E Aogā le Galulue Faatasi mo le Agaʻigaʻi i Luma

E TĀUA tele ona galulue faatasi i latou e mananaʻo e tausia aʻe se aiga e alolofa ma tapuaʻi iā Ieova. Ina ua faia e Ieova le uluaʻi ulugalii, sa ia faamamafa atu iā i laʻua e manaʻomia ona galulue faatasi. Sa fesoasoani Eva i le avea o sē ua “tatau” mo Atamu. (Kene. 2:18) I le faaipoipoga, e ao ona galulue faatasi le tane ma le avā, ma ia felagolagomaʻi. (Fai. 4:9-12) E manaʻomia foʻi i mātua ma fanau ona galulue faatasi, i le faatinoina o o latou matafaioi ua tofia mai e Ieova.

Tapuaʻiga a le Aiga

E toʻalima le fanau a Barry ma Heidi. Ua la iloa e agaʻigaʻi i luma le latou aiga, pe a galulue faatasi e fai le latou suʻesuʻega faale-Tusi Paia. Ua faapea mai Barry: “Mai lea taimi i lea taimi, ou te tofia atu i le fanau ni vaega laiti e sauniuni i ai mo le suʻesuʻega a le aiga. O nisi taimi ou te fai i ai e sauni e faamatala mai ni manatu e faavae mai i mataupu o le Ala Mai! E faataʻitaʻi foʻi a matou taulimaga e fai i le talaʻiga, ma sauni uma ai e tamaiti se taulimaga e fai.” Ua faaopoopo mai Heidi: “E tofu i matou ma se lisi o sini o mea e matou te mananaʻo e ausia i le tapuaʻiga iā Ieova, ma e fai ma matou toe talanoaina i le taimi o le suʻesuʻega a le aiga, po o ā mai a matou taumafaiga e tusa ai o nei sini.” Ua iloa foʻi e lenei ulugalii, e maua le avanoa e le aiga atoa e faitau ai lomiga, pe a tapē le televise i nisi pō.

Sauniga a le Faapotopotoga

Na tausia aʻe e Mike ma Denise se fanau e toʻafā. Na faapefea ona aogā i lo latou aiga le galulue faatasi? Fai mai Mike: “O nisi taimi, e tusa lava pe fai taumafaiga e vave ona taunuu i le sauniga, ae e lē mafai, peitaʻi o lea ua mafai ona o le galulue faatasi.” Ua faapea mai Denise: “Ina ua tuputupu aʻe le fanau, e tofu lava le tamaitiiti ma lana mea e fai. E fesoasoani le ma tama teine o Kim i le kukaina o meaʻai ma seti le laulauʻai.” Na faapea mai le la tama o Michael: “O pō o Aso Lua e fai ai sauniga a le faapotopotoga i le matou fale. O lea, e matou te tapena ai le fale, faamamā le fola ma faatulaga nofoa e nonofo ai le ʻauuso.” Ua faapea mai le isi a la tama o Matthew: “E taumafai lava tamā ia vave ona manava mai i pō o sauniga, ina ia fesoasoani i a matou tapenaga mo le sauniga.” O le ā na iʻu i ai?

E Aogā Taumafaiga Uma

Ua faapea mai Mike: “I le 1987, sa amata ai ona ma galulue ma Denise o ni paeonia. I le taimi lenā, e toʻatolu le ma fanau o loo matou faatasi pea. O le toʻalua na avea foʻi ma paeonia, ae o isi na galulue i le fauina o fale mo Peteli. Ua faaopoopo mai le isi fiafiaga i lo matou aiga, ona ua mafai ona matou fesoasoani i tagata e toʻa 40, ina ia tuuina atu o latou ola iā Ieova ma papatisoina. Na matou maua foʻi le faaeaga e galulue faatasi ai o se aiga i galuega faufale, e oo lava i galuega i isi atunuu.”

O lea la, e aogā taumafaiga uma ina ia galulue faatasi o se aiga. Pe e iai nisi auala e mafai ona tou galulue faatasi ai o se aiga? E mautinoa o le a fesoasoani le galulue faatasi, ina ia atili ai ona agaʻigaʻi i luma faaleagaga lou aiga.

[Ata i le itulau 28]

E aogā le faataʻitaʻi o taulimaga ina ia agaʻigaʻi ai i luma i le faiva