“Ubbaappe Keehi Aadhdhiya Ogiyaa,” Siiquwaa Kaalleetii?

“XOOSSAI siiqo.” Kiitettida Yohaannisi xaafido ha qaalati Xoossaa waanna eeshshaa qonccissoosona. (1 Yohaannisa 4:8) Nuuni Xoossaakko shiiqanaadaaninne aara mata dabbotaa medhanaadan oottiday Xoossay asaa naata siiqiyoogaa. Xoossaa siiqoy hara ayba ogiyan nuna maaddii? “Nuuni siiqiyoobay nu oonatettaa laammees” yaagiyo guussay deˈees. Hegee tuma. Gidikkonne, nuuni siiqiyo urinne nuna siiqiya uri nuna laammiyoogeekka tuma. Nuuni Xoossaa leemisuwan merettido gishshau, nu deˈuwan Xoossaa siiquwaa qonccissanau danddayoos. (Doomettaabaa 1:27) Yaatiyo gishshau, kiitettida Yohaannisi, “Xoossai koiro nuna siiqido gishshau” nuuni a siiqiyoogaa yootiis.—1 Yohaannisa 4:19.

Siiquwaa Qonccissiya Oyddu Qaalata

Kiitettida PHauloosi siiquwaa “ubbaappe keehi aadhdhiya ogiyaa” yaagiis. (1 Qoronttoosa 12:31) I siiquwaa hegaadan qonccissidoy aybissee? PHauloosi hegaadan giido siiqoy awugee? Hegaa akeekanau, “siiquwaa” giya qaalaa birshshettaa ane pilggoos.

Beni wode Giriiketi siiquwaa qonccissanau oyddu waanna qaalata dumma dumma ogiyan goˈettidosona; hegeeti istorge, eroos, filiyaanne agaappe. “Siiqo” gidida Xoossaa qonccissanau goˈettido qaalay agaappee giyaagaa. * Ha siiquwaa xeelliyaagan Profeeseriyaa Wiliyaam Barkiley, Niwu Testtament Words giya ba maxaafan: “Agaappee qofaara gayttidaba: akeekennan wozanan siyettiyaaba gidenna; hegee nuuni nu deˈuwan qoppidi kaalliyo baaso siraata. Agaappee aybippenne aaruwan koshshaara gayttidaba” yaagiis. Ha qofay bessiyoogaadan, agaappee baaso siraataa kaalliyoogan bessiyo siiqo; gidoppe attin, darotoo wozanappe siyettiyaaban qonccees. Loˈˈo woy iita baaso siraatati deˈiyo gishshau, Kiristtaaneti Xoossaa Yihooway Geeshsha Maxaafan xaafissido baaso siraataa kaallana koshshiyoogee qoncce. Geeshsha Maxaafan siiquwaa qonccissanau goˈettido hara qaalata Agaappee giyaagaa qonccissido ogiyaara geedarssiyo wode, nuuni bessana koshshiyo siiquwaa loyttidi akeekana danddayoos.

So Asaa Giddon Deˈiya Siiquwaa

Siiqettiyaanne issippetettay deˈiyo so asaa yame gidiyoogee ayba ufayssiyaabee! Isttorge giyo Giriike qaalay darotoo so asaa giddon deˈiya, meretan demmiyo siiquwaa qonccissanau goˈettiyo qaala. Kiristtaaneti bantta soo asau siiquwaa  bessanau baaxetoosona. Wurssetta gallassan daro asay ‘meretan demmiyo siiqoy baynnaagaa’ gidanaagaa PHauloosi kasetidi yootiis. *—2 Ximootiyoosa 3:1, 3, NW.

So asaa giddon deˈana koshshiya, meretan demmiyo siiqoy ha wodiyan alamiyan baynnaagee azzanttiyaaba. Daro maccaasati shahaaraa kesissiyoy aybissee? Daro so asay banttana yelida cimatuyyo qoppennay aybissee? Macho yeddiyoogeenne azinappe kiyiyoogee keehippe daridoy aybissee? Ha oyshatu zaaroy meretan demmiyo siiqoy baynnaagaa giyaagaa gidiyoogee tuma.

Hegaa bollikka, Geeshsha Maxaafay, “asa wozani ubbabaappe aadhdhi cimmiyaaba” gidiyoogaa yootees. (Ermmaasa 17:9) So asaa siiqoy nu wozanaaranne nuuyyo siyettiyaabaara gayttidaba. Gidikkonne, azinay ba macheeyyo bessana koshshiyo siiquwaa qonccissanau PHauloosi agaappe giya qaalaa goˈettiis. PHauloosi he siiquwaa Kiristtoosi gubaaˈiyau bessido siiquwaara geeddarissiis. (Efisoona 5:28, 29) Ha siiqoy so asaa deˈuwaa Doomissida, Yihooway kessido baaso siraatan baasettidaagaa.

So asaa wozanappe siiqiyoogee nuna yelida cimidaageetussi qoppanaadaaninne nu naatuura gayttidaagan nu aawatettaa polanaadan denttettees. Hegee, yelidaageeti koshshiyo wode bantta naata seeranaadankka denttettees; qassi darotoo naata yeddi bessanaadan oottiya, naatussi yooqi yooqiyo hanotaa bessennaadan teqqees.—Efisoona 6:1-4.

Naaˈˈu Mattumaa giddon Deˈiya Siiquwaanne Geeshsha Maxaafaa Baaso Siraataa

Gelidaageetinne ekkidaageeti issoy issuwau bessiyo siiqoy tumuppe Xoossa imota. (Leemiso 5:15-17) Gidoppe attin, maccaanne attumaa giddon deˈiya siiquwaa malaatiya eroos giya qaalaa ayyaanaa kaaletuwan Geeshsha Maxaafaa xaafidaageeti goˈettibookkona. Aybissi? Wochiyo Keelay amarida layttappe kase hagaadan giis: “Ha wodiyan kumetta alamee beni wode Giriiketuugaa mala balaa baliiddi deˈiyaaba milatees. Eti xoossa oottidi Eroosau goynnidosona, ayyo yarshshiyo sohuwan goynnidosonanne yarshshidosona. . . . SHin mattuma siiquwau hegaadan goynniyoogee kawushshiyaaba, moorobanne aquwaa laaliyaaba gidiyoogaa taarikee bessees. Geeshsha Maxaafaa xaafeti he qaalaa goˈettibeennay hegaassa gidennan aggenna.” Nuuni puula xallaa xeellidi issi uraa siiqiyoogaappe naagettanau, hegaa mala siiquwaa xeelliyaagan Geeshsha Maxaafaa baaso siraatan nu huuphiyaa naagana woy haarana bessees. Yaatiyo gishshau, ‘Tau siyettiya mattuma siiqoy ta laggiyaa tumuppe siiqiyoogaara moggottii?’ yaagada nena oycha.

 Mattuma siiqoy darotoo wolqqaamiyo ‘panttatettaa’ wodiyan, Geeshsha Maxaafaa baaso siraataa mintti naagiya yelagati kandduwan geeshsha gididi deˈoosona. (1 Qoronttoosa 7:36, NW; Qolasiyaasa 3:5) Nuuni aqo deˈuwaa Yihooway immido geeshsha imotadan xeelloos. Azinanne macho xeelliyaagan Yesuusi: “Xoossai issippe gattidoogaa asi shaakkoppo” yaagiis. (Maatiyoosa 19:6) Nuuni issoy issuwaara siiqettiyo wode xallan issippe deˈiyoobadan gidennan, aqo deˈuwaa wolqqaama aawatettadan xeelloos. Aqo deˈuwan metoy merettiyo wode, a laaliyo ogiyaa koyiyoogaappe so asaa deˈuwaa ufayssiyaagaa oottanau Xoossay dosiyo eeshshaa bessanau wozanappe baaxetoos. Hegaa mala baaxee deˈo layttan ubban ufayssaa demissees.—Efisoona 5:33; Ibraawe 13:4.

Laggetu Giddon Deˈiya Siiquwaa

Laggee baynnan deˈoy salettiyaaba gidees! Geeshsha Maxaafan issi leemisoy: “Ishappe aadhdhidi ammanttiya laggee de7ees” yaagees. (Leemiso 18:24) Nuussi tumu laggeti deˈanaadan Yihooway koyees. Daawitanne Yonaataana giddon deˈiya mino laggetettay keehi erettidaagaa. (1 Sameela 18:1) Yesuusi kiitettida Yohaannisa ‘siiqiyoogaa’ Geeshsha Maxaafay yootees. (Yohaannisa 20:2) “Siiquwaa” woykko “laggetettaa” giya qaalatussi goˈettiyo Giriiketto qaalay filiyaa giyaagaa. Gubaaˈiyaa giddon deˈiyaageetuura mata laggetettaa medhiyoogee bala gidenna. Gidikkokka, 2 PHeexiroosa 1:7y, nuuni “ishatettaa siiquwaa” (filaadelfiyaa, “lagge” giyaagau goˈettiyo filoos giyaanne “isha” giyaagau goˈettiyo adelfos giya Giriiketto qaalata issippe gattido qaala) bolli siiquwaa (agaappee) gujjanaadan minttettees. Nuuni duuxxenna laggetettaa medhanau, ha zoriyaa oosuwan peeshshana koshshees. ‘Laggetettaa xeelliyaagan tau siyettiyaabay Geeshsha Maxaafaa baaso siraataara moggii?’ yaagidi nuna oychana koshshees.

Nuuni laggetuura deˈiya gaytotettan asappe asa shaakkennaadan Xoossaa Qaalay maaddees. Nuuni nu laggetuura gayttidaagan shugo, qassi nu lagge gidennaageetuura gayttidaagan mino gidida naaˈˈu qommo maaraa kaallokko. Hegaa bollikka, laggetettaa medhanau giidi harata coo sabbokko. Ubbaappekka aadhidi, Geeshsha Maxaafaa baaso siraataa oosuwan peeshshiyoogee laggeta bessiyaagaadan dooranaunne ‘loˈˈo hanotettaa mooriya iita laggetettaappe’ haakkanau akeekaa immees.—1 Qoronttoosa 15:33.

Siiquwan Merettiya Dumma Issippetettaa!

Kiristtaanetu giddon deˈiya issippetettay tumuppe dumma! Kiitettida PHauloosi: “Intte siiqoi asa bessanau siiqettiyoobaa gidanau bessenna; . . . issoi issuwaara ishanttudan siiqettite” yaagidi xaafiis. (Roome 12:9, 10) Kiristtaaneti ‘siiqettiyoy (agaappe) asa bessanau’ gidennaagee tuma. Ha siiqoy nu wozanay denttettido gishsha xallau coo bessiyooba gidenna. Hegaappe, Geeshsha Maxaafaa baaso siraataa mintti kaalliyoogan bessiyoogaa. Gidikkokka, PHauloosi ha xiqisiyan, ‘ishatetta siiquwaanne’ (filaadelifiyaa) wozanappe ‘siiqettiyoogaa’ (filostorgos, filosinne istorge giya qaalata issippe gattoogaa) giya qaalatakka goˈettiis. Issi eranchay giidoogaadan, ‘ishatetta siiqoy,’ “wozanappe siiqiyoogaa, kehatettaa bessiyoogaa, qarettiyoogaanne maaddiyoogaa” malaatees. Hegaa bolli agaappee gujettiyo wode, Yihoowassi goynniyaageeti issoy issuwaara keehippe matattanaadan oottees. (1 Tasalonqqe 4:9, 10) PHauloosi goˈettido hara qaalay, (filostorgos) ‘siiqettiyoogaa’ geetettidi birshshettidaagee Giriikettuwan koyro xaafettidaagan issisaa xallan deˈees; he qaalay so asaa giddon deˈiyaagaa mala keehippe siiqettiyoogaa malaatees.

Kiristtaanetu giddon deˈiya mino issippetettay so asaa giddooninne tumu laggetu giddon deˈiya siiquwaa naaˈˈaakka gujjiyaagaa gidishin, Geeshsha Maxaafaa baaso siraatan baasettida siiqoy kaalettiyoogaa. Kiristtaane gubaaˈee coo issippetettau shiiqiyo soho woy coo dirijjite gidennan, matattiya so asaagaadan Xoossaa Yihoowayyo goynniyoogan issippetettay deˈiyoogaa. Nuuni issoy issuwaa ishanne micho giidi xeegoos; qassi eta xeelliyoykka hegaadaana. Eti nuuyyo ayyaanaaban so asa; nuuni eta laggedan siiqoosinne eta ubbatoo Geeshsha Maxaafaa baaso siraataara moggottiya ogiyan oyqqoos. Nuuni ubbay, tumu Kiristtaane gubaaˈiyaa shaakki erissiyaanne nu giddon issippetettay deˈanaadan oottiya siiquwaa ubbatoo bessiyaageeta gidoos.—Yohaannisa 13:35.

[Tohossa qofata]

[Sinttaa 18n deʼiya misiliyaa qonccissuwaa]

Nu giddon issippetettay deˈanaadan oottiya siiquwaa neeni ayba ogiyan bessay?