Akasabi ed Nisulinek Iran Pasen so Bini na Katuaan

SAY Republika na Tuva diad Russia et walad bandad abalaten na Siberia, tan abay a mismo na Mongolia. Maslak a taga Tuva et manaayam ed nisulinek iran pasen a mairap a nasabi mensahe na Panarian. Anggaman ontan, diad agano ni labat, walay grupon nanlapud sarayan nisulinek a pasen a linma’d Kyzyl, say kapital na Tuva, pian mi-seminar. Akabatan itan na sakey a payunir ed Kyzyl a si Maria, tan naisip ton pankanawnawa to la iya pian ninabang so maong a balita ed sikara.

Insalaysay nen Maria so agawa: “Inyeskedyul na eskuelaan a panbabangatan ko so sakey a seminar no panon a natalonaan so lingon panangusar ed saray substansia [singa say alkohol tan druga]. Walay onatendin manga 50 manlapud nisulinek iran pasen na Tuva. Diad satan a grupo et walaray mamaestra, sikolohista, saray nanlapud ahensian manbabantay ed pankaabigay ugugaw, tan arum nira.” Parad si Maria, sayan seminar et maabig a pankanawnawa pian makapanpulong balet ta ag-iya mainomay. Inkuan to: “Diad tua, mabaing ak tan mairap koy manpulong ya impormal. Balet impikasik ed si Jehova ya ikdan to ak na pakpel pian nadaeg koy takot ko tan makapantasi ak.” Kasin agawaan to itan?

Oniay intuloy nen Maria: “Akaromog ak na Awake! a nipaakar ed phobia. Say kuan ko’d sarilik et ‘Anganko nagustoan iya na sakey a sikolohista.’ Kanian inawit ko itan ed eskuelaan. Diad satan ya agew, linma’d opisinak so sakey a maestran misi-seminar. Inyopresik imay magasin tan maliket ton inawat itan. Diad tua, inkuan ton sikaton mismo et walay phobia to. Diad sinmublay ya agew, inyawitan koy libron Questions Young People Ask​—Answers That Work, Tomo 1. Maliket to met ya inawat itan. Lapud ontan so reaksion to, inisip kon paninteresan met seguro na arum a mamaestra iyan libro. Kanian angawit ak ed eskuelaan na sakey kahon a Young People Ask.” Et naupot itan a tampol. Oniay nanonotan nen Maria: “Linma’d opisinak so pigaran kamaestraan na samay naopresian koy Young People Ask, tan intepet da no iner so pakalaan na saramay libro.” Apugpugta ray aanapen da!

Say unor ya agew na seminar et Sabado. Anggapoy loob nen Maria ed satan, kanian sikatoy angiyan na literatura diad pigaran lamisaan ed opisina to. Insan oniay intilak ton mensahe: “Pinablin Iran Titser! Mangala kayo labat dia na babasaen tan nayari yo met ya iyalaay kakaaro yo. Makatulong irayan alay abig a publikasyon ed trabaho tan ed ibiskeg na pamilya.” Antoy resulta ey? “Sanen linma ak ed opisina ed saman ya agew, dakdakel lay abawas ed saramay literatura. Kanian angala ak lamet a tampol na saray libro tan magasin.” Diad ami-amin et akapangipalimay Maria na 380 magasin, 173 libro, tan 34 brosyur legan na satan a seminar. Sanen sinmempet la irayan aki-seminar diad nisulinek iran lugar a panaayaman tan pantratrabahoan da, nisempet da met irayan literatura. Inkuan nen Maria,“Malikeliket ak ta say bini na katuaan et akasabi la natan ed nisulinek iran pasen na Tuva!”​—Ecl. 11:6.

[Mapa ed pahina 32]

(Parad aktual a format, nengnengen so publikasyon)

RUSSIA

REPUBLIKA NA TUVA