Mbuto Zyakasimpe Zyasika Kumasena Aali Kulamfwu

CISI ca Tuva ku Russia cili kumusanza kwini kwacooko ca Siberia kakuli kumusanza alimwi akujwe kuli cooko ca Mongolia. Bantu banji mucisi ca Tuva bakkala muzilawo zikatazya kubasikila amulumbe wa Bwami. Nokuba boobo, myaka yamusyule oomu, kabunga kabantu bamwi kakeenda kuzwa mumasena aali kulamfwu mucisi ca Tuva kwiinka kudolopo pati lya Kyzyl, kutegwa bakajanike kumuswaangano umwi. Mupainiya umwi wazyina lya Maria uukkala mudolopo lya Kyzyl, wakamvwa kuti bantu aaba basika, aboobo wakayeeya kuti eeci cilamupa ciindi cibotu cakubakambaukila bantu aaba balo balangilwa kuti tabakambaukilwi-kambaukilwi makani mabotu.

Maria upandulula cakacitika kati: “Kucikolo nkondiyiisya bakabamba muswaangano wakali kujatikizya kumana penzi lyakuciindizya kunywa bukoko alimwi akubelesya misamu iikola. Bantu babalilwa ku 50 ibazwa mumasena aali kulamfwu mucisi ca Tuva bakeelede kujanika. Kabunga aaka kakali kubikkilizya bamayi, basyaabupampu balanganya mizeezo yabantu, ibalanga-langa mbobapona bana, alimwi abamwi buyo.” Ooyu muswaangano wakapa Maria ciindi cibotu cakukambauka, nokuba boobo eeci cakali kuyooba cintu cimukatazya. Waamba kuti: “Ndilaansoni, alimwi kulandikatazya kukambauka kwamukwiizya. Nokuba boobo, ndakapaila kuli Jehova kuti andipe busicamba kutegwa ndibakambaukile bantu aaba.” Sena wakazwidilila?

Maria uyungizya kuti: “Ndakajana magazini ya Sinsimuka! yalo iibandika kaambo kajatikizya buyoofwu. Ndakayeeya kuti, ‘Syaabupampu uulanganya mizeezo yabantu inga wayanda kwiibala magazini eeyi,’ aboobo ndakaitolelezya kucikolo. Mubuzuba oobu, umwi mwiiyi mukaintu iwakaboolede kumuswaangano ooyu wakanjila muofesi yangu, eelyo ndakamupa magazini eeyi. Wakaitambula. Alimwi wakaamba kuti wakali muyoofwu. Buzuba bwakatobela, ndakamuletela bbuku lyakuti Achichepere Akufunsa—Mayankho Amene Amathandiza, Bbuku 1. Alyalo bbuku eeli wakalitambula. Mbokunga wakali kwaangulukide kutambula bbuku eeli, ndakayeeya kuti bamayi bambi abalo inga baliyanda bbuku eeli. Aboobo ndakabweza cibbokesi cijisi mabbuku aakuti Achichepere Akufunsa alimwi amabbuku amwi kutola kucikolo.” Mukaindi buyo kasyoonto, mabbuku akamana. Mboobu Maria mbwapandulula cakacitika: “Ibeenzinyina amwiiyi ngondakapa bbuku lyakuti Achichepere Akufunsa bakaboola muofesi yangu akundibuzya kuti: ‘Ino nguni upa mabbuku?’” Eelyo kaka bakasika kubusena bweelede!

Mu Mujibelo bwakali mbobuzuba bwamamanino bwamuswaangano ooyu. Bwakali mbobuzuba Maria mbwaakali kulyookezya, aboobo wakabikka mabbuku manji amatebulu aakali muofesi yakwe. Abboodi wakalemba kuti: “Nomuyandwa Bamayi! Mulakonzya kubweza mabbuku ngomuyanda akubwezyela balongwe banu. Mabbuku mabotu aaya ayoomugwasya kuubeleka kabotu mulimo wanu alimwi ayooyumya-yumya mikwasyi yanu.” Ino ncinzi cakacitika? Maria waamba kuti: “Nondakaunka kuofesi mubuzuba oobu ndakajana kuti mabbuku manji abwezegwa. Cakufwambaana ndakatola mabbuku alimwi amamagazini aambi mapya.” Kusikila ciindi nowakamana muswaangano ooyu, Maria wakaabila mamagazini aali 380, mabbuku aali 173 alimwi amabroshuwa aali 34. Ciindi aabo bakajanika kumuswaangano nobakapiluka muzyooko mobakkala alimwi amobabelekela, mabbuku ngobakabweza bakaatolelezya. Maria waamba kuti: “Eelyo kaka ndilikkomene kapati kuti lino mbuto zyakasimpe zyasika kumasena aali kulamfwu mucisi ca Tuva!”—Muk. 11:6.

Maapu iili apeeji 32]

(Kutegwa mubone bwini mbwaakkede mabala, amubone bbuku lini)

RUSSIA

CISI CA TUVA