Luw Ranyisi mar Yesu​—⁠Lend gi Chir

‘Ne watimo chir mondo wahulnu wach maber.’ ​—⁠1 THES. 2:2.

1. Ang’o momiyo wach maber mar Pinyruoth en wach mamoro ji ahinya?

MANO kaka winjo wach maber moro ji ahinya! To wach maberie moloyo duto, en wach maber mar Pinyruodh Nyasaye. Wach maberni singonwa ni giko mar chandruok, tuoche, lit, kuyo, koda tho chiegni. Wachno miyowa geno mar bedo gi ngima mochwere, ofwenyonwa dwaro mar Nyasaye, koda kaka wanyalo bedo gi winjruok mar hera gi Nyasaye. Inyalo paro ni ng’ato ka ng’ato ne nyalo bedo mamor winjo wach maberno ma Yesu ne lando ne dhano. Gima lit en ni, ne ok en kamano.

2. Ler ane tiend wach ma Yesu nowacho niya: ‘Ne abiro mondo akel pogruok.’

² Yesu nowacho ne jopuonjrene kama: “Kik ugal ka ne abiro mondo akel kuwe e piny; ne ok abiro mondo akel kuwe, to ligangla. Ne abiro mondo apog ng’ato kod wuon mare, kendo nyako kod min mare, kendo chi wuowi kod wuon odgi, kendo wasik ng’ato nobed mana joode owuon.” (Math. 10:⁠34-​36) Kar rwako wach maber gi mor, ji mang’eny  kwedo wachno. Jomoko to bedo wasik jogo malando wachno, kata odoko ni gin joot kata wede.

3. Dwarore ni wabed gi ang’o mondo wachop tijwa mar lendo?

³ Weche mwalando gin mago moting’o adiera ma Yesu bende ne lando, kendo ji mang’eny kawo wechego e kindegi mana kaka ne gikawogi e kinde Yesu. Mano en gima wageno ni biro timore. Yesu nowacho ni jopuonjrene kama: “Misumba ok duong’ moloyo ruodhe. Ka gisesanda, un bende ginisandu.” (Joh. 15:20) E pinje mathoth ok warom gi sand mager, to kata kamano, waromo gi jojaro kendo joma ok rwak wach maberno. Omiyo, dwarore wabed gi yie motegno koda chir mondo omi wanan e tijwa mar lando wach maber maonge luoro.—Som 2 Petro 1:⁠5-8.

4. Ang’o momiyo ne dwarore mondo Paulo ‘otim chir’ mondo olendi?

⁴ Seche moko inyalo nwang’o ka tekni timo tij lendo, kata inyalo bedo maluor tiyo gi yore mamoko mag lendo. Ka en kamano, ng’e ni ok in kendi. Jaote Paulo ne en jalendo ma jachir kendo maonge luoro ma nolony ahinya e ng’eyo mare kuom adiera, to ema podi nitie kinde ma ne bedone matek timo tij lendo. Paulo nondiko ne Jokristo ma ne ni Thessalonika kama: ‘Yande waseneno masira, kendo otimnwa malit, e dala mar Filipi kane pok wachopo iru, kaka ung’eyo. To kata kamano ne watimo chir kuom Nyasachwa mondo wahulnu wach maber mar Nyasaye, ka wan e lweny mager.’ (1 Thes. 2:2) Ka gin Filipi, joloch nochiwo chik ni mondo ochwad Paulo gi Sila, mi ne obolgi e od twech. (Tich 16:⁠16-​24) Kata kamano, Paulo gi Sila ne ‘otimo chir’ mar dhi nyime gi lendo. Ere kaka wan bende wanyalo timo kamano? Mondo wayud dwoko, we wanon ane gima nomiyo jotich Nyasaye machon obedo gi chir mar wacho adiera e wi Jehova, kendo wapuonjre kaka wanyalo luwo ranyisi margi.

Chir ne Dwarore e Kedo gi Sigu

5. Ang’o momiyo kinde duto chir osebedo gima dwarore kuom jogo momakore gi Jehova?

⁵ Kuom adier, Yesu Kristo ema noketonwa ranyisi maber moloyo duto mar bedo gi chir. Kata kamano, chakre kinde ma nochwe dhano, chir en gima osebedo ka dwarore kuom jogo duto momakre gi Jehova. Nikech ang’o? Bang’ ng’anjo ma notimore e puodho mar Eden, Jehova nokoro ni sigu ne dhi bedoe e kind jogo matiyo ne Nyasaye koda jogo matiyo ne Satan. (Chak. 3:⁠15) Siguno ne onenore mapiyo kane Kain onego Abel jal makare. Bang’e, siguno nonyis kuom Enok, ma bende ne en jal makare ma nodak ka Ataro mar pi podi. Ne okoro ni Nyasaye ne dhi biro gi oganda mang’ongo mar joge maler mondo ong’ad bura ni ji duto maok oluore. (Juda 14, 15) Mano ne en wach ma ji mang’eny ne ok dwar winjo. Ji ne osin gi Enok kendo nenre ni dine ginege kapo ni Jehova ne ok okawo ngimane. To mano kaka Enok nonyiso chir miwuoro!—Chak. 5:⁠21-​24.

6. Ang’o momiyo ne dwarore ni Musa obed gi chir mar wuoyo gi Farao?

⁶ Par ane bende chir ma Musa nonyiso kane owuoyo gi Farao, ma ne en jaloch ma ji ne neno ok mana kaka ng’at mochung’ e lo nyiseche, to kaka nyasaye owuon, wuod nyasach chieng’ miluongo ni Ra. Nyalo bedo ni ne olamo kido mare owuon, mana kaka Farao mamoko ma notelo. Gima Farao nowacho ne bedo chik. Farao ne en ruoth ma nigi teko, ma jang’ayi, ma wiye tek kendo ng’ato ne ok nyal nyise gima onego otim. Mano e ng’at ma Musa, jakwath mamuol nodhi ire nyadinwoya—maok ogwele. To en ang’o ma Musa nokoro? Wach masiche malich. To en ang’o ma nowacho ni odwaro? Ne odwaro mondo Farao ogony wasumbini mage tara mogwaro, mondo oa e pinyno! Be ne dwarore ni Musa obed gi chir? Ee!—Kwan 12:3; Hib. 11:27.

7, 8. (a) Gin tembe mage ma jotich makare machon ne oromogo? (b) Ang’o ma nokonyo jotich Nyasaye machon bedo gi chir ne lamo maler?

 ⁷ Higini mang’eny bang’ mano, jonabi koda jotich Nyasaye mamoko makare ne odhi nyime bedo gi chir ne lamo maler. Piny ma Satan oteloeni ne osin kodgi. Paulo ndiko niya: “Nochielgi gi kite, notemgi, nomworgi sirunda gi musmeno, noneggi gi ligangla. Ne giwuotho gi lep rombe, gi lep diek, ka gin jo modhier, jo misando, kendo ne gineno chandruok.” (Hib. 11:37) Ang’o ma nokonyo jotich Nyasaye makarego chung’ motegno? E wechene motelo, jaote Paulo nonyiso gima ne omiyo Abel, Ibrahim, Sara, koda jomamoko obedo gi teko mar nano. Nowacho kama: “Ne ok ginwang’o gik ma Nyasaye nosingonigi, to ne ginenogi gi ku mabor, kendo ne giyie ni gin adier.” (Hib. 11:13) Onge kiawa ni, jonabi ma notimo chir ne lamo madier kaka Elija, Jeremia, koda jomamoko makare ma nodak chon ka kinde mag Jokristo podi, bende noyudo kony mar nano kokalo kuom keto genogi kuom singo mag Jehova.—Tito 1:2.

⁸ Jotich Nyasaye makarego ne ogeno ni kinde mabiro ne dhi bedo maber ahinya. Bang’ chier margi, mosmos gibiro bedo makare chuth kendo ibiro ‘gonygi a e tuech mar top’ kokalo kuom tij dolo mar Kristo Yesu kaachiel gi jodolo 144,000 mabiro tiyo e bwoye. (Rumi 8:⁠21) E wi mano, Jeremia kaachiel gi jotich Nyasaye mamoko machon, notimo chir nikech singo mag Jehova, manenore e singo ma nomiyo Jeremia kama: “Mi gini ked kodi; to ok giniriembi: ni mar an kodi, Jehova owacho, mondo agoli e chandruok.” (Yer. 1:19) E kindegi, ka waketo e paro singo mag Nyasaye kuom kinde mabiro, kendo geno ni obiro ritowa kuom gimoro amora manyalo ketho winjruokwa kode, wan bende wayudo teko mar nano.—Nge. 2:7; som 2 Jo Korintho 4:⁠17, 18.

Hera Nojiwo Yesu Mondo Olendi gi Chir

9, 10. Yesu nonyiso chir e yore mage e nyim (a) jotend din, (b) oganda askeche, (c) jadolo maduong’, (d) Pilato?

⁹ Yesu noketonwa ranyisi mar bedo gi chir e yore mopogore opogore. Kuom ranyisi, kata obedo ni jogo ma ne nie loch ne sin kode, Yesu ne lando gima Nyasaye ne dwaro ni ji ong’e kata obedo ni mano ne ok dhi morogi. Ne okwedo ma onge luoro tim jotend din mar nyisruok ni gin joma kare kaachiel gi puonjgi mag miriambo. Jogo ne gin joma okwedi, kendo Yesu ne owachonegi kamano ratiro. Chieng’ moro nowacho kama: “Yaye, nodoknu malit, un jondiko gi jo Farisai, ma jogang wach! Nikech uchalo gi liete mobuk matar, ma nenore maber malich gi oko, to igi opong’ gi choke jo motho kod yuothruok duto. E kaka un bende gi oko unenore nyim ji ka jo makare, to e iu upong’ gi gango wach kod richo.”—Math. 23:⁠27, 28.

¹⁰ Kane oganda askeche obiro make e puoth Gethsemane, Yesu nonyiso chir kuom fwenyorenegi. (Joh. 18:⁠3-8) Bang’e ne otere e nyim Sanhedrin, mi jadolo maduong’ nochako none. Kata obedo ni nong’eyo ni jadolo maduong’ ne manyo gima onyalo donjonego mondo onege, Yesu noyie maonge luoro ni en e Kristo kendo Wuod Nyasaye. Nomedo wacho ni, ne gidhi nene ‘kobet piny e bat  korachwich mar teko, kendo kobiro gi boche polo.’ (Mari. 14:⁠53, 57-​65) Mapiyo bang’e, Yesu nochung’ kotweye e nyim Pilato, jal mabende ne nyalo gonye. Kata kamano, Yesu ne ok odwoko wach moro kuom weche ma ne idonjonego. (Mari. 15:⁠1-5) Kuom magi duto, chir ne dwarore.

11. Ere kaka chir otudore gi hera?

¹¹ Yesu nowacho ne Pilato kama: ‘Gimomiyo nonyuola, kendo gimomiyo nabiro e piny ka, en ni mondo abed janeno kuom adiera.’ (Joh. 18:37) Jehova nomiyo Yesu tij lando wach maber, kendo Yesu ne mor timo tijno nikech nohero Wuon mare me polo. (Luka 4:⁠18, 19) Yesu bende nohero ji. Nong’eyo ni ngima ma ne gidakie ne tek. E yo machalo kamano, wan bende watimo tij lendo gi chir nikech hera ma waherogo Nyasaye kod jowetewa.—Math. 22:⁠36-​40.

Roho Maler Miyowa Teko mar Lendo gi Chir

12. En ang’o ma ne okelone jopuonjre mokwongo mor?

¹² Jumbe moko bang’ tho Yesu, jopuonjre ne mor neno ni Jehova ne medo jopuonjre manyien kuomgi. Mano kaka e odiechieng’ achiel kende ji 3,000 kuom joma nobiro Jerusalem e nyasi mar Pentekost nobatisi, Jo-Yahudi koda oganda mamoko ma norwako din mar Jo-Yahudi! Mano kaka nyaka bed ni ji duto e Jerusalem ne owuoyo kuom gima notimreno! Muma wacho niya: “Luoro nomako ji duto, kendo honini mathoth gi ranyisi notimore gi luet joote.”—Tich 2:⁠41, 43.

13. Ang’o momiyo owete nokwayo e lamo mondo omigi chir, to ang’o ma ne otimore?

¹³ Ka gin gi mirima, jotend din ne otweyo Petro kod Johana nyaka kinyne, kendo ne gikwerogi kik giwuo e wi Yesu. Bang’ ka nosegonygi, ne gidhi ir owete kendo hulonegi gima notimore, kendo giduto ne giwuoyo gi Jehova e lamo e wi akwede ma ne giyudo, ka gikwayo niya: ‘Imi jotichini yalo wachni gi chir chutho.’ Ang’o ma ne otimore? ‘Roho maler nopong’ogi giduto, kendo ne giyalo wach Nyasaye gi chir.’—Tich 4:⁠24-​31.

14. Ere kaka roho maler konyowa e tij lendo?

¹⁴ Ne ni, roho maler mar Jehova ema nokonyo jopuonjrego wuoyo kuom wach Nyasaye gi chir. Chir ma wabedogo e lando adiera ne jomoko, kata mana ne jogo makwedo otewa, ok a kuomwa wawegi. Jehova nyalo, kendo obiro miyowa roho mare maler ka wakwaye. Kokalo kuom kony ma Jehova chiwo, wan bende wanyalo bedo gi chir madwarore mondo wanan e bwo akwede moro amora ka wachung’ motegno.—Som Zaburi 138:3.

Jokristo ma Kindegi Lendo gi Chir

15. Ere kaka adiera pogo ji e kindewagi?

¹⁵ E kindewagi, mana kaka e kinde machon, adiera pod dhi nyime kelo pogruok e kind ji. Jomoko rwako kit lamo maler, to moko ok ong’eyo kendo ok rwak kit lamowa. Jomoko kwedowa, jarowa, kendo sin kodwa, mana kaka Yesu nokoro. (Math. 10:22) Seche moko, iwacho miriambo kendo iketho nyingwa kitiyo gi yore mopogore opogore mag fwambo kata lando weche. (Zab. 109:⁠1-3) Kata kamano, e piny duto, oganda Jehova lando wach maberno gi chir.

16. En ang’o ma notimore manyiso ni bedo gi chir nyalo loko paro mag joma walendonegi?

¹⁶ Chir ma wanyiso nyalo miyo ji olok paro ma gin-go kuom wach maberno mar Pinyruoth. Nyaminwa moro e piny Kyrgyzstan wacho kama: “Kane an e tij lendo, wuon ot moro nowachona kama: ‘An gi yie kuom Nyasaye to ok kuom Nyasach Jokristo. Kapo ni ibiro e dho rangaya kae kendo, abiro gonyoni guogani!’ E tok jalo, ne nitie guok maduong’ motwe gi nyororo. Kata kamano, kane watimo kampen mar trakt mar Wach Pinyruoth Na. 37, ‘Giko Din mar Miriambo Okayo Machiegni!,’ ne ang’ado mar dok kendo e odno kageno ni abiro romo gi ng’at machielo kuom joodno. Kata kamano,  ng’at cha ema kendo noyawo dhoot. Mapiyo ne akwayo Jehova e lamo, kae to awachone jalo niya: ‘Amosi, anyalo paro mbaka ma ne wabedogo odiechienge adek mokalo, kendo anyalo paro guogi. Kata kamano, ne adwaro keloni traktni, nikech mana kaka in, an bende an gi yie kuom Nyasaye achiel kende madier. Nyasaye chiegni kelo kum ne dinde maok miye duong’. Inyalo ng’eyo weche momedore kuom wachno kisomo traktni.’ Ne awuoro ahinya kane jalno oyie kawo traktno. Bang’e ne adhi e ot machielo. Mapiyo bang’e, ng’atno nobiro ira koringo gi trakt mar Wach Pinyruoth e lwete. Nowachona niya, ‘Asesome. Ang’o monego atim mondo kik ayud kum mar Nyasaye?’” Ne ochak puonjruok Muma kod ng’atno, kendo nochako dhi e chokruoge mag Jokristo.

17. Ere kaka chir ma nyaminwa moro nonyiso nojiwo japuonjre moro ma ne luor?

¹⁷ Chir mwanyiso bende nyalo jiwo jomoko mondo obed jochir. E piny Russia, nyaminwa moro ne ochiwo gaset ne ng’at ma ne gin-go e bas. Bang’e, ng’at moro nowuok e kome, mi oywayo gaset e lwet nyaminwano, moyieche, kae to owite piny. Koyanye gi dwol maduong’, kodwaro ng’eyo kama nyaminwano oaye, nokwero nyaminwano kik olendi e alworano. Nyaminwano nokwayo Jehova kony e lamo kae to noparo wach ma Yesu nowacho niya: “Kik uluor jo ma nego ringruok.” (Math. 10:28) Kotiyo gi dwol mamuol, nochung’ mowacho ne ng’atno kama: “Ok abi nyisi kama adakie, kendo abiro dhi nyime lendo e alworani.” Bang’e, nolor owuok e bas. Dhako moro ma ne puonjre kode Muma ne nie basno, to nyaminwano ne ok ong’eyo. Noyudo dhakono oseweyo luoro mar dhano omone dhi e chokruoge mag Jokristo. Kata kamano, bang’ neno chir ma nyaminwano nonyiso, japuonjreno nong’ado mar chako dhi e chokruoge.

18. Ang’o mabiro konyi lendo gi chir mana kaka Yesu notimo?

¹⁸ E piny masani ma ji ok ong’eyoe Nyasaye, dwarore wabed gi chir eka mondo walend kaka Yesu. Ang’o mabiro konyi timo kamano? Ket wang’i kuom kinde mabiro. We mondo hera mari kuom Nyasaye koda joweteni omed bedo motegno. Kwa Jehova e lamo mondo okonyi bedo gi chir. Kinde duto ibed king’eyo ni ok in kendi ngang’, nikech Yesu nikodi. (Math. 28:20) Roho maler biro miyi teko. Kendo Jehova biro gwedhi kendo konyi. Kuom mano, weuru wabed gi chir, kendo wawach niya: “[Jehova] e jakonya, ok analuor gimoro; ere gi ma dhano nyalo timona?”—Hib. 13:6.

Inyalo Dwoko Nade?

• Ang’o momiyo dwarore ni jotich Nyasaye obed gi chir?

• E wi wach bedo gi chir, ang’o mwapuonjore kuom . . .

jotich Nyasaye makare ma nodak kapok kinde Kristo?

Yesu Kristo?

Jokristo mokwongo?

Jokristo wetewa e kindegi?

[Penjo mag Puonjruok]

[Picha manie ite mar 23]

Yesu nokwedo jotend din gi chir

[Picha manie ite mar 25]

Jehova miyowa chir mar lendo