Aligen si Jesus​—Makpel a Manpulong

“Apabayani [odino, nampakpel] kami . . . a mangisalita ed sikayo na ebanghelyo.”​—1 TES. 2:2.

1. Akin et makapasagyat so maong a balita na Panarian?

ALAY dakep na pakarengel na maong a balita! Tan say sankarakepan ed amin a balita et say maong a balita na Panarian na Dios. Ipapaseguro ed sikatayo na sayan maong a balita a manampot lay irap, sakit, ot-ot, ermen, tan patey. Satan so mangitotonton ed sikatayo diad andi-anggan a bilay, mangipaparungtal ed gagala na Dios, tan mangipapaamta no panon itayon nawalaay maapit a relasyon ed Dios. Isipen mo lagin amin et maliket a mangawat ed sayan balitan impasabi nen Jesus ed katooan. Balet makapaermen ta andi.

2. Ipaliwawa so imbaga nen Jesus a: “Linma ak dia a manggawa na pisuppiatan.”

² Oniay inkuan nen Jesus ed saray disipulo to: “Agyo isipen a linma ak dian mangiter na kareenan, noag ingen sakey a kampilan. Ta linma ak dia a manggawa na pisuppiatan na laki ed ama to, tan say anak a bii ed ina to, tan say manugang a bii ed katulangan ton bii. Et saray kakabusol na too sikaray kaamong to lanlamang.” (Mat. 10:34-36) Ag-aawaten na maslak a totoo so maong a balita. Tan kakalabanen ni ingen na arum iramay mangipupulong ed satan, anggano kapamilyaan da ni ra.

3. Anto so kaukolan tayo pian nasumpal tayo so kimey a panagpulong?

 ³ Ipupulong tayo met iramay katuaan ya impulong nen Jesus. Tan pareho met so reaksion na karaklan natan, a singa nensaman. Agtayo iya pankelawan ta oniay imbaga nen Jesus ed saray disipulo to: “Say aripen aliwan babaleg nen say katawan to. No pinasegsegang da ak, pasegsegangen da kayo met.” (Juan 15:20) Diad dakel a bansa, ag-itayo makakasagmak na panamasegsegang balet ta bubusolen da itayo tan agda itayo ikabkabilangan. Kanian, kaukolan tayoy pananisia tan pakpel pian nitultuloy tayon andi-takot ya ipulong so maong a balita.​—Basaen so 2 Pedro 1:5-8.

4. Akin et kaukolan nen Pablo so manpakpel pian makapanpulong?

⁴ Nayarin no maminsan et naiirapan ka ed ministeryom, odino ompan anggapoy pakpel mon mibiang ed pigaran aspekto na satan. Agka mapaga ta agmo bukbukor so makakaliknay ontan. Si apostol Pablo et makpel a managpulong tan aralem so pakatalos to ed katuaan, balet ta walaray panaon a nairapan met. Oniay insulat to ed saray kaagian to’d Tesalonica: “Nantepel kami nensaman, tan makapabaing so impakapairap mi ed Filipos, unong a kabat yo, apabayani [odino, nampakpel] kami ed Dios tayo a mangisalita ed sikayo na ebanghelyo na Dios ed dakel a sumpaan.” (1 Tes. 2:2) Sanen walad Filipos si Pablo tan si Silas, sikaray nilewet, impriso na saray manuley, tan saray sali ra et sinigpit na angkakabaleg a tabla. (Gawa 16:16-24) Anggaman ontan, siansian “apabayani” odino nampakpel ira pian nitultuloy so panagpulong. Panon itayo met a makapanpakpel? Aralen tayo pa no antoy akatulong ed saray lingkor na Dios nensaman pian makpel ya ipulong so katuaan nipaakar ed si Jehova. Tan aralen tayo met no panon tayon naalig so ehemplo ra.

Kaukolan so Inkakpel Pian Nasungdoay Panamusol

5. Akin et lawas kaukolan na amin a matoor ed si Jehova so inkakpel?

⁵ Siempre, say sankaabigan ya ehemplo na inkakpel et si Jesu-Kristo. Manlapu la’d inkapalsa na too, lawas a kaukolan na amin a matoor ed Jehova so inkakpel. Akin? Kayari na impanrebelde ed Eden, impasakbay nen Jehova a gulaen na saray manlilingkor ed si Satanas iray manlilingkor ed Dios. (Gen. 3:15) Tampol ya apatnagan iyan panggula sanen say matunong a toon si Abel et pinatey nen Cain. Diad saginonor, binusol na totoo si Enoc, sakey nin matoor a toon nambilay sakbay na Delap. Impropesiya ton onsabi so Dios kaiba iray masanton anghel to pian ipaakseb so panangukom ed saray agmaridios. (Jud. 14, 15) Sayan mensahe et aglabalabay na karaklan. Binusol day Enoc tan ompan pinatey da ni ingen noag labat impangangga nen Jehova so bilay to. Agaylay inkakpel nen Enoc!​—Gen. 5:21-24.

6. Akin et kaukolan nen Moises so manpakpel sanen akiarapan ed si Faraon?

⁶ Isipen pa met so inkakpel nen Moises sanen akiarapan ed si Faraon, sakey a manuley ya aglabat impasen bilang representanti na dirios noagta dios a mismo, say anak na dios ya agew a si Ra. Singa ed inmuuna ni ran Faraon, posiblin dinayew toy dilin imahen to. No antoy imbaga to, sikatoy natumbok. Tan anggapoy siopaman a nayarin mandikta ed sikato. Sikatoy makapanyari, mapaatagey, tan anawet so puso to. Satan a too so kaukolan a maminpigapigan piarapan na mauyamon pastol a si Moises tan say piarap to ni ingen et ag-iilaloan tan aglabalabay. Antoy impasakbay nen Moises? Makaderal iran bakbak. Tan antoy kinerew to? A saray pigaran milyon ya ariripen nen Faraon et abuloyan to komon ya ontaynan ed Ehipto! Diad padesir mo, kaukolan ta nen Moises so manpakpel? Siempre!​—Num. 12:3; Heb. 11:27.

7, 8. (a) Antoran subsubok so asagmak na saray matoor a lingkor nensaman? (b) Antoy akatulong ed sikara pian makpel a manuporta tan mangidepensa ed dugan panagdayew?

⁷ Kayari na pigaran siglo, siansia nin andi-takot ya indepensa na saray propeta tan arum nin matoor a lingkor na Dios so dugan panagdayew. Kabkabusol ira na mundo nen Satanas. Oniay imbaga nen Pablo: “Saray arum tinupak da ra,  tinegteg da ra, tinukso da ra, pinatey da ra ed kampilan, nanakar-akar ira dia tan diman a nankawes ira na katat na saray karnero tan saray kanding, makabos ira, apadpairap ira, akabkabil ira.” (Heb. 11:37) Antoy akatulong ed sarayan lingkor na Dios a mansiansian matoor? Diad akadkauna iran bersikulo, imbaga na apostol no antoy amabiskeg ed kinen Abel, Abraham, Sara, tan arum ni pian makapansungdo ira. Oniay inkuan to: “Inatey iraya ya agda ni inawat so saray sipan, ingen [unong ed pananisia] sikara so anengneng da tan sikara so imbano ra nanlapu ed arawi.” (Heb. 11:13) On, seguradon anggan saramay propetan singa si Elias, Jeremias, tan arum nin matoor a lingkor a makpel ya angidepensa ed dugan panagdayew, et akapansungdo lapud impanmatalek da ed saray sipan nen Jehova.​—Tito 1:2.

⁸ Saratan a matoor a lingkor nensaman et nanilalo ed marakep ya arapen. Sano paolien la ra, kalkalna iran magmaliw a perpekto tan “niliktar ed inkaaripen na kabulokan” panamegley na makasaserdoten betang nen Kristo Jesus tan saray kaiba ton 144,000. (Roma 8:21) Niarum ni, nampakpel si Jeremias tan arum nin lingkor na Dios nensaman lapud sikaray pinaseguroan nen Jehova, a singa nanengneng tayo ed sipan to ed si Jeremias: “Mibakal ira naani ed sika; balet agda ka naani taloen; ta wala ak ed sika, kuan nen Jehova, pian ilaban ta ka.” (Jer. 1:19) Diad sayan panaon, napapabiskeg itayo met sano momolimolien tayo iray sipan na Dios tan say panamaseguro ton iter to so espiritual a proteksion to.​—Uli. 2:7; basaen so 2 Corinto 4:17, 18.

Aro so Amakiwas ed si Jesus Pian Makpel a Manpulong

9, 10. Diad antoran paraan a nampakpel si Jesus sanen kaarap to (a) iray lider na relihyon, (b) iray sundalo, (c) so atagey a saserdote, (d) si Pilato?

⁹ Say Ehemplo tayo a si Jesus et nampakpel ed nanduruman paraan. Singa bilang, anggaman binusol na saray walaan na autoridad, agto pinalemew so mensahen labay ya ipasabi na Dios ed totoo. Sikatoy agtinmakot ya angiwalwal ed pansimpisimpitan tan palson bangabangat na saray maimpluensyan lider na relihyon. Prangka tan diretsaan iran kinondena nen Jesus. Aminsan et inkuan to: “Kasi kayo la, ya eskribas tan Fariseos, a mansimpisimpitan! ta mipadpara kayo ed saray [pinaputin] lubok, a diad paway nengneng toy marakerakep, balet diad dalem napno na pukepukel na saray totoo ya inaatey, tan amin a karutakan. Ontan yo met a nengneng yo so matunong ed saray totoo, balet dia ed loob napno kayo na pansimpisimpitan tan kaugsan.”​—Mat. 23:27, 28.

¹⁰ Sanen aanapen na saray sundalo si Jesus diad hardin na Getsemani, makpel ton impakabat so inkasikato. (Juan 18:3-8) Diad saginonor, sikatoy inyakar da ed Sanhedrin tan tinepet-tepetan na atagey a saserdote. Anggaman amta ton sikatoy aanapan labat na atagey a saserdote na sengegan pian napapatey, andi-takot ya imbaga nen Jesus a Sikato so Kristo tan Anak na Dios. Inyarum to ni a sikatoy nanengneng da a ‘manyudyurong ed nikawanan a lima na pakayari, tan onsabi a walad saray lurem na tawen.’ (Mar. 14:53, 57-65) Kayarin tuloy na satan, si Jesus et binalor da tan inyarap ed kinen Pilato. Sarag komon nen Pilato a sikatoy ibulos. Balet ta diad saman a pankanawnawa, agla  inebatan nen Jesus iray akusasyon ed sikato. (Mar. 15:1-5) Agawaan to irayan amin lapud pakpel to.

11. Antoy pikonektaan na inkakpel ed panangaro?

¹¹ Oniay imbaga nen Jesus ed si Pilato: “Lapud saya et nianak ak, tan lapud saya et linma ak dia ed mundo, ta pian tasian ko so katuaan.” (Juan 18:37) Ingganggan nen Jehova si Jesus ya ipulong so maong a balita, tan maliket ton sinumpal itan lapud inaro toy Ama to. (Luc. 4:18, 19) Inaro met nen Jesus iray totoo. Amta ton mairap so bilay da. Ontan met ed sikatayo, makpel tan andi-takot tayon manpupulong lapud papakiwasen itayo na aralem a panangaro ed si Jehova tan ed totoo.​—Mat. 22:36-40.

Papabiskegen Itayo na Masanton Espiritu Pian Makpel a Manpulong

12. Antoy amaliket ed saray inmuunan disipulo?

¹² Pigaran simba kayari na impatey nen Jesus, walay rason na saray disipulo a manliket ta inyarum ed sikara nen Jehova iray balon babangatan. Diad loob labat na sanagew, abautismoan so manga 3,000 Judio tan proselita a taga’d arum a bansa a linma’d Jerusalem pian selebraay Pentecostes. Seguradon satan ya agawa et pantotongtongan na amin a walad Jerusalem! Oniay inkuan na Biblia: “Sinmabi so takot ed balang kamarerwa; et dakel a makapakelaw tan saray tanda so ginawa na saray apostoles.”​—Gawa 2:41, 43.

13. Akin ya impikasi na saray agagi a makapanpakpel ira komon, tan antoy resulta?

¹³ Lapud saya et sinmanok iray lider na relihyon, kanian impaerel day Pedro tan Juan. Sanlabi da ran inkulong, tan ingganggan da ran agda la ipupulong so nipaakar ed si Jesus. Sanen sikaray nibulos la, imbalita ra so agawa ed saray agagi, tan saniiba ran impikasi so nipaakar ed sasagmaken dan isusumpa, ya inkerew da: “Katawan, . . . iyabuloy mo ed saray aripen mo a salitaen da a makmakpel so salitam.” Antoy resulta? “Napno ra ya amin na espiritu santo, et sinalita ra so salita na Dios a makmakpel.”​—Gawa 4:24-31.

14. Panon itayon tutulongan na masanton espiritu ed panagpulong tayo?

¹⁴ Imanoen a say makapanyarin masanton espiritu nen Jehova so tinmulong ed saray disipulo pian makpel dan nipulong so salita to. Kanian, say inkakpel ed panangipulong ed katuaan, anggan diad saramay agmalabay ed mensahe tayo, et agmandedepende ed dilin pakayari tayo, noagta ed pakayari nen Jehova. Sarag tan labay nen Jehova ya ikdan itayo na masanton espiritu to no onkerew itayo. Diad tulong nen Jehova, nayarian tayo met so manpakpel pian matoor tayon nasungdoan so antokaman ya isusumpa.​—Basaen so Salmo 138:3.

Makpel a Manpupulong Iray Kristiano Natan

15. Panon a naaapag iray totoo natan lapud katuaan?

¹⁵ Singa met nensaman, siansian naaapag iray totoo natan lapud katuaan. Walaray arum ya ondengel, balet walaray arum ya agda natatalosan nisay aapresyaen so panagdayew tayo. Sikatayoy balbalawen, pabpabaingan, odino bubusolen ni ingen na arum, a singa impasakbay nen Jesus. (Mat. 10:22) No maminsan et uusaren day media pian ikayat iray lingon impormasyon tan pian deralan da itayo. (Sal. 109:1-3) Ingen ta siansia nin makpel iray totoo nen Jehova a mangipupulong ed maong a balita diad interon mundo.

16. Anton eksperiensya so mangipapanengneng a nauman na inkakpel so panmoria na saray pupulongan tayo?

¹⁶ Nayarin mangumay panmoria na totoo ed mensahe na Panarian lapud inkakpel tayo. Oniay insalaysay na agin bii a taga Kyrgyzstan: “Aminsan diad lawak na kimeyan, imbaga’d siak na sakey ya akatongtong ko: ‘Manisia ak ed Dios balet ta aliwan samay Dios na saray Kristiano. Oras ya ompawil ka dia, ipaketket ta ka’d asok!’ Legan ton ibabaga itan et walad benegan to so akagulonggulong a bulldog. Ingen ta sanen ibubunog mi so Kingdom News No. 37 a ‘Magano Lay Panampot na Palson Relihyon!,’ nandesisyon ak a pawilen iman ya abung ta isipen  kon ompan sananey a membro na pamilya so nakatongtong ko. Balet ta saman met lanlamang a laki so pinmaway. Nampikasi ak a tampol ed si Jehova, insan ko inkuan: ‘Komusta kayo, sankanonot ko ni imay impantongtong tayo taloy agew lay apalabas, tan sankanonot ko met imay aso yo. Balet agko nitepel a labsanan kayo lapud manisia ak met ed tuan Dios a singa sikayo. Magano lan dusaen na Dios iray relihyon ya agmamapagalang ed sikato. Dakel ni naaralan yo nipaakar ed satan no basaen yo iya.’ Agak makapanisian inawat na laki imay Kingdom News. Insan ak la linma’d sananey ya abung. Kayari pigaran minuto, nitan la imay laki, a manaapuran inmabot ed siak, awi-awit to imay inter kon Kingdom News. Inkuan ton, ‘Abasak la. Antoy gawaen ko ey pian agak napilanor ed sanok na Dios?’” Nigapo so panangiyaral na Biblia ed saman a laki tan onaatendi met la ed saray aral.

17. Panon ya atulongan a manpakpel so sakey a matakot ya iyaaralan na Biblia lapud pakpel na sakey ya agin bii?

¹⁷ Lapud inkakpel tayo, napaseseg met so arum a manpakpel. Diad Russia, walay sakey ya agin bii ya angiyopresi na magasin ed kaabay to ed bus. Kabebekta et inmalagey so sakey a laki tan sininggaw to’d samay agi so magasin, kinesekese to itan, insan to imbasileng. Inayew-ayew to imay agi, tan pinilit ton iter na agi so address to. Tan pinagyaw ton agla manpupulong diman ed baryo. Kinmerew ed si Jehova na tulong imay agi tan ninodnonot to imay imbaga nen Jesus ya: “Agyo takotan so saray mamatey na laman.” (Mat. 10:28) Sikatoy kalmadon inmalagey tan inkuan to’d samay laki: “Agko iter ed sikay address ko, tan manpulong ak nin siansia ed baryo.” Insan la inmepas ed bus. Say ag-amta na samay agi et akalugan met manaya diman ed bus so sakey ya iyaaralan toy Biblia. Saman ya iyaaralan to et agmakakapiaral lapud takot ed too. Balet sanen anengneng toy inkakpel na agi tayo, sikatoy nandesisyon ya atendian to la ray aral.

18. Antoy makatulong ed sikan makpel a manpulong a singa si Jesus?

¹⁸ Diad sayan mauges a mundo, kaukolan so manpakpel pian makapanpulong a singa si Jesus. Antoy makatulong pian nagawaan mo itan? Onnengneng ka ed arapen. Pansiansiam a mabiskeg so panangarom ed Dios tan ed totoo. Kerew kay inkakpel ed si Jehova. Agmo lilingwanan a lawas kaibam si Jesus kanian agmo bukbukor. (Mat. 28:20) Say masanton espiritu so mamabiskeg ed sika. Bendisyonan tan tulongan ka nen Jehova. Kanian, manpakpel tan ibaga tayon: “Say Katawan sikato so mananulong ko; agak naani ontakot. Anto so nayarin gawaen ed siak na too?”​—Heb. 13:6.

Antoy Ebat Mo?

• Akin a kaukolan a manpakpel iray lingkor na Dios?

• Antoy naaralan tayo ed inkakpel . . .

na saray matoor a lingkor antis nen Kristo?

nen Jesu-Kristo?

na saray inmuunan Kristiano?

na saray agagi tayo natan?

[Tepetepet Parad Panagaral]

[Litrato ed pahina 21]

Andi-takot ya inwalwal nen Jesus so pansimpisimpitan na saray lider na relihyon

[Litrato ed pahina 23]

Iikdan itayo nen Jehova na inkakpel pian makapanpulong