Aru ia Iesu—Tutu Aere ma te Mataku Kore
Aru ia Iesu—Tutu Aere ma te Mataku Kore
“Kua akatoatoa matou kia rauka te tu mataku kore . . . kia akakite atu kia kotou i te tuatua meitaki.”—1 TESA. 2:2, NW.
1. Eaa ra te tuatua meitaki o te Patireia i riro ei ei mea marekaia?
E MEA mataora tikai kia akarongo i te tuatua meitaki! E ko te tuatua meitaki rava atu koia oki, ko te tuatua meitaki o te Patireia o te Atua. Te akapapu maira teia tuatua meitaki kia tatou e ka kore te au tu kino, te maki, te mamae, te taitaia, e te mate. Te oronga maira te reira i te manakonakoanga no te oraanga mutu kore, te akakite maira i to te Atua akakoroanga, e te akaari maira kia tatou e ka akapeea e rauka ai tetai pirianga vaitata kiaia. Manako atu koe e ka rekareka te au tangata ravarai i te akarongo i teia nuti ta Iesu i akakite mai ki te tangata nei. Ko te mea taitaia ra, kare mei te reira te tu.
2. Akamarama mai i te tuatua a Iesu e: “I aere mai nei au e akatupu i te tamaki.”
2 Kua akakite a Iesu ki tana au pipi e: “Auraka e manako e, i aere mai ei au e apai mai i te au i te enua nei; kare au i aere mai e apai mai i te au, e tamaki ra. I aere mai nei au e akatupu i te tamaki i te metua tane raua ko te tamaiti, te metua vaine raua ko te tamaine, te metua ongoai vaine raua ko te unonga vaine. E kitea oki to te tangata nei enemi i roto i tona uaorai ngutuare.” (Mata. 10:34-36) Te patoi nei te maataanga o te tangata i te reira, kare e ariki mai ana. Kua akariro tetai aronga ia ratou uaorai ei au enemi no te aronga e akakitekite aere ra i te reira, noatu e e kopu tangata piri tikai.
3. I te rave anga i ta tatou tuanga kia tutu aere eaa te ka anoanoia kia rauka ia tatou?
3 Te akakite nei tatou i taua au tuatua mou rai ta Iesu i akakite, e i te rongo anga i te reira, kua aite rai te tu o te tangata i teia tuatau mei to te manganui rai i taua tuatau ra. Ko teia rai ta tatou ka tapapa atu. Kua akakite a Iesu ki tana au pipi e: “Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou.” (Ioa. 15:20) I roto i te au enua e manganui kare tatou e aro tika atu ana i te takinga kino, inara e aro atu ana tatou i te tu akavaavaa e te tu mareka kore mai o te tangata. No reira, ka anoano tatou i te akarongo, e te ngakau toa kia rauka te akakoromaki i roto i ta tatou angaanga tutu aere i te tuatua meitaki ma te mataku kore.—E tatau ia 2 Petero 1:5-8.
4. Eaa i anoanoia ai a Paulo kia ‘akatoatoa kia rauka te tu mataku kore’ i te tutu aere?
4 Penei i tetai au taime e ngata ana ia koe i te piri atu ki roto i te angaanga orometua, me kore penei e matakutaku ana koe i te piri atu ki roto i tetai tuanga ke atu. Me koia ia, kare e ko koe ua te akapera ana. E tangata tutu evangeria ngakau toa e te mataku kore te apotetoro ko Paulo tei marama meitaki i te tuatua mou, e oti akera i tetai au taime e ngata ana rai iaia i te tutu aere. Ki te au Kerititiano i Tesalonia, kua tata a Paulo e: “I muri ake i to matou rokoia anga e te kino e te takinga kinoia anga (mei ta kotou i kite) i Philipi, kua akatoatoa matou kia rauka te tu mataku kore mei to matou Atua i te akakite atu kia kotou i te tuatua meitaki o te Atua ma te ngata tikai.” (1 Tesa. 2:2) I Philipi kua papaia a Paulo raua ko tona taeake ko Sila e te aronga mana, kua uriia ki roto i te are tapekaanga, e kua tuku atura ia raua ki roto i te patiti. (Anga. 16:16-24) Noatu ra, kua “akatoatoa [a Paulo raua ko Sila] kia rauka te tu mataku kore” i te tutu aere ua atu rai. Akapeea e rauka ai ia tatou te rave i te reira? Ei pau i te reira, ka akamanako ana tatou e eaa tei tauturu i te au tavini o te Atua i te au tuatau Pipiria kia tuatua ma te mataku kore i te tuatua mou no runga ia Iehova, e ka akara ana tatou e ka akapeea tatou i te aru anga i ta ratou akaraanga.
Anoanoia te Mataku Kore me Aro Atu i te Tu Kaitamaki
5. Eaa ra te tumu i anoano uaia ai kia rauka te tu mataku kore i te aronga tiratiratu kia Iehova?
5 Te akaraanga meitaki rava atu no te ngakau toa e te mataku kore koia oki ko Iesu Karaiti. Inara, mei muatangana mai o te tuatua enua o te tangata, e anoano uaia ana rai te tu mataku kore e te aronga tiratiratu kia Iehova. Eaa te tumu? Aru mai i te meameaau i roto i Edene, kua totou a Iehova e ka tupu te ke koia oki te kaitamaki i rotopu i te aronga e tavini ra i te Atua, e te aronga e tavini ra ia Satani. (Gene. 3:15) Kua akapapu vaveia mai taua tu kaitamaki ra i te tamate angaia te tangata tuatua tika ko Abela, e tona tuakana. I muri mai, kua akaariia taua tu kaitamaki ra kia Enoka, tetai tangata akarongo mou ke mai, tei noo ana i mua ake i te Vaipuke. Kua totou aia e ka aere mai te Atua ma te manotini ua atu o Tona aronga tapu i te akautunga i te aronga akono kore i te Atua. (Iuda 14, 15) Kare teia i te karere inangaroia. E tu makitakita tikai to te tangata ia Enoka e naringa kare a Iehova i akaope i tona oraanga, kua tamate rai ratou iaia. E tu mataku kore tikai to Enoka!—Gene. 5:21-24.
6. Eaa ra i anoanoia ai kia rauka ia Mose te tu mataku kore i te tuatua atu anga kia Pharao?
6 E akamanako katoa i te tu mataku kore ta Mose i akaari i te tuatua anga kia Pharao, e tutara aia tei manakoia e e atua uaorai, e kare aia i te komono ua no te au atua, mari ra e tamaiti na Ra, te atua o te ra. Penei e kua aite rai aia ki tetai au Pharao ke atu, e akamori ana aia i tona uaorai itoro. Ko ta Pharao tuatua ko te ture rai ia; aru tika tana tutara anga i te ture. No te mana maata, te akatietie, e te marokiakia, kare a Pharao i matau e na tetai ke e akakite mai kiaia i tana ka rave. Ko teia te tangata ta Mose, e tiaki mamoe akaaka ua, e tu putuputu ua ana ki mua—ma te kore i patiia mai ana e ma te kore katoa i marekaia mai ana. Eaa ra ta Mose i totou ei? E au mate rikarika. E eaa tana i maro atu? Te tikaanga kia tuku a Pharao i te au mirioni ua atu o tana au tuikaa kia akaruke i taua enua ra! Kua anoanoia ainei kia rauka ia Mose te tu mataku kore? Papu rava e, ae!—Nume. 12:3; Ebe. 11:27.
7, 8. (a) Eaa te au tu kino tei tupu ki te aronga akarongo mou tei noo ana i mua ake ia Karaiti? (e) Eaa tei tauturu i te aronga i noo ana i mua ake i te tuatau o te au Kerititiano, kia akaari i te tu mataku kore i roto i te tamou marie e te turuturu anga i te akamorianga mou?
7 I te au anere mataiti tei aru mai, kua turuturu ua atu rai te au peroveta e etai atu au tavini akarongo mou o te Atua i te akamorianga mou, ma te mataku kore. Kare te ao o Satani i takinga meitaki ana ia ratou. Te akakite maira a Paulo e: ‘I peîia ratou i te toka, i kekeia ratou ki rotopu e taka ke atura, i timataia, i tamate takiriia i te koke; i koka aere ua ratou ma te kakau kiri mamoe e te kiri puaka-nio, ma te puapinga kore, te tairoia, e te takinga-kinoia ra.’ (Ebe. 11:37) Eaa tei tauturu i taua au tavini tiratiratu o te Atua kia vai ngaueue kore ua? I roto i etai au irava i muao, kua akakite te apotetoro e eaa tei akamaroiroi ia Abela, ia Aberahama, ia Sara, e etai ke atu kia akakoromaki. Kua akakite aia e: “Kare rai i rauka tei tuatuaia maira, kua akara ra [ma te akarongo] i taua au mea ra i te atea ke, e kua akarongo tikai, e kua āriki marie.” (Ebe. 11:13) Kare e ekoko e, ko te au peroveta mei ia Elia, ia Ieremia, e etai atu aronga akarongo mou i mua ake i te tuatau o te au Kerititiano tei turuturu i te akamorianga mou ma te mataku kore, kua tauturu katoaia rai kia akakoromaki na te akatinamou anga i to ratou irinakianga ki roto i te au taputou a Iehova.—Tito 1:2.
8 Kua akara tamou taua aronga akarongo mou o te tuatau i mua ake i te au Kerititiano, ki tetai oraanga manea e te inangaro maataia i te tuatau ki mua. Me akatuia mai, ka rauka ia ratou te turanga ara kore e ka “akaora katoaia te au mea angaia nei i te tapeka o te mate” na roto i te au angaanga a te kau taunga koia oki ko Iesu Karaiti e tona au taunga tauturu, e 144,000. (Roma 8:21) Tetai, kua rauka katoa ia Ieremia e etai atu au tavini mataku kore o te Atua i te au tuatau taito te ngakau toa no te akapumaanaanga a Iehova, tei akaataia mai i roto i tana taputou kia Ieremia e: “E tamaki mai oki ratou ia koe, e kare ra koe e rauka ia ratou; tei ia koe au, ei akaora ia koe, te tuatua mairā Iehova.” (Iere. 1:19) I teia tuatau me akamanako tatou no runga i ta te Atua taputou no tatou i te tuatau ki mua, e tana akapumaanaanga kia paruru ia tatou i te pae vaerua, ka akamatutu katoaia rai tatou.—Mase. 2:7; e tatau ia 2 Korinetia 4:17, 18.
Akakeuia a Iesu e te Aroa kia Tutu Aere ma te Mataku Kore
9, 10. Na roto i teea au mataara i akaari ei a Iesu i te tu mataku kore i mua (a) i te au arataki akonoanga, (e) i tetai pupu vaeau, (ng) i te taunga maata, (i) ia Pilato?
9 Kua akatutu mai to tatou Akaraanga ko Iesu, i te tu mataku kore na roto i te au mataara tukeke. Ei akatauanga, noatu te makitakitaia maira aia e te aronga e tikaanga e e mana to ratou, kare rava a Iesu i akaiti mai ana i te puapinga o te karere ta te Atua e inangaro ra i te tangata kia kite. Kua akaari mataku kore pu ua mai aia i te au arataki akonoanga, no to ratou tu irinaki tau kore i to ratou uaorai tu tika, e no ta ratou au apiianga pikikaa katoa. Kua akaapaia taua au tangata ra, e kua akakite tika atu a Iesu i te reira kia ratou ma te taka meitaki tikai. I tetai atianga kua akakite aia e: “Aue kotou, e te au tata tuatua, e te Pharisea e, e aronga pikikaa! te arite nei kotou i te tanumanga akateateaia nei, tei akaieie i vao ake, ko roto ra, kua ki ïa i te ivi turuma e te au mea viivii katoa. Koia katoa kotou na, mei te aronga tuatua-tika kotou i vao ake i ta te tangata nei akara anga, ko roto ra, te ki nei ïa i te pikikaa e te kino.”—Mata. 23:27, 28.
10 I te aroia atu anga e tetai pupu vaeau i roto i te aua i Getesemane, kua akakite tika atu a Iesu kia ratou e koai tikai aia, ma te ngakau toa. (Ioa. 18:3-8) I muri mai kua aratakiia atu aia ki mua i te Sunederi e kua uiuiia atu tetai au uianga e te taunga maata kiaia. Noatu e kua kite aia e te kimi ra te taunga maata i tetai kotoeanga kia tamate iaia, kare a Iesu i mataku ana i te akapapu atu e Koia te Karaiti, e te Tamaiti a te Atua. Kua karanga katoa atu aia e ka kite ratou iaia “i te noo anga i te rima katau o Tei mana ra, e te aere anga mai na runga i te tiao.” (Mare. 14:53, 57-65) I muri poto ua ake, kua tu a Iesu tei tapekaia ki mua ia Pilato, tei iaia te tika kia tuku atu iaia kia aere. Inara kua noo muteki ua a Iesu i te ariu atu anga ki te au akaapaanga iaia. (Mare. 15:1-5) No teia au mea ravarai tei tupu ka anoano maataia te ngakau toa.
11. Eaa te pirianga o te tu mataku kore ki te aroa?
11 Kia Pilato, kua karanga atu a Iesu e: “I anau mai ei au nei, i aere mai ei au ki te ao nei, e akakite i te tuatua-mou.” (Ioa. 18:37) Kua akamana a Iehova ia Iesu kia tutu aere i te tuatua meitaki, e kua rekareka maata a Iesu i te rave i te reira no te mea kua inangaro tikai aia i tona Metua. (Luka 4:18, 19) E aroa katoa ana a Iesu i te tangata. Kua kite aia i te tu ngata o to ratou oraanga. Mei te reira katoa rai to tatou tu ngakau toa e te mataku kore i te akakitekite aere, no te mea e oonu tikai to tatou inangaro i te Atua e to tatou aroa i to tatou tangata tupu.—Mata. 22:36-40.
Akamana te Vaerua Tapu ia Matou kia Tutu Aere ma te Mataku Kore
12. Eaa tei akatupu i te rekareka no te au pipi i mua ana?
12 I te au epetoma tei aru mai i te mate o Iesu, kua rauka i te au pipi tetai tumuanga tau no te rekareka no te mea kua kapiti mai a Iehova i te aronga tei akaoraia kia ratou. Ae oki, i te ra okotai ua, mei tetai 3,000 ngati Iuda e te au poroteraita mei te au enua mai e manganui, tei aere mai ki Ierusalema i te akamaara i te Penetekote, e kua papetitoia! Kare e kore e kua riro teia ei tuatua anga na te ngati Iuda no runga i taua tupuanga ra! Te karanga ra te Pipiria e: “E rokoia iora ratou ravarai e te mataku, e manganui te mea umere e te akairo i raveia e te au aposetolo.”—Anga. 2:41, 43.
13. Eaa te tumu i pure ei te au taeake no te tu mataku kore, e eaa tei tupu mai?
13 No to ratou riri, kua opu te au arataki akonoanga ia Petero raua ko Ioane, kua tuku ia raua ki roto i te are tapekaanga i te po, e kua akaue atura ia raua auraka e tuatua no runga ia Iesu. I te tukuia mai anga ki vao, kua ripoti atu nga tokorua ki te au taeake e eaa tei tupu, e kua pure ratou pouroa no runga i te patoianga ta ratou e aro atura, i te pati anga e: “E te Atu [Iehova], . . . e akamaroiroi mai i to au tavini kia tuatua ua i taau tuatua ma te mataku kore.” Tei tupu mai? ‘E akakiia maira ratou ravarai i te vaerua tapu, kua tuatua ua iora i te tuatua a te Atua ma te mataku kore.’—Anga. 4:24-31.
14. Akapeea te vaerua tapu i te tauturu anga ia tatou i roto i te angaanga tutu aere?
14 Ka akara ana, e na te vaerua tapu ririnui i tauturu i te au pipi kia akakite i te tuatua a te Atua ma te mataku kore. Ko te ngakau toa kia akakite i te tuatua mou ki etai ke, e ki te aronga katoa e patoi maira i ta tatou karere, tei runga te reira ia Iehova, kare ia tatou. Ka rauka ia Iehova e ka oronga mai rai aia i tona vaerua tapu me pati tatou kiaia. Ma te tauturu a Iehova, ka rauka katoa ia tatou i te akaari i te tu mataku kore tei anoanoia kia autu tatou i tetai ua atu patoianga.—E tatau ia Salamo 138:3.
Tutu Aere te Au Kerititiano ma te Mataku Kore i Teia Tuatau
15. E akapeea ana te tuatua mou i te akatakake anga i te tangata i teia tuatau?
15 I to tatou nei tuatau, e mei te au tuatau i topa, te akatakake nei rai te tuatua mou i te tangata. Te ariu meitaki ua maira tetai pae, kareka tetai papaki kare ratou e marama ana, e kare katoa e akangateitei ana i ta tatou akamorianga. Tetai aronga e akaapa ana ratou, e aviri ana, me kore e makitakita mai ana ratou ia tatou mei ta Iesu rai i totou. (Mata. 10:22) I tetai au taime, e riro ana tatou ei takete no te au tuatua pikikaa, e te au tuatua akakino tapikipiki na roto i te nuti. (Sala. 109:1-3) Kareka ra, te akakitekite mataku kore ua nei rai te iti tangata o Iehova i te tuatua meitaki, i te enua katoa nei.
16. Eaa te tupuanga e akaari maira e ka riro te tu mataku kore ei akatuke i te manako o te aronga e tutu atura tatou?
16 Penei ka riro to tatou tu mataku kore ei akakeu i te tangata kia akatuke i to ratou manako no runga i te karere o te Patireia. Te akakite ra tetai tuaine no Koketitani e: “Iaku i roto i te ngai tutu aere, kua akakite mai tetai pu ngutuare kiaku e: ‘E irinaki ana au i te Atua, eiaa ra i te Atua o te au Kerititiano. Me oki akaou mai koe ki teia aua, ka tuku atu au i taku puakaoa kia katikati ia koe!’ I muri iaia te tu ua maira tetai aka puakaoa kua tapekaia ki te vivi. Inara, i te tuatau o te kamupeini e tua aereia ra te Tuatua Patireia Nu. 37, ‘Te Vaitata Maira te Openga no te Akonoanga Pikikaa!,’ kua manako au e oki atu ki taua are ra ma te irinaki e ka aravei atu i tetai mema i roto i te pamiri o taua tangata ra. Inara, na taua tangata ra i vai mai i te pa. Kua pure viviki atu au kia Iehova e oti kua karanga atu e: ‘Kia orana, te maara nei iaku ta taua pukapukaanga e toru ra i topa akenei, e te maara katoa nei rai au i taau puakaoa. Inara kua inangaro au i te apai mai i teia vaanga pepa no te mea mei ia koe rai, okotai rai aku Atua mou tikai e irinaki nei. Kare e roa atu ana ka akautunga te Atua i te au akonoanga kare e akangateitei ana iaia. E maata atu taau ka kite no runga i te reira me tatau koe i teia.’ Kua poitirere tikai au no te mea kua ariki mai taua tangata ra i te Tuatua Patireia. I reira kua aere atu au ki tetai are ke mai. Nga mea miniti i muri mai, kua oro mai taua tangata ra i te aru iaku e te aenga pepa o te Tuatua Patireia i roto i tona rima. ‘Kua oti iaku te tatau,’ i nana ai. ‘Eaa taku ka rave kia kore te riri o te Atua e iri mai ki runga iaku?’” Kua akamataia atu tetai apii, e kua akamata aia i te aere mai ki te au uipaanga Kerititiano.
17. Akapeea te tu mataku kore o tetai tuaine i te akamatutu anga i tetai vaine apii Pipiria e mataku ua ra i te tangata?
17 Ka riro katoa to tatou tu mataku kore ei akamaroiroi i etai ke kia rauka te ngakau toa. I Rutia, kua oronga atu tetai tuaine e na runga ra i te bus, i tetai makatini ki tetai patete. I reira, kua rere mai tetai tangata mei tona nooanga, kua uuti i te makatini mei roto i te rima o te tuaine e kua komirimiri i te reira e kua titiri atu ki runga i te taua. I te tao maata anga atu iaia, kua maro aia kia akakite mai te tuaine i tona ngai e noo ra e kua akamatakite mai iaia e auraka e tutu aere i roto i te oire. Kua pure te tuaine kia Iehova kia tauturu mai, e kua akamaara kiaia uaorai i te au tuatua a Iesu e: “Auraka e mataku i te ta mai i te kopapa nei.” (Mata. 10:28) Kua tu aia ki runga na roto i te tu au ua e kua akakite atu ki taua tangata ra e, “Kare au e akakite atu i toku ngai e noo ana, e ka tutu aere ua atu rai au i roto i te oire.” I reira kua eke atu aia mei runga i te bus. Ma te kite kore o te tuaine e, tei runga i te bus tetai vaine e apii atu ana aia i te Pipiria. Kua akatika ua taua vaine ra i te mataku i te tangata kia arai iaia i te aere ki te au uipaanga Kerititiano. Inara i muri ake i te kite anga i te tu mataku kore o to tatou tuaine, kua manako taua vaine apii Pipiria ra e ka akamata aia i te aere ki te au uipaanga.
18. Eaa te ka tauturu ia koe kia tutu aere ma te mataku kore mei ta Iesu i rave?
18 I roto i teia ao kare i kite i te Atua, ka anoanoia te tu mataku kore kia rauka te tutu aere mei ia Iesu rai. Eaa ra te ka tauturu ia koe kia rave i te reira? E akara ki te tuatau ki mua. E akamatutu ua rai i toou aroa no te Atua e no toou tangata tupu. E pure kia Iehova kia rauka te ngakau toa. E akamaara ua rai e, kare rava koe e noo e ko koe anake ua, no te mea tei vaitatao a Iesu uaorai ia koe. (Mata. 28:20) Ka akamatutu te vaerua tapu ia koe. E ka akameitaki a Iehova ia koe e ka turuturu ia koe. No reira, kia ngakau toa tatou e kia karanga e: “Ko Iehova toku tauturu, kare au e mataku; eaa ta te tangata kia rave mai iaku?”—Ebe. 13:6.
Akapeea Koe me Pau?
• Eaa ra te au tavini o te Atua i anoano ei i te tu mataku kore?
• No runga i te mataku kore, eaa ta tatou ka mou mai mei . . .
te aronga akarongo mou tei noo ana i mua ake ia Karaiti?
ia Iesu Karaiti?
te au Kerititiano i muatangana?
te au oa Kerititiano i teia tuatau?
[Au Uianga Apii]
[Tutu i te kapi 21]
Akaari mataku kore pu ua mai a Iesu i te angaanga a te au arataki akonoanga
[Tutu i te kapi 23]
Oronga mai a Iehova i te ngakau toa kia rauka ia tatou te tutu aere