¿Aswan allin ñannintachu purichkanki?

‘DIOSQA kuyakuqllañam.’ Juanpa kayna nisqanmi qawachin Diospa sumaq kayninkunamanta mayqan puntapi kasqanta (1 Juan 4:8). Runakunata Jehová Dios kuyasqanraykum payman asuykuspa amistadnin kachwan. ¿Imapiwanraqmi yanapawanchik Diospa kuyawasqanchik? Imapas kuyasqanchikmi imayna runa kananchikpaq tanqawanchik. Runakunata otaq imakunatapas kuyasqanchikmantam imayna runakunapas kasunchik. Kuyawaqninchik runakunapas paykuna hina kananchikpaqmi cambiawanchik. Diosman rikchakuq unanchasqa kasqanchikraykum atichwan kuyakuynin qatipakuyta (Gen. 1:27). Chaymi Juan nirqa: “Diostaqa kuyanchik paypuni puntata kuyawasqanchikraykum”, nispa (1 Juan 4:19).

Kuyakuymanta niq tawa rimaykuna

Pablopa nisqanman hinaqa, kuyakuyqa “aswan allin” ñanmi (1 Cor. 12:31). ¿Imanasqataq chaynaqa? ¿Imayna kuyakuymantam rimachkarqa? Yachanapaq qawasun kuyakuy niq rimay ima ninan kasqanmanta.

Ñawpaq tiempopi griegokunaqa kuyakuymanta rimaspankum tawa rimaykunata servichikuqku: storgué, éros, filía hinaspa agápe niqta. Jehová ‘Diosqa kuyakuqllañam’ nisqanpim Bibliaqa servichikun agápe nisqa rimayta. * William Barclay sutiyoq profesormi kayna kuyaymanta Palabras griegas del Nuevo Testamento qellqapi nirqa: “Agape nisqaqa yuyaywan kuyaymi. Manam imatapas chaylla kuyaychu aswanqa kamachikuyman hina allinta tanteaspa kuyaymi. Chayqa tupanmi munasqanchikwan”, nispa. Hinaptinqa, agápe nisqaqa allinta tanteaspa kamachikuyman hina kuyaymi. Ichaqa manam chaywanqa piensanachu mana sientispa kuyay kasqantaqa. Yachananchikmi, manam lliw kamachikuykunachu allinninchikpaqqa. Chaymi cristianokunaqa Bibliapa nisqanman hina kuyanakunanchik. Agápe nisqa kuyakuyta storgué, éros hinaspa filía nisqa kuyakuykunawan tupachispaqa, allintachá entiendesun kawsakuyninchikpi imayna kuyakuyniyoq kanamanta.

 Ayllupi kuyanakuymanta

¡Mayna sumaqmi kuyanakuspa hinaspa hawkayaypi kawsakuq familiapi kayqa! Griego idiomapiqa Storgué nisqa rimaytam servichikurqaku familiapi kuyanakuymanta rimaspanku. Cristianokunaqa kallpanchakunchikmi ayllunchikta kuyanapaq, Pablopa willasqanman hinam kay tukupay tiempopi runakunaqa “mana kuyakuqkuna” kanku (2 Tim. 3:1, 3).

Arí, familia ukupi kuyakuyqa chinkachkanmi. ¿Imanasqataq achka warmikuna abortanku? ¿Imanasqataq achka runakunaqa qonqarunku yuyaq ayllunkuta? ¿Imanasqataq achkallaña divorciakunku? Familiapi ‘mana kuyakuy’ kasqanraykum.

Tukuy sonqonchikmantam ayllunchiktaqa kuyanchik, ichaqa manam qonqananchikchu Bibliapa kayna nisqanta: “Tukuy imamantapas engañakuqllañam runapa sonqonqa” (Jer. 17:9). Huk cristiano señoranta kuyananmanta apostol Pablo nispanqa agápe nisqatam servichikurqa. Chaymantapas, chayna kuyakuytaqa tupachirqa qatiqninkunata Jesuspa kuyasqanwanmi (Efe. 5:28, 29). Chayna kuyayqa familiata rikurichiq Jehová Diospa nisqanman hina kuyaymi.

Familiankuta sonqomanta kuyasqankum tayta-mamakunata harkanqa wawa-churinkuta mana llumpayta kuyapayaspan munasqallankuta ruraqta mana saqenankupaq. Astawanqa yanapanqam tayta-mama kasqankuwan cumplinankupaq hinaspa correginanku kaptin kuyakuywan correginankupaqpas (Efe. 6:1-4). Chaynataq, llapanchiktam kallpanchawanchik yuyaq tayta-mamanchikta atiendenapaq.

Warmi-qari kuyanakuymantawan Bibliapa nisqanmanta

Casadokunapa kuyanakusqankuqa Diospa sumaq regalonmi (Pro. 5:15-17). Ichaqa, Bibliata qellqaqkunam chayna kuyakuymanta rimaspankuqa éros palabrataqa mana servichikurqakuchu. ¿Imanasqa? Puntataraqmi La Atalaya revista nirqa: “Kunanpas runakunaqa ñawpaq griegokuna hinam pantachkanku. Paykunam Eros nisqata taytachata hina yupaychaqku, altarninpi qonqoraqku hinaspa ofrendakunata qoqku. [. . .] Chayna rurayqa huchapakuyman, penqayman hinaspa mana controlakuymanmi runata aparqa. Chayraykuchá Biblia qellqaqkunaqa éros palabrataqa mana servichikurqakuchu”. Pitapas rikchayllanta otaq warmi-qari puñuyta piensaspa qawanamantaqa, warmi-qari kuyanakuyqa kanan agápe nisqa kuyakuyman hinam otaq Bibliapa nisqanman  hinam. Tapukusunchik: “¿Chaynachu kuyakuyniy kachkan casado vidaypi?”, nispa.

Mozo-sipaskunaqa ‘waytarisqan’ otaq warmiwan hinaspa qariwan ancha puñuy munasqan tiempopim, chuya kanankupaq Diospa kamachikuyninkunata kasukunanku (1 Cor. 7:36, NM; Col. 3:5). Casarakuyqa Jehová Diospa rikurichisqanmi, chaynatam cristianokunaqa qawanchik. Casadokunamanta rimaspanmi Jesus nirqa: ‘Runaqa manam rakinmanchu Diospa kuskanchasqantaqa’, nispa (Mat. 19:6). Chaymi casado vidataqa ancha chaninniyoqta qawananchik, warmi-qari puñunapaq tiempollapi allin kasqanta qawanamantaqa. Sasachakuy kaptinpas manam rakinakuypichu piensanchik aswanqa tukuy sonqomantam kallpanchakunchik Diosta serviq hina allichanapaq. Kaymi yanapawasun kusisqa kanapaq (Efe. 5:33; Heb. 13:4).

Amistadkuna kuyaymanta

¡Manam allinchu kachwan mana amistadniyoqqa! Bibliam nin: ‘Kanmi wawqemantapas aswan confiakunaraq amigokuna’, nispa (Pro. 18:24). Jehová Diosqa munanmi cheqap amistadniyoq kananchikta. Ejemplopaq, allin amistadmi karqaku Davidwan Jonatan (1 Sam. 18:1). Bibliam willawanchik discipulon Juanta Jesus ‘kuyasqanmanta’ (Juan 20:2). “Amistad” otaq “kuyay” nisqa palabraqa griego rimaypi filía nisqamantam tikrakun. Congregacionpi kaqkunata wakinta aswan kuyaptinchikpas, 2 Pedro 1:7 yuyachiwanchik ‘wawqe-panintin sientinakusqanchikman’ agápe kuyakuyta yapananchikpaq. Amistadninchik unaypaq kananpaqqa chay consejotam kasukunanchik. Tapukunanchikmi: “¿Amistadniyta kuyasqayqa Bibliapa nisqanman hinachu kachkan?”, nispa.

Bibliapa nisqanman hina kaptinqa manam amistadninchikkunamanqa sayapakusunchu nitaq paykunallatachu entiendesun, aswanqa llapanwanmi chaynalla kasun. Manataqmi alabaq tukusunchu amistadkunata tarinapaqqa. Aswanqa allinta tanteaspam amistadninchikkunata akllasunchik hinaspam karunchakusun ‘mana allin amistadkunamanta’ (1 Cor. 15:33).

Kuyakuymi huñulla tarichiwaqninchikqa

Mana tupachiy atinam cristianokunata huñulla tarichiwaqninchikqa. Pablom qellqarqa: “Cheqaptapuniyá kuyanakuychikqa [agápe] [. . .]. Wawqe-panintin hinayá lliwchaykichik sumaqllataña kuyanakuychik”, nispa (Rom. 12:9, 10). Arí, cristianokunaqa ‘cheqaptapunim kuyanakunchik’. Manam qonqayllamantachu kuyanakunchik, aswanqa Bibliapa nisqanman hinam. Kay textopiqa Pablom servichikun filadefía (“wawqe-panintin” kuyanakuychik) hinaspa filóstorgos (“sumaqllataña kuyanakuychik”) rimaytapas. Yachaysapa runapa nisqanman hinaqa wawqe-panintin kuyanakuyqa: “sumaq sonqo kaspa, llakipayaspa hinaspa yanapayta munaspa kuyaymi”. Kayna kuyakuy agápe kuyakuywan hukllawakuptinqa, Diospa serviqninkunaqa huk sonqollam kanku (1 Tes. 4:9, 10). Filóstorgos nisqa rimayqa huk kutillatam rikurirqa qallariypi Diospa Palabran qellqakusqanpiqa, familiapi kuyanakuymanta rimaspan.

Cristianokunataqa huñullatam tarichiwanchik, ayllunchikta hinaspa amistadninchikta kuyasqanchik chaynataq Bibliapa nisqanman hina kuyasqanchikpas. Jehová Diospa llaqtanpi congregacionkunaqa manam runakunawan reqsinakunapaqchu, aswanqa Diosta huñulla servinapaqmi. Iñiqmasinchiktaqa qayanchik turi-ñañay hinaspa wawqe-paniy nispam, ayllunchik hina kasqankurayku. Chaymantapas, paykunaqa amistadninchikkunam chaymi kallpanchakunchik Bibliapa nisqanman hina qawananchikpaq. Hinallayá kuyakuq kanapaq kallpanchakusun, chaynapim congregacionqa huñulla tarikunqa (Juan 13:35).

[Willakuy]

[12 kaq paginapi suti rikuylla kaq willakuy]

Congregacion huñulla kananpaq, ¿imaynatam kallpanchakunki kuyakuq kanaykipaq?