Kwoj Jerbale Ke “Ial eo Emmõntata” Ej Yokwe?

‘ANIJ ej yokwe.’ Nan kein an dri jilik Jon rej kalikar bwe eñin karkar eo elaptata karkarin Anij. (1 Jon 4:8) Eñin unin armij ro remaroñ druaklok ñõn Anij im ejaak juõn kõtan ebak iben. Ilo wãwen it ko yokwe eo an Anij ej jelet kij? Kar ba bwe: “Men ko jej yokwe kiõ renaj jelet mour eo ar tokelik.” Men in emol, im bareinwõt kin ro jej yokwe ir im rej yokwe kij, renaj jelet kij. Kinke Anij ear kõmõnmõn kij ilo wãwen wõt E, jemaroñ jerbale yokwe eo An ilo mour ko ar. (Jen. 1:​27) Kin men in, dri jilik Jon ear je bwe jej yokwe Anij kinke “E ar yokwe kij mokta.”​—1 Jon 4:​19.

Nan ko Emen Rej Kemelele kin Yokwe

Dri jilik Paul ear ba bwe yokwe ej “ial eo emmõntata.” (1 Kor. 12:31, UBS) Etke ear konono kin yokwe ilo wãwen in? Yokwe rot eo Paul ear konono kake? Ñõn jela uak ko, jen lukkun etale ta melelen nan in “yokwe.”

Dri Grik ro ilo ien ko etto rar kajerbal nan kein emen, ilo elõñ wãwen ko, ñõn kemelele ilo tibrik kin yokwe, rej stor·geʹ, eʹros, phi·liʹa, im a·gaʹpe. Ian nan kein aolep, nan in a·gaʹpe ej jitõñlok ñõn Anij eo ej “yokwe.”  * Ikijen yokwe in, juõn dri meletlet etan, William Barclay, ear je ilo buk eo an New Testament Words im ba: “Agapē ej walok jen lemnok eo ar im jab jen iñjake eo wõt ar me ej walok jen buruer; ej juõn berber kin unin ar mour. Elaptata ñõn kwalok agapē, jej aikwij lukkun kate kij.” Ilo aolepen kemelele kein, ej kalikar bwe a·gaʹpe ej yokwe eo ej wawa ion berberin kien ko an Anij, im ej kitibuj iñjake. Kinke eor kien ko rebwir im ko rejime, eaurõk bwe dri Kristian ro rej aikwij lor kien ko rejime an Jeova Anij me rej ber ilo Baibel eo. Ñe jej keiri kemelele ko ilo Baibel kin nan in a·gaʹpe iben nan kein jet me rej walok bareinwõt ilo Baibel eo, stor·geʹ, eʹros, im phi·liʹa, jenaj melelelok kin yokwe eo me jej aikwij in jerbale.

Yokwe eo Ikõtan Baamle

Elukkun emõn ñe baamle ko rej burukuk wõt im yokwe dron. Stor·geʹ, ej nan in Grik, ekkã kajerbal nan in ñe rej jitõñlok ñõn yokwe eo ikõtan ro uan juõn baamle. Dri Kristian  ro rej kate ir ñõn kwalok yokwe ñõn ro uan baamle ko air. Paul ear kanan bwe ilo ran ko eliktata, armij ro rejamin “yokwe ro nukiir.” *​—2 Tim. 3:​1, 3.

Ekaburomõjmõj bwe ilo ran kein edriklok an ro uan baamle ko kwalok yokwe ñõn dron. Etke elõñ kõra ro rebõroro rej mõn lojiir? Etke elõñ baamle ko rejjab koutiej jemeir im jineir? Etke elõñlok dri belele ro rej jibel jen dron? Uak eo ej kinke edriklok kwalok yokwe.

Bareinwõt, Baibel eo ej katakin bwe ‘buruen armij ejelã mon jen men otemjej.’ (Jerm. 17:9) Yokwe eo ikõtan baamle ej kitibuji iñjake ko rej walok jen buruer. Ekaitoktoklimo bwe Paul ear kajerbale a·gaʹpe ñõn jitõñlok ñõn yokwe eo juõn eman ej aikwij kwalok ñõn kõra eo belen. Paul ear keiri yokwe in ñõn yokwe eo Jisõs ear kwalok ñõn congregation eo. (Ep. 5:​28, 29) Yokwe in ej berber ion kien ko an eo ej Unjen karõk in baamle, ej Jeova.

Elañe emol ar yokwe ro uan baamle eo ar, men in enaj kamakit kij ñõn kwalok koutiej ñõn jiner im jemer ak ñõn bõk erro eo ñõn kakajiriri ajiri ro nejir. Ej bareinwõt kamakit ro jinen im jemen ñõn kowe ajiri ro nejiir ñe ekkar im bõprae jen air kalloke an ajiri ro kõmõni men ko renana.​—Ep. 6:​1-4.

Yokwe eo Ikõtan Dri Belele ro im Kien ko ilo Baibel

Yokwe eo ikõtan dri belele ro ej menin letok jen Anij. (Ken. 5:​15-​17) Bõtab, dri jeje ro me Anij ear kakõrmol ir ñõn je Baibel eo rar jab kajerbale nan in, eʹros, me ej jitõñlok ñõn yokwe eo ikõtan dri belele ro wõt. Etke rar jab kajerbale? Jet yiõ ko remotlok, buk in Imõniaroñroñ eo ear kwalok kemelele in: “Ilo aolepen lõl in armij ro ilo ran kein rej kõmõne ejja bwir eo wõt dri Grik ro ilo ien ko etto rar kõmõne. Rar kabuñ ñõn anij eo Eros, barikrik ñõn lokatok eo an im lelok menin katok ko ñõn e. . . . Ak bwebwenato ko an lõl rej kwalok bwe kabuñ rot in kin belele wan kar bõktok tokjen ko renana, retõr jen joñõn im ej kejebel dri belele ro. Bwelen eñin unin dri jeje Baibel ro rar jab kajerbal nan in.” Ñõn ar bõprae kij jen kauwatata in, iñjake ko ar rej aikwij berber ion kien ko ilo Baibel eo. Inem kwon kajitõk ibõm mõke, ‘Iñjake eo aõ ñõn eo beleiõ (eʹros), ej ke errã iben yokwe eo emol?’

 Jodrikdrik ro me rej edrep ñõn kien ko ilo Baibel eo renaj drebij wõt mour erreo meñe rej ber ilo ien eo ñe kõnan eo ñõn belele ekajurlok jen mokta. (Kol. 3:5) Jej watõk mare bwe ej juõn menin jolit ekwojarjar jen Jeova. Jisõs ear ba nan kein ikijen dri belele ro emwij air mare: “Men eo Anij e ar kobaik, armij en jab kijbili.” (Mat. 19:6) Jet armij rej mõnõnõ in ber iben dron mae ien eo remõk kin dron, ak ñõn kij jej watõk mour in mare bwe ej juõn karõk eaurõk im eto an ber. Elañe abañ ko rej walok, jejjab mõkõj in jibel jen dron ak jej kate kij ñõn kwalok karkar ko karkarin Anij bwe jen maroñ lo mõnõnõ ilo mour in baamle eo ar. Ar kate kij ilo wãwen in enaj bõktok mõnõnõ eo ej ñõn in drio.​—Ep. 5:​33; Hib. 13:4.

Yokwe an Ro Rej Jimjeraik Dron

Jej mõnõnõ ñe eor ro mõtar. Juõn jabõnkennan ilo Baibel eo ej ba: “Eor juõn jera ej edrep wõt jen juõn jein im jãtin.” (Ken. 18:24) Jeova ekõnan bwe en or juõn mõtar emol. Elõñ armij rejela kin jimjera eo ebak ikõtan Devid im Jonetan. (1 Sam. 18:1) Im Baibel eo ej ba bwe Jisõs ear “yokwe” dri jilik Jon. (Jon 20:2) Nan in Grik eo kin “yokwe” ak “jimjera” ej phi·liʹa. Ejjab nana ñõn an juõn kõmõn juõn kõtan ebak iben juõn jein ak jãtin ilo congregation eo. Bõtab, ilo 2 Piter 1:7 (UBS), ej rejañ kij ñõn kwalok yokwe (a·gaʹpe) ñõn ro jeer im jãter ilo congregation eo (phi·la·del·phiʹa ej itok jen nan in Grik eo phiʹlosʹ, melelen “jimjera,” im nan in Grik eo juõn a del phosʹ, melelen “jeer im jãter”). Elañe jekõnan bwe jimjera eo ar iben ro jeer im jãter en to an ber, jej aikwij jerbale nan in kakabilek in. Emõn jen kajitõkin kij mõke, ‘Aõ kwalok yokwe eo ikõtaõ im ro jeiõ im jãtiõ ilo congregation eo, ej errã ke iben kien ko ilo Baibel?’

Nan in Anij ej jibõñ kij ñõn bõprae kij jen ar kwalok kalijeklok ñõn ro mõtar. Jen jab kõmõne wãwen kein ruo: juõn jej kwalok joij ñõn ro jej ebake ir im ruo jejjab kwalok joij ñõn ro me rejjab mõtar. Bareinwõt, jejjab nebar armij le jen joñõn bwe ren erom ro mõtar. Men eo eaurõk ej bwe ar jerbale kien ko ilo Baibel ej jibõñ kij ñõn kile ta eo ej aikwij or iben armij eo jej kalet bwe en jerar im bõprae ‘kõmao ko renana me rej kakõt mõnit ko remõn.’​—1 Kor. 15:33.

Lukluk in Yokwe eo Ejej Uan!

Yokwe ej kaburukuk dri Kristian ro ejej uan! Dri jilik Paul ear je: “Yokwe en jab ankiliriõp. . . . Kin yokwe jimjãn jimjãten, komin menoan dron.” (Rom. 12:​9, 10) Emol bwe eor iben dri Kristian ro‘yokwe (a·gaʹpe) eo ejjab ankiliriõp.’ Yokwe in ejjab itok jen iñjake wõt ak ej berber ion kien ko ilo Baibel. Bõtab, Paul ej bareinwõt konono kin “yokwe jimjãn jimjãten” (phi·la·del·phiʹa) im “menoan dron” (phi·loʹstor·gos). Ekkar ñõn juõn dri meletlet, “yokwe jimjãn jimjãten” ej “yokwe eo ebak ikõtan ruo armij, e joij, tiriamokake, im mõnõnõ in lelok jibõñ.” Ñe ekoba iben a·gaʹpe, ej kalaplok juõn kõtan ebak ikõtan dri kabuñ ro an Jeova. (1 Tes. 4:9, 10) Nan eo phi·loʹstor·gos ej walok juõn wõt alen ilo Baibel im ej jitõñlok ñõn yokwe eo ikõtan ro uan baamle eo.

Yokwe eo ej kaburukuk dri Kristian ro remol ej kobaik yokwe eo ikõtan baamle im ro rej jimjeraik dron iben yokwe eo ej berber ion kien ko an Baibel. Ilo Kristian congregation eo, ejjab juõn jikin kwoj ion armij ro jet im bwebwenato ibeir, ak ej juõn baamle rej burukuk ñõn kabuñ ñõn Jeova Anij. Jej watõk dron einwõt juõn baamle im kin men in jej kir dron ro jeer im jãter. Jej yokwe ir einwõt ro mõtar, im aolep ien kõmõn ko ar ñõn ir rej ekkar ñõn kien ko an Baibel. Jen aolep wõnmanlok im kwalok yokwe in me ej kaburukuk im kalikar congregation eo emol an Kristian.​—Jon 13:⁠35.

[Kamelele ko itulal]

[Naan ko ilo peij 12]

Ewi wãwen kwomaroñ kwalok yokwe eo me ej kaburukuk kij?