisonekeleli akwaKristu amuTesalonika nindi: ‘Muneluki dehi nenu helili twakaba dehi nakutwila chatama kuFwilipi, hitukuumika mudi Nzambi yetu nakuyishimwinenu nsañu yayiwahi yaNzambi, iku nikumona makabi amavulu.’ (1 Atesalonika 2:2) MuFwilipi, aPawulu niibwambu dindi Silasi ayihumpwili natubama kudi akwanshimbi, nikuyumbila mukaleya nakuyipata mumpompa. (Yililu 16:16-24) Hela ayimwesheli ikezeñi, aPawulu niSilasi ‘omikili’ nakutwalekahu kushimwina. Indochetu twatela kuumika ñahi? Hakwila nawu twakuli ilu lwihu, tusambilenu kwiluka chaletesheli ambuña aNzambi akunyima kuhosha nsañu yalala yaYehova chakadi woma, nawa tutalenu chitwatela kwimbujola chakutalilahu chawu.

Antu aKunyima Ateleleli Kwikala Ahamuka Hakwila Ashindi Kuhelañana

5. Muloñadi antu amwovwahilaña Yehova chatela kuhoshelawu chakadi woma?

⁵ Yesu Kristu diyi wemikili chakutalilahu chachiwahi chakuumika nikuhamuka. Hela chochu, kufuma tuhu kumatachikilu achihandilu chawantu, antu ejima amwovwahilaña Yehova ahoshaña chakadi woma. Muloñadi? Kufuma tuhu hakudikaña kwadiñi muEdeni, Yehova washimwini nindi kwakekala nkunyi hakachi kawantu amukalakelaña Nzambi nawantu amuzatilaña Satana. (Kutachika 3:15) Nkunyi yeniyi yamwekeni chelili Abeli, muntu waloña, amujahi kudi mana kwindi. Nkumininaku, nkunyi yeniyi yamwekeneni cheñi kudi Enoki, muntu mukwawu washinshika wadiñuku henohu Dibaji kanda dinzi. Waprofweteli nindi Nzambi wakenza nayihita Yindi yawañelu ajila nakujilumuna antu atama. (Yuda 14, 15) Iyi nsañu yayitiyishileña antu kumuchima bwi-i. Antu amuheleli Enoki nawa neyi Yehova welili kukumisha wumi windi nehi mutenowu adi kumujaha. Eñañi, Enoki wadiñi wahamuka.—Kutachika 5:21-24.

6. Muloñadi Mosi chahosheleñayi nakuhamuka kumesu aFwaro?

⁶ Toñojokenu cheñi hawulobu wamwekesheliyi Mosi hampinji yahosheleñayi naFwaro, nyuli wamweneñawu antu nawu hinzambi nahindi, mwana kanzambi wetañwa wejina daRa, bayi neyi mukwakuyihoshelaku hohu anzambuku. Chidi neyi wadiñi nakudifukula kuchifwikija chindi yomweni, neyi chelileñawu aFwaro amakwawu. Fwaro wadiñi wakalisha; wayulileña nanshimbi hohu. Wadiñi mukwañovu, wadivuna, nawa woma muchima, wadiñi nachaaku chakubula kumuleja kudi akwawu. Mosi kabiña wamwovu, wayileña kudi muntu wamuchidiwu chakadi kumutambika nawa chakubula kumutambwila chiwahi. Indi Mosi washimwineña nsañwinyi yakamwekana kumbidi? Washimwineña hansañu yayipupu yafwana. Nawa wamulejeli mwanta kwiladi? Wamulombeleña Fwaro nindi yombuku yihita yayivulu yawanduñu jindi kufuma mwituña. Komana Mosi wateleli kuhosha chakadi woma? Eñañi!—Kuchinda 12:3; Aheberu 11:27.

7, 8. (a) Kwesekanyi kwayiholokeleleli antu ashinshika akunyima? (b) Chumanyi chayikwashili antu akunyima kwikala ahamuka hakuhakwilaku nikutiyakesha kudifukula kwalala?

⁷ Chimwahitili yaaka yayivulu, atuprofwetu niantu jaNzambi amakwawu ashinshika atwalekeluhu kuhakwilaku kudifukula kwalala nakuhamuka. Antu jaSatana adiñi nakuyimwesha  ikezeñi. Pawulu nindi: “Ayasoleli malola, ayiketoleli ngwa ngwa, ayesekeli, ayitapoleli nampoku yakabali. Akimbokeli nakuvwala yitembi yawanyikoku niyawampembi; asheli kwamakasa munshiñu; ayimwesheli lukadi, ayikoñeli chatama.” (Aheberu 11:37) Chumanyi chayikwashili awa ambuña aNzambi ashinshika kuumika? Mumavasi antesha itunatañi dehi, kapostolu welukili chuma chakwashili Abeli, Abarahama, Sara niantu amakwawu kuumika. Wahosheli nindi: ‘Afwili chakadi kutambula yikaninu, [hamuloña wachikuhwelelu] akuminini dakuyimwena maaya, nakuyisambilila iku yichidi kwakulehi, hiyakwiteja.’ (Aheberu 11:13) Chakadi nikujina, atuprofwetu adi neyi Elija, Yeremiya niantu amakwawu ashinshika akunyima, ahakwilileñaku kudifukula kwalala, niwena ayinkeli ñovu jakuumika kuhitila mukukuhwelela muyikaninu yaYehova.—Titusa 1:2.

⁸ Antu ashinshika wenawa adiñuku henohu Kristu kanda yenzi hamaseki adiñi nakutalila yuma yayiwahi yikamwekana kumbidi. Chikasañukawu, dihakekalawu awanina “kufuma muwuduñu wakutoka” kuhitila munyidimu yawupristu yaKristu Yesu niatupristu twindi anyanya a 144,000. (Aroma 8:21) Cheñi, Yeremiya niambuña aNzambi ahamuka akumashiita emikili mushindu muloña wakushiika kwaYehova, kwekala muchikaninu chindi chamukaniniyi Yeremiya nindi: “Wena akalwa naneyi; ilaña akakukañanya; ami nidi neyi, nakakupulwishaña. Dimu mwanahoshiyi Yehova.” (Yeremiya 1:19) Makonu, neyi hitukutoñojoka hayikaninu yaNzambi yahosha hayuma yakumbidi nihachikaninu chindi chakutukiña kuspiritu, anetu nawa twakekala aloña.—Yishimu 2:7; tañenu 2 Akorinda 4:17, 18.

Kukeña Kwamuleñeleli Yesu Kushimwina Chakadi Woma

9, 10. Munjilanyi mwamwekesheleliyi Yesu wulobu kudi (a) akulumpi jansakililu, (b) amashidika amavulu, (c) kapristu muneni, (d) Pilatu?

⁹ Chakutalilahu chetu, Yesu, wamwekesheli wulobu munjila jajivulu. Chakutalilahu, hela chakwila anyuuli niantu amakwawu amuheleli, Yesu walejeleña antu jiika yuma yakeñeleñayi Nzambi nindi eluki. Wafuñunwini tufuta twawakulumpi jansakililu aditeneneña kuloña chakadi woma nintañishilu yawu yakutwamba. Dichi Yesu wayihishili chakadi kuhita mumbadi. Mpinji yimu, Yesu wahosheli nindi: ‘Oyu yihuñu yimwakamonenu ansoneki nawaFwarisi, amfwikiji! Mudi neyi majamu akupembesha, amwekanaña lubanji hanzi, hakwila mukachi mwenzala mafwaha awafu, niwuzondu wejima. Dichi ninenu nawa, hanzi mwamwekanaña kuloña kudi antu, hakwila mukachi mwenzala niwumfwikiji nikuluwa mbe-e.’—Matewu 23:27, 28.

¹⁰ Chamulukukiluwu kudi amashidika amavulu mwitempa daÑesemani, Yesu wadilumbulwili yomweni chakadi woma. (Yowanu 18:3-8) Nkumininaku, amutweli kuchota chaSanihedilini nakumwihujola kudi kapristu muneni. Hela chakwila welukili nindi kapristu wakeñeleña hakumwinkela muloña kulonda amujahi, Yesu wetejeli chakadi woma nindi wadiñi Kristu nawa Mwana kaNzambi. Wayilejeli cheñi nindi akamumona “nashakami kuchikasa chachidiilu chañovu, hakwinza mumavu amwiwulu.” (Maku 14:53, 57-65) Hashimbwili wanyi, Yesu wemeni iku anamukasi kumesu aPilatu, wateleli kumumbaku. Ilaña hampinji  yamwinkeleñawu nyiloña yakutwamba, Yesu wadimweneneni nzo-o. (Maku 15:1-5) Muyuma yejimiyi, Yesu wamwekesheli wulobu.

11. Indi kuhamuka kwanuñañana ñahi nakukeña?

¹¹ Yesu wamwilili Pilatu nindi: “Dichi chinavwalikilili, dichi chinenjilili mumpata yamunu mwishina, kulonda nakeli chinsahu chansañu yalala.” (Yowanu 18:37) Yehova wamwinkeli Yesu mudimu wakushimwina nsañu yayiwahi, Yesu niyena watiyileña kuwaha kuzata iwu mudimu muloña wamukeñeli Tata yindi wamwiwulu. (Luka 4:18, 19) Cheñi Yesu wadiñi wakeña antu. Welukili nindi chihandilu chawu chadiñi chakukabakana. Anetu nawa, hamuloña wakusweja kumukeña Yehova niantuñi netu, chatuleñelaña kushimwina nakuhamuka nawa chakadi woma.—Matewu 22:36-40.

Spiritu Yajila Yatusañumunaña Kushimwina Chakadi Woma

12. Chumanyi chaleñeleli atumbanji akusambila kwikala namuzañalu?

¹² Munyilungu yalondeleluhu kufuma hafwiliyi Yesu, atumbanji azañaleli hakumona Yehova chadiñiyi nakubombelaku antu amakwawu kumukanka wawu. Hefuku dimu hohu, antu 3,000, aYudeya niantu abalumukili kwikala aYudeya afumini kumatuña amavulu nakwinza kuYerusalema nakwanakana chawija chaPentekosta ayipapatishili. Iyi diyi mpanji yadiñi mutunwa twawantu ejima muYerusalema. Bayibolu yahoshaña nawu: “Antu ejima atiya niwoma. Apostolu hiyakwila yihayamisha yayivulu niyinjikijilu.”—Yililu 2:41, 43.

13. Muloñadi amana kwaPetulu niYowanu chiyalombeleluwu hansañu yakuhamuka, nawa chumanyi chafuminumu?

¹³ Hamuloña wakuhila, akulumpi jansakililu ayikwatili aPetulu niYowanu, nakuyikamika mukaleya wufuku wejima, nawa ayilejeli nawu aleki kuhosha nsañu yaYesu. Ilaña chayifumishiluwu mukaleya, aPetulu niYowanu ayili kudi ana kwawu nakuyileja yuma yamwekeni, wonsu wawu alombeleli halukadi lwamwenuwu, nawu: ‘Yehova, . . . atwiteji etu anduñu jeyi tushimuni mazu eyi chakadi woma.’ Chumanyi chafuminumu? ‘Wejima wawu hiyakwinzala spiritu yajila, hiyakuhosha mazu aNzambi chakadi woma.’—Yililu 4:24-31.

14. Indi spiritu yajila yatukwashaña ñahi mumudimu wetu wakushimwina?

¹⁴ Spiritu yajila yaYehova yasweja ñovu diyi yayikwashili atumbanji kuhosha izu daNzambi chakadi woma. Yehova diyi watwinkaña wuswa wakuleja antu chalala chakadi woma, niantu akaanaña. Yehova wahanaña spiritu yindi, nawa neyi tumulomba wakatwinka. Nawukwashu waYehova, anetu tunateli kumwekesha wulobu wukutukwasha kushinda kukala kwejima kukutumwekena.—Tañenu Masamu 138:3.

Makonu akwaKristu Anakushimwina Chakadi Woma

15. Indi chalala chinakwambula ñahi antu makonu?

¹⁵ Nikulelu, chalala chinakwambula antu neyi chichadiña kunyima. Antu amakwawu etejaña, ilaña amakwawu hiyetejaña hela kulemesha kwitiya kwetuku. Neyi chashimwiniyi Yesu, amakwawu atwinkaña nyiloña, atusekeshaña, nikutuhela. (Matewu 10:22) Mpinji jikwawu, atukasilaña mafwaha kunyendu nawa atulumbishilaña nsañu kuhitila muyikuzulemba. (Masamu 109:1-3) Hela chochu, antu jaYehova ashimwinaña nsañu yayiwahi chakadi woma iseki dejima.

16. Chakutalilahwinyi chinakumwekesha nawu kwikala ahamuka kunateli kuleñela antu itwashimwinaña kuhimpa yililu yawu?

¹⁶ Kuhamuka kwetu kunateli kukwasha antu kwiteja nsañu yaWanta. Muhela wumu mwituña daKyrgyzstan walumbulwili nindi: “Chinayili nakushimwina, mwiniitala wumu wanlejeli nindi: ‘Namukuhwelela Nzambi bayi Nzambi wawakwaKristuku. Neyi wakenza hanu cheñi, nakakuswakija nakawa kulonda akakubokoti!’ Kunyima yindi kwadiñi lukawa lweneni lwakukasila mwileñi. Ilaña hampinji yakampeni kakuhana Nsañu yaWanta Na. 37, ‘Kukuma kwaNsakililu yaKutwamba Kudi Mukamwihi!,’ natoñojokeli kufunta cheñi kudina itala nami kewili nukuwanaku ntaña yindi. Ilaña, nawenenuhu yoyenona muntu. Chakadi nikulaba nalombeli kudi Yehova, kufumahu namwilili nami:  ‘Mudi ñahi mwani, nichidi kwanuka yuma yitwahosheli mafuku asatu anahituhu, nichidi kwanuka nikawa kenu. Ilaña nakeñeña hohu kuyinka iyi tilakiti muloña nayikeña, nawa nakuhwelela Nzambi walala wumu hohu. Nzambi keña yajilumuni nsakililu yamusawulaña. Mukudiza yuma yayivulu neyi mutaña iyi tilakiti.’ Nadihayaminini chikupu, hakumona iwu iyala hakutambula Nsañu yaWanta. Nivuma ninyamu nakuya hetala dikwawu. Chinendeluku chanti, nami nitali kunyima kumonaku ona iyala nakunlondela lufuchi nitilakiti yindi yaNsañu yaWanta muchikasa. Wahosheli nindi, ‘Nayitañi iyi tilakiti. Hanu dinu chumanyi chinateli kwila kulonda kuzuwa kwaNzambi kwakabuli kumbabesha?’” Kufumahu, twatachikili kudiza Bayibolu naniwu iyala, nawa watachikili kuwanika kukupompa kwawakwaKristu.

17. Indi kuhamuka kwamuhela wumu kwakwashili ñahi kadizi waBayibolu watiyileña antu woma?

¹⁷ Kuhosha chakadi woma kunateli kuleñela amakwawu niwena kwikala ahamuka. Mwituña daRussia, muhela wumu wadiña halwendu wamwinkeli mukwawu mwayilileñawu hamu mubasi magazini. Iyala wumu wavwatukili hachitwamu chindi nakuhukula magazini yadiña namuhela mumakasa, nakuyitambola nikuyinatila hamaseki. Hakumuhoshola muhela nezu dankalu, nawa wamwilili nindi yamwinki keyala yindi nikumuleja nindi yaketuki kushimwina mumukala. Muhela walombeli kudi Yehova nawa wanukili mazu aYesu akwila nawu: “Bayi mutiyaña woma ajahaña mujimbaku.” (Matewu 10:28) Muhela wanyamukili nakumuleja ona iyala mumesu awunda nindi, “Nukukwinka keyala yami wanyi, nawa nukutwalekahu kushimwina mumukala.” Kufumahu, yasuluka nimubasi. Muhela welukili wanyi nindi muniyi basi dimwadiñi nikadizi windi waBayibolu. Iwu kadizi waBayibolu hayileña kukupompa kwawakwaKristuku muloña watiyileña antu woma. Chamweniyi kuhamuka kwamuheletu, iwu kadizi waBayibolu watoñojokeli nindi wukutachika kuya nakupompa.

18. Chumanyi chikuyikwasha kushimwina chakadi woma neyi cheliliyi Yesu?

¹⁸ Chineli antu mudinu ituña hiyamukeña Nzambuku, twatela kwikala ahamuka hakwila nawu tushimwini neyi cheliliyi Yesu. Chumanyi chikutukwasha kwikala ahamuka? Toñojokenuña hayuma yikamwekana kumbidi. Swejenu kumukeña Nzambi niantuñi nenu. Lombenu kudi Yehova kulonda yayinki ñovu jakuumika. Anukenuña nenu, himudi nkawenuku, Yesu wudi nanenu. (Matewu 28:20) Spiritu yajila yikuyikolesha. Yehova wukayikiswila nikuyikwasha. Dichi twatela kwikala ahamuka nikuhosha netu: “Yehova diyi nkwashi yami, hinukutiya womaku, antu akuñila chumanyi?”—Aheberu 13:6.

Mukwakula Nenudi?

• Muloñadi ambuña aNzambi chatela kwikalilawu ahamuka?

• Yumanyi yitwatela kudizila kudi antu ahamuka adi neyi: . . .

antu ashinshika adiñuku henohu Kristu kanda yenzi hamaseki?

Yesu Kristu?

akwaKristu akusambila?

akwetu akwaKristu makonu?

[Malwihu aKuzatisha haKudiza]

[Mwevulu wudi hefu 23]

Yesu wafuñunwini tufuta twawakulumpi jansakililu chakadi woma

[Mwevulu wudi hefu 25]

Yehova watwinkaña wulobu wakushimwina