Isua Entawn Rawh—Huai Taka Thu Hrilin
Isua Entawn Rawh—Huai Taka Thu Hrilin
“Chanchin ṭha in hnêna sawi tûrin kan Pathianah chuan kan lo huai tâk zâwk kha.”—1 THES. 2:2.
1. Engvângin nge Lalram chanchin ṭha chu a duhawm êm êm?
CHANCHIN ṭha hriat chu a va nuam êm! Chanchin ṭha a zawnga ṭha ber chu Pathian Ram chanchin ṭha hi a ni. Chu chanchin ṭha chuan hrehawm tawrhna te, natna te, na tawrhna te, lungngaihna te, leh thihna te tihtâwp min tiam a. Chu chuan chatuan nunna kawng a hawng a, Pathian thiltum a târ lan bâkah, amah nêna inlaichînna duhawm tak neih dân min kawhhmuh bawk a ni. Chuvângin, Isua puan chhuah he thutak hi mi tinin hriat nuam an tih i ring ngei ang. Mahse, lungchhiatthlâk takin chutiang chu a ni tlat lo.
2. Isua’n: “Rem lêntîr tûra lo kal . . . ka ni lo” a tih awmzia hi hrilhfiah rawh.
2 Isua chuan a zirtîrte hnênah: “Khawvêlah hian rem lêntîr tûra lo kal emaw mi ti suh u; rem lêntîr tûra lo kal ka ni lo va, khandaih lêntîr tûra lo kal ka ni zawk. Mi a pa dotîr tûrin fanu a nu dotîr tûrin, mo a pi dotîr tûrin lo kal ka ni asin. Mi a hmêlmate chu ama chhûngte zînga mi ngei a ni ang,” tiin a hrilh a. (Mt. 10:34-36) Mi tam zâwk chuan chanchin tha chu lâwm taka pawm ahnêkin, an hnâwl zâwk a. A ṭhen phei chuan chanchin ṭha puangtute chu an do tlat a, an chhûngte an nih pawhin an do tho tho a ni.
3. Thu hril tûra kan chanvo neih hlen chhuak tûrin eng nge kan neih ngai?
3 Keini pawhin Isua thutak puan chhuah ang tho chu kan puang chhuak a, Isua hun laia mite chhân lêt ang bawkin mi tam takte chuan an chhâng lêt a ni. Chutiang a nih chu kan beisei tûr a ni. Isua ngeiin a zirtîrte hnênah: “Bâwih chu a pu aiin a ropui lo, . . . annin kei mi tihduhdah tawh chuan nangni pawh an tiduhdah ang che u,” tia a hrilh avângin. (Joh. 15:20) Ram tam takah chuan tihduhdahna kan tawng lo na a, hmuhsit leh ngaihsak loh kan hlawh a. Chuvângin, chanchin ṭha hril zêl tûr chuan rinna leh huaisenna kan neih a ngai a ni.—2 Petera 1:5-8 chhiar rawh.
4. Engvângin nge Paula chu thu hril zêl tûra a ‘intihhuai’ a ngaih?
4 Nang ngei pawhin, rawngbâwlnaa tel harsa tih châng i nei mai thei a, a nih loh pawhin rawngbâwlna pêng a engemaw bera tel hlauh deuh châng pawh i nei mai thei. Chutiang i nih pawhin i mal lo ve. Tirhkoh Paula pawh thu hriltu huaisen leh hlauh nei lo, thutak hriatna thûk tak nei a ni a; mahse, ani meuh pawhin thu hrilh harsa tih châng a nei ve a ni. Thessalonika khuaa Kristiante hnênah heti hian a ziak a ni: “In hriat tawh angin, Philippi khuaah chuan hrehawm tuar leh zahthlâk taka siama kan awm hnu khân buai êm êm chung pawhin Pathian chanchin ṭha in hnêna sawi tûrin kan Pathianah chuan kan lo huai tâk zâwk kha,” tiin. (1 Thes. 2:2) Philippi khuaah chuan thu rêltute chuan Paula leh a ṭhian Sila chu an vua a, kawl buntîrin tân inah an khung a. (Tirh. 16:16-24) Chuti chung pawhin, Paula leh Sila chu thu hril zawm zêl tûrin an ‘intihuai’ a ni. Engtin nge kan intihhuai ve theih ang? A chhânna hriat nân, Bible hun laia Pathian chhiahhlawhte huaisen taka Pathian Jehova chungchânga thu dik tak sawitîrtu leh anmahni kan entawn theih dân i lo en ang u.
Dotute Hmachhawn Tûrin Huaisen A Ngai
5. Engvângin nge Pathian Jehova laka mi rinawm tute tân pawh huaisen a ngaih?
5 Huaisenna kawnga entawn tûr ṭha ber chu Isua Krista chu a ni ngei mai. Chuti chung pawhin, mihring awm ṭan tirh aṭang rêngin, Pathian Jehova laka rinawm nghet apiangte tân huaisenna neih a ngai a ni. Engvângin nge? Eden huana helna a chhuah hnu khân, Pathian Jehova chuan A rawngbâwltute leh Setana rawngbâwltute inkâra indona a awm tûr thu a lo sawi lâwk a. (Gen. 3:15) Chu indona chu mi fel Abela a unaupa’n a thah khân a rawn lang chiang ta nghâl a. Chu mi hnuah, Tuilêt hmaa nung mi fel dang Enoka pawhin dona a tâwk bawk. Ani chuan Pathian chu Amah ngaihsak lotute chunga phuba la tûrin a vântirhkoh thianghlim tam takte nên a rawn kal tûr thu a hrilh lâwk a ni. (Jud. 14, 15) Chu thuchah chu mite ngaihthlâk duhzâwng a ni lo hle. Anni chuan Enoka chu an hua a, Pathian Jehova’n a nunna la bo lo phei sela chuan an tihlum ngei ang. Enoka chu a va huaisen tak êm!—Gen. 5:21-24.
6. Engvângin nge Mosia tân Pharaoa be tûrin huaisen a ngaih?
6 Chu bâkah, pathian aiawh mai pawh ni lo, pathian pakhat, ni pathian Ra-a fapa anga ngaih hial, Pharaoa a biak ṭuma Mosia huaisenzia pawh kha han ngaihtuah bawk teh. Ani chuan Pharao lal dangte ang bawkin ama lim a bia a nih hmêl hle. A ṭawngkam chhuak tawh phawt chu dân a ni tawp mai a; thupêk chhuahin ro a rêl ṭhîn a ni. Thiltithei, chapo tak, leh luhlul tak Pharaoa chuan mi dangin a thiltih tûr an hrilh chu a ngai thei lo. Chutiang mi hmaah chuan a ni, berâm vêngtu tlâwm tak Mosia chu a inlan ṭhin ni—sâwm pawh ni lo leh lawm pawh hlawh si lovin. A nih leh Mosia chuan eng nge a hrilh lâwk? Hremna hri râpthlâk tak chungchâng a ni. A thil ngiat chu eng nge ni? Pharaoa sal maktaduai engemaw zâtte Aigupta ram chhuahsan tûra phalna ngei mai chu! Chutiang ti tûr chuan Mosia tân huaisen a ngai em? Ngai teh meuh mai!—Num. 12:3; Heb. 11:27.
7, 8. (a) Hmân laia mi rinawmte’n eng fiahnate nge an tawh? (b) Kristian hun hmaa mite chu biakna thianghlim chawisân leh tihmasâwnnaa huaisenna lantîr tûrin engin nge ṭanpui?
7 Chu mi hnu kum zabi-ahte chuan, zâwlneite leh Pathian chhiahhlawh rinawm dangte chuan biakna dik atân huaisenna an lantîr zawm zêl a. Setana khawvêl chuan anni chu a ngaithei si lo. Paula chuan: “Lunga denin an awm a, thingzainaa zai bunin an awm a, thlêmna an tâwk a, khandaiha sahhlumin an awm a; berâm vun leh kêl vun sinin an vâkvai a; rethei takin, hrehawm takin, tihduhdahin an awm a,” tiin a sawi a ni. (Heb. 11:37) Engin nge chûng Pathian chhiahhlawh rinawmte chu ding nghet tûra ṭanpui? A hma lawk Bible chângahte chuan tirhkoh Paula chuan Abela te, Abrahama te, Sari te, leh mi dangte hnêna chhel tûra chakna petu chu a sawi lang a ni: “[Anni chuan] thiltiamte chu chang lovin; nimahsela chûng chu [rinnaa] hla tak aṭanga hmuin chibai an lo bûk [an lo pawm] tawh,” tiin. (Heb. 11:13) Biakna dik atâna huaisen taka ding zâwlnei Elija leh Jeremia angte, leh Kristian hun hmaa mi rinawm dangte pawh chu Jehova thutiamte thlîr tlatna chuan chhel tûrin a ṭanpui tih rinhlelh rual a ni lo.—Tit. 1:1, 2.
8 Kristian hun hmaa chûng mi rinawmte chuan nakin hun beiseina duhawm tak lam chu an thlîr a. Anni chu kaihthawh leh an nih chuan, Isua Krista leh a hnuaia puithiam hna thawk 1,44,000-te rawngbâwlna zârah zawi zawiin mi ṭha famkim an lo ni ang a, “chhiatna bâwih ata tihchhuahin an awm ang.” (Rom 8:21) Chu bâkah, Jeremia leh hmân laia Pathian chhiahhlawh huaisen dangte chu Jeremia hnêna Pathian Jehova thutiama lang chhuak thlamuanna thu avângin an intihuai a ni. Pathian Jehovah chuan Jeremia hnênah: “An bei ang chia, mahse an hneh lo vang che: chhan chhuak tûr chein i hnênah ka awm si a, tih hi LALPA thu chhuak a ni,” tih a tiam a ni. (Jer. 1:19) Tûn laiah pawh, nakin hun atâna Pathian thu min tiamte leh thlarau lam vênhimna min tiamte ngaihtuahna chuan, chutiang bawkin min tichak a ni.—Thuf. 2:7; 2 Korinth 4:17, 18 chhiar rawh.
Hmangaihna Chuan Isua Chu Huaisen Taka Thu Hril Tûrin A Chêttîr
9, 10. Eng kawngin nge Isua chuan (a) sakhaw hruaitute hmaah, (b) sipaiho hmaah, (c) puithiam lal hmaah, leh (d) Pilata hmaah huaisenna a lantîr?
9 Kan Entawn tûr Isua chuan huaisenna chu kawng hrang hrangin a lantîr a. Entîr nân, mi thiltithei leh challangte’n haw hle mah se, Isua chuan Pathianin mite hriat atâna a duh thute chu mite tihlâwm loh a hlauh avângin a zêp ṭhen ngai lo. Sakhaw hruaitu thiltithei takte intihfelna leh an zirtîrna dik lohte chu huaisen takin a hai lang a. Tlang tak leh chiang takin anni chu a dem a ni. Ṭum khat phei chu: “Lehkhaziaktu leh Pharisai vervêkte u, in chung a pik e! Thlân hnawih vâr, pawn lam mawi taka lang, a chhûng lam erawh chu mitthi ruhte leh bawlhhlawh tinrênga khat angte chu in ni asin. Nangni pawh chutiang takin pawn lamah chuan mihring mithmuhin fel takin in lang ṭhîn a, in chhûng lamah erawh chuan vervêkna leh sualnain in khat si,” tiin a sawi.—Mt. 23:27, 28.
10 Gethsemane huana sipai hovin man an tum pawh khân, Isua chuan an man tum chu amah a nihzia huaisen takin a puang a. (Joh. 18:3-8) Chu mi hnu chuan Sanhedrin hmaah hruai a ni a, puithiam lalin thu a zâwt a. Puithiam lalin amah tihhlum theihna tûr a zawng tih hre reng mah se, Isua chuan Krista leh Pathian Fapa A nihzia chu huaisen takin a nemnghet a. “Thiltihtheihna ding lama ṭhu a, vân chhûm zînga lo kal” an la hmuh tûr thu a sawi belh hial a ni. (Mk. 14:53, 57-65) Chu mi hnu rei lo têah chuan, Isua chu amah chhuah theitu, Pilata hmaah phuar chungin a ding a. Mahse, Isua chuan amah an hêknate chu engtin mah a chhâng lêt lo. (Mk. 15:1-5) Chutiang ti tûr chuan huaisen hle a ngai a ni.
11. Engtin nge huaisenna leh hmangaihna chu a inzawm?
11 Pilata hnênah Isua chuan: “Thutak hriattîr hi ka pian chhan leh khawvêla ka rawn kal chhan a ni,” tiin erawh a hrilh ngei a. (Joh. 18:37) Pathian Jehova chuan Isua chu chanchin ṭha hril tûrin a tîr a, Isua chuan a Pa vâna mi a hmangaih avângin, chu hna thawh chu nuam a ti a ni. (Lk. 4:18, 19) Isua chuan mite a hmangaih bawk a. An nun a retheihzia chu a hriatpui a ni. Chutiang bawkin, huaisen tak leh hlauh nei lova thu kan hrilh chhan chu Pathian leh vêngte kan hmangaih vâng a ni.—Mt. 22:36-40.
Thlarau Thianghlimin Huaisen Taka Thu Hril Tûrin Min Tichak
12. Engin nge zirtîr hmasate tihlim?
12 Isua thih hnu chawlhkâr engemaw zât lekah chuan, Pathian Jehova’n zirtîr thar a belhchhah avângin zirtîrte chuan lâwm chhan tûr an nei a ni. Tihah chuan, ni khat chhûng lekin, Pentikost nî hmang tûra ram hrang hrang aṭanga Jerusalema lo kal, Juda mi leh saphun mi 3,000 vêlin baptisma an chang hial si a! Chu thil thleng chuan Juda-te zîngah tîtî a va ti tam dâwn êm! Bible chuan: “Mi tinin an hlau ta a; tirhkohte chuan thilmak leh chhinchhiahna tam tak an ti a,” tiin a sawi.—Tirh. 2:41, 43.
13. Engvângin nge unaute chu huaisenna dîla an ṭawngṭai a, chu chuan eng nge a rah chhuah?
13 Sakhaw hruaitute thinrim chuan Petera leh Johana chu an man a, zan khuain tân inah an khung a, Isua chungchâng thu sawi tawh lo tûrin thu an pe a ni. Tân in aṭanga an chhuah hnu chuan thil awm dân chu unaute hnênah an hrilh a, an zain Jehova hnênah: “Lalpa . . . i bâwihte hi huai takin i thu hrilhtîr la,” tia dîlin dodâlna an tawh chungchângah an ṭawngṭai a ni. Chu chuan eng nge a rah chhuah? “An zain thlarau thianghlimin an lo khat a, huai takin Pathian thu an hril ta” a ni.—Tirh. 4:24-31.
14. Engtin nge kan thu hrilhnaah thlarau thianghlimin min ṭanpui?
14 Pathian thu huaisen taka sawi tûra zirtîrte ṭanpuitu chu Pathian Jehova thlarau thianghlim thiltithei tak a ni tih chhinchhiah ang che. Kan thuchah dodâltute pawh tiamin, mi dangte hnêna Pathian thutak sawi tûra huaisenna chu mahnia kan neih a ni lo. Pathian Jehova hnêna huaisenna kan dîl phawt chuan a thlarau thianghlim min pe theiin, min pe ngei bawk ang. Keini pawhin, Jehova ṭanpuinain dodâlna tuar chhuak thei tûra mamawh huaisenna chu kan lantîr ve thei a ni.—Sâm 138:3 chhiar rawh.
Tûn Laia Kristiante Chuan Huaisen Takin Thu An Hril
15. Engtin nge thutak chuan tûn laia mite a indotîr?
15 Hmân lai ang bawkin, kan hunah pawh thutak chuan mite chu a la indotîr ta zêl a. Mi dangte’n Pathian kan biak dân an hriat thiam loh va, an ngaih hlut loh laiin, ṭhenkhat chuan ṭha takin an chhâng lêt thung a. Isua sawi lâwk ang ngeiin, ṭhenkhatin min sawisêl a, min nuihzat a, huat pawh min haw hial a ni. (Mt. 10:22) A châng phei chuan chanchin theh darhnaahte hian kan chanchin chu dik lo tak leh huatthlala taka thehdarh a ni ṭhîn. (Sâm 109:1-3) Chuti chung chuan, Jehova mite chuan khawvêl pumah chanchin ṭha huaisen takin an puang chhuak a ni.
16. Huaisenna chuan kan thu va hrilhte thil thlîr dân a thlâk danglam thei tih eng thiltawnin nge târ lang?
16 Kan huaisenna chuan mite chu Lalram thuchah an thlîr dân a thlâktîr thei a. Kyrgyzstan rama unaunu pakhat chuan: “Thu hrila ka chhuahnaah in neitu pakhat chuan: ‘Pathian chu ka ring a; mahse, ka rin chu Kristiante Pathian a ni lo. I rawn kal leh vaih chuan ka ui ka sehtîr ang che!’ a ti a. A hnungah chuan Sâp ui chi khat (bulldog) lian zet mai chu a thlung rûn mai a. Mahse, Lalram Chanchin Thar No. 37, ‘Sakhaw Dik Lo Tâwpna A Hnai!’ tih semna beihpui kan thlâk ṭum chuan chu inah bawk chuan an chhûngkaw zînga mi dang hmuh beiseiin ka va kal leh a. Mahse, chu pa bawk chuan kawng chu a rawn hawng leh a. Chu veleh Pathian Jehova hnênah ka ṭawngṭai vat a, chutah chu pa hnênah chuan: ‘Ni thum kal taa kan inbiakna kha ka la hre reng a, i ui pawh kha ka la hre reng asin. Mahse, kei pawh nangmah ang bawka Pathian dik awmchhun ring ve tho ka nih avângin ka kal pêl thei lo che a ni. Pathian chuan amah chawimawi lo sakhuate chu a hrem thuai dâwn a. He tract hi i chhiar chuan chu mi chungchâng chu i hriat belh thei ang’ ka ti a. Rin loh tak maiin, chu pa chuan Lalram Chanchin Thar chu a la ta hlauh mai a. Tichuan in dangah ka kalsan ta a. A hnu lawkah chu pa chuan Lalram Chanchin Thar chu keng chungin min rawn ûmzui a. ‘Hei hi ka chhiar a, Pathian thinurna ka tawn loh nân eng nge ka tih ngai?’ tiin min rawn zâwt ta a ni,” tiin a sawi. Chu pa chuan Bible a zir ṭan nghâl a, Kristian inkhâwmnaah pawh a tel ṭan ta a ni.
17. Engtin nge unaunu pakhat huaisenna chuan Bible zirlai dâwihzep tak pakhat chu a tihhuaisen?
17 Kan huaisenna chuan mi dangte pawh huaisen ve tûrin a fuih thei bawk. Russia rama unaunu pakhat chuan bus-a a chuan laiin a bula ṭhu hnênah magazine a pe a. Chu veleh, pa pakhat chu a ṭhutna aṭanga thovin, unaunu kut ata magazine chu a phih thla a, a nuai hlâwm hnuah chhuatah a paih a ni. Ring taka ânchhia lawh pahin, unaunu chu a address a dîl a, an khuaa thu hril lo tûrin a vau bawk a. Unaunu chu Jehova hnênah ṭanpuina dîlin a ṭawngṭai a, Isua thusawi: ‘Taksa tihlum theitu chu hlau suh u,’ tih chuan a inthlamuan a. (Mt. 10:28) Unaunu chu a ding chhuak a, ṭawngkam dam takin, “Ka address ka pe lo vang che a, he khuaah hian thu ka hril zêl bawk ang,” tiin a chhâng a. Tichuan, bus aṭang chuan a chhuk ta a. A hriat miah lohvin, a Bible zirpui pakhat chu bus-ah chuan a lo chuang ve reng a lo ni a. Chu nu chu mihring hlauhna avânga Kristian inkhâwmnaa tel ngam ṭhîn lo kha a ni a. Mahse, kan unaunu huaisenzia a hmuh hnu chuan, inkhâwm ṭan chu a tum ta a ni.
18. Isua anga huaisen taka thu hril tûrin engin nge ṭanpui ang che?
18 Pathian laka inmihran he khawvêlah hian, Isua ang bawka thu hril tûr chuan huaisen a ngai a ni. Chutianga huaisen tûr chuan engin nge ṭanpui ang che? Hma lam hun thlîr la, Pathian leh vêngte i hmangaihna chu tichak reng rawh. Pathian Jehova hnênah huaisenna dîlin ṭawngṭai la, Isua’n a awmpui reng che avângin mahni chauh i ni lo tih hre reng bawk ang che. (Mt. 28:20) Thlarau thianghlim chuan a tichak ang che a, Pathian Jehova’n mal a sâwm chein, a ṭanpui bawk ang che. Chuvângin, huaisen takin: “Lalpa chu mi ṭanpuitu a ni, ka hlau lo vang; mihringin eng nge mi tih theih ang?” tiin i sawi ang u.—Heb. 13:6. (w09 7/15)
Engtin Nge Kan Chhân Ang?
• Engvângin nge Pathian chhiahhlawhte tân huaisen a ngaih?
• Huaisenna chungchângah . . .
Krista hmaa mi rinawmte hnên aṭangin eng nge kan zir theih?
Isua Krista hnên aṭangin eng nge kan zir theih?
Kristian hmasate hnên aṭangin eng nge kan zir theih?
tûn laia kan Kristian unaute hnên aṭangin eng nge kan zir theih?
[Zirlai Atâna Zawhnate]
[Phêk 27-naa milem]
Isua chuan huaisen takin sakhaw hruaitute dik lohna a hai lang
[Phêk 29-naa milem]
Pathian Jehova chuan thu hril tûrin huaisenna min pe