E Aru Ana Koe i te “Mataara Meitaki Maata Rava” o te Aroa?

“KO TE Atua oki te aroa.” Te akataka maira teia au tuatua a te apotetoro ko Ioane i to te Atua tu maata rava atu. (1 Ioa. 4:8) Na te aroa o te Atua no te tangata i rauka ai ia tatou kia akavaitata atu kiaia e kia rauka tetai pirianga mou no tatou kiaia. I roto i teea mataara ke atu i akatuke ei to te Atua aroa ia tatou? I karangaia ana e: “E riro ana te au mea ta tatou e inangaro ra ei akatuke i to tatou tu.” E tika rava te reira. Inara, e tika katoa e ka akatukeia tatou e te aronga e inangaro ra tatou pera katoa te aronga e inangaro maira ia tatou. No te mea kua angaia tatou i roto i to te Atua tu, ka rauka ia tatou i te akaata i to te Atua aroa i roto i to tatou oraanga. (Gene. 1:27) No reira te apotetoro a Ioane i tata ai e te aroa ra tatou i te Atua “no te mea koia tei aroa mua mai ia tatou.”​—1 Ioa. 4:19.

E A Kupu e Akataka Maira i te Aroa

Kua kapiki te apotetoro ko Paulo i te aroa e ko “te mataara meitaki maata rava.” (1 Kori. 12:31) Eaa aia i akataka mai ei i te aroa i roto i teia tu? Eaa te tu aroa ta Paulo e taiku ra? E kite ei tatou i te reira, ka akara meitaki ana tatou i teia kupu, ko te “aroa.”

E a, a te Ereni i taito au kupu tumu, e taangaanga ana i roto i te au turanga tukeke, i te akataka mai i te aroa koia oki e: stor·geʹ, eʹros, phi·liʹa, e te a·gaʹpe. I teia au kupu e a, ko te a·gaʹpe te kupu e taangaangaia ana i te akataka mai e ko “te Atua te aroa.” * No runga i teia aroa, kua karanga te Poropeta a William Barclay i roto i tana puka New Testament Words e: “Ko te agapē, no runga te reira i te manako: kare te reira i te manako ngakau e tupu ua mai ana i roto i to tatou ngakau; e kaveinga ra te reira ta tatou e taangaanga ra ma te akakoro tikai i roto i to tatou oraanga. Ko te agapē, no runga tikai te reira i te anoano.” I roto i teia tataanga, ko te a·gaʹpe e aroa te reira tei akatereia me kore tei aratakiia e tetai kaveinga,inara e kapiti ua mai ana te reira i te manako ngakau oonu. No te mea e te vai ra te kaveinga meitaki e te kaveinga kino, te taka ua ra e e mea tau kia riro te au Kerititiano na te au kaveinga meitaki e arataki, ko tei akanooia i roto i te Pipiria, e te Atua uaorai ko Iehova. Me akaaite tatou i te au akatakaanga Pipiria no te a·gaʹpe ki tetai atu au tuatua e taangaangaia ra i roto i te Pipiria i te akataka i te aroa, ka marama meitaki atu tatou i te aroa ka tau tatou kia akaari mai.

Aroa i Roto i te Pamiri

Mei teaa atura te mataora kia riro ei tuanga no tetai pamiri piri vaitata e te pumaana! Ko te kupu Ereni stor·geʹ te taangaanga putuputuia ana no te aroa natura e vai ra i rotopu i te au mema o te pamiri  okotai. E tauta ana te au Kerititiano i te akaari i te aroa ki te au mema o to ratou pamiri. Kua totou a Paulo e i te tuatau openga, “kare e aroa natura” o te manganui anga o te tangata. *​—2 Timo. 3:​1, 3, NW.

I roto i teianei ao te ngere ra te aroa natura i rotopu i te au mema o te pamiri i teia tuatau. Eaa te au vaine nui e manganui e tiritiri ei i ta ratou au pepe? Eaa te tumu i te au pamiri e manganui i manako kore atu ei i to ratou metua ruaine? Eaa te akaruke anga i te akaipoipo i viviki ua atu ei i te maata? Ko te pauanga tika tikai koia oki, ko te Ngere i te aroa natura.

Pera katoa, te apii maira te Pipiria e “E pikikaa maata to te ngakau i te au mea katoa nei.” (Iere. 17:9) Te kapiti maira te inangaro pamiri i to tatou ngakau e to tatou manako. Ko te mea umere ra, kua taangaanga a Paulo i te kupu a·gaʹpe ei akataka mai i te inangaro ka tau te tane kia akaari ki tana vaine. Kua akaite a Paulo i taua inangaro ra ki te inangaro ta te Karaiti e akaari maira no te putuputuanga. (Ephe. 5:​28, 29) Kua akatumuia teia inangaro ki runga i te au kaveinga tei orongaia mai e Iehova, ko Tei Akamata i te akanoonooanga o te pamiri.

Ka riro te aroa no te au mema pamiri i te akakeu ia tatou kia manako atu i to tatou au metua ruaine me kore ka akakeuia tatou kia rave i te apainga no ta tatou au tamariki. Ka akakeu katoaia te au metua kia apii meitaki i ta ratou au tamariki ma te tau tikai, e ka paruru i te au metua kia kore e akaari i te tu aroa kare e tumuanga tau, te taopenga putuputu ua ana ki te akatikatika ua i te tamariki.​—Ephe. 6:​1-4.

Aroa Akainangaro e te Au Kaveinga Pipiria

Ko te aroa i te pae kopapa i rotopu i te tane e te vaine i roto i te akaipoipo, e apinga aroa ua te reira mei ko mai i te Atua. (Mase. 5:​15-17) Inara, te aiteanga o te kupu eʹros, e tuatua ra no runga i te aroa akainangaro, kare te reira i taangaangaia e te aronga akauruia tei tata i te Pipiria. No teaa ra? I tetai au mataiti ua akenei, kua tata The Watchtower i teia au tuatua e: “I teia tuatau te rave nei rai te ao katoa nei i taua tarevake ra mei ta te Ereni rai i taito i rave. Kua akamori ratou ia Eros ei atua, kua tupou ki mua i tona atarau e kua oronga i te au atinga kiaia. . . . Inara te akaari maira te tuatua enua e te apai ua maira taua tu akamorianga no te inangaro ainga i te turanga viivii, te kaki pangia kore i te ainga tau kore e te akaatikau koreromotu. Penei ko te tumu tera i kore ei te aronga tata Pipiria i taangaanga i tera kupu.” Kia rauka ia tatou i te kopae i te au pirianga akatumu uaia ki runga i te akaraanga manea ua, ko te manako akainangaro ka anoanoia kia akaaereia me kore kia akatereia e te au kaveinga Pipiria. No reira e ui kia koe uaorai e, ‘Te parani ra ainei toku manako akainangaro ki te inangaro tika tikai no toku tokorua?’

 I te tuatau e mapu ra, e pakari ana te inangaro no te ainga, ko te au mapu e akono marie ra i te au kaveinga Pipiria ka vai viivii kore ua ratou. (1 Kori. 7:36; Kolo. 3:5) Te manako atura tatou i te akaipoipo ei apinga aroa tapu no ko mai ia Iehova. Kua tuatua a Iesu no runga i te aronga akaipoipo e: “E ta te Atua i topiri ra, auraka te tangata e akataka ke atu.” (Mata. 19:6) Kare e noo kapiti ana no te inangaro ia raua uaorai, e akariro ana tatou i te akaipoipo ei koreromotu puapinga tikai. Me tupu mai te manamanata i roto i te akaipoipo, kare tatou e akara ki te mataara ngoie ua i te akakore i te reira, inara ka tauta pakari tatou i te akaari i te au tu o te Atua i te akariro i to tatou oraanga pamiri kia mataora. Ka apai mai taua au tautaanga ra i te mataora mutu kore.​—Ephe. 5:33; Ebe. 13:4.

Aroa i Rotopu i te Au Oa

Ka maromaroa te oraanga me kare e au oa! Kua karanga tetai materi Pipiria e: “Te vai nei ra te oa e piri meitaki tona i to te taeake.” (Mase. 18:24) Te inangaro ra a Iehova kia rauka ia tatou te au oa mou tikai. Ko te pirianga oa mou tikai i rotopu ia Davida raua ko Ionatana e mea kitea pu uaia te reira. (1 Samu. 18:1) E kua karanga te Pipiria e e “pipi akaperepere” te apotetoro a Ioane na Iesu. (Ioa. 20:2) Ko te kupu Ereni no te “aroa akaperepere” me kore no te “pirianga oa” e phi·liʹa. Kare e tarevake kia piri ki tetai oa mou tikai i roto i te putuputuanga. Inara, i roto ia 2 Petero 1:7, te akamaroiroiia maira tatou kia kapiti atu i te aroa (a·gaʹpe) ki to tatou “aroa taeake” (phi·la·del·phiʹa, e maata te au tuanga o teia kupu no te phiʹlos, te kupu Ereni no te “oa,” e te a·del·phosʹ, te kupu Ereni no te “taeake.”) Kia rauka ia tatou te au pirianga oa mou, ka anoanoia tatou kia taangaanga i teia ako. Ka tau tatou kia ui kia tatou uaorai e, ‘Te parani ra ainei toku manako no te pirianga oa ki te au kaveinga Pipiria?’

Ka tauturu te Tuatua a te Atua ia tatou kia kopae i te tu papakitai i ta tatou akono atu anga i to tatou au oa. Kare tatou e taangaanga ana e rua tu: ko te tu akatikatika ua no to tatou au oa e te tu tuke ake rai e te pakari no te au tangata kare i te au oa no tatou. Pera katoa, kare tatou e taangaanga i te au tuatua akareka kia rauka to tatou au oa. Ko tei puapinga rava atu, na te taangaanga anga i te au kaveinga Pipiria e oronga mai kia tatou i te kite ka anoanoia kia akamanako meitaki i te iki anga i te au oa e kia kopae i “te kapiti anga kikino.”​—1 Kori. 15:33.

E Tatua Aite Koreia o te Aroa!

Ko te tatua e taokotai ra i te au Kerititiano e mea aite koreia tikai! Kua tata te apotetoro ko Paulo e: “Kia riro to kotou aroa ei mea pikikaa kore. . . . Ma te aroa taeake ra e aroa takinga meitaki atu i tetai e tetai.” (Roma 12:​9, 10, NW) E tika rai, e mataora ana te au Kerititiano i te ‘aroa (a·gaʹpe) ma te pikikaa kore.’ Kare teia aroa i kotinga uaia ki te manako ngakau tupu pu ua mai i roto i to tatou ngakau. Mari ra, kua oonu te aka ki roto i te au kaveinga Pipiria. Tetai, kua tuatua katoa a Paulo no te “aroa taeake” (phi·la·del·phiʹa) e te “aroa takinga meitaki” (phi·loʹstor·gos, e maata te au tuanga o teia kupu no te phiʹlos e te stor·geʹ). Kia tau ki ta tetai tangata apii, ko te “aroa taeake” e “aroa akaperepere, te akaari ra i te takinga meitaki, te tu tangi e te oronga i te tauturu.” Kapiti atu ki te a·gaʹpe, te turuturu ra te reira i te pirianga taeake vaitata i rotopu i te aronga e akamori ra ia Iehova. (1 Tesa. 4:​9, 10) Ko tetai atu tuatua, tei uriia e “aroa takinga meitaki,” ka kitea uaia okotai taime i roto i te Pipiria e te taiku ra i tetai tu pirianga tumanava pumaana, mei to roto rai i tetai pamiri. *

Ko te tatua e taokotai ra i te au Kerititiano mou ravarai e taokotaianga te reira no te inangaro e te aroa takinga meitaki pamiri no te au oa mou tikai, ma te au pirianga katoatoa te aratakiia ra e te aroa akatumuia ki runga i te au kaveinga Pipiria. Kare te putuputuanga Kerititiano i te karapu aravei anga tangata, me kore i te akaaerenga na te tangata, inara e pamiri pirianga vaitata te taokotaiia ra i roto i te akamorianga i te Atua ko Iehova. E kapiki ana tatou i to tatou au taeake irinaki e e au taeake e te au tuaine, e te manako ra tatou ia ratou mei te reira tikai. E tuanga ratou no to tatou pamiri i te pae vaerua, e te aroa ra tatou ia ratou ei au oa, e te akono atura tatou ia ratou kia rotai ki te au kaveinga Pipiria. Ko te “mataara meitaki maata rava” ia. Kia riro ua rai tatou i te oronga atu i taua tatua aroa ra ei taokotai e ei akataka i te putuputuanga Kerititiano mou tikai.​—Ioa. 13:35.

[Au Tataanga Rikiriki i Raro]

[Tataanga i te kapi 12]

Ka akapeea koe me turuturu i te tatua o te aroa e taokotai ra ia tatou?