Ukubombela Pamo Kulalenga Ulupwa Ukukosa mu Kupepa

UKUBOMBELA pamo kulafwaikwa sana ku bafwaya ulupwa lwabo ukukosa mu kupepa. Ilyo Yehova abumbile Adamu na Efa, alefwaya ukuti balebombela pamo. Efa ali “munankwe” wa kwa Adamu uo ali no kulabombela pamo nankwe. (Ukute. 2:18) Umulume no mukashi bafwile ukulabombela pamo no kula-afwana. (Luk. Mil. 4:9-12) Pa kuti abafyashi na bana balecita ifyo Yehova abeba ukulacita, kano balebombela pamo.

Ukupepela Pamo Ngo Lupwa

Ba Barry na ba Heidi bakwata abana basano. Basanga ukuti ukulasambilila Baibolo bonse capamo ngo lupwa, kulaafwa ulupwa lwabo ukulakoselako mu kupepa. Ba Barry batile: “Mu nshita mu nshita, ndapeela abana ifya kucita pe sambililo lya lupwa ifinono finono. Limo ndabeba ukupekanya ifya kwisalandapo ukufuma mu fipande fya muli Loleni! Tulapituluka na mu fya kuyalanda ilyo twaya mu kushimikila pa kuti cila mwana aiteyanya.” Ba Heidi na bo batile: “Bonse twalilemba umutande wa fintu ifyakuma ukupepa kwesu ifyo tufwaya ukucita, kabili libili libili tulaloleshapo pali uyu mutande ilyo tulesambilila pa kuti tumone nga tulefikapo pa buyo bwesu.” Ba Barry na bena mwabo basanga ukuti ukukanatamba TV pa nshiku shimo mu cungulo kulalenga ulupwa lwabo lonse ukukwata inshita ya kubelenga ukwabula ifya kupumfyanya.

Ukulongana

Ba Mike na ba Denise bakwata abana bane. Busuma nshi ulupwa lwabo lwasangile mu kubombela pamo? Ba Mike batile: “Ku numa, nangu twapekanya bwino shani, limo twalecelwa mu kulongana, lelo ukubombela pamo kwalitwafwile ukuleka ukucelwa.” Ba Denise na bo batile: “Ilyo abana besu baali abanono, cila muntu alekwata imilimo ya kubomba. Kim umwana wesu umukashana aleipikako ifya kulya no kufitwala pa tebulo.” Michael, umwana wabo umbi atile: “Pali Cibili, pa mwesu e palebela ukulongana. E ico twalewamya umuputule twalelonganinamo, no kutantika bwino ifipuna.” Matthew, umwana wabo na umbi alundapo ukuti: “Pa bushiku bwa kulongana, batata balebwela bwangu pa ng’anda ukufuma ku ncito pa kuti batwafwe ukuipekanya bwangu pa kuya mu kulongana.” Finshi fyafumamo?

Mwaliba Ubusuma Ubwingi

Ba Mike batile: “Mu 1987, ine na Denise twatendeke ukubomba bupainiya. Pali ilya nshita ninshi abana besu batatu bacili na ifwe pa ng’anda. Babili pali aba, na bo balitendeke bupainiya, kabili bambi balibombako umulimo wa kukuula amayanda ya Bethel. Cimbi icaletela ulupwa lwesu insansa ca kutila, bonse capamo twalyafwa abantu 40 ukuipeela no kubatishiwa. Kabili inshita imo twalikwete ne shuko lya kubombako mu fya makuule mu calo cesu na mu fyalo fimbi.”

Cine cine, ulupwa nga lulebombela pamo, mulafuma ifisuma. Bushe kuti mwatontonkanyako pa fintu na fimbi umo ulupwa lwenu lwingabombela pamo? Mwilaba ukuti ukubombela pamo kukalenga ulupwa lwenu ukukosa sana mu kupepa.

[Icikope pe bula 28]

Ukupituluka mu fya kuyalanda mwi bala kulalenga tuleshimikila bwino